လောင်စာဆီဈေးနှုန်း

September 19, 2016

ဒေါ်လာဈေးတက်မှုကြောင့် လောင်စာဆီဈေးနှုန်း မြင့်တက်

အမေရိကန်ဒေါ်လာဈေး မြင့်တက်လာမှုကြောင့် ပြည်တွင်းဈေးကွက်မှာ ဓာတ်ဆီနဲ့ ဒီဇယ် လောင်စာဆီဈေးနှုန်းတွေလည်း မြင့်တက်လာနေပါတယ်။ မန္တလေးမြို့မှာ သြဂုတ်လက အောက်တိန်း ၉၂ တလီတာကို ၅၈၀ ကျပ်၊ ၉၅ တလီတာကို ၈၂၀ ကျပ်၊ ၉၇ တလီတာကို ၉၁၀ ကျပ်၊ ဒီဇယ်ဆီ ၅၆၀ ကျပ်နဲ့ ရောင်းချခဲ့ရာက ခု စက်တင်ဘာလမှာ ၉၂ တလီတာ ၅၉၀ ကျပ်၊ ၉၅ တလီတာ ၈၃၀ ကျပ်၊ ၉၇ တလီတာ ၉၂၀ ကျပ်၊ ဒီဇယ်ဆီ ၅၈၀ ဈေးနှုန်းနဲ့ ဈေးနှုန်းမြင့်တက်လာပါတယ်။ ဘီအိုစီကုမ္ပဏီ မန်နေဂျင်းဒါရိုက်တာ ဦးဝင်းဆွေက “ဒီရက်ပိုင်းမှာ ဖြစ်နေတဲ့ ဒေါ်လာဈေးနှုန်းက ၁၂၄၀ ကျော် ၁၂၅၀ နီးပါးမှာ ဖြစ်နေတယ်ပေါ့နော်။ လက်ရှိ ဒီဈေးနှုန်းနဲ့ ကမ္ဘာ့ ဒီနေ့ဖြစ်နေတဲ့ စင်ကာပူမှာထွက်တဲ့ ရေနံဈေးတွေနဲ့ တွက်မယ်ဆိုရင်တော့ ဆီဈေးတွေက ၉၂ ဆိုရင် မန္တလေးမြို့အရောက် ၁ လီတာကို ကုမ္ပဏီသွင်းတဲ့ အရင်းဈေး ၅၂၅၊ ၅၃၀ နီးပါးလောက် ဒီနေ့ ဖြစ်နေတယ်” လို့ ပြောပါတယ်။ လမ်းဘေးက တပိုင်တနိုင် ဆီဆိုင်အသေးတွေမှာတော့ သြဂုတ်လက အောက်တိန်း ၉၂ တဂါလံကို ၂၃၀၀ ကျပ်ရှိခဲ့ပြီး စက်တင်ဘာလထဲမှာတော့ တဂါလံကို ၂၅၀၀ ကျပ်နဲ့ ရောင်းချနေပါတယ်။ “တဂါလံကို ပြီးခဲ့တဲ့လက ၂၃၀၀ ပေါ့နော်။ အောက်တိန်း ၉၂ ပေါ့။ ခုလဆိုရင် ၂၅၀၀ လောက် ပေါက်ဈေးဖြစ်နေတယ်။ ပေပါဈေးနှုန်းဆိုရင်တော့ တပေပါကို လက်ရှိပေါက်ဈေး တသိန်းတသောင်းကိုးထောင့်ငါးရာပေါ့။ စောစောပိုင်းတုန်းကဆိုရင်တော့ အရင်လတွေကဆို တသိန်းတသောင်းပေါ့။ တသိန်းတသောင်းတို့၊ တသိန်းကိုးထောင်တို့ပေါ့။ ခုတော့ တပေပါကို တသောင်းလောက် တက်သွားတယ်ပေါ့” လို့ ဆီအရောင်းအ၀ယ်လုပ်သူ ကိုဖိုးကျော်က ပြောပါတယ်။ ဒီရက်ပိုင်းမှာဖြစ်နေတဲ့ ဒေါ်လာဈေးနှုန်းက ၁၂၄၀ ကျော် ၁၂၅၀ နီးပါး ဖြစ်နေပြီး စင်ကာပူနိုင်ငံနဲ့ ထိုင်းနိုင်ငံဘက်ကနေတဆင့် ဆီတွေ တင်သွင်းတာကြောင့် ဒေါ်လာဈေးနှုန်း အတက်အကျပေါ်မှာ ဆီဈေးကမှီပြီး အတက်အကျ ရှိနေတာပါ။ သတင်း - အောင်အောင်
5 years Ago

January 19, 2016

ပြည်တွင်းလောင်စာဆီဈေးနှုန်းများ လျှော့ချသတ်မှတ်

မြန်မာပြည်တွင်း စက်သုံးဆီဈေးနှုန်းတွေကို ဒီကနေ့ ဇန်န၀ါရီ ၁၉ ရက်က စတင်ပြီး  တလီတာကို ပျမ်းမျှ ကျပ် ၅၀ ကနေ ၁၀၀ အကြား လျှော့ချရောင်းပေးဖို့ စီစဉ် ဆောင်ရွက်ထားတယ်လို့ ဒီကနေ့ထုတ် နိုင်ငံပိုင် သတင်းစာတွေမှာ ဖော်ပြပါတယ်။ ကမ္ဘာ့ရေနံဈေးတွေ ကျဆင်းလာပြီး မြန်မာ့ရေနံနဲ့ စက်သုံးဆီ ဈေးနှုန်းတွေ ဆက်လက် မြင့်တက်နေတာကို ကာကွယ်တားဆီးဖို့အတွက် စွမ်းအင်ဝန်ကြီးဌာနနဲ့ စက်သုံးဆီ တင်သွင်းဖြန့်ဖြူး ရောင်းချသူများအသင်းတို့ ပူးပေါင်းပြီး ဈေးနှုန်းကျဆင်းရေး ဆောင်ရွက်နေတာလို့ ဆိုပါတယ်။ ဈေးနှုန်းတွေ လျှော့ချ ရောင်းချပေးဖို့ကို စက်သုံးဆီ အရောင်းဆိုင်တွေထံ အကြောင်းကြားထားပြီး ဖြစ်တယ်လို့လည်း ဆိုပါတယ်။ Max Energy ဆီအရောင်းဆိုင်ကတော့ ပြီးခဲ့တဲ့ ညသန်းခေါင်အချိန်ကစပြီး ရန်ကုန်က သူ့ရဲ့ ဓာတ်ဆီအရောင်းဆိုင်တွေမှာ ဆီဈေးနှုန်းတွေ စတင်လျှော့ချ ရောင်းပေးနေပြီလို့ အရောင်းဌာန တာဝန်ရှိသူတဦးက ဒီဗွီဘီကို ပြောပါတယ်။ “ဒီဇယ်က တလီတာကို ကျပ် ၅၀၀၊ ပရီမီယံဒီဇယ်က ၅၆၀ ကျပ်၊ အောက်တိန်း 92 က ၅၅၀ ကျပ်၊ အောက်တိန်း 95 က ၆၆၀ ကျပ် ဒီနေ့ကစချတာ၊ မနေ့ည ၁၂ နာရီကနေပြီး စချတာ၊  ဒီဇယ်ဆိုရင်တော့ ၇၀ ကျသွားတယ်၊ ပရီမီယံဒီဇယ်ဆိုရင် ၅၀ ကျတယ်၊ 92 ဆိုရင် ၆၀ ကျတယ်၊ 95 ဆိုရင် ၅၀ ကျတယ်၊ ကျနော်တို့ဆီဆိုင်တွေ မက်စ်ဆီဆိုင်တွေ ရန်ကုန်မှာ ဆီဆိုင်အကုန်လုံးကိုချတာ။” မန္တလေး၊ နေပြည်တော် အပါအ၀င် တခြားမြို့တွေမှာတော့ ဆီဈေးနှုန်းတွေ ကျဆင်းခြင်း မရှိသေးပါဘူး။ မြန်မာနိုင်ငံ စက်သုံးဆီ တင်သွင်းရောင်းချ ဖြန့်ဖြူးရေး အသင်းကတော့ အသင်းရုံးက အပတ်စဉ် ထုတ်ပြန်ပေးနေတဲ့ ဆီဈေးနှုန်းတွေနဲ့ အရောင်းဆိုင်တွေမှာ ရောင်းချပေးနေတဲ့ လက်လီဈေးတွေ များစွာကွာဟနေတာ တွေ့ရလို့ သတ်မှတ်ဈေးနှုန်းထက် ပိုမရောင်းချကြဖို့နဲ့ မန္တလေးတိုင်းအတွင်းရှိ ဆိုင်တွေအနေနဲ့ ရန်ကုန်ဈေးနှုန်းနဲ့ ထိန်းညှိရောင်းချဖို့ စက်သုံးဆီ တင်သွင်းရောင်းချတဲ့ ကုမ္ပဏီတွေကို ဇန်န၀ါရီ ၁၈ ရက် နေ့စွဲနဲ့ ညွှန်ကြားချက် ထုတ်ပြန်ထားပါတယ်။ အသင်းက နောက်ဆုံး သတ်မှတ်ထုတ်ပြန်ထားတဲ့ စက်သုံးဆီ ရောင်းဈေးတွေကတော့ ဒီဇယ် တလီတာ ၅၀၀ ကျပ်၊ အဆင့်မြင့်ဒီဇယ် တလီတာ ၅၆၀ ကျပ်၊ 92 တလီတာ ၅၅၀ ကျပ်၊  95 တလီတာ ၆၆၀ ကျပ် ဖြစ်ပါတယ်။ စက်သုံးဆီဆိုင်တွေအနေနဲ့ ဈေးနှုန်းမြင့်တက် ရောင်းချခြင်း မပြုလုပ်ဖို့ ညွှန်ကြားထားပြီး ဈေးနှုန်းမြင့်တက်ပါက သတိပေး အရေးယူသွားမှာဖြစ်ကြောင်းနဲ့ မလိုက်နာရင် အရေးယူ ဆောင်ရွက်မှုတွေ မကြာခင် စတင်သွားမယ်လို့ ရေနံထွက်ပစ္စည်း ဖြန့်ဖြူးရောင်းချလုပ်ငန်းများ ထိန်းသိမ်းကြီးကြပ်ရေး ကော်မတီရဲ့ ပြောဆိုချက်ကို ကိုးကားပြီး နိုင်ငံပိုင်သတင်းစာမှာ ဖော်ပြပါတယ်။
6 years Ago
Up