ပြည်ထဲရေးဝန်ကြီးပြော

February 17, 2018

ဒုက္ခသည်များ ပြန်ခေါ်ရန် အဆင်သင့်ဟု ပြည်ထဲရေးဝန်ကြီးပြော

ဘင်္ဂလားဒေ့ရ်ှကို ၃ ရက်ကြာခရီးစဉ် ရောက်ရှိနေတဲ့ ပြည်ထဲရေးဝန်ကြီး ဒုတိယဗိုလ်ချုပ်ကြီး ကျော်ဆွေက မြန်မာအစိုးရအနေနဲ့ ဒုက္ခသည်တွေကို နှစ်နိုင်ငံ သဘောတူညီချက်အရ ပြန်ခေါ်ဖို့ အဆင်သင့်ပဲလို့ ဘင်္ဂလားဒေ့ရှ် သမ္မတ အဘ်ဒူလ် ဟာမစ်ဒ်ကို ပြောကြားလိုက်တယ်လို့ သိရပါတယ်။ ကုလသမဂ္ဂ အတွင်းရေးမှူးချုပ်ဟောင်း ကိုဖီအာနန် ဦးဆောင်တဲ့ ကော်မရှင် အစီရင်ခံစာကို အကောင်အထည်သွားမယ်လို့ မြန်မာပြည်ထဲရေးဝန်ကြီးက ပြောကြားခဲ့ကြောင်းလည်း အာရ်တီသတင်းဌာနမှာ ဖော်ပြပါတယ်။ ဖေဖော်ဝါရီ ၁၆ ရက်နေ့ နေ့လယ်ပိုင်းမှာတော့ ဒုတိယဗိုလ်ချုပ်ကြီး ကျော်ဆွေနဲ့ ဘင်္ဂလားဒေ့ရှ် ပြည်ထဲရေးဝန်ကြီး အဆာဒူဇာမန် ခန်နဲ့ ဒါကာမြို့က ပြည်ထဲရေးဝန်ကြီးဌာနမှာ တွေ့ဆုံခဲ့ကြပါတယ်။ ဘင်္ဂလားဒေ့ရ်ှရောက် ဒုက္ခသည်တွေအရေး၊ လက်နက်နဲ့မူးယစ်ဆေးဝါး တရားမဝင် မှောင်ခိုကူးတာတွေ ရပ်တန့်ဖို့နဲ့ နယ်စပ်အရေး သဘောတူညီချက်ကို အကောင်အထည်ဖော်ရေးတို့ကို ဆွေးနွေးဖွယ်ရှိတယ်လို့ ဒေးလီးစတားသတင်းမှာ ဖော်ပြထားပါတယ်။ လူကယ်ပြန်ဝန်ကြီးဒေါက်တာ ဝင်းမြတ်အေးကတော့ ဒုက္ခသည်တွေကို ပြန်လည်လက်ခံဖို့အတွက် ဘင်္ဂလာဒေ့ရ်ှအစိုးရ၊ ကုလသမဂ္ဂတို့နဲ့ ပူးပေါင်းဆောင်ရွက် လုပ်ဆောင်နေရတဲ့အတွက်ကြောင့် အချိန်ကြန့်ကြာနေရတယ်လို့ ပြောကြားထားပါတယ်။ ဖေဖော်ဝါရီ ၁၅ ရက်က ရခိုင်ပြည်နယ် မောင်တောဒေသကို ကမ္ဘာ့နိုင်ငံပေါင်း ၁၀ ကျော်က သံအမတ်ကြီးတွေအပါအဝင် ကုလသမဂ္ဂ လက်အောက်ခံ UN အဖွဲ့အစည်းနဲ့ အစိုးရအဖွဲ့တို့ မောင်တောကိုသွားရောက်ပြီးအပြန် စစ်တွေလေဆိပ်မှာ ပြောဆိုခဲ့တာပါ။ ပြီးခဲ့တဲ့နှစ်သြဂုတ်လက ARSA အကြမ်းဖက်သမားတွေရဲ့ တိုက်ခိုက်မှုဖြစ်ပွားပြီးနောက် ရခိုင်ပြည်နယ်တောင်ပိုင်းဒေသကနေ ဘင်္ဂလားဒေ့ရ်ှနိုင်ငံဘက်ကို ဒုက္ခသည်တွေ သိန်းနဲ့ချီ ထွက်ပြေးခဲ့ကြတာ ဖြစ်ပါတယ်။
4 years Ago

August 4, 2017

သပိတ်စခန်းများအား ဥပဒေ လုပ်ထုံးလုပ်နည်းနှင့် ဆောင်ရွက်မည်ဟု ပြည်ထဲရေးဝန်ကြီးပြော

ရန်ကုန်၊ မန္တလေးက သပိတ်စခန်းတွေကို သာသနာရေးဝန်ကြီးဌာနက အမှုဖွင့်ရင် လုပ်ထုံးလုပ်နည်းနဲ့အညီ ဆောင်ရွက်သွားမယ်လို့ ပြည်ထဲရေးဝန်ကြီးဌာန ဒုတိယဝန်ကြီး ဗိုလ်ချုပ်အောင်စိုးပြောကြားလိုက်ပါတယ်။ “သာသနာရေးဝန်ကြီးဌာနကနေပြီးတော့ သက်ဆိုင်ရာတိုင်း၊ မြို့နယ်တွေမှာရှိတဲ့ သံဃာအဖွဲ့အစည်းတွေနဲ့ ညှိနှိုင်းဆောင်ရွက်နေပါတယ်။ ဒါ့အပြင် သက်ဆိုင်ရာ တိုင်းဒေသကြီး အစိုးရအဖွဲ့တွေကလည်း လိုအပ်တဲ့ အစည်းဝေး ပြုလုပ်မှုတွေလုပ်နေတယ်။ ဥပဒေမှာပြဋ္ဌာန်းထားတဲ့ လုပ်ထုံးလုပ်နည်းတွေနဲ့အညီ ငြိမ်းချမ်းစွာ ဖြေရှင်းဆောင်ရွက်နိုင်ဖို့ လုပ်ဆောင်နေပါတယ်။ သက်ဆိုင်ရာ သံဃာနာယကအဖွဲ့အစည်းတွေရဲ့ ညှိနှိုင်း ဆောင်ရွက်ချက်တွေနဲ့ သက်ဆိုင်ရာ တိုင်းဒေသကြီး အစိုးရအဖွဲ့တွေရဲ့ ထုတ်ပြန်ချက်တွေမှာ အားလုံးအပြည့်အစုံ ပါလာမှာဖြစ်ပါတယ်။ အုပ်ချုပ်ရေးလမ်းကြောင်းတွေမှာ ကျနော်တို့ သာသနာရေးကနေပြီးတော့ အမှုဖွင့်ထားရှိပြီး လုပ်လာပြီဆိုရင်တော့ သက်ဆိုင်ရာ ဥပဒေတွေ၊ လုပ်ထုံးလုပ်နည်းတွေ အဆင့်ဆင့် ပြဋ္ဌာန်းထားပြီးဖြစ်ပါတယ်။ လုပ်ငန်းစဉ်တွေအတိုင်းပဲ သက်ဆိုင်ရာအစိုးရအဖွဲ့က အဆင့်ဆင့်တာဝန်ယူဆောင်ရွက်သွားမှာဖြစ်ပါတယ်လို့ ပြောလိုပါတယ်။ အားလုံးကို ကျေးဇူးတင်ပါတယ်။” သာသနာရေးနဲ့ ယဉ်ကျေးမှု ၀န်ကြီးဌာနကလည်း ရန်ကုန်၊ မန္တလေးမြို့တို့မှာ ပြုလုပ်နေတဲ့ သပိတ်မှောက်ပွဲမှာ ပါဝင်တဲ့ သံဃာတွေဟာ သံဃာအများစုဆန္ဒကို ကိုယ်စားမပြုကြောင်း သြဂုတ် ၃ ရက်နေ့ညနေပိုင်းက သတင်းထုတ်ပြန်ထားပါတယ်။ ဒီကနေ့ မနက်ပိုင်းအထိ ရန်ကုန်မြို့ ကြေးသွန်းဘုရားမှာတော့ အမျိုးသားရေးလှုပ်ရှားသူတွေလို့ နာမည်ခံထားတဲ့ လူနဲ့သံဃာတချို့ဟာ သူတို့ဖွင့်ထားတဲ့ သပိတ်စခန်းမှာ ဆက်ရှိနေတုန်း ဖြစ်ပါတယ်။ သူတို့ဟာ လက်ရှိအစိုးရ နုတ်ထွက်ပေးရေးကို တောင်းဆိုနေတာ ဖြစ်ပါတယ်။ ကြေးသွန်းဘုရားမှာ ဖွင့်ထားတဲ့ သပိတ်စခန်းကို သြဂုတ် ၃ ရက်မနက်ပိုင်းက စပြီး ဒီနေ့ မနက်ပိုင်းအထိ ရဲတပ်ဖွဲ့ဝင် အနည်းငယ်ကပဲ စောင့်ကြည့်တာတွေ ရှိနေပါတယ်။
4 years Ago
Up