မြန်မာအမျိုးသမီးဘောလုံးအသင်း

April 4, 2019

အိုလံပစ်ခြေစစ်ပွဲတွင် မြန်မာအမျိုးသမီးအသင်းက နီပေါကို ၃ ဂိုး ၁ ဂိုးဖြင့်နိုင်

၂၀၂၀ အိုလံပစ် အမျိုးသမီးဘောလုံးပြိုင်ပွဲ ဒုတိယအဆင့် ခြေစစ်ပွဲစဉ်အဖြစ် မြန်မာအသင်းနဲ့ နီပေါအသင်းတို့ မနေ့ညနေက ယှဉ်ပြိုင်ရာ မြန်မာအသင်းက ၃ ဂိုး ၁ ဂိုးနဲ့ အနိုင်ရသွားပါတယ်။ မြန်မာအသင်းအတွက် ဂိုးတွေကို ပွဲချိန် ၂၄ မိနစ်မှာ ရီရီဦး၊ ၄၈ မိနစ်နဲ့ ပွဲပြီးကာနီးမှာ ဝင်းသိင်္ဂီထွန်းတို့က သွင်းယူပေးခဲ့ပါတယ်။ နီပေါအသင်းအတွက် တလုံးတည်းသော ချေပဂိုးကိုတော့ ပထမပိုင်း ပြီးခါနီးမှာ နီရူသာပါက သွင်းယူပေးခဲ့ပါတယ်။ ပွဲအပြီးမှာ မြန်မာ့လက်ရွေးစင် အမျိုးသမီးအသင်း နည်းပြချုပ် ဦးဝင်းသူမိုးက "ဒီနေ့ပွဲကတော့ ကလေးတွေရဲ့ ကြိုးစားမှုကြောင့် အနိုင်ရရှိခဲ့တာပါ။ ဒါပေမယ့် အချိတ်အဆက်လေးတွေ လွဲနေသေးတာရှိလို့ သူတို့အမှားတွေကို ထောက်ပြပြီးတော့ နောက်ပွဲတွေအတွက် ပြင်ဆင်သွားမယ်။ နိုင်သင့်တဲ့ပွဲတွေ နိုင်သွားတာ ဝမ်းသာပါတယ်။ ကြိုးစားမှုရဲ့ ရလဒ်က အောင်မြင်မှုတွေဖြစ်စေတယ်။ ကလေးတွေက မိနစ် ၉၀ လုံး ကြိုးစားကစားသွားတယ်။ နီပေါအသင်းက ကြံ့ခိုင်တဲ့အသင်းမျိုး ဖြစ်သလို တဖက်အသင်း ဘောလုံးတည်လို့မရအောင် လိုက်ဖျက်နိုင်တဲ့ အသင်းမျိုးဖြစ်တယ်။ ဆက်ကြိုးစားသွားပါဦးမယ်။ နောက်ပွဲအတွက်ကတော့ သူတို့ရဲ့အားနည်းချက်တွေကို ပြင်ဆင်ပြီးတော့ လိုအပ်ချက် ရှိနေတာလေးတွေကို ပြုပြင်သွားမယ်။ ဒီနေ့ထက်ပိုကောင်းတဲ့ ခြေစွမ်းမျိုးရရှိအောင် လမ်းညွှန်ပေးသွားမယ်" လို့ ပြောသွားကြောင်း မြန်မာဘောလုံးအဖွဲ့ချုပ်က ထုတ်ပြန်ပါတယ်။ ၂၀၂၀ အိုလံပစ်ပြိုင်ပွဲ အမျိုးသမီး ဘောလုံးပြိုင်ပွဲ ဝင်ရောက်ယှဉ်ပြိုင်ခွင့်ရရေး ဒုတိယအဆင့် ခြေစစ်ပွဲစဉ်တွေ ကျင်းပနေရာမှာ မြန်မာအသင်းဟာ အုပ်စု က မှာ အိန္ဒိယ၊ အင်ဒိုနီးရှား၊ နီပေါတို့နဲ့ တအုပ်စုတည်း ကျရောက်နေပြီး အိမ်ရှင်အဖြစ် လက်ခံကျင်းပနေတာ ဖြစ်ပါတယ်။ ဒီအုပ်စုက အမှတ်အများဆုံးရတဲ့ အသင်းတသင်းပဲ အိုလံပစ်ခြေစစ်ပွဲ တတိယအဆင့်ကို တက်ရောက်နိုင်မှာ ဖြစ်ပါတယ်။ မနေ့က အစောပိုင်းယှဉ်ပြိုင်တဲ့ အိန္ဒိယနဲ့ အင်ဒိုနီးရှားတို့ ပွဲစဉ်မှာတော့ အိန္ဒိယက ၂ ဂိုး ဂိုးမရှိနဲ့ အနိုင်ရသွားပါတယ်။ ဒါကြောင့် အုပ်စု က အဖွင့်ပွဲစဉ်တွေ ယှဉ်ပြိုင်အပြီးမှာ မြန်မာနဲ့ အိန္ဒိယတို့ နိုင်ပွဲကိုယ်စီရပြီး ၃ မှတ်စီ တူညီနေပေမယ့် သွင်းဂိုးပိုသာတဲ့ မြန်မာအသင်းက အုပ်စုကို ဦးဆောင်နေပါတယ်။ အုပ်စု ဒုတိယပွဲစဉ်တွေအဖြစ် လာမယ့် ဧပြီ ၆ ရက်နေ့မှာ မြန်မာနဲ့ အင်ဒိုနီးရှား၊ အိန္ဒိယနဲ့ နီပေါတို့ ဆက်လက်ယှဉ်ပြိုင်ရမှာ ဖြစ်ပါတယ်။
3 years Ago

February 18, 2019

ဖိတ်​​ခေါ်ဖလားချန်​ပီယံ မြန်မာအမျိုးသမီးအသင်းအား ဆုကြေးကျပ် သိန်း ၅၅၀ ချီးမြှင့်

အိန္ဒိယနိုင်​ငံမှာ ​​ဖေ​ဖော်​ဝါရီ ၉ ရက်​က​နေ ၁၅ ရက်​အထိ ယှဉ်​ပြိုင်​ကစားခဲ့တဲ့ ​လေးနိုင်​ငံဖိတ်​​ခေါ် Hero Gold Cup ပြိုင်​ပွဲမှာ ​ချန်​ပီယံဖြစ်​ခဲ့တဲ့ မြန်​မာအသင်းကို ဆု​ကြေး ကျပ်​သိန်း ၅၅၀ ချီးမြှင့်​ခဲ့ပါတယ်။ မြန်​မာအမျိုးသမီးအသင်းဟာ အုပ်​စုပွဲစဉ်​​တွေမှာ နီ​ပေါအသင်းကို ၃ ဂိုး ဂိုးမရှိ၊ အီရန်​နဲ့ အိန္ဒိယအသင်း​တွေကို ၂ ဂိုး ဂိုးမရှိ ရလဒ်​​တွေနဲ့ အသီးသီး အနိုင်​ရခဲ့တာ ဖြစ်​ပါတယ်​။ ဒီနောက်​ ​ဖေ​ဖော်​ဝါရီ ၁၅ ရက်​က ကစားခဲ့တဲ့ ဗိုလ်​လုပွဲမှာလည်း နီ​ပေါအသင်းနဲ့ တွေ့ဆုံရာမှာ ၃ ဂိုး ၁ ဂိုး ရလဒ်​​နဲ့ အနိုင်​ရ ဗိုလ်​စွဲခဲ့တာ ဖြစ်​ပါတယ်​။ ချန်​ပီယံဆုဖလား ရယူနိုင်ခဲ့တဲ့ မြန်မာ့လက်ရွေးစင် အမျိုးသမီးဘောလုံးအသင်းဟာ ​ဖေ​ဖော်ဝါရီ ၁၇ ရက်​က ရန်​ကုန်​မြို့ဆီ ပြန်​လည်​​ရောက်ရှိလာခဲ့ပြီး မြန်မာဘောလုံးအဖွဲ့ချုပ် (MFF) ဥက္ကဋ္ဌ ဦးဇော်ဇော်က နိုဗိုတယ် ရန်ကုန် မက်စ်မှာ ဂုဏ်ပြုနေ့လယ်စာနဲ့ တည်ခင်းဧည့်ခံခဲ့ပါတယ်။ အဲဒီ​နောက် ဆုချီးမြှင့်ပွဲ ပြုလုပ်​ရာမှာ ​​MFF နာယက ဦးအောင်ကိုဝင်းက ကျပ်သိန်း ၂၀၀၊ MFF ဥက္ကဋ္ဌ ဦးဇော်ဇော်က ကျပ်သိန်း ၂၀၀၊ အမျိုးသမီး ဘောလုံးကော်မတီ ဥက္ကဋ္ဌ ဦးလှ​ဌေးနဲ့ အဖွဲ့ဝင်တွေက ကျပ်သိန်း ၁၀၀၊ ဦးထွန်းနဲ့ မမို့ (Poe Poe Car Company) က ကျပ်သိန်း ၅၀၊ စုစုပေါင်း ကျပ်သိန်း ၅၅၀ ကို ဂုဏ်ပြုချီးမြှင့်ခဲ့ကြတာ ဖြစ်​ပါတယ်​။ MFF ဥက္ကဋ္ဌက ဦး​ဇော်​​ဇော်​က "လေးနိုင်ငံပွဲ ချန်ပီယံဖြစ်ခဲ့တဲ့အတွက် ချီးကျူးဂုဏ်ပြုပါတယ်။ လာမယ့် အာဆီယံအဆင့် ပြိုင်ပွဲတွေ၊ ဆီးဂိမ်းစ်နဲ့ အာရှအဆင့် ပြိုင်ပွဲတွေမှာ အောင်မြင်မှုရဖို့ အစွမ်းကုန် ပိုမိုကြိုးစားပေးကြပါလို့ တိုက်တွန်းလိုပါတယ်" လို့ ပြောကြားသွားပါတယ်​။ မြန်​မာ့လက်​​ရွေးစင် အမျိုးသမီးအသင်းကို နည်းပြချုပ် ဦးဝင်းသူမိုး တာဝန်ယူ ကိုင်တွယ်နေတာဖြစ်​ပြီး လာမယ့် ​ဧပြီလအတွင်း တိုကျိုအိုလံပစ် ဒုတိယအဆင့် ခြေစစ်ပွဲအဖြစ်​ နီပေါ၊ အိန္ဒိယ၊ အင်ဒိုနီးရှားတို့နဲ့ ဆက်​ပြီး ယှဉ်​ပြိုင်​ကစားရဖို့ ရှိပါ​တယ်​။
3 years Ago
More News
Up