သြစတြေးလျအမျိုးသား ဖမ်းဆီးခံရ

December 6, 2017

အိန္ဒိယဇနီးနှင့်သမီးငယ်ကို လူကုန်ကူးခဲ့သည့် သြစတြေးလျအမျိုးသား ဖမ်းဆီးခံရ

အိန္ဒိယနိုင်ငံသူ ဇနီးနဲ့ ၂ လအရွယ် သမီးဖြစ်သူကို ခြိမ်းခြောက်အကျပ်ကိုင်ပြီး နေရပ်ပြန်ပို့ခဲ့တဲ့ သြစတြေးလျနိုင်ငံသားတဦးဟာ လူကုန်ကူးမှုနဲ့ ဖမ်းဆီးတရားစွဲဆို ခံနေရတယ်လို့ ဘီဘီစီသတင်းမှာ ဒီဇင်ဘာလ ၅ ရက်နေ့က ဖော်ပြပါတယ်။ အသက် ၂၇ နှစ်အရွယ် အဆိုပါအမျိုးသားကို ဆစ်ဒနီတရားရုံးက လူကုန်ကူးမှုနဲ့ ဗီဇာစာရွက်စာတမ်းအတု ပြုလုပ်မှုတွေအပါအ၀င် စွဲချက် ၃ ခုနဲ့ တရားစွဲဆိုထားခဲ့တာပါ။ သူဟာ ဇနီးနဲ့ သမီးဖြစ်သူကို နေရင်းနိုင်ငံဖြစ်တဲ့ အိန္ဒိယကို အလိုမတူပဲ ပြန်ပို့ခဲ့ပြီးနောက်မှာ သူတို့သားအမိရဲ့ သြစတြေးလျနိုင်ငံသားဗီဇာကို ဖျက်သိမ်းပစ်လိုက်ဖို့ ကြိုးစားခဲ့တာပါ။ ဒါပေမယ့် မအောင်မြင်ခဲ့ပဲ ဇနီးဖြစ်သူက သြစတြေးလျအခြေစိုက် လူကျွန်ဆန့်ကျင်ရေး အဖွဲ့အစည်းတခုမှတဆင့် တိုင်ကြားခဲ့ရာမှ ခုလို ဆက်စပ်နိုင်ခဲ့တာ ဖြစ်ပါတယ်။ “အဲဒီအမျိုးသမီးနဲ့ ကလေးကို တွေ့လိုက်ရချိန်မှာ ဒါဟာ တော်တော့်ကို စိတ်မသက်မသာ ဖြစ်ရတာပါပဲ”လို့ သြစတြေးလျဗဟိုရဲဌာနမှ တာဝန်ရှိသူ ဒန်အက်ဗန်စ်က ပြောပါတယ်။ လက်ရှိမှာတော့ တရားခံအမျိုးသားကို စုံစမ်းစစ်ဆေးမှုတွေ ဆက်လက်လုပ်ဆောင်သွားမှာဖြစ်ပြီး အခုလကုန်ခါနီးမှာ တရားရုံးမှာ ဆက်လက်စစ်ချက် ရယူသွားမယ်လို့ ဆိုပါတယ်။
3 years Ago
Up