မြန်မာနိုင်ငံတွင် မိခင်နို့တိုက်ကျွေးနှုန်း ကမ္ဘာ့လျာထားချက်၏ ထက်ဝက်သာရှိ

April 29, 2016

မြန်မာနိုင်ငံတွင် မိခင်နို့တိုက်ကျွေးနှုန်း ကမ္ဘာ့လျာထားချက်၏ ထက်ဝက်သာရှိ

မြန်မာနိုင်ငံမှာ ကလေးအသက် ၆ လပြည့်တဲ့အထိ မိခင်နို့တမျိုးတည်း တိုက်ကျွေးနှုန်းက ကမ္ဘာ့လျာထားမှုရဲ့ ထက်ဝက်ပဲရှိတယ်လို့ သုတေသနအသစ်တခုက ဖော်ပြပါတယ်။ ကုလသမဂ္ဂ ကလေးများရန်ပုံငွေအဖွဲ့နဲ့ Alive & Thrive အဖွဲ့တို့ရဲ့ ပူးပေါင်းဆောင်ရွက်တဲ့ သုတေသနရလဒ်ကို ထုတ်ပြန်လိုက်တာပါ။ မြန်မာနိုင်ငံက မိခင်အားလုံးနီးပါးဟာ မိခင်နို့ တိုက်ကျွေးကြပေမယ့် အသက် ၆ လပြည့်တဲ့အထိ မိခင်နို့တမျိုးတည်း တိုက်ကျွေးခံရတဲ့ ကလေးက ၂၄ ရာခိုင်နှုန်းပဲ ရှိပါတယ်။ ဒီလို တမျိုးတည်းတိုက်ကျွေးဖို့က ကမ္ဘာ့ကျန်းမာရေးအဖွဲ့နဲ့ ကုလသမဂ္ဂ ကလေးများရန်ပုံငွေအဖွဲ့တို့ရဲ့ လမ်းညွှန်ချက်ဖြစ်ပြီး မိခင်နို့တမျိုးတည်း တိုက်ကျွေးဖို့ ကမ္ဘာ့လျာထားချက်ကတော့ ၅၀ ရာခိုင်နှုန်း ဖြစ်ပါတယ်။ အသက် ၆ လပြည့်တဲ့အထိ မိခင်နို့တမျိုးတည်း တိုက်မယ်ဆိုရင် ကလေးတွေ သေဆုံးတာရဲ့ အဓိကအကြောင်းရင်းဖြစ်တဲ့ ဝမ်းပျက်ဝမ်းလျှောနဲ့ အဆုတ်အအေးမိရောဂါတွေကို ကာကွယ်နိုင်မှာ ဖြစ်ပါတယ်။ ဒါကြောင့် နှစ်စဉ် မြန်မာနိုင်ငံက ကလေး ၁၆၃၆ ဦးရဲ့ အသက်ကို ကယ်တင်နိုင်ပြီး ၅ နှစ်အောက် ကလေးသေဆုံးနှုန်းကို လျှော့ချပေးနိုင်မယ်လို့ သုတေသနရလဒ်က ဆိုပါတယ်။ ဒါ့အပြင် မိခင်နို့ကို မှန်မှန်ကန်ကန် တိုက်ကျွေးမယ်ဆိုရင် အစိုးရနဲ့ ပုဂ္ဂလိက ကဏ္ဍနှစ်ခုလုံးမှာ နှစ်စဉ် ကျန်းမာရေးကုန်ကျစရိတ် အမေရိကန်ဒေါ်လာ ၃ ဒသမ ၃ သန်းကျော် သက်သာသွားမယ်လို့ ဆိုပါတယ်။ မိခင်နို့ လုံလုံလောက်လောက် မတိုက်လို့ အစားထိုး အစားအစာတွေ ကျွေးမွေးရတဲ့စရိတ်က လစာနိမ့် အလုပ်သမားတယောက် လစဉ်ဝင်ငွေရဲ့ သုံးပုံတပုံ ရှိနေပါတယ်။ မြန်မာနိုင်ငံက အစိုးရဌာနတွေမှာ မီးဖွားခွင့်ကို ၆ လအထိ ပေးနေပြီဖြစ်ပေမယ့် ပုဂ္ဂလိက ဌာနတွေမှာတော့ ရက်သတ္တပတ် ၁၂ ပတ်လို့ပဲ သတ်မှတ်ထားဆဲ ဖြစ်ပါတယ်။
6 years Ago
Up