သေသည်အထိ

August 10, 2018

သက်ငယ်မုဒိမ်း ကျူးလွန်သူများကို ထောင်ထဲမှာ သေသည်အထိ ပြစ်ဒဏ်ချနိုင်ရန် အဆိုတင်

အရွယ်မရောက်သေးတဲ့ မိန်းကလေးတွေနဲ့ မသန်စွမ်းမိန်းကလေးတွေအပေါ် မုဒိမ်းမှုကျူးလွန်သူတွေကို ထောင်ထဲမှာ သေတဲ့အထိ ပြစ်ဒဏ်ချနိုင်ဖို့ အမျိုးသားလွှတ်တော်မှာ ဒီကနေ့ အဆိုတင်သွင်းလိုက်ပါတယ်။ အသက် ၁၂ နှစ်အောက် မိန်းကလေးတွေနဲ့ မသန်စွမ်းသူ မိန်းကလေးကို မုဒိမ်းမှုကျုးလွန်သူတွေရဲ့ ပြစ်ဒဏ်ဟာ လုံလောက်တဲ့ အဟန့်အတားမဖြစ်တဲ့အတွက် အခုလို ရာဇာသတ်ကြီးကို ဒုတိယအကြိမ်ပြင်ဆင်တဲ့ ဥပဒေကြမ်းအဆိုတင်သွင်းရတာလို့ အဆိုရှင် လွှတ်တော်အမတ် ဦးအောင်သိန်းက ပြောပါတယ်။ လက်ရှိ ရာဇာသတ်ကြီးပုဒ်မ ၃၇၆ အရ မုဒိမ်းမှုတွေအတွက် ပြစ်ဒဏ်ဟာ ထောင်ဒဏ် နှစ် ၂ဝ ဖြစ်စေ၊ ထောင်ဒဏ် ၁ဝ နှစ်ထိ ထောင်ဒဏ် တစ်မျိုးမျိုးဖြစ်စေ ချမှတ်ရမယ့်အပြင် ငွေဒဏ်လည်း ချမှတ်နိုင်တယ်လို့ ပြဋ္ဌာန်းထားပါတယ်။ အဆိုရှင် လွှတ်တော်အမတ် ဦးအောင်သိန်းက “သက်ငယ်မုဒိမ်းမှုတွေ ကျုးလွန်သူတွေကို သေဒဏ်ပေးဖို့ ဆန္ဒထုတ်ဖော်တောင်းဆိုနေပေမယ့် ပြစ်ဒဏ်အရ မသန်စွမ်းသူ မိန်းကလေးကိုဖြစ်စေ၊ အသက် ၁၂ နှစ်အောက် မိန်းကလေးကိုဖြစ်စေ မုဒိမ်းမှုကျုးလွန် သူတွေကို ထောင်ဒဏ် နှစ် ၂ဝ သို့မဟုတ် ထောင်ဒဏ်တစ်သက်(ထောင်ထဲမှာဘဲ သေသည်အထိ) ချမှတ်နိုင်ဖို့ အဆိုတင်သွင်းတာဖြစ်ပါတယ်” လို့ပြောပါတယ်။ ကျုးလွန်ခံရသူဟာ ကျုးလွန်စဉ် သေဆုံးသွားခဲ့ရင် မုဒိမ်းမှုကျူးလွန်သူအနေနဲ့ လူသတ်မှုပုဒ်မနဲ့ပါ ငြိစွန်းတဲ့အတွက် သေဒဏ်ချမှတ်ခံရနိုင်တယ်လို့ ပြောပါတယ်။ ပြည်ထဲရေးဝန်ကြီးဌာနရဲ့ ၂ဝ၁၇ ခုနှစ် ဖေဖော်ဝါရီလလယ်ထိ ထုတ်ပြန်တဲ့စာရင်းအရ ၁၆ နှစ်အောက် မုဒိမ်းမှု ဟာ ၂ဝ၁၆ ခုနှစ်မှာ ၆၇၁ မှု၊ ၂ဝ၁၇ ခုနှစ်မှာ ၈၉၇ မှု ရှိတယ်လို့ သိရပါတယ်။ ၁၆ နှစ်အထက် မုဒိမ်းမှုဟာ ၂ဝ၁၆ ခုနှစ်မှာ ၄၂၉ မှု၊ ၂ဝ၁၇ ခုနှစ်မှာ ၅ဝဝ မှုရှိတယ်လို့ သိရပါတယ်။ သက်ငယ်မုဒိမ်းမှုအများဆုံးဖြစ်တဲ့ ဒေသတွေကတော့ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ မန္တလေးတိုင်းဒေသကြီး၊ ပဲခူးတိုင်းဒေသကြီးနဲ့ စစ်ကိုင်းတိုင်း ဒေသကြီးတို့ ဖြစ်ပါတယ်။
3 years Ago
Up