ကြည်ရွာ

May 30, 2019

မေ ၃၀ အောက်မေ့ဖွယ်အခမ်းအနား ကြည်ရွာတွင် ပြုလုပ်

မေ ၃၀ ဒီပဲယင်း အရေးအခင်း ၁၆ နှစ်မြောက်အောက်မေ့ဖွယ် အခမ်းအနားကို ဒီပဲယင်းမြို့နယ်၊ ကြည်ရွာမှာ ပြုလုပ်ခဲ့ပါတယ်။ ဒီအောက်မေ့ဖွယ်အခမ်းအနားကို တိုင်းဒေသကြီးအစိုးရအဖွဲ့ကိုယ်စား စည်ပင်သာယာရေးဝန်ကြီး ဦးမြင့်ကြည်နဲ့ အန်အယ်လ်ဒီဗဟိုပြန်ကြားရေးအဖွဲ့မှ မုံရွာအောင်ရှင်၊ စစ်ကိုင်းတိုင်းဝန်ကြီးချုပ်ဇနီး၊ လွှတ်တော်ကိုယ်စားလှယ်တွေ၊ ပါတီတာဝန်ရှိသူတွေ၊ ပါတီဝင်တွေ၊ အရေးအခင်းမှာ ကိုယ်တိုင်ကြုံတွေ့ခဲ့သူတွေ၊ ပြည်သူတွေ တက်ရောက်ခဲ့ကြပါတယ်။ ရွာထိပ်မှာ သေဆုံးသူတွေအတွက် လွမ်းသူ့ပန်းခွေချတာ၊ ပင့်ဖိတ်ထားတဲ့ သံဃာတော်တွေကို သေဆုံးသူတွေအတွက် ရည်စူးပြီး ဆွမ်းကပ်အမျှဝေတာ၊ တက်ရောက်လာတဲ့ ဧည့်ပရိသတ် ထောင်ပေါင်းများစွာကို ထမင်းကျွေးမွေးတာတွေ ပြုလုပ်ခဲ့ပါတယ်။ “သမိုင်းဆိုတာ ခွင့်လွှတ်လို့ ရပေမယ့် မေ့လို့မရဘူး။ အာဏာရှင်စနစ်ကို မကြိုက်ဘူး၊ အာဏာရှင်စနစ်မှာ ဖြစ်ပျက်လာတဲ့ ဖြစ်ပျက်မှုက မေ့လို့မရအောင် ဖျောက်ပစ်လို့မရအောင် ဖြစ်ခဲ့တယ်ဆိုတာကို သတိရစေဖို့။ လက်စားချေဖို့မဟုတ်ဘူး။ ဒီလို အဖြစ်အပျက်တွေကို လက်မခံနိုင်ဘူးဆိုတာ သိအောင် လုပ်တာ။ ဒီပဲယင်း နိုင်ငံရေး အကြမ်းဖက် လုပ်ကြံမှုလို့ ပြောမှ ပြည့်စုံမှာ” လို့ မုံရွာအောင်ရှင်က ပြောပါတယ်။ ၂၀၀၃ ခုနှစ် မေ ၃၀ ရက်က ဒီပဲယင်းမြို့အနီး ကြည်ရွာမှာ ဒေါ်အောင်ဆန်းစုကြည်နဲ့ ဦးတင်ဦးတို့ လိုက်ပါလာတဲ့ ပါတီစည်းရုံးရေးယာဉ်တန်းကို စစ်အစိုးရလက်ပါးစေတွေက ညအမှောင်မှာ ဝင်ရောက်တိုက်ခိုက်ခဲ့တာဖြစ်ပြီး သေဆုံးဒဏ်ရာရသူ ရာနဲ့ချီရှိနိုင်တယ်လို့ ကိုယ်တွေ့ကြုံရသူတွေက ခန့်မှန်းပါတယ်။ သေဆုံးသူတွေအတွက် ပေးဆပ်ခဲ့ရတဲ့ အသက်သွေးချွေးတွေက အခုအချိန်ထိတော့ တန်တယ်လို့ ပြောမရသေးဘူးလို့ အရေးအခင်းမှာ ပါဝင်ခဲ့သူတဦးက ပြောဆိုပါတယ်။
2 years Ago

May 30, 2017

ကြည်ရွာသားတွေပြန်ပြောပြတဲ့ ဒီပဲယင်းလုပ်ကြံမှုအကြောင်း (ရုပ်သံ)

  ပါတီစည်းရုံးရေးခရီးထွက်တဲ့ အမျိုးသားဒီမိုကရေစီအဖွဲ့ချုပ်ခေါင်းဆောင် ဒေါ်အောင်ဆန်းစုကြည် နဲ့ သူရဦးတင်ဦးတို့ရဲ့ယာဉ်တန်း ဒီပဲယင်းမြို့နယ်၊ ကြည်ရွာမှာ  လူတစုရဲ့ အကြမ်းဖက်တိုက်ခိုက် ခံခဲ့ရတာဟာ ဒီကနေ့  မေ ၃၀ ရက်ဆိုရင် ၁၄ နှစ်တိတိ ရှိပြီဖြစ်ပါတယ်။ ဒီပဲယင်းအရေးအခင်းဖြစ်ပွားခဲ့တာ နှစ်တွေ ဆယ်စုနှစ်နဲ့ချီကြာလာပြီဖြစ်ပေမယ့် ခံစားခဲ့ ရသူတွေနဲ့ ဒေသခံတွေကတော့ ဒီအဖြစ်အပျက်တွေကို မမေ့နိုင်သေးဘဲ သေဆုံးသူတွေအတွက် လွမ်းသူ့ပန်းခွေချ၊ သံဃာတော်တွေကိုပင့်ဖိတ်ကာ ဒီကနေ့ ဆွမ်းကပ်အမျှဝေခဲ့ကြပါတယ်။ မြန်မာ့နိုင်ငံရဲ့ ဒီမိုကရေစီလှုပ်ရှားမှုသမိုင်းမှာ ဖျောက်ဖျက်မရတဲ့  Black Friday ခေါ် အမှောင်ဖုံးတဲ့သောကြာနေ့အကြောင်း ဒေသခံကြည်ရွာသားတွေက ပြန်ပြောင်းပြောပြ ထားပါတယ်။
4 years Ago
Up