‘ပြုပြင်ပြောင်းလဲမှု

January 10, 2019

‘ပြုပြင်ပြောင်းလဲမှု စံနမူနာပြ ထွေအုပ်က’ဟု ဆိုနိုင်အောင် ကြိုးပမ်းရန် ၀န်ကြီးတိုက်တွန်း

‘ပြုပြင်ပြောင်းလဲမှု စံနမူနာပြ ထွေအုပ်က’လို့ ဆိုနိုင်တဲ့အထိ  ဖြစ်လာအောင် ဝိုင်းဝန်းကြိုးပမ်းအားထုတ်ပေးကြဖို့ ပြည်ထောင်စုအစိုးရအဖွဲ့ရုံးဝန်ကြီးဌာန ပြည်ထောင်စုဝန်ကြီး ဦးမင်းသူက ထွေအုပ်ဝန်ထမ်းတွေကို ပြောကြားလိုက်ပါတယ်။ ဇန်န၀ါရီ ၉ ရက်က မြစ်ကြီးနားမြို့မှာ ၀န်ကြီးနဲ့ ကချင်ပြည်နယ်၊ ခရိုင်၊ မြို့နယ် အထွေထွေ အုပ်ချုပ်ရေးဦးစီးဌာနဝန်ထမ်းများ တွေ့ဆုံပွဲမှာ ပြောခဲ့တာဖြစ်ပါတယ်။ အထွေထွေအုပ်ချုပ်ရေးဌာနကို ပြည်ထဲရေးဝန်ကြီးဌာနလက်အောက်ကနေ အစိုးရအဖွဲ့ရုံး ၀န်ကြီး ဌာနအောက်ကို ပြောင်းရွှေ့လိုက်တဲ့အတွက် မစိုးရိမ်ကြဖို့လည်း ၀န်ကြီး က ပြောပါတယ်။ “ဝန်ထမ်းတွေကို နိုင်ငံတော်အစိုးရရဲ့ မူဝါဒတွေနဲ့ ပတ်သက်ပြီး အလေးအနက်ထား မှာကြားချင်တဲ့အဓိကအချက်(၂)ချက် ရှိပါတယ်။ နံပါတ် (၁) အချက်က အထွေထွေအုပ်ချုပ်ရေးဦးစီး ဌာနကြီး မိမိတို့ဝန်ကြီးဌာနအောက်ကို ပြောင်းရွှေ့လိုက်တဲ့အတွက် ဘာတွေများဖြစ်လာမလဲဆိုတဲ့ စိုးရိမ် ပူပန်မှုမရှိကြဖို့ ပထမဆုံး ပြောချင်ပါတယ်။ နံပါတ်(၂)အနေနဲ့ ပြောင်းလဲလာတဲ့ မူဝါဒ ညွှန်ကြားချက် တွေနဲ့ အညီ ပြုပြင်ပြောင်းလဲမှုများကို လိုက်ပါဆောင်ရွက်တဲ့ နေရာမှာ လူထုကို မျက်နှာမူပြီး အပြောင်းအလဲတွေ ဖော်ဆောင်နိုင်အောင် ကြိုးပမ်းကြဖို့ မှာကြားချင်ပါတယ်။” ဒါ့အပြင်  အစိုးရ ပြုပြင်ပြောင်းလဲရေး ဆောင်ရွက်ရာမှာ ပြည်သူလူထုနဲ့ နီးစပ်တဲ့ အောက်ခြေက စတင်မယ်၊ ပြည်သူနဲ့အတူ စုပေါင်းအင်အားနဲ့ ချဉ်းကပ်မယ်၊ပြည်သူ့ဆန္ဒကို အလေးထားပြီး တည်ဆောက်မယ်၊ ပြုပြင်ပြောင်းလဲမှုနဲ့ အံမဝင်တဲ့ နေရာတွေမှာ လူစားလဲမှုတွေ ပြုလုပ်မယ်ဆိုတဲ့ မူဝါဒ(၄)ရပ်နဲ့ ဆောင်ရွက်သွားဖို့ သမ္မတက မှာထားတယ်လို့လည်း ထွေအုပ်ဝန်ထမ်းတွေကို ၀န်ကြီး ဦးမင်းသူ က ပြောပါတယ်။ ဝန်ထမ်း တဦးချင်း ကိုယ်တိုင်က စိတ်ဓာတ်နဲ့ ခံယူချက်ကို စတင်ပြုပြင်ပြောင်းလဲကြဖို့၊ ကြိုးနီစနစ်နဲ့ ခေါက်ရိုးကျိုး ဖြစ်မနေဖို့နဲ့  ပြုပြင်ပြောင်းလဲလိုစိတ် ပြင်းပြတဲ့ Reform Minded ရှိနေဖို့ အလေးအနက်ထား တိုက်တွန်းပြောသွားပါတယ်။ အထွေထွေအုပ်ချုပ်ရေးဝန်ကြီးဌာနကို ပြည်ထဲရေးဝန်ကြီးဌာနလက်အောက်ကနေ အစိုးရအဖွဲ့ရုံးဝန်ကြီးဌာနအောက်ကို ပြောင်းရွှေ့ပြီးတဲ့နောက် ထွေအုပ်ကို ကိုင်တွယ်မယ့် ၀န်ကြီးနဲ့ ထွေအုပ်ဝန်ထမ်းတွေ ပထမဆုံး တွေ့ဆုံကြတာ ဖြစ်ပါတယ်။ ပြည်ထဲရေးဝန်ကြီးဌာန လက်အောက်ရှိ အထွေထွေအုပ်ချုပ်ရေးဦးစီးဌာနကို ဒီဇင်ဘာ ၂၈ ရက်ကစပြီး ပြည်ထောင်စုအစိုးရအဖွဲ့ရုံး ဝန်ကြီးဌာနလက်အောက်ကို  လွှဲပြောင်းဖွဲ့စည်း တာဝန်ထမ်းဆောင်စေခဲ့ပါတယ်။
2 years Ago
Up