မြ၀တီ

February 17, 2018

မြ၀တီနှင့် ကြာအင်းဆိပ်ကြီးတွင် လက်နက်ခဲယမ်းနှင့် မူးယစ်ဆေးဝါးများ ဖမ်းမိ

မြဝတီမြို့နယ်နဲ့ ကြာအင်းဆိပ်ကြီးမြို့နယ်တို့မှာ လက်နက်၊ ခဲယမ်းတွေနဲ့ မူးယစ်ဆေးဝါးတွေ သိမ်းဆည်းရမိတယ်လို့ ပြန်ကြားရေးသတင်းမှာ ဖော်ပြပါတယ်။ သင်္ဃန်းညီနောင်နယ်မြေရဲစခန်းက တပ်ဖွဲ့ဝင်တွေပါဝင်တဲ့ ပူးပေါင်းအဖွဲ့ဟာ ဖေဖော်ဝါရီ ၁၅ ရက် မွန်းလွဲပိုင်းက မြဝတီမြို့နယ် သင်္ဃန်းညီနောင် ကျေးရွာအုပ်စု ရွာသစ် ၉ဝ၇ ဝင်းအနီးနေ ကျော်နိုင်ရဲ့ နေအိမ်ကိုရှာဖွေရာ စိတ်ကြွရူးသွပ်ဆေးပြား ၆၇၄ ပြား၊ ပြောင်းချော သေနတ် ၂ လက်၊ ၉ လုံးကျည် ၉ တောင့်၊ ပွိုင့် ၃ဝ ကျည် ၁၄ တောင့်နဲ့ မော်တော်ယာဉ်တစီးတို့ကို ဖမ်းဆီးရမိခဲ့တယ်။ ကွင်းဆက်အရ မွန်းလွဲ ၂ နာရီမှာ မြဝတီမြို့ အမှတ်(၂) ရပ်ကွက် စိန်သရဖူ (၂)လမ်းနေ ဧည့်သည်(ခ)ကြက်ကုလားရဲ့ နေအိမ်ကို ရှာဖွေရာ အေးနိုင်(ခ)သံပိုက်အား တွေ့ရှိပြီး စိတ်ကြွရူးသွပ် ဆေးပြား ၂၁၈ဝဝ နဲ့ လက်ကိုင်ဖုန်းတလုံးကို ဖမ်းဆီးရမိခဲ့ကြောင်း သတင်း ထုတ်ပြန်ထားပါတယ်။ အလားတူ ဖေဖော်ဝါရီ ၁၆ ရက် မနက်ပိုင်းက တပ်မတော်နဲ့  နယ်မြေရဲတပ်ဖွဲ့ပါဝင်တဲ့ ပူးပေါင်းအဖွဲ့ဟာ ကြာအင်းဆိပ်ကြီးမြို့နယ် ဘုရားသုံးဆူမြို့ အမှတ်(၂)ရပ်ကွက်ရှိ မြစန္ဒာဝင်းရဲ့ နေအိမ်ကို ရှာဖွေရာ စိတ်ကြွရူးသွပ်ဆေးပြား ၂၂၄၁ ပြား၊ အိုက်စ် ၃ ဒသမ ၆၅ ဂရမ်၊ ငွေကျပ် ၇ဝဝဝ၊ ထိုင်း ဘတ် ၃၁၆ဝ ကို သိမ်းဆည်းရမိခဲ့တယ်။ ဒါ့အပြင် မွန်းတည့် ၁၂ နာရီလောက် မူးယစ်တပ်ဖွဲ့စု (၆)ကသာမှ တပ်ဖွဲ့ဝင်တွေပါဝင်တဲ့ ပူးပေါင်းအဖွဲ့ဟာ ရွှေဘို-မြစ်ကြီးနား ကားလမ်းမှာ နိုင်ဦး မောင်းနှင်လာတဲ့ မော်တော် ဆိုင်ကယ်ကိုရှာဖွေရာ စိတ်ကြွရူးသွပ် ဆေးပြား ၉၆ဝဝ နဲ့ ငွေကျပ် ၁ဝ သိန်း၊ ညနေ ၅ နာရီခွဲမှာ ကသာမြို့နယ် မီးရထားသံလမ်းကူးအနီး ကျော်လင်းထွန်း(ခ)ဖိုးတုတ် မောင်းနှင်လာတဲ့ ဆိုင်ကယ်ကို ရှာဖွေရာ စိတ်ကြွရူးသွပ်ဆေးပြား ၁၆ဝဝ ကိုလည်း ဖမ်းဆီးရမိခဲ့တယ်လို့ ထုတ်ပြန်ထားပါတယ်။ အလားတူ ဖေဖော်ဝါရီ ၁၆ ရက်နေ့မှာပဲ မူးယစ်တပ်ဖွဲ့စု (၂၆)ပင်လောင်းမှ တပ်ဖွဲ့ဝင်များပါဝင်တဲ့ ပူးပေါင်းအဖွဲ့ဟာ ပင်လောင်းမြို့နယ် နောင်ပီ-ဖယ်ခုံကားလမ်း မိုးဦး ကျေးရွာအဝင်မှာ အုန်းဖေ မောင်းနှင်လာတဲ့ မော်တော်ဆိုင်ကယ်ကို ရှာဖွေရာ ဘိန်းစိမ်း ၇ ဒသမ ၈ ကီလို သိမ်းဆည်းရမိခဲ့တယ်လို့ ဆိုပါတယ်။ ဖမ်းမိသူတွေကို မူးယစ်ဆေးဝါးနဲ့ စိတ်ကိုပြောင်းလဲ စေသော ဆေးဝါးများဆိုင်ရာ ဥပဒေ အရ အရေးယူထားတယ်လို့ သိရပါတယ်။
3 years Ago

June 14, 2017

မြ၀တီတွင် ၆ လ ကျော်စောင့်ဆိုင်းရသည့် အလုပ်သမား ၁၀၀ ကျော် အခက်တွေ့

  ထိုင်းနိုင်ငံကို  တရားဝင်အလုပ်သွားလုပ်မယ့် အလုပ်သမားပေါင်း ၁၀၀ ကျော်ဟာ အမ်အိုယူ ကတ်ရရှိဖို့  မြ၀တီမြိုမှာ လာရောက်စောင့်ဆိုင်းနေကြတာမှာ ၆ လ ကျော်ကြာခဲ့ပေမယ့်လည်း အခု ထိမရသေးလို့ စားဝတ်နေရေး အခက်အခဲတွေ ဖြစ်နေကြပါတယ်။ အလုပ်သမားတချို့က အရင်ကထိုင်းမှာ တရားမ၀င်သွားရောက်လုပ်ကိုင်ပြီး  တရားဝင် ပြန်ဖြစ်ဖို့အတွက် ပွဲစားအဆက်အသွယ်နဲ့ မြန်မာပြည်ထဲ ပြန်လည်ဝင်ရောက်လာရာမှာ မြ၀တီမှာ ၆ လကျော် သောင်တင်နေလို့ အလုပ်ပျက်အကိုင်ပျက်၊ စားစရာမရှိ ဖြစ်နေတယ်လို့  ရှမ်းပြည်နယ် မိုင်းရှူးမြို့နယ်က စိုင်းမတ်ကအလုပ်သမား ပြောပါတယ်။ “ပတ်စပို့တွေတော့ရပါပြီ။ သူက ရန်ကုန်ကိုခေါ်သွားပြီး လုပ်ပေးတယ်။ ဒါပေမယ့် ဒီမြ၀တီမှာ လာကြာနေတာ၊ အလုပ်သမားကတ်နဲ့ ဗီဇာရဖို့တဲ့၊ နောက်တပတ်ရမယ်။ နောက် ၂ ပတ်ရမယ် ဆိုပြီး ရက်တွေရွှေ့ရွှေ့လာတာ။ ကျနော်တို့ ပါလာတဲ့ ပိုက်ဆံလည်းကုန်ပြီ။ အိမ်ကို ခနခနပြန်မှာရတာ။ အလုပ်ကလည်း မလုပ်ရတော့ အကြွေးတွေ လည်းတင်၊ တချို့ဆို ဒီမြ၀တီမှာ ရရာအလုပ်ဝင်လုပ်ရတယ်။ ပိုက်ဆံရှိတဲ့လူနဲ့ မရှိတဲ့သူ မျှစားတာတောင် တချို့နေ့တွေ ဆို ထမင်းတနပ်ဘဲစားရတယ်။ နေစရာက ကုမ္ပဏီက ၂ ထပ် အိမ်တလုံး ငှားထားပေးတယ်။ အမ်အိုယူလာစောင့်တဲ့ အလုပ်သမားက တရာကျော်၊ ဒါကြောင့် အဲဒီအိမ်မှာ ၅၀ ကျော်နေပြီး ကျန်တဲ့လူက အဲဒီနားက နောက်ထပ်အိမ်တလုံးမှာ စုပြီးငှားနေ ကြတယ်။ ပူကလည်းပူ၊ ခြင်ကလည်း များ၊ စားရေးသောက်ရေးအခက်အခဲက ပိုဆိုးပါတယ်။” လွယ်လင်ခရိုင် ကွန်ဟိန်းမြို့နယ်က လာတဲ့ နန်းရွှေဆိုသူ အမျိုးသမီးကလည်း သူမမှာ မြန်မာ မှတ်ပုံတင် မရှိလို့ သူများထက်ပိုပေးရကြောင်း၊ မှတ်ပုံတင်နဲ့ ပတ်စ်ပို့လုပ်ခအတွက်တင် ပွဲစားကို ထိုင်းဘတ် ၂၆၅၀၀ (မြန်မာငွေ ဆယ်သိန်းခန့်) ပေးထားရပြီး လက်ထဲ ဘာအထောက်အထားမှ မရသေးလို့ စိတ်ပူနေတယ်လို့  ပြောပါတယ်။ အမ်အိုယူအလုပ်သမားကဒ်ရဖို့ လာစောင့်နေတဲ့ သူအများစုမှာ ရှမ်းပြည်နယ် မိုင်းရှူး၊ မိုင်းနောင်၊ လဲချား၊ လွိုင်လင်၊ ကွန်ဟိန်း၊ မိုင်းကိုင် စတဲ့မြို့နယ်က ရှမ်းနဲ့ အခြားတိုင်းရင်း သားတွေဖြစ်ကြပါတယ်။ ဒီကိစ္စနဲ့ ပတ်သက်ပြီး အလုပ်သမားအရေးဆောင်ရွက်နေတဲ့ ချင်းမိုင်နဲ့ မဟာချိုင်အခြေစိုက် HRDF (လူ့အခွင့်အရေးနဲ့ ဖွံ့ဖြိုးတိုးတက်ရေးဖောင်ဒေးရှင်း) မှ ဥပဒေရေးရာတာဝန်ခံ စိုင်းပိုင်း ကတော့ အလုပ်သမားတွေက ဆက်သွယ်အကူအညီတောင်းလာတဲ့အတွက် သက်ဆိုင်ရာ ပွဲစားနဲ့ ကုမ္ပဏီတွေကို လိုအပ်သလို စစ်ဆေးအရေးယူပေးဖို့ ဇွန်လ ၁၂ ရက်နေ့က တာ့ခ်ခရိုင် အလုပ်သမားရှာဖွေခန့်ထားရေးရုံးမှာ သွားရောက်တိုင်တန်းထားတယ်လို့   ပြောပါတယ်။ “ကျနော်မြ၀တီဘက်ကူးသွားပြီး အဲဒီဒုက္ခရောက်နေတယ်ဆိုတဲ့ အလုပ်သမား တချို့နဲ့ သွားတွေ့ပါတယ်။   အဲဒီအလုပ်သမားတစ်ရာကျော်ကို ခေါ်လာတာ ကုမ္ပဏီ အနည်းဆုံး ၃ ခုနဲ့ ပွဲစားတွေလည်းပါတယ်လို့ သိရတယ်ခင်ဗျ။  ခက်တာက ကျနော်တို့ အလုပ်သမားတွေက သူတို့ကုမ္ပဏီရဲ့ နာမည်လည်း သေချာမသိဘူး။ ဖုန်းနံပတ်တွေလည်း တောင်းမထားဘူး၊ ပိုက်ဆံ ပေးတော့လည်း ငွေလက်ခံဖြတ်ပိုင်းတွေ တောင်းထားရမှန်းလည်းမသိဘူး။ ဒါကြောင့် ဆက်သွယ် မေးမြန်းပေးလို့ မရဘူးဖြစ်နေတယ်။” ထိုင်းမြန်မာ ၂ နိုင်ငံသဘောတူစာချုပ် အမ်အိုယူအရ ထိုင်းနိုင်ငံထဲ အလုပ်လာလုပ်မယ်ဆိုရင် လုပ်ထုံးလုပ်နည်းမှာ  မြန်မာ အလုပ်သမားညွှန်ကြားရေး ဦးစီးဌာနကနေ အမည်လျှောက်ထားပြီး အဆင့်ဆင့်ထွက်ခွာသွားရမှာပါ။ ဒါပေမယ့် အဲဒီအလုပ်သမားတွေက ထိုင်းဘက်ကနေပွဲစားနဲ့ မြန်မာထဲ ပြန်ဝင်တာကြောင့် ငွေလည်းပိုကုန်သလို အခန့်မသင့်ရင် အလိမ်ခံရတာတွေကြုံတွေ့နေကြရပါတယ်။
4 years Ago
More News
Up