လှေစီးဒုက္ခသည်

October 13, 2015

လှေစီးဝင် ဘင်္ဂလားဒေ့ရှ် ၁၀၃ ဦး နေရပ်ပြန်ပို့

မြန်မာနိုင်ငံထဲ လှေစီးဝင်လာတဲ့ ဘင်္ဂလားဒေ့ရ်ှနိုင်ငံသား ၁၀၃ ဦးကို ရခိုင်ပြည်နယ်၊ မောင်တောမြို့နယ်၊ တောင်ပြို (လက်ဝဲ) မြို့ကနေ ဘင်္ဂလားဒေ့ရ်ှနိုင်ငံဘက်ကို ပြန်လည် လွှဲပြောင်းပေးလိုက်ပါတယ်။ ဘင်္ဂလားဒေ့ရှ် အမှတ် ၁၇ နယ်ခြားစောင့်တပ်က ခေတ္တ တပ်ရင်းမှူးထံ အောက်တိုဘာလ ၁၂ ရက်နေ့ မွန်းလွဲပိုင်းမှာ တရားဝင် အခမ်းအနားနဲ့ ပြန်လည်လွှဲပြောင်း ပေးအပ်ခဲ့တာလို့ အစိုးရ ပြန်ကြားရေးက သတင်းထုတ်ပြန်ပါတယ်။ ပြီးခဲ့တဲ့ မေလက ရခိုင်ပြည်နယ်မှာ ဘင်္ဂလားဒေ့ရှ် ၂၀၀ လိုက်ပါလာတဲ့ လူမှောင်ခို လှေတစီးနဲ့ ဧရာဝတီတိုင်း ဖျာပုံမှာ ဘင်္ဂါလီ ၇၀၀ ကျော်ပါ လှေတစီး ဖမ်းမိခဲ့တာဖြစ်ပြီး ဇူလိုင်လမှာတော့ တနင်္သာရီတိုင်း ကော့သောင်းမြို့နယ်ရှိ စောင်းကောက်ကျွန်းမှာ ဘင်္ဂါလီ ၁၀၂ ဦးကို တပ်မတော်ရေက ဖမ်းဆီးမိခဲ့တာပါ။ အဆိုပါ ထိန်းသိမ်းထားသူတွေကို အသုတ်လိုက်ခွဲ နေရပ်ပြန်ပို့ပေးနေတာမှာ ခုတကြိမ်ဟာ ၆ ကြိမ်မြောက် လွှဲပြောင်းပေးခဲ့တာဖြစ်ပြီး  စုစုပေါင်း ၇၂၉ ဦးရှိပြီ ဖြစ်ပါတယ်။ အောက်တိုဘာ ၁၂ ရက်နေ့က ပြန်လွှဲပေးလိုက်သူတွေနဲ့ ပတ်သက်ပြီး ရခိုင်ပြည်နယ် လူဝင်မှုကြီးကြပ်ရေးဌာန အရာရှိ ဦးခင်စိုးက “အဲဒါက ဧရာဝတီတိုင်းမှာ ဖမ်းမိတဲ့လူရော၊  ရခိုင်ပြည်နယ်မှာ ဖမ်းမိတဲ့ လူတွေရော ပါသလို ကော့သောင်းဘက်ကနေ ပို့လိုက်တဲ့လူလည်း ပါပါတယ်” လို့ ဒီဗွီဘီကို ပြောပါတယ်။ လက်ကျန် ဘင်္ဂလားဒေ့ရ်ှနိုင်ငံသား ၇၇ ဦးကို နေရပ်ပြန်ပို့ဖို့ နှစ်နိုင်ငံ နိုင်ငံခြားရေးဝန်ကြီးတွေ သံတမန်နည်းလမ်းနဲ့ ဆောင်ရွက်နေသလို နယ်ခြားစောင့်တပ်ဖွဲ့တွေ အချင်းချင်း ဆက်သွယ်ဆောင်ရွက်နေတယ်လို့လည်း ပြောပါတယ်။
6 years Ago

October 9, 2015

ကျန်ရှိလှေစီးဒုက္ခသည် ၁၀၀ ကျော် ၁၂ ရက်နေ့ လွှဲပေးမည်

ရခိုင်ပြည်နယ် မောင်တောမြို့နယ် တောင်ပြိုလက်ဝဲမှာ ယာယီကယ်ဆယ်ထားတဲ့ ဘင်္ဂလား ဒေ့ရ်ှနိုင်ငံသား လှေစီးပြေးဒုက္ခသည်တွေထဲက ၁၀၅ ဦးကို လာမယ့် ရက်ပိုင်းမှာ  လွှဲပြောင်း မယ်လို့ ရခိုင်ပြည်နယ် လူဝင်မှုကြီးကြပ်ရေးဌာန အရာရှိ ဦးခင်စိုးက ပြောပါတယ်။ မြန်မာနိုင်ငံထဲမှာ လှေစီးဒုက္ခသည် လက်ရှိ ၁၈၁ ဦးကျန်နေပြီး လာမယ့်အောက်တိုဘာ ၁၂ ရက်နေ့ကျရင် ၁၀၅ ဦးကို လွှဲပြောင်းပေးမယ်လို့ ဦးခင်စိုးက ပြောပါတယ်။ “ဘင်္ဂလားဒေ့ရ်ှကောင်စစ်ဝန်ရုံးကတော့ ကျနော်တို့ ပြည်နယ်အစိုးရအဖွဲ့ကို ကြောင်း ကြားထားတယ်။ ၁၂ ရက်နေ့ လွှဲပြောင်းပေးဖို့ပေါ့နော်။ အဲဒါ ကျနော်တို့ မောင်းတော ခရိုင်မှူးကနေဆင့် ဟိုဘက် နယ်ခြားစောင့်ကို ၁၂ ရက်နေ့ လွှဲပြောင်းပေးမယ်။ အဲဒီက လက်ခံပေးဖို့ တရားဝင် အကြောင်းကြားပြီးဖြစ်ပါတယ်။” ဒီတခေါက်လွှဲပေးရင်တော့ ဆဋ္ဌမအကြိမ်လွှဲပြောင်းတာဖြစ်ပြီး မြန်မာနိုင်ငံတွင်း ၇၀ ကျော်သာ ကျန်ရှိမှာဖြစ်ပါတယ်။ ကျန်ရှိသူတွေကိုလည်း စိစစ်ပြီး ပြန်ပို့သွားမယ်လို့လည်း ပြောပါတယ်။ မေ ၂၁ ရက်နေ့က ရခိုင်ပြည်နယ် မောင်တောမြို့နယ်အနီး ပင်လယ်ပြင်မှာ လူ ၂၀၈ ဦး လိုက်ပါလာတဲ့ စက်လှေတစင်းကို မြန်မာရေတပ်က တွေ့ရှိကယ်ဆယ်ခဲ့သလို မေလ ၂၉ ရက်နေ့တုန်းကလည်း ဧရာဝတီတိုင်း ဖျာပုံမြို့နယ်အတွင်းက မြန်မာ့ပင်လယ်ပြင်မှာ  လှေစီးဒုက္ခသည် ၇၀၀ ကျော် လိုက်ပါလာတဲ့ ငါးဖမ်းလှေတစီးကို မြန်မာရေတပ်က ကယ်ဆယ်ခဲ့ပါတယ်။ အဲဒီလှေစီးဒုက္ခသည်တွေကို မြန်မာဘက်က စိစစ်မှုတွေပြုလုပ်ပြီး ၁၈၀ ကျော်ဟာ မြန်မာနိုင်ငံဘက်က ဘင်္ဂါလီတွေဖြစ်တဲ့အတွက် သူတို့နေထိုင်ရာရွာတွေကို ပို့ဆောင်ထားပြီဖြစ်ပြီး ကျန်ရှိ နေတဲ့သူတွေကို နှစ်နိုင်ငံက ညှိနှိုင်းစိစစ်ပြီး ဘင်္ဂလားဒေ့ရ်ှဘက်ကို လွှဲပြောင်းပေးမှုတွေ လုပ်ဆောင်တာဖြစ်ပါတယ်။ ၁၂၅ ဦးကို ဘင်္ဂလားဒေ့ရ်ှနိုင်ငံကို ဒီနေ့ လွှဲပြောင်းပေးလိုက်ပါတယ်။ ၁၂၆ ဦးကို လွှဲပြောင်းဖို့ စီစဉ်ခဲ့ပေမယ့် တစ်ဦးဟာ ကယ်ဆယ်ရေးစခန်းကနေ ထွက်ပြေးသွားသူတွေထဲမှာ ပါဝင် တာကြောင့် ၁၂၅ ဦးကိုသာ လွှဲပြောင်းပေးနိုင်ခဲ့တယ်လို့ ရခိုင်ပြည်နယ် လူဝင်မှုကြီးကြပ်ရေးနဲ့ အမျိုးသား မှတ်ပုံတင်ရေးဦးစီးဌာန ညွှန်ကြားရေးမှူး ဦးခင်စိုးက ပြောပါတယ်။ "ကျနော်တို့ မနက် ၁၁ နာရီမှာ တောင်ပြိုလက်ဝဲဆိုတဲ့ မြို့နယ်ခွဲအုပ်ချုပ်ရေးမှူးရုံးမှာ နှစ်နိုင်ငံအလံတင် အခမ်းအနားနဲ့ ကျင်းပပါတယ်၊ ၂ နာရီမှာ နယ်စပ်မှာရှိတဲ့ ချစ်ကြည်ရေးတံတားကနေ တရားဝင် လွှဲပြောင်းပေးလိုက်ပါတယ်၊ ၁၂၆ ဦးပါ ၁ ဦးက ထွက်ပြေးတဲ့တစ်ယောက်ပါ နာမည်စာရင်းအပါပေါ့၊ ဒီနေ့လွှဲတာတော့ ၁၂၅ ဦးပါ" နောက်ဆုံးကျန်ရှိနေသေးတဲ့ ၁၀၁ ဦးကိုလည်း စစ်တွေမြို့အခြေစိုက် မြန်မာနိုင်ငံဆိုင်ရာ ဘင်္ဂလားဒေ့ရ်ှကောင် စစ်ဝန်က ဘင်္ဂလားဒေ့ရ်ှနိုင်ငံသားတွေလို့ အတည်ပြုပြီးဖြစ်တာကြောင့် ထပ်မံလွှဲပြောင်းဖို့ စီစဉ်နေတယ်လို့လည်း ဦးခင်စိုးက ပြောပါတယ်။ ပြီးခဲ့တဲ့ မေလအတွင်းက ရခိုင်ပြည်နယ်နဲ့ ဧရာတီတိုင်း ဖျာပုံမြို့နယ်တွေအတွင်းကနေ ဖမ်းဆီးရမိခဲ့တဲ့ လှေစီးပြေး ဒုက္ခသည်တွေကို တောင်ပြိုလက်ဝဲကနေတစ်ဆင့် ဘင်္ဂလားဒေ့ရ်ှနိုင်ငံကို အသုတ်လိုက် ပြန်လည်ပို့ဆောင်ခဲ့ရာမှာ အခု ၅ ကြိမ် မြောက်ဖြစ်တယ်လို့လည်း သိရပါတယ်။ အဲဒီအထဲက လူ ၁၅ ဦးဟာ ပြီးခဲ့တဲ့လတွေက တောင်ပြို လက်ဝဲမှာ ဖွင့်လှစ်ထားတဲ့ ယာယီကယ်ဆယ်ရေးစခန်းကနေ ထွက်ပြေးလွတ်မြောက်သွား ခဲ့ကြတာလည်း ဖြစ်ပါတယ်။ မောင်တောမြို့နယ်အတွင်းမှာ ဖမ်းဆီးရမိခဲ့တဲ့ စက်လှေပေါ်မှာလိုက်ပါလာတဲ့ စကားပြန်အပါအဝင် လှေသား ၂၀ ကို လူဝင်မှုကြီးကြပ်ရေးဥပဒေတွေနဲ့ ထောင်ဒဏ် ၅ နှစ်စီချမှတ်ပြီး စစ်တွေအကျဉ်းထောင်မှာ ထိန်းသိမ်းထားသလို သူတို့တွေကို လူကုန်ကူးမှုဥပဒေပုဒ်မတွေနဲ့ စစ်တွေမြို့နယ်နဲ့ ခရိုင်တရားရုံးတွေမှာ ထပ်မံတရားစွဲဆို ထားတယ် လို့လည်း သိရပါတယ်။
6 years Ago
More News
Up