၂၁ ရာစု ပင်လုံညီလာခံအတွက် ဖက်ဒရယ်ဆိုင်ရာ မူဝါဒများ ဆွေးနွေး

August 8, 2016

၂၁ ရာစု ပင်လုံညီလာခံအတွက် ကြံ့ခိုင်ရေးပါတီဆွေးနွေး

၂၁ ရာစု ပင်လုံညီလာခံမှာ သဘောထား ထုတ်ပြန်နိုင်ဖိုအတွက် ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီက အမျိုးသားပြန်လည်သင့်မြတ်ရေးနှင့်ပြည်တွင်းငြိမ်းချမ်းရေးဆိုင်ရာ အလုပ်ရုံ ဆွေးနွေးပွဲကို နေပြည်တော်ပါတီ ဌာနချုပ်မှာ ဒီကနေ့ ဩဂုတ် ၈ ရက်မနက်မှာ ကျင်းပပါတယ်။ အဲ့ဒီဆွေးနွေးပွဲမှာ ပါတီဥက္ကဋ္ဌ ဦးသိန်းစိန်က "ဒီကနေ့ပြုလုပ်တဲ့ဆွေးနွေးပွဲကနေ နိုင်ငံတော် အစိုးရအနေနဲ့ မကြာမီမှာပြုလုပ်ကျင်းပတော့မယ့် ငြိမ်းချမ်းရေးညီလာခံမှာ ကျနော်တို့ပါတီက ဆောင်ရွက်ချက်များ သဘောထားရပ်တည်ချက်တွေကို ဖော်ထုတ်ကြေညာနိုင်ဖို့အတွက် ဖြစ်ပါတယ်"လို့ ပြောပါတယ်။ ဒါ့အပြင် မြန်မာပြည်သမိုင်းကြောင်းနဲ့ အမျိုးသားပြန်လည်သင့်မြတ်ရေး ပြည်ထောင်စု ငြိမ်းချမ်းရေး ဆောင်ရွက်ချက်တွေ၊ တိုင်းရင်းသားစည်းလုံးညီညွတ်ရေးကို ဦးတည်တဲ့ ဖက်ဒရယ် ပြည်ထောင်စုဖော်ဆောင်ရေးကိစ္စတွေကိုလည်း ပြောသွားပါတယ်။ ကြံ့ခိုင်ရေးပါတီဥက္ကဋ္ဌ သမ္မတဟောင်း ဦးသိန်းစိန်ဟာ ယခင်သူ့အစိုးရသက်တမ်းအတွင်း ပြည်ထောင်စုငြိမ်းချမ်းရေးဖော်ဆောင်ရေး ဗဟိုကော်မတီဥက္ကဋ္ဌအဖြစ် တာဝန်ယူပြီး တိုင်းရင်းသားလက်နက်ကိုင်အဖွဲ့ ၈ ဖွဲ့နဲ့ တနိုင်ငံလုံးအပစ်ရပ်စာချုပ် (အန်စီအေ) လက်မှတ် ထိုးနိုင်ခဲ့ပါတယ်။ ဆွေးနွေးပွဲကို ၄ ရက်ကြာ ကျင်းပမှာဖြစ်ပြီး ပါတီရဲ့ ဗဟိုကော်မတီဝင်တွေနဲ့ ပြည်နယ်နဲ့ တိုင်းတွေက ပါတီဝင်တွေ၊ လွှတ်တော်အသီးသီးက ပါတီကိုယ်စားလှယ်တွေနဲ့ ပါတီက ဖွဲ့စည်းထားတဲ့ ကော်မတီတွေအပါအ၀င် ၁၅၀ လောက် တက်ရောက်ခဲ့ကြပါတယ်။ ကြံ့ခိုင်ရေးပါတီညီလာခံကို ဩဂုတ်လ တတိယပတ်ထဲမှာပြုလုပ်ဖို့ရှိပြီး အဲ့ဒီ ညီလာခံမှာ ပါတီရဲ့ ရှေ့ဆက်လုပ်ကိုင်မယ့် မူဝါဒ လုပ်ငန်းစဉ်တွေကို အတည်ပြုချမှတ်နိုင်ဖို့အတွက် ဆွေးနွေးမယ်လို့ လည်းသိရပါတယ်။
5 years Ago

July 1, 2016

၂၁ ရာစု ပင်လုံညီလာခံအတွက် ဖက်ဒရယ်ဆိုင်ရာ မူဝါဒများ ဆွေးနွေး

နိုင်ငံတော်အတိုင်ပင်ခံ ဒေါ်အောင်ဆန်းစုကြည်မှ လာမယ့်သြဂုတ်လအတွင်း ဦးဆောင်ကျင်း ပဖို့ရှိတဲ့ ၂၁ ရာစုပင်လုံညီလာခံမှာ ပါဝင်ဆွေးနွေးဖို့ တိုင်းရင်းသားနိုင်ငံရေးပါတီအစု အဖွဲ့တွေဟာ ဖက်ဒရယ်ဆိုင်ရာ မူဝါဒအကြောင်းတွေ အတူဆွေးနွေးနေပါတယ်။ မြန်မာနိုင်ငံဖက်ဒရယ်စနစ်ဆိုင်ရာ အဓိကကျသော မူဝါဒနှင့် လက္ခဏာများ ရေးဆွဲခြင်းလို့ ခေါ်တဲ့ အဲဒီအလုပ်ရုံဆွေးနွေးပွဲကို ယူအန်အေ (စည်းလုံးညီညွတ်သော တိုင်းရင်းသားလူမျိုးများ မဟာမိတ်အဖွဲ့)နဲ့ အီအန်အေစီ (တိုင်းရင်းသားလူမျိုးများရေးရာစင်တာ) တို့ပူးပေါင်းပြီး ရန်ကုန်မြို့ အင်းလျားလိတ်ဟိုတယ်မှာ ဇွန်လ ၃၀ ကနေ ဇူလိုင်လ ၂ ရက်နေ့ထိ ၃ ရက်တာ ကျင်းပနေတာ ဖြစ်ပါတယ်။ အဓိကအားဖြင့် ၂၁ ရာစု ပင်လုံညီလာခံကျင်းပပြီး ဖက်ဒရယ်အကြောင်းဆွေးနွေးမယ်ဆိုရင် လိုအပ်တဲ့အကြောင်းအရာ၊ အချက်အလက်နဲ့ မတူညီတဲ့သဘောထားအမြင်တွေကို ကြို တင်ညှိနှိုင်းကြာတာလို့ ယူအန်အေအဖွဲ့ဝင် ရှမ်းတိုင်းရင်းသားများဒီမိုကရေစီအဖွဲ့ချုပ် အထွေထွေ အတွင်းရေးမှူး - ၁ ဦးစိုင်းညွှန့်လွင်မှ ဒီဗွီဘီကို ခုလိုပြော ပါတယ်။ “တကယ်လို့ ၂၁ ရာစု ပင်လုံညီလာခံဖြစ်ခဲ့လို့ရှိရင် ဖက်ဒရယ်ပြည်ထောင်စုကိစ္စ လိုအပ်တဲ့ အချက်အလက်တွေပေါ့နော်၊ အဓိကအကြောင်းအရာတွေကို ကြိုတင်ပြီးတော့ ညှိနှိုင်းတာပါ။ ဒီလိုဆွေးနွေးပွဲတွေက အများကြီး လုပ်သွားရမယ်။ ခနခနလုပ်ရမယ်၊ ဒါမှဘဲ ဖက်ဒရယ်စနစ်နဲ့ ပတ်သက်လို့ ကြေကြေညက်ညက်ဖြစ်လာမယ်၊ လိုအပ်တဲ့ အချက်အလက်တွေလည်း ရလာ မယ်။ တယောက်နဲ့တယောက် အမြင်ချင်းမတူတဲ့ခါကျတော့ နောက်ကျတော့ အမြင်တွေ နီးစပ်လာမှာပေါ့။” ENAC တိုင်းရင်းသားလူမျိုးများရေးရာစင်တာအနေနဲ့ ဖက်ဒရယ်ဆိုင်ရာ အလုပ်ရုံဆွေးနွေးပွဲကို ပြည်ပမှာ လေးငါးကြိမ် လုပ်ခဲ့ပြီဖြစ်ပြီး ပြည်တွင်းရှိ နိုင်ငံရေးအင်အားစုတွေနဲ့တော့ ဒီတကြိမ်ဟာ ပထမဆုံးအကြိမ်ပြုလုပ်တာ ဖြစ်ပါတယ်။ ဆွေးနွေးပွဲကို တက်ရောက်နေတဲ့ ကချင်ပြည်နယ်ဒီမိုကရေစီပါတီဥက္ကဋ္ဌ ဒေါက်တာတူးဂျာ ကလည်း ၂ ရက်တာအတွင်း ဖက်ဒရယ်စနစ်ရဲ့ ဖွဲ့စည်းအုပ်ချုပ်ပုံအခြေခံဥပဒေ အကြောင်း လေ့လာဆွေးနွေးကာ မတူညီတဲ့ အမြင်သဘောထားတွေ ညှိနှိုင်းခဲ့ကြတယ်လို့ ပြောပါတယ်။ “ENAC မှာ ကြိုတင်ပြင်ဆင်ထားတဲ့ မူကြမ်းရှိတယ်။ အဲဒီမှာ လွှတ်တော် ၃ ရပ်ကိစ္စ၊ ဗဟိုအစိုးရ နဲ့ ပြည်နယ်အစိုးရ၊ ပြည်နယ်ထဲမှာ တိုင်းရင်းသားအထူးဒေသ၊ ကိုယ်ပိုင်အုပ်ချုပ်ခွင့်ရဒေသ အစရှိသဖြင့်ပေါ့ အဲဒီလိုခွဲထားတာရှိတယ်။ ဖွဲ့စည်းအုပ်ချုပ်အခြေခံဥပဒေမှာလည်း ပြည်ထောင်စု တခုလုံးဆိုင်ရာဥပဒေနဲ့ ပြည်နယ်အုပ်ချုပ်ပုံ ဆိုင်ရာဆိုင်ရာဥပဒေ ခွဲထားတယ်ပေါ့။ အာဏာခွဲဝေ တဲ့ နေရာမှာ ဗဟိုအစိုးရမှာ ဘယ်လိုအာဏာရှိလဲ ပြည်နယ်အစိုးရမှာ ဘယ်လို အာဏာရှိလဲ၊ ထပ်တူပြုအာဏာက ဘာလဲ။ ကြွင်းကျန်အာဏာတွေကဘာလဲ အစရှိသဖြင့် ဒါတွေကို ခွဲပြီးတော့ ၀ိုင်းဝန်းဆွေးနွေးနေကြတာဖြစ်တယ်။ ကြိုတင်ပြင်ထားတဲ့ မူကြမ်းအပေါ်မှာ နည်းနည်းပါးပါး ကွဲလွဲနေတာတွေကို ပြန်ညှိတယ်။ အမြင်မတူတာတွေရှိပေမယ့် ပြန်ညှိနှိုင်းလို့ ရတယ်။” လက်ရှိမြန်မာနိုင်ငံဟာ ဖက်ဒရယ်စနစ်ကို သွားနေတဲ့အတွက် လိုအပ်တဲ့ဖက်ဒရယ်ပုံစံကို ၀ိုင်းဝန်းဆွေးနွေးပြီး အကြံပေးချက်တွေ စုစည်းတာမို့ အင်မတန်အရေးကြီးသလို ဒါကို ကောင်းကောင်းဆွေးနွေးနိုင်တယ်ဆိုရင် ပင်လုံညီလာခံတက်ရောက်တဲ့အခါ အသုံးပြုနိုင်တယ် လို့ သူက ဆက်ပြောပါတယ်။ သူတို့ကချင်ပါတီအနေနဲ့ ဒီအလုပ်ရုံဆွေးနွေးပွဲက ရလာတဲ့ အချက်အလက်တွေပေါ်မူတည်ပြီး ကချင်ပါတီအချင်းချင်းကြားမှာ သဘောထားညှိနှိုင်းကာ ကချင်ပြည်နယ် အတိုင်ပင်ခံအဖွဲ့မှ ဦးေ ဆာင်ကျင်းပမယ့် ကချင်ကွန်ဖရင့်မှာ တင်ပြသွားဖို့ရှိတယ်လို့ ဒေါက်တာတူးဂျာက ပြောသွား ပါတယ်။ ဒီအလုပ်ရုံဆွေးနွေးပွဲမှာ ယူအဲန်အေအဖွဲ့ဝင် နိုင်ငံရေးပါတီ ၃ ခု၊ ယူအန်အေအဖွဲ့ဝင်မဟုတ်သော ပါတီ ၃ ခု၊ လူမှုအခြေပြုအဖွဲ့အစည်း ၃ ဖွဲ့၊ တိုင်းရင်းသားလက်နက်ကိုင်အဖွဲ့ ၃ ဖွဲ့ က ကိုယ်စားလှယ်တွေနဲ့ ပုဂ္ဂိုလ်ရေးအရ ရွေးချယ်ဖိတ်ကြားခံရသူ ပညာရှင် ၃ ဦး စုစုပေါင်း ၅၀ ကျော် တက်ရောက်ဆွေးနွေးလျှက်ရှိပါတယ်။
5 years Ago
Up