ဖွဲ့စည်းပုံအခြေခံဥပဒေပုဒ်မ ၄၃၆ (ခ) မှာ အကျုံးဝင်တဲ့ ပြင်ဆင်တဲ့ မူကြမ်းကို ဇူလိုင် ၈ ရက်နေ့ ကျင်းပတဲ့ ပြည်ထောင်စုလွှတ်တော်မှာ မဲခွဲဆုံးဖြတ်ရာ ရှုံးနိမ့်ခဲ့ပါတယ်။
တိုင်းဒေသကြီးနဲ့ ပြည်နယ်ဝန်ကြီးချုပ်တွေကို သက်ဆိုင်ရာ တိုင်းနဲ့ပြည်နယ် လွှတ်တော်တွေက ရွေးချယ်ခန့်အပ်ရေး (ပုဒ်မ ၂၆၁)၊ သမ္မတနဲ့ ဒု-သမ္မတတွေကို လွှတ်တော်ကိုယ်စားလှယ်ထဲကနေ ရွေးချယ်ဖို့ စတဲ့ ပြင်ဆင်ရေးမူကြမ်းတွေ ရှုံးနိမ့်ခဲ့တာပါ။ ပြီးခဲ့တဲ့အပတ်က ပုဒ်မ ၄၃၆ (က) ဆွေးနွေးဆုံးဖြတ်စဉ်ကလည်း ရှုံးနိမ့်ခဲ့ပါတယ်။
ဒါနဲ့ပတ်သက်လို့ အမျိုးသားလွှတ်တော်ကိုယ်စားလှယ် ဒေါက်တာအေးမောင်ကို ဆက်သွယ်မေးမြန်းထားပါတယ်။
ပြည်နယ်ဝန်ကြီးချုပ်တွေကို သမ္မတကပဲ ခန့်မယ့်အစား သက်ဆိုင်ရာ ပြည်နယ်နဲ့ တိုင်းဒေသကြီးတွေက ကိုယ်စားလှယ်တွေကပဲ ခန့်အပ်မယ့်ပြင်ဆင်ချက် လွှတ်တော်မှာ မဲခွဲတာရှုံးသွားတာက ဘာကြောင့်ပါလဲခင်ဗျ။
“၁ အချက်က လွှတ်တော်တွင်းမှာ ရွေးကောက်ခံအမတ်က ၇၅ ရာခိုင်နှုန်းမပြည့်ဘူး။ ခန့်အပ်တဲ့အမတ်က ၂၅ ရာခိုင်နှုန်း ကျော်နေတာပေါ့။ အဲဒီတော့ တပ်မတော်ကလည်းပဲ အဲဒီပုဒ်မ ၂၆၁ ကို မပြောင်းစေချင်တဲ့သဘော ရှိတဲ့အခါမှာ ဖွဲ့စည်းပုံအခြေခံဥပဒေ အရကိုက သူတို့မပေးရင် မရဘူး၊ မပြောင်းရင် မဖြစ်ဘူးဆိုတဲ့သဘော ဖြစ်တဲ့အခါကျတော့ အဓိက ကတော့ ၁၆၆ ဦးက မပြောင်းလိုတာကြောင့်ပေါ့။”
ပြည်တွင်းငြိမ်းချမ်းရေးဖြစ်စဉ် (Peace Process) လုပ်ဆောင်နေတာတွေကလည်း လွှတ်တော်က ဘယ်လောက်ထိအောင် လိုက်လျောမလဲလို့ စောင့်ကြည့်တာတွေ ရှိတယ်ဆိုတော့ ဒီလိုမျိုး လွှတ်တော်ဆုံးဖြတ်ချက်ဟာ အပြင်မှာ တိုင်းရင်းသား လက်နက်ကိုင်တွေနဲ့ အစိုးရအကြား ငြိမ်းချမ်းရေးဆွေးနွေးပွဲတွေပေါ်မှာ သက်ရောက်မှု တစုံတရာ ရှိနိုင်လားဆရာ။
“ရှိနိုင်တယ်။ ဘာကြောင့်ဆို ခင်ဗျားတို့ သိပါတယ်။ လွှတ်တော်အစိုးရဆိုတာ Ruling Party ပဲ။ လွှတ်တော်မှာလည်း သူတို့ပဲ။ အစိုးရမှာလည်း သူတို့ပဲ။ ဒါပေမယ့် အစိုးရလုပ်တဲ့ လုပ်ငန်းတိုင်းကို လွှတ်တော်ကို အသိပေးချင်မှပေးမယ်။ အဲဒီတော့ လွှတ်တော်မှာလည်းပဲ အဆုံးအဖြတ်ပေးနိုင်မယ့် အင်အားစုက အစိုးရရဲ့အောက်မှာရှိတယ်။ ကျနော်ဆိုလိုတာက ၁၆၆ ဦးသော တပ်မတော်သားတွေဟာ အစိုးရရဲ့ ကွပ်ကဲမှုအောက်မှာရှိတယ်။ အဲဒီတော့ အန်စီအေပေါ့နော် အခု ငြိမ်းချမ်းရေးဆွေးနွေးနေတာ အားလုံးကလည်းပဲ အစိုးရဘက် တာဦးတာပေါ့။ ဒီဘက်က ဦးသိန်းဇော်က နောက်လိုက်ကျ ဖြစ်သွားတာပေါ့။ အဲဒီတော့ ပြည်တွင်းငြိမ်းချမ်းမှုဆိုတဲ့ဥစ္စာကို ကျနော်တို့ သုံးသပ်တာက နိုင်ငံရေးရည်မှန်းချက်တခုအတွက် အသုံးပြုတာ။ တနည်းအားဖြင့် ဒီအစိုးရရဲ့ နောက် ၂၀၁၆ - ၂၀၂၀ နိုင်ငံရေးသက်တမ်းတခုအတွက် ပြည်တွင်းငြိမ်းချမ်းမှုကို အသုံးချနေတယ်လို့ပဲ ကျနော်မြင်တယ်။ အဲဒါကြောင့်လည်း အခုထိ ဘာမှ အဖြေမရ၊ အဖြေမရတဲ့အပြင် ၂၆၁ တို့ဘာတို့ တိုင်းရင်းသားများ စိတ်ဝင်စားတဲ့ ပုဒ်မတွေကို အစိုးရဘက်က အများစုဖြစ်တဲ့ တပ်မတော်သားတွေပေါ်မှာ၊ ကျနော်ထင်တယ်ဗျ မပြင်လိုတဲ့ သဘောနဲ့ပဲ ညွှန်ကြားတာရှိနိုင်တယ်။ အဲဒါကြောင့် နဂိုအတိုင်းထားမယ်ဆိုတဲ့ သဘောနဲ့ ဆွေးနွေးကြတာပါ။ အဲဒီတော့ လွှတ်တော်တွင်းက ကဏ္ဍနဲ့ အစိုးရရဲ့ ကဏ္ဍတွေဟာ တလမ်းစီဖြစ်နေတာပေါ့။”
ခြောက်ပွင့်ဆိုင်ဆွေးနွေးတုန်းက လွှတ်တော်ကိုယ်စားပြု တိုင်းရင်းသားအစုအဖွဲ့ကိုယ်စား ဒေါက်တာအေးမောင်က ‘ပြည်နယ်နဲ့တိုင်း အစိုးရအဖွဲ့တွေမှာ သမ္မတက ၀န်ကြီးချုပ် ရွေးချယ်နေတာကိုရပ်ပြီး သက်ဆိုင်ရာ လွှတ်တော်ကိုယ်စားလှယ်တွေက ရွေးချယ်တင်မြှောက်ခွင့်ရရေး’ ကို အဓိကထား ကိုင်စွဲဆွေးနွေးခဲ့တယ်မဟုတ်လား။
“ဟုတ်တယ်။ အဲဒီဟာ တခုတည်းမဟုတ်ဘူး။ ကိုယ်ပိုင်အုပ်ချုပ်ခွင့်ဆိုတာကို ကိုယ်ပိုင်အုပ်ချုပ်ခွင့်၊ ကိုယ်ပိုင်ပြဋ္ဌာန်းခွင့်နဲ့ သယံဇာတခွဲဝေခွင့်၊ နောက် အခွန်အတုတ်ခွဲဝေခွင့်ကို ကာကွယ်ရေးဦးစီးချုပ်ဘက်က ပြောတယ်ဗျ။ ပြောတဲ့အခါမှာ ကျနော်တို့ဘက်ကလည်းပဲ ၂၆၁ နဲ့ပတ်သက်လို့ သေသေချာချာလည်း ရှင်းပါတယ်။ ကိုယ်ပိုင်အုပ်ချုပ်ခွင့်ကို ပေးချင်ရင် ကိုယ်တို့ပြည်နယ်၊ ကိုယ်တို့တိုင်းဒေသကြီး ပါလီမန်ကနေ များရာစု ရွေးကောက်တင်မြှောက်တဲ့ ပုဂ္ဂိုလ်ကို အုပ်ချုပ်ခွင့်ပေးဖို့လိုမယ်။ အဲဒါမျိုးပေးတဲ့အပြင် ပြည်တွင်းစစ်၊ ပြည်တွင်းပဋိပက္ခကို ငြိမ်းချမ်းစေချင်သလား၊ တပ်မတော်ရဲ့ သဘောထားကြီးမှုကိုပြပါ။ ၂၅ ရာခိုင်နှုန်းသော တပ်မတော်သားတွေ ပါဝင်မှုကို ပြည်ထောင်စုမှာထားဦး။ တိုင်းဒေသကြီး၊ ပြည်နယ်ပါလီမန်ကနေစပြီး ရုပ်သိမ်းပေးပါ။ သဘောထားကြီးမှုနဲ့ ဥပဒေပြုမှု မဏ္ဍိုင်ကစပြီးတော့ တပ်မတော်ဘက်က ပြန်လျှော့တယ်ဆိုတာလေးကိုပြပြီးမှ ပြည်တွင်းငြိမ်းချမ်းမှုကို ရယူပါ၊ သဘောထားကြီးပါလို့ ကျနော်တို့ တင်ပြတယ်။ နောက်တပတ်ကျော်တဲ့အခါ ဦးရွှေမန်းက ပြန်ပြောတာကျ ဒုတိယတကြိမ်မှာ ပုဒ်မ ၂၆၁ ကို မပြင်ဘဲနဲ့ ခုန ကာကွယ်ရေးဦးစီးချုပ်ပြောတဲ့ ကိုယ်ပိုင်အုပ်ချုပ်ခွင့်ဆိုတာ မဖြစ်ဘူး၊ အဲဒါကြောင့် ၂၆၁ ကို ပြင်မှဖြစ်မယ်ဆိုတာ ဦးရွှေမန်း သေသေချာချာရှင်းပြတယ် ခြောက်ပွင့်ဆိုင်မှာ။”
(မှတ်ချက်။ ။ ဖွဲ့စည်းပုံအခြေခံဥပဒေ ပုဒ်မ ၂၆၁ အရ သက်ဆိုင်ရာ တိုင်းဒေသကြီးနဲ့ ပြည်နယ်လွှတ်တော်တွေက လွှတ်တော်ကိုယ်စားလှယ် တဦးစီကို သမ္မတက ရွေးချယ်၊ အဲဒီပုဂ္ဂိုလ်တွေကို သက်ဆိုင်ရာ လွှတ်တေ်ာတွေထံ အမည်စာရင်းပေးပို့ အတည်ပြုချက် တောင်းခံပြီး ၀န်ကြီးချုပ်တွေ ခန့်အပ်တာဖြစ်ပါတယ်။ အမည်စာရင်းပေးပို့သူမှာ သတ်မှတ်အရည်အချင်းပြည့်မီရင် လွှတ်တော်တွေအနေနဲ့ ငြင်းပယ်ခွင့်မရှိစေရဘူးလို့ ပါရှိပါတယ်။)
ပြည်နယ်နဲ့တိုင်းဒေသကြီးအစိုးရအဖွဲ့တွေရဲ့ ၀န်ကြီးချုပ်တွေကို သမ္မတက မခန့်ဘဲ အမတ်တွေက ရွေးချယ်ခန့်ထားရေးဟာ တိုင်းရင်းသားအင်အားစုအသီးသီးအတွက် ဘယ်လောက်ထိအောင် သူတို့အတွက် အရေးကြီးသလဲ။ ပိုမိုသိအောင် ရှင်းပြပါ။
“ခင်ဗျား ဒါဆိုရင် ပင်လုံက စရမှာပေါ့။ ပင်လုံမတိုင်ခင် မျိုးနွယ်စုကြီးတွေဟာ သီးသန့်ဗျ ပွင့်ပွင့်လင်းလင်းပြောရင်။ ရခိုင်ကတော့ ဗမာဘုရင်ရဲ့ကျွန်ဖြစ်တာကိုးဗျနော်။ အုပ်ချုပ်အသိမ်းသွင်းခံခဲ့ကြရတာကိုး နှစ် ၄၀ လောက်လေ။ မွန်လည်း ဒီအတိုင်းဖြစ်မှာပေါ့။ ဒါပေမယ့် ရှမ်းတို့၊ ချင်းတို့ ကျန်တဲ့ ကယားတို့ဟာ သီးသန့် အချုပ်အခြာအာဏာနဲ့ရှိကြတယ်ဗျ။ ဗမာဘုရင်မသိမ်းခင် ရခိုင်လည်း ကိုယ့်အချုပ်အခြာနဲ့ရှိတာကိုး။ အဲဒီတော့ အင်္ဂလိပ်သိမ်းတဲ့အခါ အင်္ဂလိပ်က သူတို့ရဲ့အချုပ်အခြာအလိုက်ကို သိမ်းသွားတဲ့ ကိုလိုနီဖြစ်သွားတာပေါ့နော်။ အဲဒီတော့ မြန်မာနိုင်ငံ လွတ်လပ်ရေးယူတဲ့အခါမှာ မိမိတို့ရဲ့ အချုပ်အခြာအာဏာအရ လွတ်လပ်တဲ့ နိုင်ငံတွေအဖြစ်သို့ တည်ရှိနေချင်ကြတာပေါ့နော်။
"ဒါပေမယ့်လို့ ဗိုလ်ချုပ်အောင်ဆန်းရဲ့ စည်းရုံးမှုကြောင့် ပင်လုံစာချုပ်ကို ချုပ်တဲ့အခါမှာ ပွင့်ပွင့်လင်းလင်းပြော ရင် ပြည်ထောင်တွေ ပေါင်းထားတာဗျ။ အချုပ်အခြာအာဏာတွေ ရှိကြတဲ့ ပြည်ထောင်တွေ ပေါင်းပြီးမှ စုပြီးမှ ပြည်ထောင်စုမယ်ဆိုတဲ့သဘောနဲ့ ဆောင်ရွက်တဲ့ ခုနက ၄၇ ပင်လုံစာချုပ်ကြီးကို မျက်ကွယ်ပြုခဲ့ကြတာပေါ့။ အဲဒီနောက် ၄၇ ဖွဲ့စည်းပုံတို့ ဘာတို့မှာ နည်းနည်းလေး အခန်း ၁၀ မှာ Decision ပါလာတာပဲလေ။ အဲဒီတော့ ပြန်ကြည့်ရင် ကျနော်တို့တိုင်းရင်းသားတွေရဲ့ အန္တိမရည်မှန်းချက်က ကိုယ်ပိုင်အုပ်ချုပ်ခွင့်နဲ့ ပြဋ္ဌာန်းခွင့်ဗျ၊ လွတ်လပ်ခွင့်မဟုတ်ဘူးနော်။ သီးသန့် ကိုယ်တို့ အချုပ်အခြာအာဏာ အဖြစ် ဘော်လကန်ဒေသတိုင်းပြည်တွေလို ဖြစ်စေချင်ကြတာမဟုတ်ဘူး။ ပြည်ထောင်စုကြီးထဲမှာ ကိုယ်ပိုင်ပြဋ္ဌာန်းခွင့်၊ အုပ်ချုပ်ခွင့်နဲ့ တန်းတူညီမျှမှု အခွင့်အရေးရရင်ပြီးပြီ၊ ကျနော်တို့ ဥမကွဲသိုက်မပျက်သွားမယ်ဆိုတဲ့ရည်မှန်းချက်နဲ့ ကျနော်တို့ တောင်းနေကြတာကိုး၊ တိုက်နေကြတာကိုး။ ဒီသဘောထားအခြေခံရှိရင် ပုဒ်မ ၂၆၁ ကို ပြင်လိုမှုဆိုတဲ့ နိုင်ငံရေးရည်မှန်းချက် ကြီးကြီးမားမား တပ်မတော်မှာလည်းရှိရမယ်၊ နိုင်ငံတော်အကြီးအကဲဖြစ်တဲ့ သမ္မတမှာလည်း ရှိရမယ်။ လွှတ်တော်တခုတည်းက ဒီသဘောထားရှိနေလို့ မရဘူး။
"ကျနော် သိသလောက် လွှတ်တော်တွင်းမှာ နိုင်ငံရေးရည်မှန်းချက်ရှိကြတယ်ဗျ။ နိုင်ငံရေးလို့ပြောကြတယ်၊ တပ်မတော်ဘက်ကလာတဲ့ ၁၆၆ ဦး၊ အစိုးရတို့ဘက်ကပြန်ကြည့်ရင် နိုင်ငံရေးရည်မှန်းချက်ကို ပါးစပ်ကပဲပြောတာ။ လက်တွေ့မှာ နိုင်ငံရေးရည်မှန်းချက်မရှိဘူး။ အဲဒါကြောင့် ၂၆၁ ကိုလည်း မပြင်ခဲ့စေချင်ဘူး။ ကျန်တဲ့ ခင်ဗျား ဇယား (၂) ကို ပြောင်းတဲ့အခါမှာလည်း အင်မတန်ကိုမှ အစွယ်အပွားလေးတွေပေါ့ဗျာ၊ သစ်ပင်တပင်ကို ချိုင်သလိုပေါ့ အကိုင်းအခက်လေးတွေကို အလှဆင်သလောက်ပဲရှိတယ်။ ကိုင်းဖျားကိုင်းနားလောက်ပဲရှိပါတယ်။ အဲဒီတော့ မထိရောက်ဘူး။ အဲဒါကြောင့်မို့လို့ ကျနော်တို့ကတော့ ပြောပါတယ်။ ပြည်တွင်းငြိမ်းချမ်းမှုကိုလိုချင်ရင် အခုကတည်းစပြီးတော့ နှစ်ပေါင်း ၆၀၊ ၇၀ ရှိနေပြီ သဘောထားကြီးမှုကို ပြပါ။ ဟုတ်လား၊ ကျနော်တို့အားလုံး ညီညီညွတ်ညွတ်နဲ့ ပြည်တွင်းစစ်ကြီးငြိမ်းချမ်းအောင် ညှိနှိုင်းဆောင်ရွက်စေချင်တယ်။”
အခုဇူလိုင်လဟာ ၄၃၆ ပြင်ဆင်ရေးတွေ ကျဆုံးတဲ့လလို့ ပြောနိုင်တယ်။ လွှတ်တော်မှာ တပ်မတော်သားတွေရဲ့မဲရအောင် ဆရာ့အပြောအရ တပ်မတော်ကို အစိုးရပိုင်တယ်ဆိုရင်လည်း သူတို့တွေထံကနေ ဆရာတို့လိုလားချက်တွေအတွက် ထောက်ခံမှုရအောင် ဘယ်လိုကြိုးစားကြမလဲ။
“ဟုတ်ပြီ။ ကျနော်တို့က ပြောပါတယ်။ တပ်မတော်သား ဗိုလ်ချုပ်တွေကိုလည်း ပြောတာပဲ။ ၂၆၁ ကို ဟုတ်လား၊ ၂၆၁ ဆိုတာ တိုင်းဒေသကြီး၊ ပြည်နယ်ဝန်ကြီးချုပ်ကို မိမိပြည်နယ်ပါလီမန်ကနေ ရွေးနိုင်အောင် ကျနော်တို့က ပြင်တယ်။ ဟုတ်ပြီနော်၊ တပ်မတော်သားတွေက မပြင်ဘူး နဂိုအတိုင်းပဲ ထားတယ်။ ဟုတ်ပြီ၊ လက်ရှိသမ္မတနဲ့ လက်ရှိတပ်မတော်ကာကွယ်ရေးဦးစီးချုပ် လက်ရှိဖွဲ့စည်းပုံအခြေခံဥပဒေမှာ လွှမ်းမိုးမှုရှိတယ်၊ ဒါ ကျနော်တို့ လက်ခံတယ်။ ဒါပေမယ့် ၂၀၁၅ အလွန်မှာဖြစ်လာမယ့် အစိုးရဟာ လက်ရှိအစိုးရ ဟုတ်ချင်မှ ဟုတ်တော့မယ်။ လက်ရှိကာကွယ်ရေးဦးစီးချုပ်လည်း ဟုတ်ချင်မှ ဟုတ်တော့မယ်။ ဟုတ်ပြီနော်၊ အဲဒီအခင်းအကျင်းမျိုးကို တွေးကြည့်လို့ရှိရင် ၂၆၁ ကို မပြင်ဘဲနဲ့ နဂိုအတိုင်းပဲ ထားတယ်ဆိုပါတော့။ ၂၀၁၆ မှာ ဖြစ်လာမယ့် နိုင်ငံတော်သမ္မတနဲ့ ကာကွယ်ရေးဦးစီးချုပ်သည် ဖွဲ့စည်းပုံအခြေခံဥပဒေကို ပြုပြင်ပြောင်းလဲလိုမှု အင်မတန်ကို ကြီးမားမယ်၊ ပြည်သူဘက်က ရပ်တည်မယ်၊ တကယ့်ကိုပြုပြင်ပြောင်းလဲရေး ၀ါဒီတဦးဖြစ်တယ်ဆိုရင် ၂၆၁ ကို မပြောင်းရင်လည်းပဲ ခန့်လို့ရတာပေါ့ဗျ။ သက်ဆိုင်ရာပြည်နယ်ပါလီမန်က အများစုမဲရတဲ့ ပုဂ္ဂိုလ်ကို သမ္မတကြီးက အတည်ပြုပေးလိုက်ရင် ပြီးပြီလေ။ လက်ရှိသမ္မတဟာ ၂၀၁၆ မှာ သမ္မတဖြစ်ချင်မှ ဖြစ်တော့မှာပေါ့။ အဲဒီတော့ ၂၀၁၆ ရဲ့ သမ္မတပေါ် မူတည်ပြီးမှ ၂၆၁ ရှိခြင်း၊ မရှိခြင်းဟာ ပြည်နယ်သူပြည်နယ်သားတွေအတွက် ဘာမှ မပတ်သက်တော့ဘူး။ ၂၆၁ ကိုမပြင်လည်း ဒီအခွင့်အရေးကို ရမှာပဲ။ ဒါဟာ သမ္မတကြီးရဲ့သဘောထားနဲ့ဆိုင်သွားပြီ။ ဟုတ်ပြီနော်၊ အဲဒီတော့ အခုကတည်းက နိုင်ငံရေးအမြင်ရှိရှိနဲ့ ပြောင်းပေးလိုက်ပါ။ ၂၆၁ ကို ပြောင်းပေးခြင်းအားဖြင့် တပ်မတော်ဟာ ဒီမိုကရေစီရဲ့ ရှေ့ဦးကို ရောက်သွားတာပေါ့ဗျာ။ စစ်ဘက်၊ အရပ်ဘက်ဆက်ဆံရေးကို အတွင်းကျကျ လေ့လာပြီးမှ ဗျူဟာမြောက်ချဉ်းကပ်မှုလို့ သုံးသပ်လို့ရတာပေါ့။ ဒါပေမယ့် အခုကတော့ လွန်သွားပြီ။
“အဲဒါကြောင့် လာမယ့် ၂၀၁၆ မှာ ဖြစ်လာမယ့်အစိုးရနဲ့ ဖွဲ့စည်းပုံအခြေခံဥပဒေ ပြင်ဆင်ရေးဟာ နိုင်ငံသူ နိုင်ငံသားများရဲ့ နိုင်ငံရေးနိုးကြားတက်ကြွမှုနဲ့ သိပ်ဆိုင်တယ်။ ဆိုပါတော့ လက်ရှိပါလီမန်အခင်းအကျင်းမှာ ဘာကြောင့် ၄၃၆ ပင်တိုင်ထားတဲ့ ၂၀၀၈ ဖွဲ့စည်းပုံကြီးကို ပြင်လို့မရဘူးလဲ။ အကြောင်းရင်းကို သိလို့ရှိရင် ပါလီမန်မှာ ပြည်သူ့ကိုယ်စားလှယ်အစစ်အမှန်တွေ မလွှမ်းမိုးလို့ပေါ့ဗျာ။ ၇၅ ရာခိုင်နှုန်းသောပုဂ္ဂိုလ်တွေဟာ တကယ့်တကယ် ဖွဲ့စည်းပုံအခြေခံဥပဒေကို ပြောင်းလဲလိုတဲ့ ပုဂ္ဂိုလ်တွေအဖြစ် လူထုက ရွေးကောက်တင်မြှောက်ပေးလိုက်ပြီဆိုရင် ၁ အချက်က ၇၅ ရာခိုင်နှုန်း သေချာပြီးပြီ။ အဲဒီ ၇၅ ရာခိုင်နှုန်းထဲက ဒီမိုကရေစီဘက်တော်သား၊ ပြုပြင်ပြောင်းလဲရေးဝါဒီအစစ်အမှန်ကြီး၊ တပ်မတော်ကို သြဇာလွှမ်းမိုးနိုင်သော၊ တပ်မတော်ရဲ့ ၁၆၆ မဲသော ပုဂ္ဂိုလ်များကို ပြည်သူ့ဘက်တော်သားအဖြစ်ပြောင်းလဲနိုင်သောစွမ်းအင်ရှိတဲ့ ပုဂ္ဂိုလ်ကြီးတယောက် ပြည်သူ့လွှတ်တော်၊ အမျိုးသားလွှတ်တော်ဘက်က တင်မြှောက်နိုင်တဲ့ ဒုတိယသမ္မတမှာ ပါလာမယ်ဆိုရင်၊ ဒုတိယသမ္မတ ၃ ဦးထဲက အဲဒီပုဂ္ဂိုလ်ဟာ သမ္မတဖြစ်သွားမယ်ဆိုရင် ကာကွယ်ရေးဦးစီးချုပ်ကို တာဝန်ပေးနိုင်တဲ့ပုဂ္ဂိုလ်၊ တာဝန်ခန့်နိုင်တဲ့ပုဂ္ဂိုလ်၊ ဖြုတ်နိုင်တဲ့ပုဂ္ဂိုလ် စသဖြင့် သမ္မတမှာရှိတဲ့တာဝန်ကို ထိန်းထိန်းသိမ်းသိမ်းနဲ့ အင်အားကြီးစွာယူနိုင်တဲ့ပုဂ္ဂိုလ်ဆိုရင် ၂၀၁၆ ဟာ ၂၀၀၈ ဖွဲ့စည်းပုံကို ပြုပြင်ပြောင်းလဲနိုင်ခြေရှိတဲ့ ပထမခြေလှမ်းဖြစ်သွားမှာပေါ့။ ”
“အဲဒီတော့ ကျနော်တို့ကပြောပါတယ် ၂၀၁၆-၂၀၂၀ ကာလဟာ သိပ်အရေးကြီးတယ်။ အဲဒီကာလလေးမှာ ကျနော်တို့ ဟိုး ခေတ်ဦးပိုင်းကဆို တော်တော်ပြောတယ်ဗျ၊ ၂ နှစ်ခွဲကျစီ ညှိနှိုင်းပြီးယူကြ။ ကနဦး ၂ နှစ်ခွဲကို ကြီးမားတဲ့ ဆည်ကြီးကိုဖောက်နိုင်အောင် အငြိမ်းစားပုဂ္ဂိုလ်ကြီးတယောက်ယောက်ကို ရွေးချယ်ပေး။ ကျန်တဲ့ ၂ နှစ်ခွဲမှာ ဖွဲ့စည်းပုံအခြေခံဥပဒေကို ပြောင်းလဲပြီးမှ သင့်လျော်တဲ့ ဒီမိုကရေစီခေါင်းဆောင်တဦးကို တင်မြှောက်၊ အဲသလိုနဲ့ လာမယ့် ၅ နှစ်ကာလမှာ ရှေ့က ၂ နှစ်ခွဲ သို့မဟုတ် ၂ နှစ်ပေါ့ဗျာ နောက်က ၃ နှစ်ပေါ့၊ ရှေ့က ၃ နှစ်ဆို နောက်က ၂ နှစ်ပေါ့ဗျာ ညီညီမျှမျှလေးနဲ့ ညှိနှိုင်းမှုတခုနဲ့သာ လာမယ့်ကာလလေးကို ညီညီညွတ်ညွတ်နဲ့ ပါတီကြီးတွေ၊ တိုင်းရင်းသားပါတီတွေအပါအ၀င် စုပေါင်း ဦးဆောင်နိုင်မယ်ဆိုရင် နှစ်ဦးပိုင်းလောက်မှာ ၂၀၁၆ ကနေ ၂ နှစ်လောက်အတွင်းမှာ ကျနော်တို့ ဖွဲ့စည်းပုံအခြေခံဥပဒေကို လူထုကြိုက်အောင် ပြောင်းနိုင်မယ်။ အဲဒီကာလနောက်ပိုင်းမှာ လူထုကြိုက်တဲ့ခေါင်းဆောင်တွေ နိုင်ငံတော်အကြီးအကဲအပါအ၀င် အစိုးရအဖွဲ့အစည်းတွေမှာ မြင်ရတွေ့ရနိုင်တဲ့အခြေအနေ ဖြစ်လာမှာပေါ့။ အဲဒီနည်းဟာ ညင်သာပျော့ပြောင်းပြီးမှ သွေးမြေကျမှု ကင်းပါတယ်။ ကျနော်တို့ ပြောဆိုနေကြတဲ့ ရွေးကောက်ပွဲအလွန် နိုင်ငံရေးတည်ငြိမ်မှုနဲ့ သက်ဆိုင်ပါတယ်။”
7 years Ago
