ပြည်ထောင်စုသဘောတူစာချုပ်

September 10, 2018

ပြည်ထောင်စုသဘောတူစာချုပ်အရ ၂၀၀၈ ဖွဲ့စည်းပုံကိုပြင်မည်

နိုင်ငံရေးဆွေးနွေးပွဲတွေကနေ ထွက်ပေါ်လာမယ့် ပြည်ထောင်စုသဘောတူစာချုပ်အရ ဖွဲ့စည်းပုံအခြေခံဥပဒေကို ပြင်ဆင်ဖြည့်စွက်ပယ်ဖျက်သွားရမယ်လို့ အပစ်ရပ် တိုင်းရင်းသားလက်နက်ကိုင်တပ်ဖွဲ့ ညီလာခံ  သဘာပတိ  ပူးဇင်ကျုံး က ပြောပါတယ်။ ထိုင်းနိုင်ငံ၊ ချင်းမိုင်မြို့မှာ စက်တင်ဘာ ၉ ရက်က ကျင်းပတဲ့ တနိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ်လတ်မှတ်ရေးထိုးထားတဲ့ တိုင်းရင်းသား လက်နက်ကိုင် အဖွဲ့အစည်းများရဲ့ ထိပ်သီးခေါင်းဆောင်များ တတိယအကြိမ်တွေ့ဆုံဆွေးနွေးပွဲ ဒုတိယနေ့မှာ ပြောခဲ့တာ ဖြစ်ပါတယ်။ “အန်စီအေမှာ အတိအလင်း ဖော်ပြထားတဲ့အတိုင်း နိုင်ငံရေးဆွေးနွေးပွဲ အဆင့်ဆင့် ကနေ ထွက်ပေါ်လာမယ့် ပြည်ထောင်စုသဘောတူစာချုပ်အရ လက်ရှိ ပြည်ထောင်သမ္မတ မြန်မာနိုင်ငံရဲ့ ဖွဲ့စည်းပုံအခြေခံဥပဒေကို ပြင်ဆင်ဖြည့်စွက်ပယ်ဖျက်ခြင်းများ ပြုလုပ်သွားကြရမှာ ဖြစ်ပါတယ်။ ဤသဘောတူညီချက်ကို အပြည့်အ၀ အကောင်အထည်ဖော်ရေးအတွက် ပြည်ထောင်စုသမ္မတ မြန်မာနိုင်ငံတော်အစိုးရနဲ့ တိုင်းရင်းသားလက်နက်ကိုင် အဖွဲ့အစည်းများ အကြား သန္နိဋ္ဌာန်ပြုထားပြီး ဖြစ်ပါတယ်။” ၂၀၀၈ ဖွဲ့စည်းပုံအခြေခံဥပဒေကို ပြင်နိုင်မှပဲ တိုင်းရင်းသားပြည်သူလူထု လိုလား တောင့်တနေတဲ့ ငြိမ်းချမ်းသာယာတဲ့နိုင်ငံတော် တည်ဆောက်နိုင်မှာ ဖြစ်တယ်လို့လည်း ပြောပါတယ်။ တနိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ် လက်မှတ်ရေးထိုးထားတဲ့ တိုင်းရင်းသား လက်နက်ကိုင်အဖွဲ့အစည်းများရဲ့ တတိယအကြိမ်မြောက် ထိပ်သီးခေါင်းဆောင် များ အစည်းအဝေး (3rd NCA-S EAO Summit) ကို စက်တင်ဘာ ၈ ရက်ကနေ ၁၁ ရက်နေ့အထိ ထိုင်းနိုင်ငံ ချင်းမိုင်မြို့မှာ ပြုလုပ်နေပါတယ်။ အစည်းအဝေးမှာ  ပြည်ထောင်စုငြိမ်းချမ်းရေးညီလာခံ ၂၁ ရာစုပင်လုံ တတိယအစည်း အဝေးနဲ့ နိုင်ငံရေးဆွေးနွေးမှုဆိုင်ရာမူဘောင် (Framework for Political Dialogue) ပြန်လည်သုံးသပ်တာ ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ ကိစ္စရပ်တွေ၊ အလွတ်သဘောဆွေးနွေးမှုဆိုင်ရာကိစ္စရပ်တွေ အပါအ၀င် NCA-S EAO ရဲ့ ရှေ့ဆက်ဆောင်ရွက်မယ့် ငြိမ်းချမ်းရေးလုပ်ငန်းစဉ်တွေနဲ့ပတ်သက်တဲ့ အကြောင်းအရာတွေ ဆွေးနွေးနေကြတာ ဖြစ်ပါတယ်။
3 years Ago

August 7, 2018

ပြည်ထောင်စုသဘောတူစာချုပ် အပိုင်း (၂) ကို  လွှတ်တော် အတည်ပြု

ပြည်ထောင်စုငြိမ်းရေးညီလာခံ ၂၁ ရာစု ပင်လုံ တတိယအစည်းအဝေး ရလဒ်ဖြစ်တဲ့  အချက် ၁၄ ချက်ပါ ပြည်ထောင်စုသဘောတူစာချုပ်ရဲ့ အစိတ်အပိုင်း ၂ ကို ဒီနေ့ ပြည်ထောင်စုလွှတ်တော်မှာ အတည်ပြုလိုက်ပါတယ်။ သြဂုတ် ၇ ရက်က ပြည်ထောင်စုလွှတ်တော်ကို သမ္မတက ပေးပို့ထားတဲ့ ပြည်ထောင်စု သဘောတူစာချုပ်ရဲ့ အစိတ်အပိုင်း ၂ ကို ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီဝင် ဦးထွန်းထွန်းဦးက တင်သွင်းပြီး ပြည်ထောင်စုလွှတ်တော်က ကန့်ကွက်သူမရှိဘဲ အတည်ပြုခဲ့တာ ဖြစ်ပါတယ်။ နိုင်ငံရေးကဏ္ဍ ၄ ချက်၊ စီးပွားရေးကဏ္ဍ ၁ ချက်၊ လူမှုရေးကဏ္ဍ ၇ ချက်နဲ့ မြေယာကဏ္ဍ ၂ ချက် စုစုပေါင်း အချက် ၁၄ ချက် ပါဝင်တဲ့ ပြည်ထောင်စု သဘောတူစာချုပ်ရဲ့ အစိတ်အပိုင်း ၂ ကို ဇူလိုင် ၁၆ ရက်က ပြီးခဲ့တဲ့ ပင်လုံညီလာခံ တတိယအကြိမ် အစည်းအဝေးမှာ သဘောတူ လက်မှတ်ရေးထိုးခဲ့ကြတာ ဖြစ်ပါတယ်။ ၂၁ ရာစု ပင်လုံညီလာခံ ဒုတိယအကြိမ် အစည်းအဝေးကနေ ပြည်ထောင်စု သဘောတူစာချုပ် အစိတ်အပိုင်း ၁ အဖြစ် ၃၇ ချက် အတည်ပြုထားခဲ့ပြီး ပြီးခဲ့တဲ့ တတိယအကြိမ်မှာ ထပ်မံအတည်ပြု သဘောတူခဲ့တဲ့ ၁၄ ချက်နဲ့ဆိုရင် ပြည်ထောင်စု သဘောတူစာချုပ်မှာ စုစုပေါင်း အချက် ၅၁ ချက် ရှိပါတယ်။ ပြည်ထောင်စုသဘောတူစာချုပ်၊ အစိတ်အပိုင်း ၁ မှာ နိုင်ငံရေးကဏ္ဍ မူဝါဒ သဘောတူညီချက် ၁၂ ချက်၊ စီးပွားရေးကဏ္ဍ မူဝါဒ သဘောတူညီချက် ၁၁ ချက်၊ လူမှုရေးကဏ္ဍ မူဝါဒ သဘောတူညီချက် ၄ ချက်နဲ့ မြေယာနှင့် သဘာဝပတ်ဝန်းကျင်ကဏ္ဍ မူဝါဒ သဘောတူညီချက် ၁၀ ချက် စုစုပေါင်း ၃၇ ချက် ပါဝင်ပါတယ်။ ပြည်ထောင်စုသဘောတူစာချုပ် အစိတ်အပိုင်း ၁ နဲ့ ၂ ရရှိဖို့အတွက် အစိုးရအစုအဖွဲ့ ကိုယ်စားလှယ်၊ လွှတ်တော်အစုအဖွဲ့ ကိုယ်စားလှယ်၊ တပ်မတော်အစုအဖွဲ့ ကိုယ်စားလှယ်၊ တိုင်းရင်းသားလက်နက်ကိုင် အဖွဲ့အစည်းများ အစုအဖွဲ့ ကိုယ်စားလှယ်၊ နိုင်ငံရေးပါတီများ အစုအဖွဲ့ ကိုယ်စားလှယ်တို့ ပါဝင်ဆွေးနွေးခဲ့ကြရတာ ဖြစ်ပါတယ်။ Photo : Union Peace Conference - 21st Century Panglong - Third Session
3 years Ago
Up