မြင်းကျား

September 2, 2018

မြည်းများကို မြင်းကျားအဖြစ် ဆေးဆိုးပြသခြင်းမရှိဟု အီဂျစ်တိရစ္ဆာန်ရုံ ရှင်းလင်း

မြည်းတွေကို ဆေးဆိုးကာ မြင်းကျားအဖြစ် ပြသထားခြင်း မရှိကြောင်း အီဂျစ်တိရိစ္ဆာန်ရုံတရုံက ပြန် လည်ဖြေရှင်းခဲ့တယ်လို့ cbs သတင်းမှာဖော်ပြပါတယ်။ ဒီတိရစ္ဆာန်ရုံက မြည်းတွေအား ဆေးဆိုးပြီး လာရောက်သူတွေကို လိမ်ညာနေကြောင်း သတင်းတွေ ထွက်ပေါ်လာခဲ့ပြီးတဲ့နောက်မှာ တိရစ္ဆာန်ရုံတာဝန်ရှိသူတွေက အခုလို ပြန်လည်ဖြေရှင်းလိုက်တာပဲ ဖြစ်ပါတယ်။ အစွပ်စွဲခံရတဲ့ တိရစ္ဆာန်ရုံဟာ ကိုင်ရိုမြို့မှာရှိတဲ့ အင်တာနေရှင်နယ်ဂါးဒန်းဖြစ်ပြီး စွပ်စွဲမှုကို မာမွတ်ဆာ ဟန်ဆိုတဲ့ ကျောင်းသားတယောက်က စတင်ခဲ့တာပဲဖြစ်ပါတယ်။ နောက်ပိုင်းမှာမှ မာမွတ်ရဲ့ဓာတ်ပုံက အွန်လိုင်းမှာ ပျံ့နှံ့ခဲ့ပြီး တိရစ္ဆာန်ရုံဟာလည်း ပြင်းထန်တဲ့ ဝေဖန်မှုတွေနဲ့ ရင်ဆိုင်လာရတာဖြစ်ပါတယ်။ မာမွတ်က တိရစ္ဆာန်ရုံမှာရှိတဲ့ မြင်းကျားနှစ်ကောင်ဟာ မြည်းတွေကို ဆေးဆိုးထားတာ ဖြစ်တယ်လို့ စွပ်စွဲခဲ့ပေမယ့် တိရစ္ဆာန်ရုံ ဒါရိုက်တာကတော့ ဒီစွပ်စွဲချက်တွေကို ငြင်းဆန်ကာ သူတို့ဆီက မြင်းကျားတွေဟာ တကယ်မြင်းကျား အစစ်အမှန်တွေဖြစ်တယ်လို့ ပြန်လည်ချေပလိုက်တာပဲ ဖြစ်ပါတယ်။ အီဂျစ်နိုင်ငံမှာ မြည်းတွေကို ဆေးဆိုးပြီး မြင်းကျားအဖြစ် ပြသထားတဲ့ကိစ္စဟာ ဒီတခေါက်ပထမဆုံးတော့ မဟုတ်ပါဘူး။ ၂ဝဝ၉ ခုနှစ်တုန်းကလည်း ဂါဇာမှာရှိတဲ့ တိရစ္ဆာန်ရုံတခုဟာ ဒီလိုလုပ်တယ်လို့ဝန်ခံခဲ့ရပြီး အစ္စရေးရဲ့ ပိတ်ဆို့မှုတွေကြောင့် မြင်းကျားအစစ်ကို မဝယ်နိုင်တာလို့လည်း ပြောခဲ့ပါတယ်။ တိရစ္ဆာန်တွေကို ဆေးဆိုးပြီး အခြားတိရစ္ဆာန်ပုံစံမျိုးပြသမှုကို သတင်းတွေမှာ မကြာခဏ မြင်တွေ့ရလေ့ရှိပြီး ၂ဝ၁၃ ခုနှစ်တုန်းကလည်း တရုတ်မှာရှိတဲ့ တိရစ္ဆာန်ရုံတခုဟာ ကြီးမားတဲ့ ခွေးကြီးတွေကို ပြင်ဆင်ပြီး ခြင်္သေ့အဖြစ် ပြသခဲ့လို့ ပြင်းပြင်းထန်ထန် ဝေဖန်ရှုတ်ချ ခံခဲ့ရဖူးပါတယ်။
3 years Ago

July 17, 2017

မိကျောင်းလက်မှ လွတ်သော်လည်း ခြင်္သေ့ ၂ ကောင် ကိုက်သတ်ခံခဲ့ရသည့် မြင်းကျား (ရုပ်သံ)

အန္တရာယ်တခုကနေ လွတ်မြောက်လို့မှ မကြာသေးခင် နောက်ထပ် အန္တရာယ်တခုက စောင့်ကြိုနေပြီး အလစ်တိုက်ခိုက်ခံခဲ့ရတဲ့ အဖြစ်ဟာ တကယ့်ကို ကြမ္မာငင်တဲ့နေ့ ဖြစ်နေမှာပါပဲ။ ဒီအဖြစ်အပျက်ဟာ ကင်ညာနိုင်ငံ၊ မာဆိုင်မာယာ အမျိုးသား သဘာဝဘေးမဲ့တောတခုတွင်းမှာ ဖြစ်ခဲ့ပြီး ရှုမျှော်ခင်းကြည့် ကောင်းကင်ဘောလုံးဆီကနေ ရိုက်ယူထားနိုင်ခဲ့တာဖြစ်တယ်လို့ ဒေးလီးမေးလ်သတင်းမှာ ဇူလိုင် ၁၄ ရက်နေ့က ဖော်ပြပါတယ်။ မြင်းကျားတကောင်ဟာ ရေထဲက မိကျောင်းတကောင်ရဲ့ တိုက်ခိုက်မှုကနေ လွတ်မြောက်လာခဲ့ချိန်မှာ ခြင်္သေ့ ၂ ကောင်က ထပ်မံတိုက်ခိုက်ခံခဲ့ရတာ ဖြစ်ပါတယ်။ မြင်းကျားဟာ ရေထဲကနေ ဖြတ်ကူးခဲ့ချိန်မှာ သူ့ဆီ ရွေ့လျားလာတဲ့ မိကျောင်းကို မြင်ခဲ့ပြီး အန္တရာယ်မပေးနိုင်ခင်မှာ လက်မတင်လေး လွတ်မြောက်လာခဲ့တာ ဖြစ်ပါတယ်။ သူဟာ ကမ်းပေါ်ကိုတက်ကာ မြက်ခင်းလွင်ပြင်ဆီ ထွက်ပြေးခဲ့တာပါ။ ဒါပေမယ့် အဲဒီမြက်ခင်းလွင်ပြင်ထဲမှာ သူမျှော်လင့်မထားတဲ့ အန္တရာယ်နောက်တခုက စောင့်ကြိုနေခဲ့တာကိုတော့ မသိခဲ့ပါဘူး။ မြင်းကျားဟာ အရှိန်နဲ့ ပြေးတက်လာခဲ့ချိန်မှာ ခြင်္သေ့တကောင်က သူ့နောက်က ပြေးလိုက်ခဲ့ပြီး လည်ပင်းကိုကိုက်ခဲကာ မြေပြင်ဆီ လှဲချနိုင်ခဲ့တာပါ။ ရုပ်သံဗွီဒီယိုဖိုင်ထဲမှာ ရိုက်ကူးနေသူတွေဆီက ထိတ်လန့်တကြား အော်ဟစ်နေကြတဲ့ အသံတွေကိုလည်း ကြားရပါတယ်။ အဲဒီနောက်တော့ နောက်ထပ် ခြင်္သေ့တကောင်ပါ ရောက်ရှိလာခဲ့ပြီး မြင်းကျားကို ကိုက်ခဲ တိုက်ခိုက်ခဲ့ကြတာကို တွေ့ရပါတယ်။ မိုးပျံဘောလုံးပေါ် လိုက်ပါလာသူတဦးကတော့ “အိုး… ဒါဟာ မြင်းကျားတကောင်ရဲ့ နောက်ဆုံးအချိန်ကို ကြည့်နေရတာပဲ။ ခြင်္သေ့ ၂ ကောင်ဟာ သူ့ကို အမဲဖျက်လိုက်ကြတယ်။ ဒါကိုကြည့်ရတာ အသည်းထိတ်စရာ” လို့ ပြောခဲ့တာပါ။ ဒီရုပ်သံဗွီဒီယိုဖိုင်ကို ဆာဖာရီလိုက်ဖ် ယူကျု အင်တာနက်စာမျက်နှာပေါ်မှတဆင့် မျှဝေခဲ့ချိန်မှာတော့ အချိန်အနည်းငယ်အတွင်း ဝင်ရောက်ကြည့်ရှုသူ ၁၂၀၀၀ ကျော် ရှိခဲ့တယ်လို့ သတင်းမှာ ဖော်ပြပါတယ်။
4 years Ago
Up