ဘရာဇီးနိုင်ငံမှ အလွတ်တန်း ရေငုပ်သမားတဦးဟာ သမုဒ္ဒရာတွင်း နစ်မြုပ်ခဲ့တဲ့ သင်္ဘောပျက်တစင်း အတွင်းပိုင်းထိ ရောက်ရှိခဲ့ချိ်န် ရိုက်ကူးထားခဲ့တဲ့ ရုပ်သံဗွီဒီယိုဖိုင်ကို ထုတ်လွှင့်ခဲ့ပါတယ်။ အသက် ၂၈ နှစ်အရွယ် အာဒမ် စတဲန်းဟာ အလွတ်တန်း ဒိုင်ဗင်သမားတဦးဖြစ်ကာ ရေအောက်ကမ္ဘာမှ သင်္ဘောပျက်တွင်း ရှုခင်းရှုကွက်တွေနဲ့အတူ စွန့်စားရိုက်ကူးခဲ့တာကို တွေ့ရပါတယ်။ သူရောက်ရှိခဲ့တဲ့ နေရာကတော့ အင်ဒိုနီးရှားနိုင်ငံ ဘာလီကျွန်း အရှေ့မြောက်ပိုင်းဖြစ်ပြီး ဘိုဂါသင်္ဘောပျက်လို့ အမည်ပေးထားတဲ့ ရေအောက်ကမ္ဘာ ဖြစ်ပါတယ်။ ဘိုဂါသင်္ဘောဟာ ကမ်းရိုးတန်းစောင့် သင်္ဘောတစင်းဖြစ်ပြီး ၂၀၁၁ ခုနှစ်က နစ်မြုပ်ခဲ့ကာ ခုချိန်မှာတော့ စွန့်စားခရီးသွားတွေ လာရောက်လေ့လာနိုင်ဖို့ ထိန်းသိမ်းထားရှိတာပါ။ ရုပ်သံဗွီဒီယိုဖိုင်ထဲမှာတော့ သင်္ဘောမာလိန်မှူးတဦးလို သရုပ်ပြနေခဲ့တဲ့ အာဒမ် စတဲန်းကို တွေ့ရပြီး ရေအောက်အနက်မှ ပတ်ဝန်းကျင်အခြေအနေတွေကို တွေ့မြင်ရမှာ ဖြစ်ပါတယ်။

ရေအောက်ကမ္ဘာကို လေ့လာစူးစမ်းဖို့နဲ့ ရုပ်သံရိုက်ကူးနိုင်ဖို့အတွက် ငါးတကောင်ရဲ့ ပုံသဏ္ဌာန်ရှိပြီး ကင်မရာတပ်ဆင်ထားတဲ့ ရေအောက်သွား ဒရုန်းတစီးကို နည်းပညာ ကုမ္ပဏီတခုက ဖန်တီးပြုလုပ်ခဲ့ပါတယ်။ BIKI လို့ခေါ်တဲ့ အဲဒီဒရုန်းဟာ 4k resolution အရည်အသွေးနဲ့ ရုပ်မြင်ရိုက်ကူးနိုင်တဲ့အပြင် အတားအဆီးတွေကို ရှောင်ရှားကာ အလိုလျောက် ဟန်ချက်ထိန်းနိုင်ပြီး အသုံးပြုသူဆီ ပြန်လာဖို့ လမ်းကြောင်းကိုလည်း GPS အသုံးပြု ရှာဖွေနိုင်တယ်လို့ RoboSea ကုမ္ပဏီက ဒီပရောဂျက်အတွက် အစုစပ် ရှယ်ယာငွေ လက်ခံတဲ့ စာမျက်နှာမှာ ဖော်ပြထားပါတယ်။ ဒီစာမျက်နှာက ဒေါ်လာနှစ်သောင်းရရှိဖို့ မျှော်မှန်းထားပေမယ့် မေလ ၃၁ ရက်နေ့အထိ ဒေါ်လာ ၁၁၆၀၀၀ ကျော် ရရှိခဲ့ပါတယ်။ ၂၀၁၅ ခုနှစ်မှာ ပရောဂျက်ကို စတင်ခဲ့ပြီး မော်ဒယ်အမျိုးမျိုး ထုတ်လုပ်ခဲ့ပါတယ်။ အခု မော်ဒယ်မှာတော့ ထောင့်ကျယ်မှန်ဘီလူးတွေ တပ်ဆင်ထားပြီး ရေအောက်မီတာ ၆၀ အောက်အထိ အသုံးပြုနိုင်ပါတယ်။