ဒေါ်အောင်ဆန်းစုကြည် မွေးနေ့ဆုတောင်းများ ထိုင်းနိုင်ငံ ပတ္တရားကမ်းခြေတွင် ပြသ

June 19, 2019

ဒေါ်အောင်ဆန်းစုကြည် မွေးနေ့အထိမ်းအမှတ် မုံရွာတွင် ပန်းချီပြပွဲကျင်းပ

ဇွန်လ ၁၉ ရက်မှာ ကျရောက်တဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ ၇၄ နှစ်ပြည့် အထိမ်းအမှတ်အဖြစ် နိုင်ငံတဝန်းမှာ ပုံစံမျိုးစုံနဲ့ကျင်းပနေကြသလို မုံရွာမြို့မှာလည်း အန်အယ်လ်ဒီပါတီက ဦးဆောင်ကာ ပန်းချီပြပွဲကို ပြုလုပ်နေပါတယ်။ ဒီပန်းချီပြပွဲမှာ မုံရွာမြို့ခံပန်းချီဆရာတွေအပြင် ကလေး၊ ချင်း၊ တောင်ကြီး၊ ပြင်ဦးလွင်၊ မန္တလေး၊ ရန်ကုန်က ပန်းချီဆရာ ၂၄ ရောက်ရဲ့ ​ရေ​ဆေး၊ ဆီ​ဆေး၊ အခရိုင်းလစ်​၊ ပယ်​စတယ်​၊ ခဲပန်းချီစတဲ့ အနုပညာ ၅ မျိုးနဲ့ရေးဆွဲထားတဲ့ ဒေါ်အောင်ဆန်းစုကြည်ရုပ်ပုံကားချပ် ၈၈ ကားကို ဇွန်လ ၁၉ ရက်ကနေ ၂၃ ရက်အထိ နေ့စဉ် မနက် ၁၀ နာရီကနေ ညနေ ၅ နာရီထိ ၅ ရက်ကြာ အခမဲ့ပြသပေးမှာဖြစ်ပါတယ်။ ပန်းချီပြပွဲဖွင့်ပွဲကိုတော့ တိုင်းအစိုးရအဖွဲ့ဝင်ဝန်ကြီးတွေ ပါတီဝင်တွေ၊ ပြည်သူတွေ၊ အနုပညာရှင်တွေ တက်ရောက်ခဲ့ကြပါတယ်။ ဒေါ်အောင်ဆန်းစုကြည်ရဲ့ မွေးနေ့အထိမ်းအမှတ်အနေနဲ့ ပတ်ဝန်းကျင်စိမ်းလန်း စိုပြေရေးအထောက်အကူပြု သစ်ပင်စိုက်ပျိုးပွဲကိုလည်း သစ်တောဦးစီးဌာနတွေက ပျိုးပင်အခမဲ့ဖြန့်ဝေပြီး စိုက်ပျိုးနေပါတယ်။ သစ်တောဦးစီးဌာနကနေဦးဆောင်ကာ စစ်ကိုင်းတိုင်းအတွင်း ၃၂ မြို့နယ်မှာ သစ်ပင်ပေါင်း ၁၂၆၄၀၇ ပင်ကို စိုက်ပျိုးသွားမှာလည်း ဖြစ်ပါတယ်။
2 years Ago

ဒေါ်အောင်ဆန်းစုကြည် မွေးနေ့အထိမ်းအမှတ် ကယားပြည်နယ်တ၀န်း သစ်ပင်စိုက်ပျိုး

ဒီကနေ့ ဇွန်လ ၁၉ ရက် ကျရောက်တဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ ၇၄ နှစ်မြောက်မွေးနေ့ အထိမ်းအမှတ်အနေနဲ့ ကယားပြည်နယ် တပြည်နယ်လုံးမှာ သစ်ပင်စိုက်ပျိုးပွဲ ပြုလုပ်ပါတယ်။ ပြည်နယ်မြို့တော် လွိုင်ကော်မြို့မှာတော့ လွိုင်ကော်တက္ကသိုလ်ဝင်းထဲမှာ သစ်ပင်ပေါင်း ၁၁၀၀ကျော်ကို ဒီမနက် ၇ နာရီမှာ အခမ်းအနားနဲ့ စိုက်ပျိုးခဲ့ကြတာတာပါ။ သစ်ပင်စိုက်ပျိုးပွဲတက်ရောက်တဲ့ဝန်ကြီးချုပ် ဦးအယ်ဖောင်းရှိုက “ ကျနော်တို့ရဲ့ခေါင်းဆောင် အတိုင်ပင်ခံပုဂ္ဂိုလ်ရဲ့ မွေးနေ့အထိမ်းအမှတ်သစ်ပင်စိုက်တာဟာ ကောင်းတဲ့အလုပ်ကိုလုပ်တာပါ။ ဒီလိုကောင်းတဲ့အလုပ်ကိုလုပ်တဲ့အတွက် မင်္ဂလာအပေါင်းနဲ့ ပြည့်စုံတယ်လို့ သတ်မှတ်လို့ရပါတယ်။ ကျနော်တို့ အားလုံးရဲ့စိတ်ထဲမှာလည်း အမှန်တကယ် နှလုံးစိတ်ဝမ်း အေးချမ်းကြလိမ့်မယ်လို့ ယုံကြည်ပါတယ်။ ”လို့ မိန့်ခွန်းပြောသွားပါတယ်။ ဒါ့အပြင် လူသားတွေနဲ့ သစ်ပင်ဟာ အပြန်လှန်အမှီပြုနေရတဲ့အတွက် မိမိတို့တတ်နိုင်တဲ့ ကဏ္ဍမှာ ကိုယ်စီတာဝန်ယူပြီး သစ်ပင်စိုက်ပျိုးကြဖို့လည်း ပြည်နယ် ၀န်ကြီးချုပ်က တိုက်တွန်းသွားပါတယ်။ ကယားပြည်နယ် သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီး ဦးတီရယ်က လည်း ဒီကနေ့ ဒေါ်အောင်ဆန်းစုကြည်မွေးနေ့ အထိမ်းအမှတ်အနေနဲ့ တပြည်နယ်လုံးမှာ သစ်ပင်တွေ စိုက်ပျိုးကြတယ်လို့ ပြောပါတယ်။ “ ဒီနေ့ မြို့နယ် ၇ မြို့နယ်စလုံးမှာ စိုက်ပါတယ်။ ဌာနဆိုင်ရာအားလုံးလည်း စိုက်ပါတယ်။ အမေစုရဲ့ ၇၄ နှစ်ပြည်မွေးနေ့အထိမ်းအမှတ်နဲ့ ကျနော်တို့ စိုက်ပါတယ်။ အားလုံးခန်းမှန်းခြေ တမြို့နယ်ကို တထောင်နီးပါဆိုတော့ ၇ မြို့နယ်ကို ၇၀၀၀ နီးပါးလောက်စိုက်တာပေါ့နော်။”   ဒါ့အပြင် ကယားပြည်နယ် သစ်တောဌာနအနေနဲ့လည်း အခုနှစ်မိုးရာသီအတွက် သစ်ပင်ပျိုးပင် ၃သိန်းခွဲ ပျိုးထားပြီး မည်သူမဆို ရှင်အောင် စိုက်ပျိုးလိုပါက အဆိုပါသစ်ပင်တွေကို အခမဲ့ ပေးဆောင်နေကြောင်းလည်း ဦးတီရယ်က ပြောပါတယ်။ လွိုင်ကော်မြို့နယ် ပြည်သူ့လွှတ်တော် ကိုယ်စားလှယ် ဒေါက်တာ ဒေါ်ခင်စည်သူကလည်း ဒီလိုသစ်ပင်စိုက်တာဟာ သဘာဝပတ်ဝန်းကျင် ပြန်လည်ထိန်းသိမ်းဖို့ စိုက်ပျိုးတာဖြစ်ပေမယ့် စိုက်ပြီးရင်တော့ ပြန်လည်း ပြုစုဖို့ အရေးကြီးကြောင်းပြောပါတယ်။ “တခုအရေးကြီးတာက စိုက်တာကတော့ စိုက်ကြပါတယ်။ စိုက်ပေမယ့် ပြန်ပြီးတော့ မစောင့်ရှောက်တာတွေများတယ်။ နောက်တနှစ်ကျရင် ဒီအပင်တွေက မရှိတော့ဘူးဆိုတော့ ဒီဟာက ကောလိပ်အနေနဲ့ စောင့်ရှောက်ဖို့လိုသလို သစ်တောကလည်း ပူးပေါင်း ဆောင်ရွက်ဖို့လိုတယ်။ ဥပမာ ပေါင်းနုတ်တာတို့ ရေလောင်းတာတို့ပေါ့နော်။ ကျမတို့ကယားမှာ ရှိတဲ့ သဘာဝပတ်ဝန်းကျင် ပြန်ပြီး ရှင်သန်လာဖို့ တခန်းတကဏ္ဍဖြစ်တာပေါ့နော်။” ဒီကနေ့ လွိုင်ကော်တက္ကသိုလ်ဝင်းအတွင်း ပြုလုပ်တဲ့ သစ်ပင်စိုက်ပျိုးခြင်း အထိမ်းအမှတ်ပွဲမှာ ၀န်ကြီးချုပ်အပါအ၀င် ပြည်နယ်ဝန်ကြီးတွေနဲ့ ဌာနဆိုင်ရာ အဖွဲ့အစည်းတွေအပါအ၀င် လူပေါင်း ၁၀၀၀ ကျော်ခန့် တက်ရောက်ဆင်နွှဲခဲ့ကြပါတယ်။
2 years Ago

June 11, 2019

ဒေါ်အောင်ဆန်းစုကြည် မွေးနေ့အထိမ်းအမှတ် သစ်ပင် ၈၀၀၀ ပြည်ခရိုင်၌ စိုက်ပျိုးမည်

ဇွန်လ ၁၉ရက် ကျရောက်တဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ မွေးနေ့မှာ အပင် ၈၀၀၀ ကျော်ကို တနေ့ထဲ စိုက်ပျိုးသွားမယ်လို့ ပဲခူးတိုင်း၊ ပြည်ခရိုင် သစ်တောဦးစီးဌာန လက်ထောက်ညွှန်ကြားရေးမှူး ဦးမြင့်သိန်းထွန်းက ပြောပါတယ်။ “အဲဒီနေ့မှာ Green Camping ဆိုပြီး မနက် ၈ နာရီခွဲမှာ စိုက်ကြမှာ ပြည်ခရိုင်ထဲက မြို့နယ်တွေမှာ အခုကစပြီး မြေနေရာပြုပြင်တာတွေ၊ ပန္နက်ရိုက် ကျင်းတူးတာတွေ လုပ်နေပြီ။ ရက်နီးရင်အပင်တွေပို့ပေးမယ်။ စိုက်မယ့်နေ့မှာတော့ ကျောင်းသားတွေ၊ အန်ဂျီအို အဖွဲ့အစည်း တွေ၊ ပြည်သူလူထုတွေ အားလုံးကိုဖိတ်ပြီးမှ အတူတူစိုက်ကြမှာပါ။ အဲဒီနေ့ တမနက်ထဲမှာပဲ ကျွန်းအပါအ၀င် အပင် ၈၀၀၀ ကို စိုက်ပျိုးသွားမှာ”လို့ သစ်တောဦးစီးမှူးက ပြောပါတယ်။ နောက်ထပ်စိုက်ပျိုးလိုသူတွေကိုလည်း သစ်ပင်ပျိုးပင် ၃ သိန်းခွဲကို အခမဲ့ ဝေငှ သွားမှာဖြစ်ပြီး မည်သူမဆို လာရောက်ယူနိုင်တယ်လို့ ပြောပါတယ်။ အခုနှစ်အတွင်း ပြည်ခရိုင်တခုထဲမှာပဲ သစ်ပင် ၁၀ သိန်းကို နည်းလမ်း ၈ သွယ်နဲ့ စိုက်ပျိုး သွားမှာဖြစ်ပြီး မြန်မာတနိုင်ငံလုံးမှာ သစ်ပင် ၁၁ သန်း စိုက်ပျိုးသွားမယ်လို့ သစ်တော ဦးစီးဌာနက သိရပါတယ်။ ပြည်ဒေသက အစိမ်းရောင်မျိုးဆက် သဘာဝပတ်ဝန်းကျင် ချစ်သူများကွန်ရက်ကတော့ အခု လာမယ့် ဇွန်လ ၁၅ ရက်နဲ့ ၂၂ ရက်နေ့တွေမှာ ရှေးဟောင်း သရေခေတ္တရာမြို့ဟောင်းထဲမှာ သစ်ပင် ၅၀၀ စိုက်ပျိုးသွားဖို့ ရှိနေပါတယ်။ သတင်း- မင်းညို
2 years Ago
More News
Up