ရေဘေးသင့်သူများ

August 17, 2018

ကယ်ဆယ်ရေးစခန်းကို မရောက်လာသည့် ရေဘေးသင့်သူများ စားဝတ်နေရေး အခက်ကြုံ

ကရင်ပြည်နယ်၊ ဘားအံမြို့မှာ ရေကြီးနစ်မြုပ်နေတဲ့ နေအိမ်တချို့ကို သက်ဆိုင်ရာ အုပ်ချုပ်ရေးမှူးတွေက ကူညီထောက်ပံ့မှု မပေးတဲ့အတွက် နေထိုင်စားသောက်ရေး အခက်အခဲတွေနဲ့ ရင်ဆိုင်နေရတယ်လို့ ရေဘေးသင့်ပြည်သူတွေက ပြောပါတယ်။ ရေကြီးနစ်မြုပ်နေတဲ့ နေအိမ်တချို့ဟာ ကျန်းမာရေး၊ စားဝတ်နေရေးနဲ့ မိသားစု လူဦးရေ များပြားတဲ့အပြင် အကြောင်းအမျိုးမျိုးကြောင့် ယာယီဖွင့်လှစ်ထားတဲ့ ရေဘေးကယ်ဆယ်ရေး စခန်းကို သွားရောက်နေထိုင်ခြင်း မရှိတဲ့ ရေဘေးသင့်ပြည်သူတွေကို ကူညီထောက်ပံ့မှု မပေးတဲ့အတွက် နေထိုင်စားသောက်ရေးမှာ အခက်အခဲတွေနဲ့ ရင်ဆိုင်နေရတာပါ။ သြဂုတ် ၈ နေ့ကစတင်ပြီး ဒုတိယအကြိမ် သံလွင်မြစ်ရေ တက်လာမှုကြောင့် ဘားအံမြို့၊ မြို့ပေါ်ရပ်ကွက်တွေနဲ့ ကျေးရွာတွေမှာ ရေပြန်လည်ဝင်ရောက်လာတဲ့အတွက် ရေကြီးနစ်မြုပ်မှုတွေ ပြန်လည်ဖြစ်ပေါ်ခဲ့တာပါ။ ဘားအံမြို့၊ အမှတ် ၉ ရပ်ကွက်၊ ဦးတင်မျိုးဝင်းက “ဌာနဆိုင်ရာက တကယ်ဒုက္ခရောက်တဲ့ သူကို တကယ်လာကူစေချင်တာပါ။ တကယ် ဒုက္ခရောက်တဲ့သူကျတော့ ဘယ်သူမှ မကြည့်ဘူး။ အခုဆို တော်တော်ဒုက္ခရောက်တာ။ ကျနော်တို့ကို ဒီလိုပဲ လျစ်လျူရှုထားတယ်။ ကျနော်တို့ တကယ် ဒုက္ခရောက်တော့ ရေလယ်ကောင်မှာ ရေသောက်ဖို့လည်း မရှိဘူး။ ထမင်းစားဖို့လည်း မရှိဘူး။ သူတို့ဆီက ပံ့ပိုးမှုဆိုတာ ဘာမှ မရှိဘူး” လို့ ပြောပါတယ်။ ကရင်ပြည်နယ် အထွေထွေအုပ်ချုပ်ရေးဦးစီးဌာန ညွှန်ကြားရေးမှူး ဦးအောင်ဇော်မိုးက “အဲဒီအတွက် အမှန်အတိုင်း ပွင့်ပွင့်လင်းလင်းပြောရရင် ရေဘေးအတွေ့အကြုံကို တကယ်တော့ ဝိုင်းဝန်းကူညီပေးမယ့်သူမှာလည်း အတွေ့အကြုံနည်းသွားတယ်။ စခန်းပေါ်မှာ နေတဲ့လူတွေ အားလုံးကိုလည်း ထမင်းချက်ကျွေးနေသလို ကျနော်တို့ ရွာတွေကိုလည်း စုံစုံလင်လင် ညီမျှအောင်လို့လည်း အားလုံးကို သာတူညီမျှဖြစ်အောင် ဝန်ကြီးချုပ်ကြီး ဦးဆောင်ပြီး ဆောင်ရွက်ပေးနေတယ်” လို့ ပြောပါတယ်။ ဘားအံမြို့၊ အမှတ် ၄ ရပ်ကွက်နေ ဒေါ်မြင်ဦးက “ဆန်၊ ဆီ၊ ဆေး၊ ဆား အကုန်လုံး လှေတွေ၊ ကူးတို့တွေနဲ့ သွားပေးရင် လိုချင်တာပေါ့။ မရှိတဲ့လူတွေက အနိမ့်ပိုင်းက မရှိကြဘူးလေ။ ကျမတို့က ကုန်းမြင့်ပိုင်းရောက်နေတာ နည်းနည်းတော့ တော်သေးတယ်။ ကျမတို့ထက် ဒုက္ခရောက်တဲ့လူတွေက အဲဒါတွေ လိုအပ်တယ်” လို့ ပြောပါတယ်။ အလားတူ ကော့ကရိတ်မြို့နယ်အတွင်း ဝေးလံပြီး လမ်းပန်းဆက်သွယ်ရေး ခက်ခဲတဲ့ ဒေသက ရေဘေးသင့် ရွှေ့ပြောင်းလုပ်သားတွေ အိမ်ထောင်စုစာရင်း (ပုံစံ-၁၀) မရှိတဲ့အတွက် သက်ဆိုင်ရာ တာဝန်ရှိသူတွေရဲ့ ကူညီထောက်ပံ့မှုတွေ မရရှိဘူးလို့ ဒေသခံတွေက သြဂုတ် ၁၄ ရက်နေ့က ပြောဆိုထားပါသေးတယ်။ ကရင်ပြည်နယ်အတွင်း ရေကြီးမှုကြောင့် ဘားအံမြို့၊ ရေဘေးကယ်ဆယ်ရေးစခန်း ၁၀ ခုမှာ အိမ်ထောင်စု ၁၄၀၀ ကျော်၊ လူဦးရေ ၇၃၀၀ ကျော်နဲ့ လှိုင်းဘွဲ့မြို့ ရေဘေး ကယ်ဆယ်ရေးစခန်း ၄ ခုမှာ အိမ်ထောင် စု ၅၀၀ လောက်၊ လူဦးရေ ၂ ထောင်ကျော် ကယ်ဆယ်ရေးစခန်းတွေမှာ ယာယီခိုလှုံနေရပြီး၊ ပြည်နယ်အစိုးရက ရေဘေးသင့် ပြည်သူတွေကို တအိမ်ထောင် ဆန် ၃ ပြည်နှုန်း ထောက်ပံ့ပေးထားပါတယ်။ သတင်း- ရဲမင်းခေါင်
3 years Ago

August 14, 2018

ရေဘေးသင့်သူများအတွက် အာဆီယံ အရန်ဆန် အထောက်အပံ့ ထပ်ရမည်

ရေဘေးသင့်ဒေသတွေအတွက် အာဆီယံ အရန်ဆန် အကူအညီ အထောက်အပံ့ ထပ်ရဖို့ရှိနေတယ်လို့ စိုက်ပျိုးရေး၊ မွေးမြူရေးနဲ့ဆည်မြောင်းဝန်ကြီးဌာန၊ ဒု အမြဲတမ်းအတွင်းဝန် ဦးမျိုးတင့်ထွန်းက ဒီဗွီဘီကို ပြောပါတယ်။ အာဆီယံ +၃ အရေးပေါ် ဆန်ရိက္ခာ အစီအစဉ်အရ သဘာဝဘေးသင့် ဒေသတွေအတွက် ပြီးခဲ့တဲ့ ၂၀၁၇-၁၈ ဘဏ္ဍာနှစ်မှာ ကိုရီးယားနိုင်ငံက ဆန်တန်ချိန် ၅၀၀၊ ဂျပန်နိုင်ငံက တန်ချိန် ၅၀၀ စုစုပေါင်း အရန်ဆန်တန်ချိန် ၁၀၀၀ ရှိခဲ့ပြီး၊ ဒီနှစ်အတွက် အာဆီယံအရေးပေါ် အရန်ဆန် ထပ်မံရရှိဖို့  ပြင်ဆင်နေတယ်လို့ ပြောပါတယ်။ ဒုအမြဲတမ်းအတွင်းဝန် ဦးမျိုးတင့်ထွန်းက “အာဆီယံအရေးပေါ် အရန်ဆန် ဆိုတာကတော့ အာဆီယံ +၃ နိုင်ငံတွေမှာ သဘာဝဘေးသင့်လာရင် ထောက်ပံ့ပေးဖို့ AFTA က ပေးတဲ့ အထောက်အပံ့ပါ။ အခု ရေဘေးသင့်ဒေသတွေကို ထောက်ပံ့နေတာ တန်ချိန် ၅၀ လောက်ပဲ ကျန်ပါတော့တယ်။ ထပ်ရဖို့အတွက်ကို ပြင်ဆင်နေပါတယ်။ လူကယ်ပြန်နဲ့လည်း ညှိဖို့လိုမယ် ထင်ပါတယ်” လို့ ဒီဗွီဘီကို ပြောပါတယ်။ အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီနဲ့ လူမှုဝန်ထမ်း ကယ်ဆယ်ရေးနဲ့ ပြန်လည်နေရာချထားရေးဝန်ကြီးအနေနဲ့ ရေဘေးသင့်ပြည်သူတွေအတွက် ဆန်ရိက္ခာကို အဓိက ထောက်ပံ့ကူညီနေတာ ဖြစ်ပါတယ်။ ပြည်နယ်နဲ့ တိုင်းဒေသအသီးသီးမှာ မိုးအဆက်မပြတ် ရွာသွန်းမှုကြောင့် ဇွန်လက စတင် ရေကြီးရေလျှံနေပြီး သြဂုတ်လဆန်းအထိ ကောက်ယူထားတဲ့ စာရင်းတွေအရ မြန်မာတနိုင်ငံလုံးမှာ လက်ရှိ ဖြစ်ပေါ်နေတဲ့ ရေကြီး ရေလျှံမှုတွေကြောင့် စိုက်ဧကပေါင်း ၁၂ သိန်းကျော် ရေနစ်မြုပ်ခဲ့ကာ စိုက်ဧက ၄ သိန်းလောက် သီးနှံပျက်စီးခဲ့တယ်လို့ သိရပါတယ်။
3 years Ago
Up