တောင်တရုတ်ပင်လယ်ထဲက တရုတ်ပိုင်တယ်လို့ ပြောထားတဲ့ ကျွန်းတွေအနား ဗြိတိန်စစ်သင်္ဘော ပြီးခဲ့တဲ့လနှောင်းပိုင်းတုန်းက ဖြတ်သန်းခုတ်မောင်းခဲ့တာဟာ ရန်စတဲ့လုပ်ရပ် ဖြစ်တယ်လို့ တရုတ်နိုင်ငံက ပြောကြားလိုက်ပါတယ်။ ဒီအတွက် ပြင်းပြင်းထန်ထန် ကန့်ကွက်သွားမယ်လို့ တရုတ်နိုင်ငံခြားရေးဝန်ကြီးဌာနက စက်တင်ဘာ ၆ ရက်မှာ ပြောပါတယ်။ ပါရာဆယ်ကျွန်းစုတွေနား ဖြတ်သန်းသွားခဲ့တဲ့ သင်္ဘောဟာ တန် ၂၂၀၀၀ ရှိတဲ့ HMS အယ်လ်ဘီယွန် စစ်သင်္ဘောဖြစ်ပြီး မရိမ်းတပ်သားတွေကို တင်ထားတဲ့ အဲဒီသင်္ဘောဟာ လွတ်လပ်စွာ ရေကြောင်းသွားလာခွင့်ကို ကျင့်သုံးခဲ့တာလို့ သတင်းရင်းမြစ်တွေကို ကိုးကားပြီး ရိုက်တာသတင်းမှာ ဖော်ပြပါတယ်။ အဲဒီအချိန်တုန်းက စစ်သင်္ဘောဟာ ဟိုချီမင်းမြို့မှာ ကမ်းကပ်ဖို့ ဂျပန်ကနေ ခုတ်မောင်းလာချိန် ဖြစ်တယ်လို့လည်း သတင်းက ဆိုပါတယ်။

အင်္ဂလိပ်ရေလက်ကြားကို ဇန်နဝါရီ ၈ ရက်နေ့က ဖြတ်သန်း ခုတ်မောင်းသွားတဲ့ ရုရှားရေယာဉ်တွေကို ဗြိတိန်ရေတပ် ဖရီးဂိတ်စစ်သင်္ဘောတစီးက လိုက်စောင့်ကြည့်ခဲ့တယ်လို့ ဗြိတိန်ကာကွယ်ရေးဝန်ကြီးဌာနက ပြောပါတယ်။ ဗြိတိန်ရေပြင်ပိုင်နက်အတွင်း ရုရှားရေတပ်ရဲ့ လှုပ်ရှားမှုတွေကို အခုနှစ်အတွက် ပထမဦးဆုံးအကြိမ် တွေ့မြင်ရတာပဲလို့လည်း ဗြိတိန်ကာကွယ်ရေးဝန်ကြီးဌာနက ပြောပါတယ်။ ဗြိတိန်တော်ဝင်ရေတပ်က HMS Westminster ဝက်စ်မင်စတာ ဖရီးဂိတ်စစ်သင်္ဘောဟာ ပြီးခဲ့တဲ့ စနေ၊ တနင်္ဂနွေက ဗြိတိန်ရေပြင်ပိုင်နက် အနားကနေ ဖြတ်သန်းသွားတဲ့ ရုရှားစစ်သင်္ဘော လေးစီးကို လိုက်လံစောင့်ကြည့်ခဲ့တာပါ။ ရုရှားသင်္ဘောတွေဟာ အရှေ့အလယ်ပိုင်း စစ်ဆင်ရေးကနေ ပြန်လာတာဖြစ်နိုင်တယ်လို့လည်း ယူဆထားပါတယ်။ ရုရှားစစ်သင်္ဘောလေးစီးမှာ ဖရီးဂိတ်စစ်သင်္ဘောနှစ်စီးနဲ့ အခြံအရံ စစ်သင်္ဘော နှစ်စီးတို့ ပါပါတယ်။ ဗြိတိန်ရေပြင်ပိုင်နက်ကနေ မြောက်ဘက်ကို ဦးတည်သွားတဲ့အထိ ဗြိတိန် ဖရီးဂိတ်စစ်သင်္ဘောက စောင့်ကြည့်သွားမယ်လို့ သိရပါတယ်။ ရုရှားရေတပ်ရဲ့ အခုလို လှုပ်ရှားမှုတွေကို လတ်တလော သီတင်းပတ်အတွင်း ခဏခဏ တွေ့လာရတယ်လို့လည်း ဗြိတိန်ဘက်က မှတ်ချက်ပေးခဲ့ပါတယ်။