နော်အုန်းလှနှင့် ဦးနေမျိုးဇင်တို့ကို ဒုတိယအကြိမ်ရုံးထုတ် အာမခံလျှောက်

July 1, 2015

နော်အုန်းလှကို ခြွင်းချက်မရှိ လွှတ်ပေးရန် ကရင်အမျိုးသမီးအဖွဲ့ တောင်းဆို

ထောင်တွင်းအကျဉ်းကျခံနေရတဲ့ နိုင်ငံရေးတက်ကြွလှုပ်ရှားသူ နော်အုန်းလှကို ခြွင်းချက်မရှိ အမြန်ဆုံးလွှတ်ပေးဖို့ ကရင်အမျိုးသမီး အဖွဲ့အစည်းတွေက တောင်းဆိုလိုက်ပါတယ်။ ပြည်တွင်းအခြေစိုက် ကရင်အမျိုးသမီးများ ဖွံ့ဖြိုးတိုးတက်ရေးအဖွဲ့နဲ့ နယ်စပ်အခြေစိုက် ကရင်အမျိုးသမီးအစည်းအရုံးတို့က ပူးပေါင်းပြီး နော်အုန်းလှကို လွှတ်ပေးဖို့ ကြေညာချက်ထုတ်ပြန် တောင်းဆိုလိုက်တာဖြစ်ပါတယ်။ “ဘာကြောင့် လွှတ်ပေးဖို့ တောင်းဆိုရတာလဲဆိုတော့ ငြိမ်းချမ်းစွာ၊ လွတ်လပ်စွာ ထုတ်ဖော်ပြောဆိုခြင်းအားဖြင့် ဘယ်သူ့မှ ထောင်တွင်း အကျဉ်းကျမခံသင့်ဘူးလို့ ကျမတို့ ယုံကြည်တယ်။ နောက်တခုကကျတော့ မြန်မာအစိုးရအနေနဲ့ ပြည်တွင်းမှာ တကယ်ပဲ ပြုပြင်ပြောင်းလဲမှုကို တကယ်လိုလားတယ်ဆိုရင် ပြည်သူလူထုတွေကို လွတ်လပ်စွာ ထုတ်ဖော်ပြောဆိုခွင့် ပေးရမယ်” လို့ ကရင်အမျိုးသမီးအစည်းအရုံးရဲ့ တွဲဘက်အတွင်းရေးမှူး ၁ ဖြစ်တဲ့ နော်တာမလာစောက ပြောပါတယ်။ ဒါ့အပြင် နော်အုန်းလှဟာ  မိမိအကျိုးအတွက်မပါဘဲ အများပြည်သူ အခွင့်အရေးပြန်ရရှိရေး အတွက် လှုပ်ရှားတိုက်ပွဲဝင်နေတဲ့ အမျိုးသမီးတဦး ဖြစ်တာကြောင့် ပြန်လွှတ်ပေးဖို့ တောင်းဆိုတယ်လို့လည်း ပြောပါတယ်။ နော်အုန်းလှဟာ ပြီးခဲ့တဲ့ ၂၀၀၇ ခုနှစ်က လူထုခေါင်းဆောင် ဒေါ်အောင်ဆန်းစုကြည် လွတ်မြောက်ရေး ရွှေတိဂုံဘုရားမှာ ၀တ်ပြုဆုတောင်းခဲ့တာကြောင့် ဇွန် ၂၉ ရက်နေ့က ထောင်ဒဏ် ၆ လ ချမှတ်ခံခဲ့ရပါတယ်။ ဒါ့အပြင် မနှစ် ဒီဇင်ဘာလအတွင်း ဖြစ်ပွားခဲ့တဲ့ လက်ပံတောင်းဒေသ အဓိကရုဏ်းမှာ မိုးကြိုးပြင် အလယ်ရွာသူ ဒေါ်ခင်ဝင်း သေနတ်ထိမှန် သေဆုံးရတဲ့ဖြစ်ရပ် အမှုမှန်ပေါ်ပေါက်ရေးနဲ့ ကြေးနီစီမံကိန်း ရပ်ဆုိုင်းပေးရေးအတွက် တရုတ်သံရုံးရှေ့မှာ ချီတက်ဆန္ဒပြမှုနဲ့ ပတ်သက်ပြီး ပြီးခဲ့တဲ့ မေလက တခြားလှုပ်ရှားသူတွေနဲ့ ထောင်ဒဏ် ၄ နှစ် ၄ လ  ချမှတ်ခံထားရသူဖြစ်ပါတယ်။ ဒါ့အပြင် တရုတ်သံရုံးရှေ့မှာ လမ်းလျှောက်ချီတက်မှုနဲ့ အလုံ၊ ကျောက်တံတား၊ စမ်းချောင်း အစရှိတဲ့ မြို့နယ်တွေကလည်း သူ့ကို ပုဒ်မ ၁၈ နဲ့ တရားစွဲဆိုထားပါတယ်။ မြန်မာနိုငံအစိုးရအနေနဲ့  အများပြည်သူမှ လွတ်လပ်စွာထုတ်ဖော်ပြောဆိုခြင်း၊ ဆန္ဒထုတ်ဖော်ခြင်းများအပြင် အစိုးရအပေါ် ဝေဖန်သုံးသပ်ခြင်းများကိုလည်း လေးစားသင့်ကြောင်းနဲ့  မိမိတို့ရဲ့အမြင် အယူအဆတွေ ထုတ်ဖော်ခြင်းအပေါ် ခြိမ်းခြောက်တာ၊ ဖမ်းဆီးတာတွေ မဖြစ်သင့်ကြောင်းလည်း ကရင်အမျိုးသမီးအဖွဲ့တွေက ဝေဖန်ထားပါတယ်။ ဒါ့အပြင် နော်အုန်းလှနှင့်အတူ အခြားသော ငြိမ်းချမ်းစွာ ဆန္ဒထုတ်ဖော်ခြင်းကြောင့် ဖမ်းဆီး ထောင်ချ စွဲချက်တင်ခံထားရသူအားလုံးကို အမှုအားလုံးကနေ ခြွင်းချက်မရှိ ချက်ချင်းလွှတ်ပေးဖို့လည်း တောင်းဆိုထားပါတယ်။
6 years Ago

June 26, 2015

နိုင်ငံရေးတက်ကြွလှုပ်ရှားသူ နော်အုန်းလှကို ထောင်ဒဏ် ၆ လ ထပ်ချ

ထောင်တွင်းအကျဉ်းကျခံနေရဆဲ နိုင်ငံရေးတက်ကြွလှုပ်ရှားသူ နော်အုန်းလှကို ဒဂုံမြို့နယ်တရားရုံးက အလုပ်နဲ့ ထောင်ဒဏ် ၆ လ ဒီနေ့ ထပ်မံချမှတ်လိုက်ပါတယ်။ ပြီးခဲ့တဲ့ ၂၀၀၇ ခုနှစ်က လူထုခေါင်းဆောင် ဒေါ်အောင်ဆန်းစုကြည်လွတ်မြောက်ရေး ရွှေတိဂုံဘုရားမှာ ၀တ်ပြုဆုတောင်းခဲ့တာကြောင့် သူ့ကို အများပြည်သူ နှောင့်ယှက်တဲ့ပုဒ်မနဲ့ ၂၀၁၃ ခုနှစ်က တရားစွဲဆိုတာဖြစ်ပါတယ်။ တရားစွဲဆိုတာ ၂ နှစ်ကြာချိန်မှာ အခုလို ထောင်ဒဏ်ချလိုက်တာလို့ နော်အုန်းလှရဲ့ ရှေ့နေ ဦးကျော်လတ်စိုးက ပြောပါတယ်။ “သူက ရွှေတိဂုံဘုရားပေါ်မှာ ဒေါ်အောင်ဆန်းစုကြည် လွတ်မြောက်ရေးအတွက် နိုင်ငံရေးသမားတွေ ရွှေတိဂုံဘုရား အင်္ဂါထောင့်မှာ ဘုရားရှိခိုးကြတာ။ ဘုရားဂေါပက ကနေပြီး သူ့ကို တရားလိုလုပ်ပြီးတော့ ပုဒ်မ ၂၉၆ နဲ့ တရားစွဲဆိုထားတဲ့အမှုပါ။ ၂၀၁၃ ခုနှစ်ကတည်းဆိုတော့ တော်တော်ကြာသွားပါပြီ။ သူ့ကို အလုပ်ကြမ်းနဲ့ ထောင်ဒဏ် ၆ လ ချလိုက်ပါတယ်။” ပုဒ်မ ၂၉၆ ဟာ အမျိုး၊ ဘာသာ၊ သာသနာကို နှောင့်ယှက် ဖျက်ဆီးမှုဖြစ်ပါတယ်။ အမှန်မှာ နော်အုန်းလှဟာ ဘာသာကို နှောင့်ယှက်တာ မဟုတ်ဘဲနဲ့ အနှောင့်ယှက်ခံရတာဖြစ်တယ်လို့ ရှေ့နေ ဦးကျော်လတ်စိုးက ဝေဖန်ပါတယ်။ “ဒီကိစ္စကြီးက တကယ်တမ်းပြောရရင် တော်တော်ကိုမတရားတဲ့ကိစ္စကြီးပါ။ တကယ်တမ်း နှောင့်ယှက်ခံရတာက ဒေါ်နော်အုန်းလှတို့က နှောင့်ယှက်ခံရတာလေ။ သူတို့ ဘုရားရှိခိုး ၀တ်ပြုဆုတောင်းကြတဲ့အချိန်မှာ နှောင့်ယှက်တယ်။ ဆုတောင်းတဲ့နေရာမှာ အက်စစ်ရေ တွေဖြန်းထားတယ်။ အများကြီးပါ။ ဘုရားဂေါပကနဲ့၊ အက်စ်ဘီတွေ ခဏခဏ ကားပေါ်တင် တနေရာခေါ်စစ်၊ အဲဒီခေတ်ကလည်း ပွင့်လင်းတဲ့အချိန်မဟုတ်ဘူးလေ။ လုပ်ချင်သလို လုပ်နေကြတာပေါ့လေ။ ဒါကိုလည်း ဒေါ်နော်အုန်းလှတို့က မတုန်မလှုပ် မကြောက်မရွံ့နဲ့ ဆောင်ရွက်ခဲ့တာပါ။” နော်အုန်းလှဟာ မနှစ် ဒီဇင်ဘာလအတွင်းဖြစ်ပွားခဲ့တဲ့ လက်ပံတောင်းဒေသ အဓိကရုဏ်းမှာ မိုးကြိုးပြင် အလယ်ရွာသူ ဒေါ်ခင်ဝင်း သေနတ်ထိမှန် သေဆုံးရတဲ့ဖြစ်ရပ် အမှုမှန်ပေါ်ပေါက်ရေးနဲ့ ကြေးနီစီမံကိန်း ရပ်ဆုိုင်းပေးရေးအတွက် တရုတ်သံရုံးရှေ့မှာ ချီတက်ဆန္ဒပြမှုနဲ့ ပတ်သက်ပြီး ပြီးခဲ့တဲ့ မေလက တခြားလှုပ်ရှားသူတွေနဲ့ ထောင်ဒဏ် ၄ နှစ် ချမှတ်ခံထားရသူဖြစ်ပါတယ်။ အင်းစိန်ထောင်မှာ ထိန်းသိမ်းခံနေရပြီး အကျဉ်းထောင်အတွင်းမှာပဲ တရားရင်ဆိုင်ရင်း နောက်ထပ်ထောင်ဒဏ် ၆ လ ထပ်မံ ချမှတ်ခံရတာဖြစ်ပါတယ်။ ဒါ့အပြင် တရုတ်သံရုံးရှေ့မှာ လမ်းလျှောက်ချီတက်မှုနဲ့ အလုံ၊ ကျောက်တံတား၊ စမ်းချောင်း အစရှိတဲ့ မြို့နယ်တွေကလည်း သူ့ကို ပုဒ်မ ၁၈ နဲ့ တရားစွဲဆိုထားပြီး အမှုရင်ဆိုင်နေရဆဲဖြစ်ပါတယ်။
6 years Ago
Up