ဒေါက်တာဟိန်းမြင့်အောင်

July 18, 2018

“လူငယ်တွေ ကင်ဆာပိုဖြစ်လာတာ ဘာကြောင့်လဲ” ဒေါက်တာဟိန်းမြင့်အောင်နှင့် မေးမြန်းချက်

ကင်ဆာရောဂါ ဖြစ်ပွားမှုဟာ လက်ရှိ ကမ္ဘာမှာရော မြန်မာနိုင်ငံမှာပါ ဖြစ်ပွားသူ အရေအတွက် တိုးလာနေသလို အရင်က သက်ကြီးပိုင်းတွေမှာပဲ ဖြစ်ခဲ့ရာက အခုဆိုရင် ငယ်ရွယ်သူတွေမှာလည်း အဖြစ်များလာပါပြီ။ ဒါကြောင့် ကင်ဆာရောဂါ ဘာကြောင့်ဖြစ်သလဲ၊ ကင်ဆာကို ဘယ်လိုကာကွယ်နိုင်သလဲ စတာတွေကို ကင်ဆာရောဂါ အထူးကုဆရာဝန် ဒေါက်တာဟိန်းမြင့်အောင်နဲ့ ဒီဗွီဘီက ဆက်သွယ်မေးမြန်းထားပါတယ်။ မေး - လက်ရှိကာလ မြန်မာပြည်မှာ ကင်ဆာရောဂါ ဖြစ်ပွားသူတွေ ပိုများလာတယ်လို့ သိရပါတယ်။ ဆရာ့အတွေ့အကြုံအရဆိုရင် ကင်ဆာဖြစ်လာသူတွေ တကယ်ပဲ ပိုများလာပါသလား။ ဖြေ - “ရန်ကုန်ပြည်သူ့ဆေးရုံကြီးမှာရှိတဲ့ ကင်ဆာကုသမှုဌာန နှစ်ခုဖြစ်တဲ့ ကင်ဆာရောဂါ ဓာတ်ရောင်ခြည်ဌာနနဲ့ ကင်ဆာဆေးသွင်းကုသမှု ဌာနနှစ်ခုက စာရင်းဇယားတွေအရ ၂ဝ၁၅ ခုနှစ်မှာ ကင်ဆာလူနာပေါင်း ၈၈၆၈ ယောက် ရှိခဲ့ပြီးတော့ ၂ဝ၁၆ ခုနှစ်မှာတော့ ကင်ဆာလူနာ ၁ဝ၈၄၃ ယောက် ရှိခဲ့ပါတယ်။ ဒီစာရင်းဇယားကို ကြည့်တာနဲ့တင် ကင်ဆာဖြစ်ပွားမှုနှုန်း များလာတာကို သိနိုင်ပါတယ်။” မေး - ဘယ်လို အသက်အပိုင်းအခြားတွေမှာ ကင်ဆာ ပိုဖြစ်လာတာကို တွေ့ရလဲခင်ဗျ။ ဖြေ - “ကင်ဆာရောဂါဟာ အစဉ်အလာအတိုင်း ဆိုရင်တော့ အသက်အရွယ် ကြီးတဲ့လူတွေမှာ ပိုအဖြစ်များပါတယ်။ အသက်ကြီးလာတာနဲ့အမျှ ကင်ဆာနိုင်ခြေ ပိုများလာတယ်။ ဒါ ဘာလို့ဖြစ်ရလဲဆိုတော့ Carcinogenic agents လို့ခေါ်တဲ့ ကင်ဆာဖြစ်စေနိုင်တဲ့ အရာများဖြစ်တဲ့ ဆေးရွက်ကြီး ဆက်စပ်ပစ္စည်းတွေ၊ ရောဂါပိုးမွှားတွေ၊ ဓာတုပစ္စည်းတွေ၊ မွေးရာပါ ခန္ဓာကိုယ်ထဲမှာရှိတဲ့ မျိုးရိုးဗီဇ ချို့ယွင်းချက်တွေ၊ ဟော်မုန်းအပြောင်းအလဲ ပြဿနာတွေနဲ့ ခန္ဓာကိုယ် ခုခံအားစနစ် ချို့ယွင်းချက်တွေ စတဲ့ အကြောင်းအချက်တွေက မွေးကင်းစကတည်းကနေ ဖြစ်လာတာ အသက်ကြီးလာတဲ့အခါမှာ စုပြီး ဖြစ်တဲ့သဘောပဲ။ ကင်ဆာအဖြစ်များတဲ့ အသက်အရွယ်က ၅ဝ ကျော်လောက်ကနေ စတယ်။ ဒါပေမယ့် အခုနောက်ပိုင်းမှာ လူတွေရဲ့ Lifestyle ခေါ်တဲ့ နေ့စဉ်ဘဝတွေမှာ နေထိုင်မှု ပုံစံတွေ ပြောင်းလာတယ်။ ဥပမာ- ဆေးလိပ်၊ အရက်၊ ဘီယာ စတာတွေကို အသက်ငယ်ရွယ်စဉ်ကနေ စတင်သုံးစွဲလာတဲ့အတွက် ကင်ဆာဖြစ်တဲ့ အသက်အရွယ်တွေ ငယ်လာကြတယ်။ ဒါကြောင့် အူမကြီးကင်ဆာ ရှိ၊ မရှိ ကြိုတင်စစ်ဆေးတဲ့ အသက်အရွယ်ကို ယခင် အသက် ၅ဝ မှာ စခဲ့ရာမှ ၂ဝ၁၇ ခုနှစ်ကစပြီး အသက် ၄၅ နှစ် အရွယ်ကနေ စပြီး စစ်ဆေးဖို့ ပြောင်းလဲခဲ့တယ်။ လူအများစု လျှောက်ပြောကြသလို မြန်မာနိုင်ငံက ကမ္ဘာမှာ ကင်ဆာအဖြစ်ဆုံး အများဆုံးတို့ ဒုတိယတို့ ဆိုတာလည်း လုံးဝ မဟုတ်ပါဘူး။ အဖြစ်များဆုံးနိုင်ငံ ၁ ကနေ ၅ဝ ထဲတောင် မဝင်သေးပါဘူး။ ကင်ဆာဖြစ်ပွားနှုန်းတွေ တက်လာတာက မြန်မာတနိုင်ငံတည်းမှာ မဟုတ်ဘူး။ တကမ္ဘာလုံးမှာဖြစ်လို့ ကျန်တဲ့နိုင်ငံတွေမှာလည်း ကင်ဆာဖြစ်နှုန်းတွေ တက်လာနေတယ်။ WHO ကနေ နောက်ဆုံးထုတ်ပြန်လိုက်တဲ့ ကင်ဆာရောဂါအကြောင်း သိကောင်းစရာတွေအရ ကင်ဆာဟာ ကမ္ဘာတလွှားမှာ လူသေဆုံးမှုနဲ့ ရောဂါဖြစ်စေနိုင်မှု အများဆုံးတွေထဲက တခု ဖြစ်တယ်။ ၂ဝ၁၂ ခုနှစ်မှာ ကင်ဆာလူနာအသစ် ခန့်မှန်း ၁၄ သန်း ဖြစ်ပွားခဲ့တယ်။ ကင်ဆာလူနာ အသစ်တွေ့ရှိရမှုဟာ နောက်အနှစ် ၂ဝ အတွင်း ၇ဝ ရာနှုန်း မြင့်တက်လာဖို့ ရှိတယ်။ တကမ္ဘာလုံးမှာ လူသေဆုံးစေတဲ့ အကြောင်းရင်းတွေထဲမှာ ကင်ဆာက ဒုတိယလိုက်တယ်။ ၂ဝ၁၅ ခုနှစ်မှာ ကင်ဆာကြောင့် လူသား ၈ ဒသမ ၈ သန်း သေဆုံးခဲ့ရတယ်။ လူသေဆုံးမှု ၆ ခုမှာ ၁ ခုက ကင်ဆာကြောင့် ဖြစ်တယ်။ ကင်ဆာကြောင့် သေဆုံးရမှုတွေရဲ့ ၇ဝ ရာနှုန်းဟာ ဝင်ငွေနည်းသော၊ ဝင်ငွေ သင့်တင့်သော နိုင်ငံများမှ ဖြစ်တယ်။ (မြန်မာနိုင်ငံက ဝင်ငွေနည်းတဲ့ နိုင်ငံထဲမှာ ပါတယ်။)” မေး - ပြီးတော့ မြန်မာနိုင်ငံမှာ ဘယ်လို ကင်ဆာအမျိုးအစားတွေ အများအားဖြင့် တွေ့ရပါသလဲ။ ဖြေ - “ဒီနေရာမှာ ကမ္ဘာနဲ့ မြန်မာ ကင်ဆာဖြစ်ပွားနှုန်း၊ ဖြစ်ပွားတဲ့ ရောဂါအမျိုးအစား မတူဘူး။ ကမ္ဘာမှာ ဖြစ်ပွားမှုနှုန်း အများဆုံး ကင်ဆာရောဂါတွေက နံပါတ် ၁ က ရင်သားကင်ဆာ၊ ၂ က ဆီးကြိတ်ကင်ဆာ၊ ၃ က အဆုတ်ကင်ဆာ၊ ၄ က အူမကြီးကင်ဆာနဲ့ ၅ က သားအိမ်ခေါင်းနဲ့ သားအိမ်ကင်ဆာတို့ ဖြစ်တယ်။ မြန်မာနိုင်ငံမှာတော့ ရင်သားကင်ဆာနဲ့ သားအိမ်ခေါင်းကင်ဆာ နှစ်ခုလုံးက တလှည့်စီ ထိပ်ဆုံးရောက်နေပြီးတော့ ဦးခေါင်း၊ ခံတွင်းနဲ့ လည်ချောင်းကင်ဆာ အုပ်စုဟာ ဖြစ်ပွားမှု အများဆုံးမှာ ရှိတယ်။ သူ့နောက်မှာ အဆုတ်ကင်ဆာ၊ အစာအိမ်နဲ့ အူလမ်းကြောင်းကင်ဆာတွေ လိုက်နေတယ်။ ၂ဝ၁၅ ခုနှစ် တကမ္ဘာလုံးမှာ လူ ၈ ဒသမ ၈ သန်းဟာ ကင်ဆာကြောင့် သေဆုံးခဲ့တယ်။ လူ ၁ ဒသမ ၆၉ သန်းက အဆုတ်ကင်ဆာ၊ ၇၈၈,ဝဝဝ က အသည်းကင်ဆာ၊ ၇၇၄,ဝဝဝ က အူမကြီးကင်ဆာ၊ ၇၅၄,ဝဝဝ က အစာအိမ်ကင်ဆာနဲ့ ၅၇၁,ဝဝဝ က ရင်သားကင်ဆာတွေကြောင့် သေဆုံးခဲ့ပါတယ်။" မေး - ဘာကြောင့် ကင်ဆာရောဂါ ဖြစ်တတ်ပါသလဲ။ ရောဂါဖြစ်ရတဲ့ အဓိက အကြောင်းအရင်းတွေ ပြောပြပါလား။ ဖြေ - “ကင်ဆာဟာ ပုံမှန်ဆဲလ်ကနေ အဆင့်ဆင့် ကင်ဆာဆဲလ်ကို ပြောင်းသွားတာ ဖြစ်တယ်။ Precancerous Lesion လို့ခေါ်တဲ့ ကင်ဆာမဖြစ်သေးခင် အဆင့်ရှိတဲ့ အလုံး အကျိတ်က Malignant Tumor လို့ခေါ်တဲ့ ကင်ဆာ ဖြစ်သွားတယ်။ ဒီလိုဖြစ်ရတာဟာ လူရဲ့ မျိုးရိုးဗီဇကြောင့်နဲ့ မျိုးရိုးနဲ့မဆိုင်တဲ့ အောက်ပါ အချက် ၃ ခုကြောင့် ဖြစ်တယ်။ ၁။ ကင်ဆာဖြစ်စေသော ရုပ်ဝတ္ထုပစ္စည်းများ Physical Carcinogens (ခရမ်းလွန်ရောင်ခြည်၊ ion ဖြစ်စေသော ဓာတ်ရောင်ခြည် စသည်) ၂။ ဓာတုပစ္စည်းများ Chemical carcinogens (Asbestos၊ ဆေးလိပ်မီးခိုးမှာပါတဲ့ ဓာတုပစ္စည်း၊ အစားအသောက်မှာပါတဲ့ Aflatoxin မှို၊ Arsenic သောက်ရေမှာပါတဲ့ ဓာတ် စသည်) ၃။ ဇီဝပစ္စည်းများ Biological carcinogens (ပိုးမွှားများ) အသက်အရွယ် ကြီးတာကလည်း ကင်ဆာဖြစ်စေနိုင်တဲ့ အရေးကြီး အချက်တချက် ဖြစ်တယ်။ အသက်ကြီးလာတာနဲ့အမျှ ဖြစ်နိုင်ခြေ မြင့်တက်လာတယ်။ ကင်ဆာကြောင့် သေဆုံးရမှု သုံးခုမှာ တခုက ဒီအချက် ၅ ချက်ကြောင့် ဖြစ်တယ်။ ၁။ BMI (ကိုယ်အလေးချိန်နဲ့ အရပ်အမြင့်အချိုး) များခြင်း ၂။ အသီးအနှံနဲ့ ဟင်းသီးဟင်းရွက် စားသုံးမှု နည်းပါးတာ ၃။ ကိုယ်လက်လှုပ်ရှားတဲ့ လေ့ကျင့်ခန်းလုပ်တာ နည်းပါးတာ ၄။ ဆေးလိပ်နဲ့ ဆေးရွက်ကြီး ဆက်စပ်ပစ္စည်းတွေ သုံးစွဲတာ ၅။ အရက်သောက်တာတွေ ဖြစ်ပါတယ်။ ဆေးလိပ်နဲ့ ဆေးရွက်ကြီး သုံးစွဲတာဟာ ကင်ဆာဖြစ်စေခြင်းရဲ့ အဓိက အကြောင်းရင်း ဖြစ်ပြီးတော့ ကင်ဆာကြောင့် သေဆုံးရတွေရဲ့ ၂၂ ရာနှုန်းဟာ ဒီဆေးလိပ်၊ ဆေးရွက်ကြီး Tobacco Use ကြောင့် ဖြစ်တယ်။ ပြီးတော့ ဝင်ငွေနည်းပါးပြီး ဆင်းရဲတဲ့နိုင်ငံတွေမှာ ဖြစ်ပွားတဲ့ ကင်ဆာတွေရဲ့ ၂၅ ရာခိုင်နှုန်းဟာ ကင်ဆာဖြစ်စေတဲ့ ပိုးမွှားဝင်ခြင်း (အသည်းရောင် ဘီပိုး စီပိုး၊ သားအိမ်ခေါင်း ကင်ဆာပိုး စသည်) တို့ကြောင့် ဖြစ်တယ်။ ဒီလိုနိုင်ငံတွေမှာ ကင်ဆာရောဂါကို နောက်ဆုံးအဆင့်မှ စတင်သိရှိတာ၊ ရောဂါရှာဖွေဖို့ ခက်ခဲတာနဲ့ ကုသဖို့ ခက်ခဲတာတို့ဟာ အဖြစ်များတယ်။ ၂ဝ၁၅ တွေ့ရှိချက်အရ ဆင်းရဲတဲ့ နိုင်ငံတွေမှာ အများပြည်သူ လက်လှမ်းမီတဲ့ ဓာတ်ခွဲခန်း Pathological services ဟာ ၃၅ ရာခိုင်နှုန်းပဲ ရှိတယ်။ ချမ်းသာတဲ့ နိုင်ငံတွေမှာတော့ ၉ဝ ရာနှုန်းကျော် ရှိတယ်။ ဆင်းရဲတဲ့နိုင်ငံမှာ ၅ နိုင်ငံမှာ ၁ နိုင်ငံမှာပဲ ကင်ဆာရောဂါနဲ့ပတ်သက်တဲ့ အချက်အလက် ပေါ်လစီ တိတိကျကျ ရှိတယ်။ မြန်မာနိုင်ငံမှာ မရှိပါဘူး။ ကင်ဆာရောဂါဆိုတာ ရောဂါအုပ်စုပေါင်းများစွာကို စုစည်းပြီး ခေါ်ဆိုတာဖြစ်ပြီး ခန္ဓာကိုယ်ရဲ့ မည်သည့်အစိတ်အပိုင်းမှာမဆို ဖြစ်နိုင်တယ်။ Malignant tumor ဒါမှမဟုတ် Neoplasm လို့ သုံးနှုန်းလေ့ရှိတယ်။ ကင်ဆာရဲ့ အဓိက လက္ခဏာတခုက ပုံမှန်မဟုတ်တဲ့ ဆဲလ်တွေဟာ သာမန်ထက် ပိုမိုလျင်မြန်စွာ ဖြစ်ပေါ်ပြီး ကြီးထွားတာဖြစ်တယ်။ ဒီကင်ဆာဆဲလ်တွေက ကပ်လျက်ရှိနေတဲ့ ခန္ဓာကိုယ် အစိတ်အပိုင်းတွေကို ထိုးဖောက် ဝင်ရောက်ပြီး တခြား အဝေးမှာရှိတဲ့ ခန္ဓာကိုယ် အစိတ်အပိုင်းတွေကို ရောက်ရှိသွားတယ်။ ဥပမာ- ရင်သားကင်ဆာက ဦးနှောက်ထဲကို ရောက်သွားတာ။ ဒီမှာတော့ ပြန့်တယ်လို့ အသိများတယ်။ Metastases လို့ခေါ်တယ်။ ကင်ဆာကြောင့် သေဆုံးရမှုရဲ့ အဓိက အကြောင်းက ပြန့်သွားလို့ ဖြစ်တယ်။” မေး - အခုခေတ်မှာ လူငယ်တွေမှာ ကင်ဆာ ပိုဖြစ်လာတာ ဘာကြောင့်လဲခင်ဗျ။ ဖြေ - “ယနေ့ခေတ် လူငယ်တွေ ဘာတွေ အလုပ်များကြလဲ၊ အရင်ထက်စာရင် ယောက်ျား၊ မိန်းမ ဆေးလိပ်၊ အရက်သောက်တာ ပိုများလာကြတယ်။ အနည်းဆုံး ဘီယာ၊ ဝိုင်သောက်ကြတယ်။ ဆေးလိပ်သောက်တာ တအားများလာကြတယ်။ အစားအသောက် စားတဲ့အခါမှာလည်း အသားစားတာ များတယ်။ အကင်တွေ ဆီကြော်တွေ စားတာများတယ်။ နောက် Fast food ခေါ်တဲ့ အလွယ် အမြန်ရတဲ့ အစားအသောက်တွေ။ အချိုဓာတ် အရမ်းများတဲ့ ကိုလာလို၊ ပက်စီလို drinks တွေ သောက်တာများတယ်။ ဟင်းသီးဟင်းရွက်၊ အသီးအနှံ အစားနည်းကြတယ်။ ဝတဲ့လူတွေ များလာတယ်။ ကိုယ်လက်လှုပ်ရှား အားကစားလုပ်တာ နည်းကြတယ်။ ဒီအချက်တွေကို အပေါ်မှာတင်ပြခဲ့တဲ့ အခြားကင်ဆာ ဖြစ်စေတဲ့ အချက်တွေ ပေါင်းတဲ့အခါမှာ အသက်ငယ်ငယ်လေးတွေနဲ့ ကင်ဆာတွေ ဖြစ်လာကြတယ်။” မေး - ကင်ဆာရောဂါအတွက် လက်ရှိ မြန်မာနိုင်ငံမှာ ဘယ်လို ကုထုံးတွေ ရှိပါသလဲ။ ဖြေ - “လက်ရှိ မြန်မာနိုင်ငံမှာ ကင်ဆာရောဂါကုထုံး အကုန်လုံးနီးပါး ရှိနေပါပြီ။ အဓိက ကုထုံးတွေဖြစ်တဲ့ ခွဲစိတ်ကုသမှု၊ ဓာတ်ရောင်ခြည်နဲ့ ကုသမှု၊ ကင်ဆာဆေးသွင်းကုသမှု၊ ကင်ဆာဆေးသွင်းကုသမှုထဲမှာမှ Targeted Therapy ခေါ်တဲ့ ကင်ဆာဖြစ်စေတဲ့ မျိုးရိုးဗီဇဆိုင်ရာ targets တွေကို အဓိက ပစ်မှတ်ထား တိုက်ခိုက်တဲ့ ကုသမှု၊ နောက် ဟော်မုန်းဆေးများနဲ့ ကုသမှု စတာတွေ အကုန်ရှိနေပြီ ဖြစ်တယ်။ လောက်ငမှု ရှိလား မေးရင်တော့ မရှိပါဘူး။ ကင်ဆာ လူနာအများစုဟာ ကုသမှု အများစုအတွက် မိမိပိုက်ဆံနဲ့ မိမိသာ အကုန်ကျခံပြီး ကုသရမှာ ဖြစ်ပြီးတော့ ကုသမှုကို အချိန်မီပေးနိုင်တာ မရှိသေးပါဘူး။ ဒါတွေဟာ ကင်ဆာရောဂါ ကုသမှုပိုင်းမှာ နိုင်ငံတော်က ဖြည့်ဆည်းပေးနိုင်တဲ့ အနေအထားနဲ့ လိုအပ်နေတဲ့ ကင်ဆာလူနာ အနေအထားက အရမ်းကို ကွာခြားနေတဲ့အတွက် ဖြစ်ပါတယ်။ နောက်ပြီးတော့ ကင်ဆာကုသမှုတွေကလည်း ငွေကုန်ကြေးကျမှု အရမ်းများပါတယ်။" မေး - ကင်ဆာရောဂါကို ကြိုတင်ကာကွယ်နိုင်ပါသလား။ ဖြေ - “၃ဝ ကနေ ၅ဝ ရာနှုန်းသော ကင်ဆာတွေက ကြိုတင်ကာကွယ်လို့ ရတယ်။ ဒါကြောင့် ဖြစ်ပွားစေနိုင်တဲ့ အကြောင်းတွေကို ရှောင်ရမယ်။ ကြိုတင်ကာကွယ်လို့ ရတာတွေကို ကာကွယ်ရမယ်။ ဒါ့အပြင် ကင်ဆာကို စောစီးစွာ ကြိုတင်သိရှိအောင် စစ်ဆေးရမယ်။ စောစီးစွာ သိရှိလာတဲ့ ကင်ဆာတွေကို ပျောက်ကင်းအောင် ကုသရမယ်။ ကင်ဆာရောဂါ အများစုဟာ အဆင့်စောပြီးသိရင် ပျောက်ကင်းအောင် ကုသလို့ရတယ်။ ဖြစ်ပွားစေနိုင်တဲ့ အကြောင်းတွေ ရှောင်ကြဉ်မယ်။ ဘီပိုး၊ သားအိမ်ခေါင်း ကင်ဆာပိုး ကာကွယ်ဆေးထိုးမယ်။ ခရမ်းလွန်ရောင်ခြည်တွေကို ကာကွယ်မယ်။ ထီးဆောင်းမယ်။ Sunscreen လိမ်းမယ်။ ဓာတ်ရောင်ခြည်တွေကို ရှောင်မယ်။ မလိုဘဲ ဓာတ်မှန် ခဏ ခဏ မရိုက်ဘူး။ ဘီပိုးနဲ့ သားအိမ်ခေါင်းကင်ဆာ ကာကွယ်ဆေးထိုးတာက တနှစ်ကို ကင်ဆာဖြစ်ပွားမှု ၁ သန်းလောက်ကို မဖြစ်အောင် ကာကွယ်နိုင်တယ်။ စောစီးစွာ သိရှိအောင် စောစီးစွာ ရောဂါတွေ့အောင် ရှာဖွေမယ်။ ကင်ဆာရောဂါ စောစောတွေ့အောင်လို့။ Screening ဆိုတာက ကင်ဆာရောဂါလက္ခဏာ မပေါ်ခင်မှာ ကင်ဆာကို သိအောင် တွေ့အောင် ရှာတာ ဖြစ်တယ်။ ဥပမာ- အူမကြီးကင်ဆာကြောင့် ဗိုက်အောင့် ဗိုက်နာ၊ သွေးဝမ်းသွား၊ အလုံးအကျိတ် စမ်းမိ စတာတွေ မပေါ်ခင်၊ မဖြစ်ခင်ကတည်းက အသက် ၅ဝ ကျော်လာရင် အူလမ်းကြောင်းကို မှန်ပြောင်းကြည့်ပြီး စစ်ဆေးမယ်ဆိုရင် ကင်ဆာကို အစောကြီးက တခါတည်း ပျောက်အောင် ကုသလိုက်နိုင်တယ်။ သားအိမ်ခေါင်းကို acetic acid ဖြန်းပြီး ကြည့်ရှုစစ်ဆေးခြင်းဟာ သားအိမ်ခေါင်းကင်ဆာ အဆင့်စောစဉ်မှာ တွေ့ရှိနိုင်တယ်။ ပိုကောင်းတာကတော့ PAP Smear ခေါ်တဲ့ သားအိမ်ခေါင်းအချွဲကို ယူပြီး စစ်ဆေးနိုင်တယ်။ အမျိုးသမီးတွေ ရင်သားကို mammogram ရိုက်ပြီးတော့ ရင်သားကင်ဆာ ရှိ၊ မရှိ ကြိုတင်သိရှိ စစ်ဆေးနိုင်တယ်။ ကုသမှုအနေနဲ့ မှန်ကန်တဲ့ ကင်ဆာရောဂါ ရှာဖွေခြင်းက ကင်ဆာကို လုံလောက်ကောင်းမွန်တဲ့ ကုသမှုပေးနိုင်ဖို့ မရှိမဖြစ် လိုအပ်တယ်။ ကင်ဆာရောဂါ အမျိုးအစားအားလုံးဟာ ကုသမှုနည်းလမ်း ကွဲပြားကြတယ်။ ခွဲစိတ်တာ၊ ဓာတ်ရောင်ခြည်ပြတာ၊ ကင်ဆာဆေး သွင်းတာတွေနဲ့ အဓိက ကုသတယ်။ ကင်ဆာကုသရာမှာ ဦးတည်ချက် ပန်းတိုင်တခု ရှိရတယ်။ ပျောက်အောင် ကုမှာလား၊ သက်သာအောင် ကုမှာလား ဆိုပြီး နှစ်မျိုးရှိတယ်။ စောစီးစွာ တွေ့ရှိနိုင်တဲ့ အချို့ကင်ဆာတွေက (ရင်သားကင်ဆာ၊ သားအိမ်ခေါင်းကင်ဆာ၊ ခံတွင်းကင်ဆာ၊ အူမကြီးကင်ဆာ စသည်) က အကောင်းဆုံး ကုမယ်ဆိုရင် အရှင်းပျောက်နိုင်တယ်။ တချို့ ကင်ဆာအမျိုးအစားတွေက ပြန့်သွားရင်တောင် အကောင်းဆုံး ကုသရင် ပျောက်နိုင်တယ်။ ဥပမာအနေနဲ့ ဝှေးစေ့ကင်ဆာ၊ သွေးကင်ဆာ၊ လင်ဖိုးမား စတာတို့ ဖြစ်တယ်။ ပျောက်ကင်းအောင် ကုသလို့မရတဲ့ အခြေအနေမှာတော့ သက်သာအောင် ကုသနိုင်တယ်။ ကင်ဆာကြောင့် ခံစားရတဲ့ ဝေဒနာများကို သက်သာပျောက်ကင်းအောင်။ လူနာနဲ့ မိသားစုတွေရဲ့ ဘဝအရည်အသွေး တိုးတက်လာအောင်။ လူနာ သက်သောင့်သက်သာနဲ့ အသက်ရှင်နေနိုင်အောင် ရည်ရွယ်တယ်။ လေ့လာစူးစမ်းမှုများစွာမှာ အရက်သောက်တာဟာ ခံတွင်းကင်ဆာ၊ လည်ချောင်းကင်ဆာ၊ အစာရေမြိုကင်ဆာ၊ အသည်းကင်ဆာ၊ ရင်သားကင်ဆာနဲ့ အူမကြီးကင်ဆာတို့ ဖြစ်ပွားမှုနှုန်း မြင့်တက်စေပါတယ်။ ကင်ဆာလူနာတွေမှာလည်း အရက်သောက်တာကြောင့် ကင်ဆာအသစ်တွေ ဖြစ်ပွားမှုနှုန်း များစေတယ်။ အရက်သောက်တာဟာ သွေးထဲမှာ လှည့်ပတ်နေတဲ့ estrogens ဟော်မုန်းဓာတ်ကို ပိုများစေတယ်။ ဒါကြောင့် ER-positive ရင်သားကင်ဆာလူနာတွေမှာ အရက်သောက်တာဟာ ရင်သားကင်ဆာ ပြန်ဖြစ်ပွားမှုနှုန်းကို မြင့်တက်စေပါတယ်။ သီအိုရီ အရပါ။ အရက်သောက်တာဟာ နှလုံးရောဂါကို ကာကွယ်စေနိုင်တယ် စတဲ့ သတင်းတွေကြောင့် အရက်သောက်တဲ့ လူနာတွေ ရှိလာတာ ဖြစ်တယ်။ ဒါကြောင့် နှလုံးရောဂါကို ကာကွယ်ချင်လို့ အရက်သောက်ရင် ရင်သားကင်ဆာ ပြန်ဖြစ်နိုင်တဲ့ အန္တရာယ်ကို သတိပြုစေချင်တယ်။ နောက်တခုက ပဲအမျိုးမျိုး၊ ဟင်းသီးဟင်းရွက်၊ အစေ့အဆံ၊ အသီးအနှံတွေမှာပါတဲ့ Fiber အမျှင်ဓာတ်ဟာ အစာအိမ် အူလမ်းကြောင်းကင်ဆာ ဖြစ်ပွားနှုန်းကို လျော့ကျစေနိုင်တယ်။ နှလုံးသွေးကြောရောဂါအတွက်လည်း ကောင်းတယ်။ အနီရောင်ရှိတဲ့ အသား၊ စည်သွပ်ထားတဲ့ အသားတွေကို လွန်လွန်ကဲကဲ စားရင် အူမကြီး၊ ဆီးကြိတ်၊ အစာအိမ်ကင်ဆာတွေ ဖြစ်နိုင်တယ်။ ပြီးတော့ အဝလွန်တာဟာ မကောင်းပါ။ ကင်ဆာအတွက်လည်း တော်တော်မကောင်းပါ။ အဝလွန်တာနဲ့ ကိုယ်အလေးချိန် လွန်ကဲတာဟာ ကင်ဆာရောဂါအားလုံးမှာ သေဆုံးနှုန်း များစေပါတယ်။ Soy bean လို့ခေါ်တဲ့ ပဲတမျိုး ပဲပိစပ် ခေါ်မယ်ထင်တယ်။ Protein ဓာတ်များများ ရစေတယ်။ အသားမစားချင်တဲ့ လူနာတွေ အသားအစားထိုး စားပေးလို့ရတယ်။ Estrogen ဓာတ်ကို အားနည်းစေလို့ ဟော်မုန်းကြောင့်ဖြစ်တဲ့ ကင်ဆာတွေကို ကာကွယ်နိုင်တဲ့ အစွမ်းရှိတယ်ဆိုတာ တိရစ္ဆာန်တွေမှာ စမ်းသပ်တွေ့ရှိထားတယ်။ တခြား Antioxidants ဓာတ်ပါတယ်။ Tamoxifen လို့ခေါ်တဲ့ ဟော်မုန်းဆေးနဲ့ ပေါင်းစည်းရင် ရင်သားကင်ဆာ ပြန်ဖြစ်တာ နည်းစေတယ်လို့ သီအိုရီအရ ခန့်မှန်းထားတယ်။ အတိအကျ လေ့လာစူးစမ်းမှု သက်သေအခိုင်အမာ မရှိသေးပါ။ သက်သတ်လွတ်စားတာဟာ ကင်ဆာရောဂါကို ကာကွယ်နိုင်တယ်ဆိုပြီး ပြောစရာ လေ့လာစူးစမ်းမှု မရှိပါဘူး။ အကျိုးတော့ ရှိမှာပါ။ သို့ပေမယ့် မြန်မာနိုင်ငံအနေနဲ့ဆိုရင်တော့ သက်သတ်လွတ်စားတဲ့ အသီးအနှံတွေမှာ ပိုးသတ်ဆေး၊ ဓာတုဆေးများ သုံးစွဲတာတွေ များနေတဲ့အတွက် ကင်ဆာကြောက်လို့ သက်သတ်လွတ်စားကာမှ ပိုးသတ်ဆေးကြောင့် ကင်ဆာဖြစ်တဲ့ လူနာတွေလည်း ရှိတယ်ဆိုတာ သတိပြုပါ။” မေး - ကင်ဆာသမားတွေအတွက် နေထိုင်၊ စားသောက်ရမယ့် ပုံစံတွေကို ပြောပြပေးပါလား။ ဖြေ - “အရက်ကို ရှောင်ပါ။ အရက်ကြောင့် ကင်ဆာအသစ်တွေ ဖြစ်ပွားမှုနှုန်း များစေတယ်။ ပြီးတော့ ကီမိုဆေး အများစုကို အသည်းက ချေဖျက်တယ်။ အရက်သောက်လို့ အသည်းရောင်တတ်တယ်။ ကီမိုဆေးသွင်းနေတုန်းမှာ အရက်သောက်ခဲ့ရင် ကီမိုဆေးတွေကို အသည်းက ကောင်းကောင်း မချေဖျက်နိုင်တဲ့အတွက် ဆိုးကျိုးတွေ ပိုများစေတယ်။ ဓာတ်ရောင်ခြည် ကုသနေတုန်းမှာလည်း အရက်သောက်တာနဲ့ မတည့်ပါ။ Mouthwash (ခံတွင်းသန့် ဆေးရည်) တွေမှာပါတဲ့ အရက်အနည်းငယ်ဟာလည်း ဓာတ်ရောင်ခြည်ဆိုးကျိုး ဖြစ်တဲ့ oral mucositis လို့ခေါ်တဲ့ ခံတွင်းအသားနုတွေ နီမြန်းရောင်ရမ်းတာကို ပိုဆိုးစေတယ်။ ဒါကြောင့် Mouthwash သုံးရင် Alcohol free ကို ရွေးသုံးပါ။ Antioxidants တွေဟာ တစ်ရှူးတွေကို Oxidative damage ကနေ ကာကွယ်ပေးနိုင်တဲ့ သဘာဝပစ္စည်းတွေပဲ။ Oxidative damage တွေဟာ ကင်ဆာဖြစ်ပွားစေမှုမှာ အရေးပါတယ်။ ဒါကြောင့် ဒီ Antioxidants တွေ စားသုံးပေးတာဟာ ကင်ဆာကို ကာကွယ်ကောင်း ကာကွယ်နိုင်မယ်။ ဟင်းသီးဟင်းရွက်နဲ့ သစ်သီးဝလံတွေမှာ Antioxidants တွေပါတယ်။ Vitamin C, Vitamin E, Carotenoids စတဲ့ Antioxidants တွေဟာ ကင်ဆာရောဂါတချို့ကို ကာကွယ်နိုင်ခြေ ရှိတယ်။ Cancer survivors တွေဟာ Second cancer နောက်ထပ် ကင်ဆာရောဂါ အသစ်တခု ဖြစ်ပွားနိုင်ခြေရှိတယ်။ ဒါကြောင့် ဒီ Antioxidants ကြွယ်ဝစွာ ပါဝင်တဲ့ အစားအသောက်တွေကို နေ့စဉ် စားပေးသင့်တယ်။ လွန်ကဲစွာ စားသုံးခြင်းကို မပြုလုပ်သင့်ပါဘူး။ ကင်ဆာလူနာများအနေနဲ့ ပြည့်ဝဆီ ပြန်ကြော်ဆီတွေကို တတ်နိုင်သမျှ လျှော့စားပါ။ ကင်ဆာလူနာတွေအတွက် အစားအသောက် ပြင်ဆင်တဲ့နေရာမှာ ရောဂါပိုးမွှား ကင်းရှင်းဖို့ အရေးကြီးတယ်။ ကင်ဆာလူနာဟာ နဂိုတည်းက ခုခံအားနည်းနေတတ်တယ်။ ကင်ဆာဆေးသွင်းထားရင် သွေးဖြူဥတွေ ကျဆင်းနေတတ်တယ်။ ဒီလိုအချိန်မှာ အစားအသောက် မသန့်ရှင်းရင် ဒုက္ခများနိုင်တယ်။ အစားအသောက်မစားခင် လက်ဆေးရမယ်။ အသီးအနှံတွေ အရွက်တွေကို ရေသေချာ ဆေးရမယ်။ အသား၊ ငါး၊ ကြက်ဥ စတာတွေကိုလည်း သန့်သန့်ရှင်းရှင်း ကိုင်တွယ် ပြင်ဆင်ရမယ်။ အိုးခွက် ပန်းကန် ဇွန်းက အစ သေချာသန့်စင် ဆေးကြောရမယ်။ ဆူရှီတွေ၊ အစိမ်းစားတာတွေ ရှောင်။ နွားနို့ကို ကျိုချက်ပြီးမှ သောက်။ ရေကအစ ပိုးမွှားကင်းစင်တဲ့ ရေသန့် သောက်တာ ကောင်းတယ်။ ကင်ဆာကုသမှု ခံယူနေစဉ်အတွင်းမှာ ကိုယ်လက်လှုပ်ရှား အားကစားပြုလုပ်တာက အန္တရာယ်မရှိစေပါဘူး။ ဒါ့အပြင် အခြားသော မောပန်းနွမ်းနယ်တာတွေကို လျော့စေတယ်၊ စိတ်လှုပ်ရှားမှုတွေကို လျော့စေတယ်။ ကင်ဆာလူနာတွေအနေနဲ့လည်း ကိုယ့်ကိုယ်ကိုယ် ယုံကြည်မှု ပိုရှိလာစေတယ်။ သူများကိုပဲ မှီခိုနေရတယ်ဆိုတဲ့ စိတ်အားငယ်မှုမျိုး လျော့နည်းစေပြီး ငါ လုပ်နိုင် ကိုင်နိုင်သေးတယ် ဆိုပြီး စိတ်အားပြန်တက်ကြွလာစေတယ်။ ကြွက်သားတွေ၊ သွေးကြောတွေ အားကောင်းစေတယ်။ ကင်ဆာဆေးသွင်း၊ ဓာတ်ရောင်ခြည် ကုသနေစဉ်မှာတော့ ပြင်းပြင်းထန်ထန် မလုပ်သင့်ဘူး။ ပြီးတော့မှ တဖြည်းဖြည်း ပြန်တင်သွားလို့ရတယ်။ အချို့ ကင်ဆာလူနာတွေအတွက်တော့ အားကစားလုပ်တာက အထူးသတိထားရမယ့် အခြေအနေတွေ ရှိပါသေးတယ်။ ဥပမာ- သွေးနီဥအားနည်းနေတဲ့ လူနာ သွေးအား ပြန်မပြည့်လာသေးဘဲ ပြင်းပြင်းထန်ထန် လုပ်လို့မရပါဘူး။ သွေးဖြူဥ နည်းနေတဲ့ လူနာတွေ အနေနဲ့လည်း လူများတဲ့ နေရာကို မသွားသင့်ဘူး။ ဓာတ်ရောင်ခြည်ကုသမှု ခံယူနေစဉ်မှာ ရေမကူးသင့်ဘူး။ ရေကူးကန်ထဲမှာပါတဲ့ ကလိုရင်းဓာတ်နဲ့ ဓာတ်ရောင်ခြည်ပြထားတဲ့ အရေပြား ထိလို့မရပါ။ အသက်ကြီး လူနာများအနေနဲ့လည်း သာမန် ဖြည်းဖြည်း သက်သာတဲ့ လေ့ကျင့်ခန်းမျိုးပဲ လုပ်သင့်တယ်။ အရိုးမကောင်းတဲ့၊ အရိုးကို ကင်ဆာပြန့်သွားတဲ့ လူနာများမှာ ဆိုရင်လည်း ထိခိုက်ဒဏ်ရာရတာတွေ၊ ချော်လဲတာတွေ မဖြစ်အောင် ရှောင်ရမယ်။ အခြား လူနာများမှာတော့ General အနေနဲ့ ပြောရရင် Regular Exercise က ကောင်းပါတယ်။ ကင်ဆာအတွက်လည်း အကျိုးရှိတယ်။ အခြား နှလုံး၊ သွေးတိုး၊ ဆီးချို၊ အရိုးပျော့ အားနည်းရောဂါတွေအတွက်လည်း ကောင်းပါတယ်။ သကြားစားခြင်းကြောင့် ကင်ဆာရောဂါ မတိုးပါ။ ပိုပြီး ဆိုးမလာပါ။ သို့ပေမယ့် သကြား လွန်ကဲစွာစားရင် ကိုယ်အလေးချိန် တိုးပြီး ဝလာမယ်။ ဝလာရင် မကောင်းပါဘူး။ ဒါကြောင့် သကြားကို လိုအပ်သလောက် စားပါ။ Natural Sugar ဖြစ်တဲ့ အသီးအနှံများကို စားပါ။ Added Sugar လို့ခေါ်တဲ့ အချိုရည်နဲ့ အစားအသောက်တွေမှာပါတဲ့ သကြားဓာတ်ကို လျှော့စားပါ။ Cancer Survivors များအနေနဲ့ လိုအပ်တဲ့ အာဟာရဓာတ်ကို တတ်နိုင်သမျှ အစားအသောက်ကနေ ယူပါ။ အားဆေး၊ ဓာတ်စာများကို တတ်နိုင်သမျှ ရှောင်ကြည်ပါ။ သို့ပေမယ့် ဒီ Supplements တွေကို မဖြစ်မနေ သောက်ရမယ့် အနေအထားများတွေရှိမှ သောက်ပါ။ မည်သည့် Dietary Supplements ဓာတ်စာ၊ အားဆေးမှ ကင်ဆာရောဂါ ပြန်ဖြစ်ပွားမှုကို နည်းစေခြင်း၊ Survival လို့ခေါ်တဲ့ အသက်ပိုရှည်စေခြင်းများ လေ့လာစူးစမ်းမှုများအရ လုံးဝ မရှိပါ။ လေ့လာစူးစမ်းမှုတွေအရ ဟင်းသီးဟင်းရွက်နဲ့ သစ်သီးဝလံတွေကို ပိုမိုစားသုံးတာဟာ ကင်ဆာပြန်ဖြစ်ပွားစေတာကို လျော့နည်းစေပါတယ်။ အကျိုးရှိပါတယ်။ နေ့စဉ်စားပါ။ အရောင်စုံ အသီးအနှံတွေကို နေ့စဉ်စားပါ။ ဖြစ်နိုင်ရင် လတ်ဆတ်စွာစားပါ။ Frozen foods စားလို့ရတယ်။ Frozen foods ဆိုတာ ခူးဆွတ်ပြီးတာနဲ့ တန်းပြီး အေးခဲလိုက်တာကို ဆိုလိုတာပါ။ Frozen food က ပိုပြီး အာဟာရရှိတယ်လို့ ဆိုပါတယ်။ ဘာလို့လဲဆိုတော့ ခူးဆွတ်ချိန်က အာဟာရဓာတ်ကို အေးခဲထားနိုင်လို့ပါတဲ့။ Canned food စည်သွပ်ဘူး အသီးအနှံတွေ စားရင်တော့ ဆိုဒီယမ်ပိုများတာကို သတိပြုပါ။ Vegetables တွေကို ချက်ပြုတ်တဲ့အခါမှာလည်း ပေါင်းပြီးတော့စားတာက ရေအများကြီးနဲ့ ပြုတ်စားတာထက် ပိုကောင်းတယ်။ နောက်ပြီးတော့ အစိမ်းစားတာထက် ချက်စားတာက ပိုပြီးတော့ ခန္ဓာကိုယ်က စုပ်ယူမှုကောင်းစေတယ်။ Fruits တွေကို စားတဲ့အခါမှာလည်း Ready made ဖျော်ရည်ထက် အသီးကိုကြိတ်ပြီး ဖျော်ရည်လုပ်သောက်တာ ပိုကောင်းပါတယ်။ ရောဂါပိုးမွှား မဝင်စေအောင် သန့်သန့်ရှင်းရှင်း ပြင်ဆင်ဖို့လိုတယ်။ Survivors များအနေနဲ့ ရေနဲ့ အရည်တွေကို အမျိုးသားဆိုရင် တနေ့ကို ရေ ၃ ဒသမ ၇ လီတာနဲ့ အမျိုးသမီးဆိုရင် ၂ ဒသမ ၇ လီတာ သောက်သင့်ပါတယ်။ ဒါဟာ တခြား ဘာရောဂါမှ မရှိတဲ့ လူတွေအတွက်ပါ။ အချို့ ကျောက်ကပ် စတဲ့ ရောဂါရှိရင်တော့ တနေ့ ရေ ဘယ်လောက် သောက်ရမလဲ ဆိုတာကို ဆရာဝန်နဲ့တိုင်ပင်ဖို့ လိုပါတယ်။” မေး - နောက်ထပ် ဖြည့်စွက်ပြောစရာ ဘာတွေများရှိသေးလဲ ခင်ဗျ။ “ကင်ဆာရောဂါ ဖြစ်ပြီဆိုရင် စိတ်ရော၊ လူရော၊ ငွေအားရော အင်မတန် ပင်ပန်းစေတယ်။ မိမိတယောက်တည်း မဟုတ်ဘဲ မိသားစု ပတ်ဝန်းကျင် အားလုံးကိုပါ စိတ်သောကရောက်စေ၊ ငွေကုန်ကြေးကျ အင်မတန်များစေတယ်။ ကင်ဆာကြောင့် ငွေကြေးကုန်ကျမှုဟာ အလွန်များတယ်။ ၂ဝ၁ဝ ခုနှစ်မှာ ကန်ဒေါ်လာ ခန့်မှန်း ၁ ဒသမ ၁၆ ထရီလီယံ (ဘီလီယံ ၁၁ဝ ကျော်) ရှိခဲ့တယ်။ ရောဂါအဆင့်မြင့်လာတာနဲ့အမျှ ဝေဒနာခံစားရတာကလည်း အလွန်များလာပြီး ပျောက်ကင်းဖို့ ရာခိုင်နှုန်း ပိုပိုနည်းလာစေပါတယ်။ သေဆုံးနှုန်းကလည်း အင်မတန်များတဲ့ ရောဂါတခုပါ။ ကုသမှုအနေနဲ့ ခေတ်မီတဲ့ အနောက်တိုင်းဆေးပညာနဲ့ သေချာ စနစ်တကျ ကုသမှပဲ သက်သာပျောက်ကင်းနိုင်ပြီးတော့ ဆေးမြီးတိုနဲ့ လုံးဝ မပျောက်ကင်းနိုင်တဲ့ ရောဂါမျိုး ဖြစ်တယ်။ ဒါကြောင့် အထက်မှာ ဖော်ပြခဲ့ပြီးဖြစ်တဲ့ ကင်ဆာမဖြစ်အောင် ကာကွယ်လို့ရတဲ့ အချက်တွေကို ရှောင်ခြင်း ဆောင်ခြင်းဖြင့် ကင်ဆာမဖြစ်အောင် ကြိုတင်ကာကွယ်ကြပါ။ မလွဲသာ မရှောင်သာ ဖြစ်တတ်တဲ့ သဘောတရားတွေကိုလည်း သိရှိပြီး cancer screening ခေါ်တဲ့ ကင်ဆာမဖြစ်ခင်မှာ ကြိုတင်သိအောင် စစ်ဆေးခြင်းကိုလည်း အသက်အရွယ် ရလာတဲ့အမျှ လူတိုင်းစစ်ဆေးကြပါ။ ဘာလို့လဲဆိုတော့ ကင်ဆာဟာ စောစီးစွာ တွေ့ရှိ သိရှိရရင် ပျောက်ကင်းအောင် ကုသနိုင်တဲ့ ရောဂါဖြစ်လို့ပဲ။ နောက်ပြီး အခုဖော်ပြခဲ့တဲ့ ကင်ဆာ ကာကွယ်ရေးအချက်တွေကို တကယ်သာ လိုက်ပါလုပ်ဆောင်နိုင်ခဲ့ရင် ကင်ဆာရောဂါတခုတည်း မဟုတ်ဘဲ တခြားသော သွေးတိုး၊ ဆီးချို၊ နှလုံး စတဲ့ မကူးစက်နိုင်တဲ့ ရောဂါတွေကိုလည်း ကာကွယ်နိုင်ပြီး ကျန်းမာရေး ကောင်းမွန်စေမှာပဲ ဖြစ်တယ်။” ခုလို အချိန်ပေးပြီး ဖြေကြားပေးတာ ကျေးဇူးတင်ပါတယ်ခင်ဗျာ။
3 years Ago
Up