ဝီဂါ

July 7, 2015

တိုင်းရင်းသား ပြဿနာ မရှိကြောင်းနှင့် လွတ်လပ်စွာ ကိုးကွယ်ခွင့်ရှိကြောင်း တရုတ်ပြော

တရုတ်နိုင်ငံ အနောက်ဘက်စွန်းမှာ တည်ရှိတဲ့ ရှင်ကျန်းဒေသမှာ တိုင်းရင်းသား ပြဿနာဆိုတာ တကယ်မရှိသလို၊ အဲဒီဒေသမှာ နေထိုင်တဲ့ မွတ်စလင် ၀ီဂါတွေဟာလည်း လွတ်လပ်စွာ ကိုးကွယ်ခွင့် ရှိတယ်လို့ တရုတ် နိုင်ငံခြားရေးဝန်ကြီးဌာနက ဇူလိုင် ၆ ရက်နေ့က ပြောပါတယ်။ တရုတ်အစိုးရက မွတ်စလင် ၀ီဂါတွေကို ဆက်ဆံတဲ့အပေါ် မကျေနပ်တဲ့အတွက် တူရကီနိုင်ငံမှာ ဆန္ဒပြပွဲတွေ ပေါ်ပေါက်နေတဲ့အချိန်မှာ တရုတ်အစိုးရက တုံ့ပြန်လိုက်တာပါ။ ၀ီဂါလူမျိုးတွေဟာ တူရကီနဲ့ ယဉ်ကျေးမှုအရ၊ ဘာသာရေးအရ ခွဲခြားလို့ မရဘူးလို့ တူရကီတွေ အတော်များများက ခံယူထားကြတာကြောင့် တရုတ်ပြည်ထဲက ၀ီဂါတွေအရေးကို အကြောင်းပြုလို့ တရုတ်နဲ့ တူရကီတို့ ဆက်ဆံရေးကိုလည်း ထိခိုက်နေပါတယ်။ တရုတ် နိုင်ငံခြားဌာန ပြောခွင့်ရသူ ဟွာချန်းယင်က “၀ီဂါတွေဟာလည်း တရုတ် တိုင်းရင်းသား ၅၆ မျိုးထဲမှာ ပါဝင်တဲ့ မိသားစုဝင်တွေပါပဲ။ ရှင်ကျန်းပြည်နယ်မှာ နေထိုင်တဲ့ ၀ီဂါလူမျိုး ၁၀ သန်းဟာလည်း ငြိမ်းချမ်းစွာ နေထိုင်နေကြပြီး ယုံကြည်တဲ့ ဘာသာတရားကို လွတ်လွတ်လပ်လပ် ကိုးကွယ်ခွင့် ရှိနေပါတယ်။” လို့ ဆိုပါတယ်။ ဇူလိုင် ၅ ရက်နေ့က တူရကီနိုင်ငံ အစ္စတန်ဘူးလ်မြို့က တရုတ်ကောင်စစ်ဝန်ရုံး အပြင်ဘက်မှာ တရုတ်ဆန့်ကျင်ရေး ဆန္ဒပြပွဲ ဖြစ်ခဲ့ပြီး တရုတ်အလံကို မီးရှို့ခဲ့ကြပါတယ်။ တရုတ်ပြည်ဘက်မှာ နှိပ်ကွပ်ခံရတဲ့ ၀ီဂါမွတ်စလင်တွေကိုလည်း တူရကီဘက်က တံခါးဖွင့်ထားတယ်လို့ တူရကီအစိုးရ ကိုယ်တိုင် ပြောထားပါတယ်။ ကျန်ခဲ့တဲ့ ၃ နှစ်အတွင်း ရှင်ကျန်းပြည်နယ်ထဲမှာ တိုက်ခိုက်မှုတွေ ဖြစ်ခဲ့ပြီး လူရာနဲ့ချီ သေဆုံးခဲ့ပါတယ်။ အဲဒီ တိုက်ခိုက်မှုတွေကို အရှေ့တာကစ္စတန်ဆိုပြီး လွတ်လပ်တဲ့နိုင်ငံ ထူထောင်ချင်တဲ့ အစ္စလာမ္မစ် စစ်သွေးကြွတွေရဲ့ လက်ချက်ဖြစ်တယ်လို့ တရုတ်အစိုးရက စွပ်စွဲခဲ့ပါတယ်။
6 years Ago
Up