ပေါင်မြို့နယ်တွင် မိုးစပါးများ အချိန်မီ ရိတ်သိမ်းနေရသဖြင့်

December 1, 2017

ပေါင်မြို့နယ်တွင် မိုးစပါးများ အချိန်မီ ရိတ်သိမ်းနေရသဖြင့် နေ့စားစပါးငှားရိတ်သူများ အဆင်ပြေ

မွန်ပြည်နယ်၊ ပေါင်မြို့နယ်အတွင်းရှိ မိုးစပါး စိုက်ပျိုးတောင်သူတွေအနေနဲ့ အချိန်အခါမဟုတ် မိုးရွာသွန်းပါက စပါးခင်းတွေ ပျက်စီးလာနိုင်ပြီး အချိန်မီ ရိတ်သိမ်းနိုင်ရေးအတွက် နေ့စား စပါးရိတ်သူတွေကို အပြိုင်အဆိုင် ငှားရမ်း လုပ်ကိုင်နေရတာကြောင့် နေ့စား စပါးရိတ်သူတွေက အဆင်ပြေနေတယ်လို့ သိရပါတယ်။ ပဲခူးတိုင်းဒေသကြီး၊ ဝေါမြို့နယ်က နေ့စား စပါးအငှားရိတ်သိမ်းသူ ကိုစိုးနိုင်က “ကျနော်တို့က နှစ်တိုင်းလိုလို ပေါင်မြို့နယ်ဘက်မှာ လာပြီး အဖွဲ့လိုက် အငှားလာရိတ်နေကြပါ။ အရင်နှစ်တွေက ဒီလောက်ထိ အလုပ်က သိပ်မရှိဘူး။ ဒီနှစ်က ရာသီဥတုလည်း မမှန်တော့ စပါးမှည့်ချိန်မှာ မိုးရွာမှာ ကြောက်ပြီး လယ်ရှင်တွေက ဆက်တိုက်ဆိုသလို စပါးရိတ်ဖို့ လိုက်ငှားနေကြတာပါ။ နောက်ပြီး ဈေးကလည်း မနှစ်ကထက် ပိုပြီးပေးနေတော့ ကျနော်တို့အတွက် ဒီနှစ်က တော်တော်လေးကို အဆင်ပြေတယ်လို့ ပြောလို့ရပါတယ်” လို့ ဒီဗွီဘီကို ပြောပါတယ်။ ပေါင်မြို့နယ်ထဲမှာ မိုးစပါးများ အငှားလာရောက် ရိတ်သိမ်းကြသူ တဦးကို တနေ့ ၇၀၀၀ ကျပ်နှုန်းနဲ့ စားစရိတ် အပြီးအငြိမ်းခေါ်ယူကာ မနက် ၆ နာရီမှ ညနေ ၅ နာရီအထိ လုပ်ကိုင်ရတာနဲ့ ဧကအလိုက် ရိတ်သိမ်းမှာဆိုပါက ၁ ဧကလျှင် ၄၅၀၀၀ ကျပ်နှုန်းနဲ့ လုပ်အားခတွေကို ပြန်လည်ရှင်းလင်းပေးရတယ်လို့ လယ်ပိုင်ရှင် အများစုဆီက သိရပါတယ်။ ထန်းပင်ချောင်ကြီးကျေးရွာမှ လယ်ရှင် ဦးဘလှက“ဒီအချိန်ကတော့ စပါးတွေ အဖြိုင်ဖြိုင်ပေါ်တဲ့အချိန်ဖြစ်လို့ အချိန်အခါမဟုတ်ဘဲ မိုးရွာမှာကို စိုးရိမ်ရတာပေါ့။ ရိတ်သိမ်းလို့ရတဲ့ စပါးတွေကို လူငှားခေါ်ပြီး အမြန်ရိတ်နေရတယ်။ နောက်ပြီး ရာသီဥတုက မမှန်တော့ ကိုယ့်စပါးခင်းတွေကို မိုးမထိအောင်လို့ အချိန်မီ ရိတ်သိမ်းနေရတယ်။ ဈေးကောင်းတဲ့အချိန် မရိတ်နိုင်ရင်လည်း ဈေးကွက်မှာ ဈေးနှိမ်ခံထိမယ်။ တချို့တွေက စက်နဲ့ရိတ်နေတာတွေလည်း ရှိတယ်။ အလုပ်သမားတွေကိုတောင် အပြိုင်အဆိုင် ငှားပြီး ရိတ်နေရတယ်” လို့ ပြောပါတယ်။ ပေါင်မြို့နယ်ထဲက စပါးစိုက်ပျိုး တောင်သူတွေအနေနဲ့ စပါးပေါ်ချိန်မှာ မိမိတို့ တနွေစာအတွက် စားသုံးဖို့နဲ့ စီးပွားဖြစ် ရောင်းချဖို့အတွက် မိရိုးဖလာလုပ်ငန်းတခု ဖြစ်တာကြောင့် ဆန်စပါးတွေကိုသာ အဓိကထား စိုက်ပျိုးကြတာ ဖြစ်ပါတယ်။ မွန်ပြည်နယ်ထဲမှာ ပေါင်မြို့နယ်ဟာ လယ်ယာလုပ်ငန်းကိုသာ အဓိကထားလုပ်ကိုင်ကြပြီး မိုးစပါးစိုက်ဧက ဒုတိယအများဆုံးဖြစ်ပြီး အခုနှစ်မှာ မိုးစပါးစိုက်ဧက ၁၂၈၈၈၄ ဧကရှိတယ်လို့ မြို့နယ်စိုက်ပျိုးရေးဦးစီးဌာနရုံးက သိရပါတယ်။ သတင်း - ယူမင်းစိုး
3 years Ago
Up