မြန်မာနိုင်ငံရဲတပ်ဖွဲ့

April 5, 2017

မြန်မာနိုင်ငံရဲတပ်ဖွဲ့ကို အစိုးရပိုင်းကလည်း တာဝန်ယူ ကိုင်တွယ်သင့်

ပြည်ထဲရေးလက်အောက်မှာရှိတဲ့ မြန်မာနိုင်ငံ ရဲတပ်ဖွဲ့ကို အစိုးရပိုင်းကလည်း တာဝန်ယူ ကိုင်တွယ်ဆောင်ရွက်သင့်တယ်လို့ နိုင်ငံရေးအသိုင်းအဝိုင်းက ပြောပါတယ်။ လက်ရှိမြန်မာနိုင်ငံရဲတပ်ဖွဲ့ရဲ့ လုံခြုံရေး ဆောင်ရွက်မှုတွေ၊ တရားဥပဒေ စိုးမိုးရေးအပိုင်းတွေနဲ့ ပတ်သက်ပြီး ပြည်သူတွေကြား ဝေဖန်ပြောဆိုမှုတွေ များစွာရှိနေတဲ့အထဲမှာ မြန်မာနိုင်ငံရဲတပ်ဖွဲ့ရဲ့ လုပ်ဆောင်မှုတွေကို ပြည်ထဲရေးဝန်ကြီးဌာန တခုတည်းက တာဝန်ယူဆောင်ရွက်တာထက် အစိုးရပိုင်းလည်း အတူပူးပေါင်းဆောင်ရွက်ရင် ပိုမိုကောင်းမွန်လာနိုင်တယ်လို့ နိုင်ငံရေးအသိုင်းအဝိုင်း က ထောက်ပြပြောဆိုပါတယ်။ “တရားဥပဒေစိုးမိုးရေး၊ ဒါတောင်မှ တရားစီရင်ရေးကဏ္ဍကို မပြောသေးဘူးနော်။ လုံခြုံရေးအဖွဲ့အစည်းတခုဖြစ်တဲ့ မြန်မာနိုင်ငံရဲတပ်ဖွဲ့ကို ပြောမယ်ဆိုရင် နှစ်ဖက်စလုံးက တာဝန်ယူကိုင်တွယ်သင့်တယ်လို့ မြင်တယ်။ ဒီဘက်က အရပ်ဘက်အစိုးရကရော၊ ပြည်ထဲရေးဝန်ကြီးဌာနကရော၊ ပြည်ထဲရေးဝန်ကြီးဌာနဆိုတာကတော့ တဆင့်ကြည့်မယ်ဆိုရင် တပ်မတော် ပါနေတာပေါ့လေ။ အားလုံးနဲ့ ဒါက ပတ်သက်နေတဲ့ကိစ္စတခုပါ။ မြန်မာနိုင်ငံ ရဲတပ်ဖွဲ့ဆိုတာ အားလုံးနဲ့ ပတ်သက်နေတဲ့ ကိစ္စ၊ အဖွဲ့အစည်းတခုဖြစ်တဲ့အတွက် နှစ်ဦးနှစ်ဖက် ပေါင်းပြီးတော့ ဒါကို အကောင်းဆုံးဖြစ်အောင် တည်ဆောက်သင့်တယ်လို့ ကျနော် မြင်ပါတယ်”လို့ တမ္ပဒီပအင်စတီကျူးမှ ဒေါက်တာခင်ဇော်ဝင်းက ပြောပါတယ်။ မြန်မာနိုင်ငံ ရဲတပ်ဖွဲ့ရဲ့ လိုအပ်ချက်တွေ အားနည်းချက်တွေကို အစိုးရဘက်က သေချာလေ့လာပြီး စီမံဆောင်ရွက်နိုင်ရင်တော့ အမှန်တကယ် ပြုပြင်ပြောင်းလဲနိုင်မယ်လို့ ၈၈ မျိုးဆက် ငြိမ်းချမ်းရေးနှင့်ပွင့်လင်းလူ့အဖွဲ့အစည်းမှ ကိုမြအေးက ပြောပါတယ်။ “မြန်မာနိုင်ငံ ပြည်သူ့ရဲတပ်ဖွဲ့ဆိုတာ ပြည်ထဲရေးဝန်ကြီးဌာနအောက်မှာ ရှိတာလေ။ အဲဒီလို ရှိနေတော့ ပြည်ထဲရေးဝန်ကြီးဌာနက တရားဥပဒေစိုးမိုးရေးကို မဖော်ဆောင်ဘူးလို့ ကျနော် ဆိုလိုတာမဟုတ်ဘူး။ ရဲတပ်ဖွဲ့စွမ်းရည် ဘာတွေ နိမ့်ကျနေလဲ၊ ရဲတပ်ဖွဲ့ရဲ့ လိုအပ်ချက်က ဘာလဲ။ ဒါတွေကို အကုန်လုံးကို ကျနော်တို့က သိဖို့လိုတယ်လေ။ သိပြီးတော့ ပြုပြင်နိုင်ဖို့ လိုတယ်လို့ ကျနော်တို့ မြင်တယ်။ နိုင်ငံရဲ့ အခြေအနေကတော့ အမျိုးသားရင်ကြားစေ့ရေးမူလို့ပဲ ပြောပြော၊ ဒါမှမဟုတ် ကျနော်တို့ ရောက်ရှိနေတဲ့ နိုင်ငံရေးအခြေအနေအရရော တကယ့်ကို ယူနတီဖြစ်တဲ့ အစိုးရတရပ် ဖြစ်ဖို့ လိုတယ်လို့ ကျနော့်အနေနဲ့ မြင်တယ်။” ရဲတပ်ဖွဲ့အနေနဲ့ မှုခင်းကြိုတင်ကာကွယ်ရေးတွေကို စီမံချက်တွေ ရေးဆွဲပြီး ဆောင်ရွက် နေပေမယ့် မှုခင်းဖြစ်ပွားမှုနှုန်း လျော့ကျသွားခြင်း မရှိခဲ့ပါဘူး။ ဒါ့အပြင် မှုခင်းကြီးတွေမှာလည်း အချိန်နဲ့တပြေးညီ သတင်းထုတ်ပြန်မှု၊ ပြည်သူတွေနဲ့ ပူးပေါင်းဆောင်ရွက်မှု အားနည်းနေသေးတဲ့ အပြင် မှုခင်းဖော်ထုတ်မှုပိုင်းမှာလည်း အားနည်းချက်တွေ များစွာ ရှိနေသေးတယ်လို့ နိုင်ငံရေးအသိုင်းအဝိုင်းက ပြောပါတယ်။
5 years Ago

February 3, 2016

မြန်မာနိုင်ငံရဲတပ်ဖွဲ့သင်ရိုးညွှန်းတန်းတွေကို ထောက်ပံ့ကူညီရန် အင်္ဂလန်ရဲတပ်ဖွဲ့ တွေ့ဆုံမည်

မြန်မာနိုင်ငံရဲတပ်ဖွဲ့ သင်တန်းကျောင်းကို နိုင်ငံတကာမှာ ကျင့်သုံးနေတဲ့ ရဲသင်တန်းကျောင်း တွေက သင်ရိုးညွှန်းတမ်းတွေကို အခြေပြုပြီး မြန်မာနိုင်ငံနဲ့ လိုက်လျောညီထွေမှုရှိတဲ့ သင်ရိုးညွှန်းတမ်းတွေ ထောက်ပံ့ကူညီဖို့ မြန်မာနိုင်ငံ ရဲတပ်ဖွဲ့နဲ့ အင်္ဂလန်နိုင်ငံရဲတပ်ဖွဲ့က  တာဝန်ရှိသူတွေနဲ့ တွေ့ဆုံဆွေးနွေးသွားဖို့ ရှိနေပါတယ်။ လက်ရှိမှာလည်း အီးယူက သင်တန်းပေးထားတဲ့ ရဲတပ်ဖွဲတွေအနေနဲ့ ပြည်သူလူထုနဲ့ ပူးပေါင်းဆောင်ရွက်ရာမှာ အဆင်ပြေချောမွေ့ခြင်း ရှိ၊ မရှိ နဲ့ ပြည်သူလူထုကလည်း ရဲတပ်ဖွဲ့ဝင်တွေနဲ့ ဆက်ဆံတဲ့အခါမှာ ဘယ်လိုခက်ခဲမှုတွေ ရှိတယ်ဆိုတာကို လူမှု အဖွဲ့အစည်းတွေနဲ့ တွေ့ဆုံကာ ရန်ကုန်မြို့၊ မန္တလေးမြို့နဲ့ ပုသိမ်မြို့တွေမှာ အင်္ဂလန်နိုင်ငံက လူမှုကူညီရေးအဖွဲ့ကနေ စစ်တမ်းတွေကောက်ယူနေပါတယ်။ မြန်မာနိုင်ငံ ရဲတပ်ဖွဲ့ကို ပြည်သူဗဟိုပြု ရဲတပ်ဖွဲ့အဖြစ် ပြုပြင်ပြောင်းလဲဖို့အတွက် အီးယူက၂၀၁၄ ခုနှစ်ကစတင်ပြီး သင်တန်းပေးတာတွေ လုပ်ခဲ့ပါတယ်။ ဒါပေမယ့် ပြီးခဲ့တဲ့ ၂၀၁၅ မတ်လအတွင်းက အမျိုးသားပညာရေးဥပဒေနဲ့ပတ်သက်ပြီး ဖြစ်ပေါ်လာတဲ့ လက်ပံတန်း ကျောင်းသားသပိတ်ကို ရဲတပ်ဖွဲ့က အကြမ်းဖက်ဖြိုခွင်းပြီးနောက်ပိုင်း ပြည်သူတွေကြားမှာ ဝေဖန်မှုတွေ ပြင်းထန်ခဲ့ပါတယ်။ ဒါ့အပြင် မြန်မာနိုင်ငံရဲတပ်ဖွဲ့ကို နိုင်ငံတကာ ရဲတပ်ဖွဲ့နည်းတူ ခေတ်မီပြီး လူသားဆန်တဲ့ ရဲတပ်ဖွဲ့အဖြစ် ပြုပြင်ပြောင်းလဲဖို့ အင်္ဂလန်နိုင်ငံက နည်းပညာနဲ့ ရဲတပ်ဖွဲ့ဝင်တွေသင်ကြားဖို့ သင်ရိုးညွန်းတမ်းတွေ ထောက်ပံ့ကူညီသွားမယ်လို့လည်း သိရပါတယ်။
6 years Ago
Up