ဖြူဖြူကျော်သိန်း

March 28, 2018

ကြည့်ရှုသူ ၄ သိန်းကျော်ရှိပြီဖြစ်တဲ့ ဖြူဖြူကျော်သိန်းနှင့် အမေရိကန်အဆိုတော်သီချင်းသစ်(ရုပ်သံ)

  နာမည်ကြီးအဆိုတော် ဖြူဖြူကျော်သိန်းနဲ့ အမေရိကန်အဆိုတော် Lanciferတို့ ပူးပေါင်း သီဆိုထားတဲ့ “Miracle အံ့သြဖွယ်” အမည်ရတဲ့ သီချင်းသစ် ထွက်ရှိလာပါတယ်။ ဒီသီချင်းကို ဖြူဖြူကျော်သိန်းက သူ့ရဲ့ ဖေ့စ်ဘွတ်ခ် လူမှုကွန်ရက်စာမျက်နှာပေါ်မှာ မတ်လ ၂၅ ရက်ကတည်းက မျှဝေထားခဲ့တာဖြစ်ပြီး ပရိသတ်တွေကြားမှာ ရေပန်းစားနေခဲ့တာ ဖြစ်ပါတယ်။ မယ်လိုဒီရော၊ ရက်ပ်တွေပါ ပါဝင်ကာ အင်္ဂလိပ်လိုရော၊ မြန်မာလိုသီချင်းစာသားတွေ ပေါင်းစပ်ဖန်တီးထားတဲ့ ဒီသီချင်းရုပ်သံဗွီဒီယိုဖိ်ုင်ထဲမှာတော့ မြန်မာအက အလှတွေရော၊ အဆိုတော်တွေရဲ့ သရုပ်ဆောင်ချက်တွေကိုပါ ထူးထူးခြားခြားရှုစားကြရမှာ ဖြစ်ပါတယ်။ လက်ရှိမှာတော့ ဒီသီချင်းရုပ်သံဗွီဒီယိုဖိုင်ကို ဝင်ရောက်ကြည့်ရှုကြတဲ့ အကြိမ်ရေ ၄ သိန်း ကျော်သွားခဲ့ပြီ ဖြစ်ပါတယ်။ အသံပါဝါအားကောင်းကောင်းနဲ့ သီချင်းဆိုလေ့ရှိတဲ့ ဖြူဖြူကျော်သိန်းဟာ လတ်တလောမှာတော့ နှလုံးသားဒိုင်ယာရီထဲက သီချင်းများ-၂၊ မန်းသီရိတေးသံသွင်း နှစ် ၄၀ ပြည့် ဂီတသင်္ကေတ၊ တေးရေးဂီတစာဆို ကိုလေးလွင် အမှတ်တရရွှေသီချင်းများ၊ လှိုင်းနှစ် ၅၀ ပြည့် ရွှေရတုသီချင်းများ အစရှိတဲ့ တေးစီးရီးအခွေထဲမှာ ပါဝင်သီဆိုထားပါတယ်။ Photo : Phyu Phyu Kyaw Thein
4 years Ago

February 26, 2018

ဖြူဖြူကျော်သိန်းနှင့် အမေရိကန်အဆိုတော် ပူးပေါင်း၍  Miracle သီချင်းကို သီဆိုမည်

ဂီတလောကမှာ အသစ်အဆန်းဖြစ်ဖို့အတွက် ရည်ရွယ်ပြီး “Miracle” အမည်ရ တေးသီချင်းကို အမေရိကန်အဆိုတော်တဦးဖြစ်တဲ့ Luncifer နဲ့အတူ ပူးပေါင်းသီဆိုသွားမယ်လို့  အဆိုတော် ဖြူဖြူကျော်သိန်း ပြောပါတယ်။ “ဖြူဖြူနဲ့ Luncifer ပထမဦးဆုံး ပူးပေါင်းပြီး သီချင်းလေးလုပ်ဖို့ ရှိပါတယ်။ သီချင်းစာသားကို သူတို့ဘက်က မြန်မာလိုရော၊ အင်္ဂလိပ်လိုရော ရေးပေးတယ်။ အဲဒါကို On Air အစီအစဉ်မှာ စပြီး ကြော်ငြာမယ်။ သူတို့ဂီတပုံစံက ဖြူဖြူအတွက်ရော၊ ပရိသတ်တွေအတွက်ရော၊ ဒီက ဂီတအနေအထားအတွက်ရော ပုံစံအသစ်လေးတခု ဖြစ်မယ်လို့ ယုံကြည်တယ်။ သီချင်းလေးထဲမှာ မယ်လိုဒီစာသားရော၊ ရက်ပ်စာသားရော ပါတယ်။ ဖြူဖြူကတော့ မယ်လိုဒီစာသားကို ဆိုမှာပါ။ ဂီတလောကအတွက် အသစ်အဆန်းဖြစ်မယ်လို့ ထင်ပြီး စွန့်စားလုပ်ကြည့်တဲ့ သဘောပါ။” မတ် ၁၈ ရက်နေ့မှာ Channel 7 ရဲ့ On Air အစီအစဉ်ကနေ  ထုတ်လွှင့်ပြသသွားမယ်လို့ ဖြူဖြူကျော်သိန်းက ပြောပါတယ်။ အဆိုတော်ဖြူဖြူကျော်သိန်းက ဂီတလောကမှာ ကိုယ်ပိုင်သီချင်းတွေကိုသာ သီဆိုတာများပြီး ပြန်ဆိုတေးသီဆိုရင်လည်း မိမိကိုယ်ပိုင်ဟန် ကိုယ်ပိုင်အသံနဲ့သာ သီဆိုတယ်လို့ ဆိုပါတယ်။ “ဖြူဖြူ လွန်ခဲ့တဲ့ ၁၄ နှစ်လောက်ကတည်းက သီချင်းတွေကို သီဆိုခဲ့တာပါ။ ဖြူဖြူ သီချင်းစဆိုတုန်းကထက် အခုအချိန်က ပိုပြီး ပြန်ဆိုတေးတွေဆိုတာ များပါတယ်။ အဆိုတော် တော်တော်များများကလည်း ပြန်ဆိုတေးတွေ ဆိုကြပါတယ်။ အဲဒီထဲမှာ ပြန်ဆိုတေးကို ဖြူဖြူကိုယ်တိုင်လည်း သိပ်ပြီး မဆိုခဲ့ပါဘူး။ ပြန်ဆိုတေး အနည်းဆုံးဆိုတဲ့ အဆိုတော်လို့တောင် ပြောလို့ရပါတယ်။ ပြန်ဆိုတေးကို ဆိုရတယ်ဆိုရင်လည်း အရင်ကဆိုခဲ့တဲ့ အဆိုရှင်တွေ၊ သီချင်းရေးသားပေးခဲ့တဲ့ သူတွေကို လေးစားတဲ့စိတ်နဲ့ အမြဲ အကောင်းဆုံး ပြန်သီဆိုပါတယ်။ နောက်တခုက ဖြူဖြူ ပြန်ဆိုတေးဆိုရင်လည်း ဖြူဖြူ့ပင်ကိုပုံစံနဲ့ ပင်ကိုဟန်နဲ့ပဲ သီဆိုဖြစ်ပါတယ်။” လတ်တလောမှာတော့  ဖြူဖြူကျော်သိန်းဟာ နှလုံးသားဒိုင်ယာရီထဲက သီချင်းများ-၂၊ မန်းသီရိတေးသံသွင်း နှစ် ၄၀ ပြည့် ဂီတသင်္ကေတ၊ တေးရေးဂီတစာဆို ကိုလေးလွင် အမှတ်တရရွှေ သီချင်းများ၊ လှိုင်းနှစ် ၅၀ ပြည့် ရွှေရတုသီချင်းများ အစရှိတဲ့ တေးစီးရီးအခွေထဲမှာ ပါဝင်သီဆိုထားပါတယ်။
4 years Ago
Up