ပြည်ထောင်စုလွှတ်တော်မီဒီယာခန်း သတင်းထောက်များ ၀င်ခွင့်ပိတ်

June 25, 2015

ဖွဲ့စည်းပုံပြင်ဆင်ရေး လွှတ်တော်တွင် လိုအပ်သည့် ထောက်ခံမဲမရဘဲ ရှုံးနိမ့်

ဖွဲ့စည်းပုံအခြေခံဥပဒေပါ ပုဒ်မ ၄၃၆ နဲ့ ၅၉ (စ) အပါအ၀င် အရေးပါတဲ့ ပုဒ်မတွေ ပြင်ဆင်ဖို့နဲ့ ပတ်သက်ပြီး ပြည်ထောင်စုလွှတ်တော်မှာ ဒီကနေ့ မဲခွဲဆုံးဖြတ်ရာမှာ လိုအပ်တဲ့  ထောက်ခံမဲ အရေအတွက် မရဘဲ ရှုံးနိမ့်သွားပါတယ်။ ဖွဲ့စည်းပုံအခြေခံဥပဒေကို ပြင်ဆင်သည့် ဥပဒေမူကြမ်း  ပုဒ်မ ၄၃၆ ပုဒ်မခွဲ (က) နဲ့ (ခ) အတွက် လွှတ်တော်ရဲ့ အဆုံးအဖြတ်ရယူရမှာ ထောက်ခံမဲ ၃၈၈ မဲစီရပါတယ်။ ပုဒ်မ ၅၉ (စ) ပြင်ဆင်ဖို့ မဲခွဲရမှာတော့ ၃၂၁ မဲ ရပြီး ရှုံးနိမ့်သွားပေမယ့်  ပုဒ်မ ၅၉ (ဃ) ကတော့ ပြင်ဆင်ဖို့အတွက် လိုအပ်တဲ့ ထောက်ခံမဲ ၅၅၆ မဲရပြီး အနိုင်ရသွားပါတယ်။  အလားတူ ပုဒ်မ ၆၀ (ဂ) က ၃၈၆ မဲ ရပြီး  ပုဒ်မ ၄၁၈ (ခ) က  ၃၈၆ မဲပဲ ထောက်ခံမဲတွေရပါတယ်။ သမ္မတရာထူးထမ်းဆောင်ဖို့ အရည်အချင်းသတ်မှတ်ချက်ဖြစ်တဲ့ စစ်ရေးအမြင်ရှိရမယ် ဆိုတဲ့နေရာမှာ ကာကွယ်ရေးအမြင် ရှိရမယ်လို့  ပြင်ဆင်ချက် ဖြစ်တဲ့ ပုဒ်မ ၅၉(ဃ) တခုပဲ လုံလောက်တဲ့ ထောက်ခံမဲရရှိပြီး  ကျန် ပုဒ်မတွေ ရှုံးနိမ့်ခဲ့တာလည်း  ဖြစ်ပါတယ်။ ဥပဒေမူကြမ်း ပုဒ်မ ၄၃၆(က) မှာ  လွှတ်တော်ကိုယ်စားလှယ်အားလုံးရဲ့ ၇၅ ရာခိုင်နှုန်း ကျော်က ပြင်ဆင်ရန် သဘောတူလက်ခံပြီးနောက် ပြည်လုံးကျွတ် ဆန္ဒခံယူပွဲကျင်းပ၍ ဆန္ဒမဲပေးပိုင်ခွင့်ရှိသူ အားလုံး၏ ထက်ဝက်ကျော် ဆန္ဒမဲဖြင့်သာ ပြင်ဆင်ရမယ်” ဆိုတဲ့နေရာမှာ ၇၀ ရာခိုင်နှုန်းအောက် မလျော့သော လွှတ်တော်ကိုယ်စားလှယ်များက ပြင်ဆင်ရန် သဘောတူ လက်ခံပြီးနောက် ပြည်လုံးကျွတ် ဆန္ဒခံယူပွဲကျင်းပ၍ ဆန္ဒမဲပေးသူ အားလုံး၏ ထက်ဝက်ကျော် ဆန္ဒမဲဖြင့်သာ ပြင်ဆင်ရမယ်” လို့ ပြင်ဆင်ဖို့ လျာထားခဲ့တာဖြစ်ပါတယ်။ ပုဒ်မ ၅၉(စ) ကတော့ သားမက်နဲ့ ချွေးမဖြစ်သူတွေရဲ့ နိုင်ငံသား သတ်မှတ်ချက်တွေကို ပယ်ဖျက်ပြင်ဆင်ပေးထားကလွဲလို့ ဇနီး၊ ခင်ပွန်းနဲ့ သားသမီးတွေဟာ နိုင်ငံခြားသား မဖြစ်ရဘူးလို့ အရင်အတိုင်း အပြောင်းအလဲမရှိ ဆက်လက် ဥပဒေမူကြမ်းမှာရေးထားတာပါ။ ဒီနေ့ ပြည်ထောင်စုလွှတ်တော်မှာ ကိုယ်စားလှယ် ၆၃၃ ယောက် တက်ရောက်ပြီး ၅၀ ခွင့်တင်ပါတယ်။ တပ်မတော်သား ကိုယ်စားလှယ် ၁၆၆ ယောက်ရှိနေတဲ့အတွက် မဲပေးချိန်မှာ တပ်က ၂၈ ရာခိုင်နှုန်းကျော် ရှိနေပါတယ်။ ဖွဲ့စည်းပုံ ပြင်ဆင်ရေး အနိုင်ရဖို့ အနည်းဆုံး ၄၇၅ မဲလိုနေချိန်မှာ ရွေးကောက်ခံကိုယ်စားလှယ် ၄၁၇ ပဲ ရှိနေတဲ့အတွက် တပ်မတော်သား ကိုယ်စားလှယ် ၅၈ ယောက် ထောက်ခံမှ အနိုင်ရမှာ ဖြစ်ပါတယ်။
6 years Ago

သတင်းသမားများကို တရားစွဲမှု မီဒီယာဥပဒေနှင့်ဆန့်ကျင်နေ

အစိုးရအနေနဲ့ သတင်းမီဒီယာသမားတွေကို တရားစွဲဆိုတာဟာ သတင်းမီဒီယာနည်း ဥပဒေနဲ့ ဆန့်ကျင်နေတယ်လို့ မြန်မာနိုင်ငံ စာနယ်ဇင်းကောင်စီက ဇွန် ၂၄ ရက်နေ့က သတင်း ထုတ်ပြန်လိုက်ပါတယ်။ သတင်းသမားတွေကို တိုက်ရိုက်တရားစွဲဆိုတာဟာ ပြည်ထောင်စုလွှတ်တော်က အတည်ပြုပြဋ္ဌာန်းထားတဲ့ သတင်းမီဒီယာနည်းဥပဒေပါ အခန်း ၁၁၊ နည်း ၃၅၊ နည်း ၃၆ တို့နဲ့ ဆန့်ကျင်နေတာပါ။ အစိုးရအနေနဲ့ သတင်းမီဒီယာသမားတွေကို တရားစွဲဆိုတဲ့နေရာမှာ စာနယ်ဇင်းကောင်စီ ကို ကြိုတင်ညှိနှိုင်းမှုမရှိဘဲ တိုက်ရိုက်တရားစွဲဆိုနေတဲ့အပေါ် သတင်းစာဆရာ ဦးမြင့်ကျော်က “အာဏာရှိတဲ့သူတွေက တန်းပြီးတော့ တရားစွဲတယ်။ သူတို့ကအသာစီးရယူချင်တယ်။ ဒါမှမ ဟုတ် နောက်တစ်ခါဒါမျိုးတွေမလုပ်အောင် ကြောက်လန့်သွားအောင်လုပ်တဲ့ကိစ္စတွေရှိပါတယ်။ ကောင်စီက ဒါမျိုးတွေမလုပ်ဖို့ကို ပြီးခဲ့တဲ့နှစ်တွေထဲကပြောလာတာပါ။ အဓိကက အစိုးရကိုပေါ့။ ခုဒီလတ်တလောမှာလည်း မီဒီယာကို တန်းပြီးတရားစွဲတဲ့ကိစ္စမျိုးတွေကို အဲဒါတွေထပ်ပြီးမလုပ်ဖို့ ကို ကြေညာချက်ထုတ်တဲ့သဘောပါပဲ”လို့ပြောပါတယ်။ ဇွန် ၁၇ ရက်နေ့က ပြဋ္ဌာန်းခဲ့တဲ့ သတင်းမီဒီယာနည်းဥပဒေပါ အခန်း ၁၁၊ နည်း ၃၅၊ နည်း ၃၆ အရ သတင်းမီဒီယာသမားတဦးဟာ ကျင့်ဝတ်စည်းကမ်းဖောက်ဖျက်ရင် နစ်နာတဲ့ဌာန အဖွဲ့အစည်း ပုဂ္ဂိုလ်က ရက် ၉၀ အတွင်း စာနယ်ဇင်းကောင်စီကို တိုင်ကြားနိုင်ပြီး ကောင်စီက တိုင်ကြားစာရပြီး ၁၅ ရက်အတွင်းမှာ ဖြေရှင်းပေးရမှာဖြစ်ပါတယ်။ အခုလို စာနယ်ဇင်းသမားတွေကို တရားစွဲဆိုမှုနဲ့ပတ်သက်ပြီး ဥပဒေပညာရှင်တခိ်ျု့က လည်းထောက်ပြဝေဖန်ကြပါတယ်။ တရားလွှတ်တော်ရှေ့နေ ဦးကြီးမြင့်က “သက်ဆိုင်ရာစာနယ်ဇင်းကောင်စီကလည်း အစိုး ရကို ထဲထဲဝင်ဝင်ပြောပေးရမယ်။ သတင်းထောက်တွေကိုလည်း ရှင်းပြရမယ်။ အဓိက ကတော့ စာနယ်ဇင်းကောင်စီအနေနဲ့ ဒီ့ထက်ပိုပြီး ကြိုးစားဖို့လိုတယ်။ အစိုးရအနေနဲ့လည်း သူထုတ်ထား တဲ့ဥပဒေတွေအပေါ်မှာ သူလေးစားဖို့လိုတယ်”လို့ ဆိုပါတယ်။ မြန်မာနိုင်ငံမှာ သတင်းထောက်တွေကို နိုင်ငံတော်လျှို့ဝှက်ချက်ပေါက်ကြားမှု၊ အကြည်ညိုပျက်မှု၊ တရားရုံးမထီမဲ့မြင်ပြုမူတွေနဲ့ အရေးယူလေ့ရှိပြီး ၂၀၁၄ ခုနှစ်နဲ့ ၂၀၁၅ ခုနှစ် ဇွန်လအထိ သတင်းထောက်အယောက် ၂၀ လောက်ကို အစိုးရက တရားစွဲဆိုခဲ့ပါတယ်။ လက်ရှိမှာလည်း ယူနတီဂျာနယ်နဲ့ မွန်းတည့်နေဂျာနယ်ကသတင်းသမားတွေကို နှစ်ရှည်ထောင်ဒဏ်ချမှတ်ထားသလို အလဲဗင်းသတင်းဂျာနယ်က အယ်ဒီတာအဖွဲ့ကိုလည်း တရားရုံးကို မထီမဲ့မြင်ပြုမူနဲ့ တရားစွဲဆိုထားပါသေးတယ်။
6 years Ago

June 21, 2015

မီဒီယာသမားများကို ဖမ်းဆီးအရေးယူမှု ဆက်ရှိနေဟု ဝေဖန်

သတင်းမီဒီယာနည်းဥပဒေထုတ်ပြန်ပြီး ဖြစ်ပေမယ့် လွတ်လပ်စွာသတင်းယူခွင့် မရှိသေးတဲ့အပြင် မီဒီယာသမားတွေကို ဖမ်းဆီးအရေးယူမူတွေ ရှိနေသေးတယ်လို့ မီဒီယာသမားတွေနဲ့ လွှတ်တော်အမတ်တွေက ဝေဖန်လိုက်ပါတယ်။ ပြန်ကြားရေးဝန်ကြီးဌာနကနေ ဇွန်လ ၁၇ ရက်နေ့က သတင်းမီဒီယာနည်းဥပဒေထုတ်ပြန်ခဲ့ပေမယ့် လက်ရှိသတင်းမီဒီယာသမားတွေအပေါ် တရာဆွဲဆိုမှုတွေ ရှိနေတဲ့အပေါ်ပြောကြားလိုက်တာပါ။ သတင်းမီဒီယာနည်းဥပဒေမှာ သတင်းမီဒီယာကောင်စီဖွဲ့ဖို့ကိုသာ အဓိကဖော်ပြထားပြီး အခန်း ၁၀ သတင်းအချက်အလက် စိစစ်ရေးသားဖော်ပြခြင်းအခန်းမှာ သတင်းရယူရာမှာ ဥပဒေပါတာဝန်နဲ့ ကျင့်ဝတ်တွေ ဖော်ဖျက်ခြင်း မရှိရဆိုတဲ့ အခန်းအပေါ် မီဒီယာသမားတွေက ဝေဖန်မှု ရှိပါတယ်။ သတင်း မီဒီယာသမားတွေကို တရားစွဲဆိုထောင်ချတာနဲ့ပတ်သက်ပြီး လွှတ်တော်မှာ ဖြေလျှော့ပေးဖို့ တင်ပြခဲ့ပေမယ့် ဆက်ပြီး တရားစွဲဆိုတာတွေ ရှိနေတာဟာ အစိုးရက မီဒီယာကို ဖိနှိပ်တာဖြစ်တယ်လို့ လွှတ်တော်ကိုယ်စားလှယ် ဦးခိုင်မောင်ရည်က သုံးသပ်ပါတယ်။ သတင်းမီဒီယာဥပဒေအရ သတင်းနဲ့ပတ်သက်ပြီး အငြင်းပွားမှုတွေရှိလာရင် ညှိနှိုင်းဖြေရှင်းဖို့လိုပြီး ညှိနှိုင်းလို့မရမှသာ တရားဥပဒေအရ ဆောင်ရွက်သင့်တယ်လို့ မြန်မာနိုင်ငံ စာနယ်ဇင်းကောင်စီဒုဥက္ကဋ္ဌ ဖိုးသောကြာက ပြောပါတယ်။ မြန်မာနိုင်ငံမှာ ၂၀၁၂ ဧပြီ ၁ ရက်နေ့ကစပြီး ပုဂ္ဂလိက သတင်းစာ ဂျာနယ်တွေကို လွတ်လပ်စွာ ထုတ်ဝေခွင့်ပြုခဲ့ပေမယ့်လည်း ယူနတီဂျာနယ်နဲ့ မွန်းတည့်နေဂျာနယ်က သတင်းသမားတွေကို နှစ်ရှည်ထောင်ဒဏ်ချမှတ်ခဲ့တဲ့အပြင် လက်ရှိမှာလည်း တရားစွဲဆိုခံနေရတဲ့ သတင်းလောကသားတွေ ရှိနေပါတယ်။ လတ်တလောမှာလည်း အလဲဗန်းဂျနယ်က အယ်ဒီတာ ၁၇ ဦး ကို ပြန်ကြားရေးဝန်ကြီးဌာနက အမှုဖွင့်တရားစွဲဆိုထားပါတယ်။ အပြည့်အစုံ ရုပ်သံကြည့်ရှုရန်
6 years Ago
More News
Up