မြောက်ကိုရီးယားစစ်သား

November 22, 2017

သေနတ်ဖြင့် ပစ်ခတ်ခံရသည့် မြောက်ကိုရီးယားစစ်သား သတိပြန်ရ

တောင်ကိုရီးယားဘက်ကို ထွက်ပြေးလို့ သေနတ်နဲ့ လိုက်လံပစ်ခတ်ခံရပြီး ဒဏ်ရာတွေရရှိခဲ့တဲ့အတွက် ခွဲစိတ်ကုသမှု ခံခဲ့ရတဲ့ မြောက်ကိုရီးယားစစ်သား သတိပြန်ရလာပြီလို့ သူ့ကိုကြီးကြပ်တဲ့ ဆရာဝန်က နိုဝင်ဘာ ၂၂ ရက်မှာ ပြောပါတယ်။ သူ့ကို ခွဲစိတ်မှု နှစ်ကြိမ်လုပ်ခဲ့ရပြီး ကိုယ်ထဲက ကျည်ဆန်တွေ ထုတ်ယူခဲ့ပြီးနောက်မှာတော့ သတိပြန်ရလာကာ သူ့ဘာသာ အသက်ရှူနိုင်တဲ့ အခြေအနေကို ရောက်ရှိလာတာ ဖြစ်ပါတယ်။ နောက်ထပ် အထူးကြပ်မတ်ကုသဖို့ လိုအပ်နေတဲ့ အဲဒီ မြောက်ကိုရီးယားစစ်သားဟာ ဆေးကုသမှုကို လိုက်နာဆောင်ရွက်မှုရှိပေမယ့် စကားပြောဖို့ တွန့်ဆုတ်နေတာ တွေ့ရပြီး စိတ်ဓာတ်ကျနေတဲ့ လက္ခဏာ တွေ့ရတယ်လို့ ခွဲစိတ်ဆရာဝန် လီကွတ်ဂျောင်က ပြောပါတယ်။ “သူ့အခြေအနေက မနေ့ကတည်းက ကောင်းလာပါပြီ။ ကျနော်တို့ မနေ့က သူ့အတွက် တီဗွီလည်း ဖွင့်ထားပေးပါတယ်။ ဒါပေမယ့် အစားအစာတော့ မစားနိုင်သေးပါဘူး။ ရေတော့ စသောက်နေပါပြီ” လို့ ခွဲစိတ်ဆရာဝန် လီကွတ်ဂျောင်က ပြောကြားသွားပါတယ်။ မြောက်ကိုရီးယား စစ်သားဟာ နိုဝင်ဘာ ၁၃ ရက်နေ့က တောင်ကိုရီးယားဘက်ကို ကားနဲ့ထွက်ပြေးစဉ် သေနတ်နဲ့ အချက်ပေါင်းများစွာ ပစ်ခတ်ခံခဲ့ရတဲ့အတွက် ဒဏ်ရာအပြင်းအထန် ရရှိခဲ့တာ ဖြစ်ပါတယ်။
3 years Ago

ထွက်ပြေးသည့် မြောက်ကိုရီးယားစစ်သားကို သေနတ်ဖြင့် လိုက်ပစ်သည့် ဗွီဒီယိုဖိုင် ထုတ်ပြန်

လွန်ခဲ့တဲ့ ရက်ပိုင်းက တောင်ကိုရီးယားဘက်ကို ထွက်ပြေးတဲ့ မြောက်ကိုရီးယားစစ်သားကို သေနတ်နဲ့ ပစ်ခတ်နေတဲ့ ဗွီဒီယိုဖိုင်ကို ကုလသမဂ္ဂတပ်ဖွဲ့ (ယူအန်စီ) က နိုဝင်ဘာ ၂၂ ရက်နေ့မှာ ထုတ်ပြန်လိုက်ပါတယ်။ ခုလို သေနတ်နဲ့ပစ်ခတ်ခဲ့တဲ့ လုပ်ရပ်ဟာ ကိုရီးယားစစ်ပွဲတွေကို ရပ်တန့်စေခဲ့တဲ့ ၁၉၅၃ ခုနှစ် အပစ်ရပ်သဘောတူညီချက်ကို ချိုးဖောက်တာဖြစ်ပြီး ဒါကိုဖြေရှင်းဖို့ မြောက်ကိုရီးယားဘက်ကိုလည်း အသိပေးထားတယ်လို့ တောင်ကိုရီးယားအခြေစိုက် ကုလသမဂ္ဂတပ်ဖွဲ့က ပြောလိုက်တာပါ။ စီစီတီဗွီကင်မရာမှတဆင့် ရိုက်ကူးထားတဲ့ အဲဒီ ရုပ်သံဗွီဒီယိုဖိုင်ထဲမှာ ပြီးခဲ့တဲ့ နိုဝင်ဘာ ၁၃ ရက်နေ့က မြောက်ကိုရီးယား စစ်ကားတစင်းဟာ မြောက်ကိုရီးယားစစ်သားတွေ စောင့်ကြပ်နေတဲ့ နယ်စပ်ဂိတ်ဆီ အပြင်းမောင်းနှင်လာခဲ့တာကို တွေ့ရပါတယ်။ ဒီနောက် မြောက်ကိုရီးယား အစောင့်တပ်သားတွေဟာ အဲဒီ ထွက်ပြေးတဲ့စစ်သားရဲ့ အနောက်နားကနေ ပစ်ခတ်ခဲ့ပြီး အစောင့်တပ်သားတယောက်ဟာ နယ်စပ်ကို အချိန်အနည်းငယ် ဖြတ်ကျော်ဝင်ရောက်ခဲ့တာကို တွေ့ရပါတယ်။ မြောက်ကိုရီးယားကနေ တောင်ကိုရီးယားဘက်ကို ထွက်ပြေးလာတဲ့ အဲဒီစစ်သားဟာ သေနတ်ဒဏ်ရာတွေ ရရှိခဲ့တာကြောင့် အမေရိကန်စစ်တပ် ရဟတ်ယာဉ်နဲ့ တောင်ကိုရီးယားဆေးရုံကို ပို့ဆောင်ကုသပေးခဲ့ရပါတယ်။ ထွက်ပြေးစစ်သားရဲ့ ရာထူးနဲ့ နာမည်ကိုတော့ အခုချိန်ထိ ထုတ်ပြန်ခြင်း မရှိသေးဘူးလို့ ရိုက်တာသတင်းမှာ ဖော်ပြထားပါတယ်။
3 years Ago

November 14, 2017

တောင်ကိုရီးယားဘက်ထွက်ပြေးသည့် မြောက်ကိုရီးယားစစ်သား သေနတ်ဖြင့် အချက်ပေါင်းများစွာ ပစ်ခတ်ခံရ

မြောက်ကိုရီးယား စစ်သားတယောက်ဟာ နိုဝင်ဘာ ၁၃ ရက်နေ့က တောင်ကိုရီးယားဘက်ကို ကားနဲ့ထွက်ပြေးစဉ် သေနတ်နဲ့ အချက်ပေါင်းများစွာ ပစ်ခတ်ခံခဲ့ရတဲ့အတွက် ဒဏ်ရာအပြင်းအထန် ရရှိသွားပါတယ်။ တောင်နဲ့ မြောက်ကိုရီးယား နှစ်နိုင်ငံကြားမှာရှိတဲ့ စစ်မဲ့ဇုန်မှာ မြောက်ကိုရီးယား စစ်သားတယောက်ဟာ ကားတစင်းနဲ့ တောင်ကိုရီးယားဘက်ကို ထွက်ပြေးခဲ့တာပါ။ အဲဒီလိုထွက်ပြေးရာမှာ  မြောက်ကိုရီးယားဘက်က သေနတ်နဲ့ အချက် ၄၀ ခန့် ပစ်ခတ်ခဲ့ပါတယ်။ အဲဒီနောက် ကားဘီးကျွတ်သွားတဲ့အတွက် မြောက်ကိုရီးယားစစ်သားဟာ ကားကိုထားခဲ့ပြီး တောင်ကိုရီးယားဘက်က အဆောက်အဦတွေကို အကာအကွယ်ယူ ထွက်ပြေးလွတ်မြောက်ခဲ့ပါတယ်။ “ဒီတပ်သားရဲ့ အခြေအနေကို ကြည့်ရတာ လာမယ့်ဗုဒ္ဓဟူးနေ့ အစောဆုံးထားပြီး ခွဲရပါမယ်။ လိုအပ်ရင် ကြာသာပတေး၊ သောကြာနေ့တွေအထိ ဆက်ခွဲရပါမယ်။ သူ့ကိုယ်တွင်းအင်္ဂါ ၇ နေရာလောက်မှာ ပေါက်ပြဲတာတွေ ရှိနေပါတယ်။ အတော်များများက ကျည်ဆန်ဖောက်ထွက်သွားတဲ့ ဒဏ်ရာတွေပါ” လို့ မြောက်ကိုရီးယားစစ်သားရဲ့ ခွဲစိတ်မှုကြီးကြပ်သူ အာဂျိုတက္ကသိုလ်ဆေးရုံမှ ဒေါက်တာ လီဂျိုဂွန်းက ပြောသွားပါတယ်။ တောင်ကိုရီးယား ပူးတွဲစစ်ဦးစီးချုပ်ရဲ့ ပြောခွင့်ရပုဂ္ဂိုလ် ဂျေဂျေအန်းက “ကားဘီးတွေက နှစ်နိုင်ငံ စစ်မဲ့မျဉ်းရဲ့ မြောက်ကိုရီးယားဘက်မှာ ကျွတ်ထွက်သွားပါတယ်။ ဒီဘက်နယ်မြေကို ပါမလာပါဘူး။ ကားထဲမှာ သူတယောက်တည်းပဲ ပါတာပါ။ သူ ကားထဲကနေထွက်ပြီး တောင်ကိုရီးယားဘက်ကို ပြေးသွားတော့ မြောက်ကိုရီးယားက သေနတ်နဲ့ပစ်ခတ်ပါတယ်” လို့ ပြောပါတယ်။ ဆက်လက်ပြီး သူက “သူ့ကိုယ်ပေါ်မှာ ကျည်ဆန်ဒဏ်ရာတွေ အများကြီးလို့ ပြောပါတယ်။ သူ့ရဲ့ တံတောင်ဆစ်နဲ့ ပခုံးမှာလည်း ဒဏ်ရာရထားပါတယ်” လို့ ပြောပါတယ်။
3 years Ago
Up