၅ ကီလိုနီးပါး နှင်းထုခရီးကြမ်းကိုဖြတ်ပြီး ကျောင်းသွားတက်သည့် အာဂကလေးငယ်

January 10, 2018

၅ ကီလိုနီးပါး နှင်းထုခရီးကြမ်းကိုဖြတ်ပြီး ကျောင်းသွားတက်သည့် အာဂကလေးငယ်

ဆိုးဝါးလှတဲ့ ရာသီဥတုနဲ့ ၄ ဒသမ ၅ ကီလိုမီတာ အကွာအဝေး နှင်းထုခရီးကြမ်းကို ဖြတ်ကာ ကျောင်းကို အရောက်သွားနိုင်ခဲ့တဲ့ တရုတ်ကလေးငယ်တဦးဟာ အင်တာနက် လူမှုကွန်ရက် စာမျက်နှာတွေပေါ်မှာ နာမည်ကြီးနေပါတယ်။ ဒီအဖြစ်အပျက်ဟာ ဇန်နဝါရီ ၈ ရက် မနက်ပိုင်းက ယူနန်ခရိုင်တွင်းမှာ ဖြစ်ခဲ့ပြီး ၃ တန်း ကျောင်းသားကလေးဟာ ကျောင်းကိုရောက်လာချိန်မှာ နီရဲတဲ့မျက်နှာနဲ့အတူ မျက်ခုံး၊ မျက်လုံးနဲ့ ဦးခေါင်းတခုလုံးမှာ ဖွေးဖွေးဖြူတဲ့ နှင်းခဲတွေ ကပ်လျက်သား အခြေအနေနဲ့ ရောက်ရှိလာခဲ့တာပါ။ ဒီခရီးကို ခက်ခက်ခဲခဲ ဖြတ်သန်းလာခဲ့တဲ့ ၈ နှစ်သား ကလေးငယ်ရဲ့ ပုံတွေကို ဆရာမတဦးက ဓာတ်ပုံမှတ်တမ်းယူကာ ရိုက်ကူးပြီး တရုတ်အင်တာနက် လူမှုကွန်ရက်စာမျက်နှာ ဝေဘိုမှတဆင့် ကျောင်းအုပ်ကြီးက မျှဝေခဲ့ချိန်မှာတော့ အင်တာနက်အသုံးပြုသူတွေကြား ကရုဏာသက်ဖွယ် ရေပန်းစား လူပြောများနေခဲ့တာပါ။ တရုတ်ပြည်သူ့နေ့စဉ်သတင်းမှာတော့ ဝမ်ဖူမန်လို့ အမည်ရတဲ့ အဲဒီကလေးငယ်ဟာ ဒီအကွာအဝေးကို အချိန် ၁ နာရီခွဲလောက် လမ်းလျှောက်လာခဲ့ရတယ်လို့ ကျောင်းအုပ်ကြီးရဲ့ အဆိုကို ကိုးကား ဖော်ပြပါတယ်။ ကျောင်းအုပ်ကြီး ဖူဟမ်းက “မနက်က ရာသီဥတုက -၉ ဒီဂရီ စင်တီဂရိတ်လောက် ရှိနေတာ။ ဒီနေ့က ကျောင်းစာမေးပွဲ ပထမနေ့လေ။ နာရီဝက်လောက်အကြာမှာတော့ အပူချိန်က ရုတ်တရက် ကျသွားခဲ့တယ်။ ဒီကလေးရဲ့အိမ်က ဝေးတော့ လမ်းမှာ ခုလိုကြုံပြီး တခေါင်းလုံး နှင်းတွေကပ်ပြီး အတန်းထဲ ရောက်လာခဲ့တယ်” လို့ ပြောပါတယ်။ လက်ရှိမှာတော့ သူ့ကို ရေခဲကောင်လေးလို့ နာမည်ပြောင်နဲ့ ချစ်စနိုး ခေါ်နေကြပြီး နာမည်ကြီးနေခဲ့တာပါ။ ဝမ်ဟာ ကျောင်းနဲ့ အတော်လှမ်းပြီး ရွှံ့နွံထူထပ်တဲ့ အိမ်တလုံးမှာ ဖခင်၊ အစ်မဖြစ်သူတွေနဲ့ နေထိုင်နေတာ ဖြစ်ပါတယ်။ ဖခင်ကတော့ ရွှေ့ပြောင်း ကျပမ်းအလုပ်သမားတဦးဖြစ်ကာ မိခင်ကတော့ သူငယ်ငယ်ကတည်းက အိမ်က ထွက်သွားခဲ့တာပါ။ သူဟာ ကျောင်းချိန်ပြင်ပမှာလည်း အဖွားဖြစ်သူရဲ့ စိုက်ခင်းမှာ ကူညီရသေးပြီး ကျောင်းတက်ရတာ သူ့အတွက်တော့ ခက်ခဲတယ်လို့ အင်တာဗျူးမှာ ဖြေခဲ့ပါတယ်။ အွန်လိုင်းပေါ်မှာတော့ ကလေးငယ်ကို အားပေးချီးကျူးမှုတွေ များစွာ ရရှိနေတာ ဖြစ်ပါတယ်။ “ကလေးရယ်၊ ခုဖြတ်သန်းနေရတဲ့ နာကျင်မှုဟာ အနာဂတ်ပြေးလမ်းမှာတော့ အလင်းရောင်ထွန်းညှိနိုင်ဖို့ပါပဲ” လို့ တယောက်က အားပေး မှတ်ချက်ရေးခဲ့ပါတယ်။ ဝမ်ဟာ ဂြိုဟ်သားတွေပါဝင်တဲ့ သိပ္ပံဆန်းကြယ်ဝတ္ထုတွေ ဖတ်ရတာ နှစ်သက်ပြီး ဘတ်စ်ကက်ဘော ကစားရတာကိုလည်း နှစ်သက်ကာ လူဆိုးတွေကိုဖမ်းတဲ့ ရဲအရာရှိတဦး ဖြစ်ချင်တယ်လို့ ပြောပါတယ်။ အခုနှစ်သစ်မှာတော့ ကျောင်းစာတွေလည်း ကြိုးစားပြီး နာမကျန်းတဲ့ အဖွားဖြစ်သူကိုလည်း ကူညီကာ ပိုက်ဆံကူညီရှာဖွေပေးသွားမှာ ဖြစ်တယ်လို့ ဆိုပါတယ်။
4 years Ago
Up