ရေလှူဒါန်း

May 14, 2017

ရေအခက်အခဲဖြစ်နေသည့် တောင်ကြားကျေးရွာကို စစ်ကိုင်းတိုင်းမီးသတ်မှ ရေလှူဒါန်း

မေလဆန်းပိုင်းကစတင်ပြီး သောက်သုံးရေအခက်အခဲကြုံတွေ့နေရတဲ့ မုံရွာမြို့နဲ့ ၁၀ မိုင်ခန့်အကွာက တောင်ကြားကျေးရွာကို စစ်ကိုင်းတိုင်း မီးသတ်ဦးစီးဌာနက သောက်ရေသန့်ဘူးကြီး ၅၀ နှင့် သုံးရေဂါလန် ၅၀၀၀ ကို မေလ ၁၃ ရက်နေ့ နေ့လယ်ပိုင်းက သွားရောက်လှူဒါန်းခဲ့ကြပါတယ်။ တောင်ကြားရွာက အိမ်ခြေ ၂၅၀ ရှိပြီး လူဦးရေ ၁၀၀၀ ကျော်ရှိပါတယ်။ ရွာမှာစည်ပင်က တူးပေးထားတဲ့ ရေတွင်းသာရှိပြီး ရေငန်သာထွက်ရှိတာကြောင့် သောက်ရေအဖြစ်သုံးလို့ အဆင်မပြေပါဘူး။ မြန်မာ့ဩဘာနဲ့ ကဲမြန်မာက လှုဒါန်းပေးထားတဲ့ ရေတွင်းတွေကလည်း ၂ မိုင်ခန့်ကွာဝေးပြီး ရေထွက်နဲ့ကုန်ကျစရိတ်မကာမိဖြစ်နေတာပါ။ “ဒီလိုရေလှူဒါန်းမှုက အင်မတန် ကုသိုလ်ရတယ်။ ဒါပေမယ့် ရေရှည်အတွက် အဆင်မပြေဘူး။ ရေရှည်အဆင်ပြေအောင်ဆောင်ရွက်မှရမယ်။ ရေလှူတာက ပြည်သူ့အကျိုးပြု လုပ်ငန်းဖြစ်တာနဲ့အညီ ဒီတောင်ကြားရွာကို မနက်တစီး၊ ညနေတစီးလှူပေးနေပါတယ်။ စစ်ကိုင်းတိုင်းအတွင်းမှာ စစ်ကိုင်းမြို့နယ်၊ မုံရွာမြို့နယ်၊ ကနီမြို့နယ်၊ ယင်းမာပင်မြို့နယ်တွေက ရေရှားတဲ့ရွာတွေကိုလည်း မီးသတ်တပ်ဖွဲ့က ဦးဆောင်လှူဒါန်းနေပါတယ်။ စုစုပေါင်း ဂါလန် ၃ သောင်းကျော်သွားပြီဖြစ်တယ်” လို့ တိုင်းမီးသတ်တပ်ဖွဲ့ ဒုတိယညွှန်ကြားရေးမှုး ဦးမင်းစမ်းအေး က ဒီဗွီဘီကိုပြောပါတယ်။ တောင်ကြားရွာအနေနဲ့ ရေရရှိရေးအတွက်ပေ ၅၀၀၀ လောက်သာဝေးတဲ့ ရွာအနီးကမ်းနီတမံက ရေရရှိရေးအတွက် မြို့နယ်စီခန့်ကို စာတင်ထားတယ်လို့သိရပါတယ်။ လက်ရှိမှာ လူမှုကွန်ရက်တွေကနေ ရေရှားတဲ့သတင်းတွေပျံ့နှံ့နေတာကြောင့် ပရဟိတအဖွဲ့တွေကလည်း လာရောက်လှူဒါန်းတာတွေရှိတယ်လို့ ကျေးရွာအုပ်ချုပ်ရေးမှူး ဦးကျော်လင်းက ဒီဗွီကိုပြောပါတယ်။ ရာသီဥတု ဆက်လက်ပူပြင်းပြီး မိုးခေါင်နေဦးမယ်ဆိုရင်တော့ ရေပြဿနာက ဆက်ကြုံရဦးမယ်လို့လည်းဆိုပါတယ်။ တောင်ကြားရွာက မုံရွာမြို့နဲ့ ၁၀ မိုင်လောက်သာဝေးပေမယ့် ချောင်ကျပြီး လမ်းပန်းဆက်သွယ်ရေးခက်ခဲလို့ လူသိနည်းတဲ့ ရွာလည်းဖြစ်ပါတယ်။
4 years Ago

April 6, 2017

ရေရှားသည့် ကျေးရွာအချို့ကို ရဲတပ်ဖွဲ့ ဦးဆောင်ပြီး ရေလှူဒါန်း

စစ်ကိုင်းတိုင်းဒေသကြီး၊ ကနီမြို့နယ်အတွင်းရှိ၊ မုံရွာ-ယာကြီး-ကလေးဝကားလမ်းဘေးဝဲယာက ကျေးရွာအချို့ကို ဧပြီလ ၅ ရက်နေ့က ကနီမြို့နယ်ရဲတပ်ဖွဲ့ဦးဆောင်ပြီး ရေဂါလံ ၅ ထောင်နီးပါး ဖြန့်ဝေလှူဒါန်းခဲ့ပါတယ်။ ပေါက်အင်းတောင်ရွာ၊ အင်းမှော်ရွာ စတဲ့ နွေရာသီရေရှားပါးတဲ့ ရွာတွေကို သောက်ရေသန့်ကား ၂ စီး၊ သုံးရေအတွက် မီးသတ်ကား ၂ စီး စုစုပေါင်းကား ၄ စီးနဲ့ ပထမဆုံးအကြိမ်အဖြစ် မြို့နယ်ရဲမှူး တင်မောင်မြင့် ဦးဆောင်ပြီး သွားရောက်လှူဒါန်းခဲ့ကြတာပါ။ “ပေါက်အင်းတောင်၊ အင်တောပြန့်၊ အင်းမှော် စတဲ့ရွာတွေက ကန်ေ်ရကိုသာ အဓိကထား သောက်သုံးကြရတာဖြစ်ပါတယ်။ နွေရာသီ ပူပြင်းခြောက်သွေ့တဲ့ အချိန်မှာတော့ ကန်ရေက လုံလောက်မှုမရှိဘဲ ချိုးရေမဆိုထားနဲ့ သောက်ရေနဲ့ ချက်ပြုတ်ရေးအတွက်တောင် မလွယ်ကူဘူး” လို့ ဒေသခံတွေက ဆိုပါတယ်။ ဒီဒေသမှာ ရေတွင်းတူးဖို့လည်း ပေ ၇၀၀၊ ၈၀၀ ထိတူးမှသာ ရေထွက်တာကြောင့် ကုန်ကျစရိတ်များတဲ့အတွက် မတူးနိုင်ကြဘူးလို့ ဆိုပါတယ်။ ဒေသခံတွေ အားထားနေရတဲ့ ရေကန်တွေက ခမ်းခြောက်နေပြီဖြစ်ပြီး နှစ်စဉ်လိုလို ရေအခက်အခဲက ကြုံတွေ့နေရတဲ့အပြင် အလှူရှင်တွေလည်း မျှော်လင့်နေရတာပါ။ အနီးဆုံးရေရနိုင်တဲ့နေရာက ၂ မိုင်လောက် ရှိပါတယ်။ ရဲတပ်ဖွဲ့အနေနဲ့လည်း ပြည်သူကို ဗဟိုပြုတဲ့ ရဲလုပ်ငန်းကို အကောင်အထည်ဖော်တဲ့နေရာမှာ ပြည်သူတွေရဲ့အခက်အခဲကို တတ်နိုင်တဲ့နေရာကနေ ကူညီဖြည့်ဆည်းပေးတဲ့အနေနဲ့ အခုလို ကူညီရတာဖြစ်တယ်လို့ ရဲတပ်ဖွဲ့ဝင်တဦးက ဆိုပါတယ်။
4 years Ago
Up