တောင်န၀င်းဆည်

February 23, 2019

တောင်နဝင်းဆည် ဘေးကင်းလုံခြုံရေး မိုးရာသီမတိုင်ခင် အပြီးဆောင်ရွက်မည်ဟု ဒုဝန်ကြီးပြော

အက်ကြောင်းတွေ ဖြစ်ပေါ်လာတဲ့အတွက် ဒေသခံပြည်သူတွေ စိုးရိမ်ထိတ်လန့်နေတဲ့ တောင်န၀င်းရေလှောင်တမံကို ကြံ့ခိုင်မှုနဲ့ ဘေးကင်းလုံခြုံစေရေးအတွက် ကျွမ်းကျင်ပညာရှင်တွေနဲ့ စစ်ဆေးမှုတွေလုပ် ဆောင်နေပြီး မိုးရာသီမတိုင်မီ အပြီးလုပ်ဆောင်မယ်လို့ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယ၀န်ကြီး ဦးလှကျော်က ပြောပါတယ်။ ဖေဖော်ဝါရီ ၂၂ ရက်နေ့က ကျင်းပတဲ့ ပြည်သူ့လွှတ်တော်အစည်းအဝေးမှာ ပေါက်ခေါင်း မဲဆန္ဒနယ် ပြည်သူ့လွှတ်တော် ကိုယ်စားလှယ် မေးမြန်းတဲ့ တောင်န၀င်းရေလှောင်တမံ လုံခြုံစိတ်ချမှုရှိစေရေး စီမံဆောင်ရွက်ထားမှု အခြေအနေ သိရှိလိုတဲ့ မွေးခွန်းအပေါ် ဒုဝန်ကြီးက အခုလို ထည့်သွင်းပြောဆိုလိုက်တာပါ။ “ဒေသနေပြည်သူများ စိုးရိမ်ပူပန်မှုများ လျော့ပါးသွားစေမှုမှသည် ပူပင်သောကများ ကွယ်ပျောက်ပြီး မိမိတို့၏ဘ၀၊ အသက်အိုးအိမ်စည်းစိမ်များ၊ စိတ်ချလုံခြုံစေမယ့် အခြေအနေများ ဖြစ်ပေါ်လာနိုင်မည့် အနေအထားအထိ အထူးအလေးထား စီမံဆောင်ရွက်ပေးသွားမှာဖြစ်ပါတယ်။" လက်ရှိအချိန်မှာတော့ ရေလှောင်တမံ ရေရှည်ကြံ့ခိုင်မှုနဲ့ ဘေးကင်းလုံခြုံရေးအတွက် ပြည်တွင်းပညာရှင်တွေနဲ့အတူ ဂျပန်နိုင်ငံ Sanyu အတိုင်ပင်ခံအဖွဲ့မှ ဘူမိဗေဒ ပညာရှင်တဦး ကွင်းဆင်းပြီး တမံအခြေအနေကို အချိန်ပြည့် စောင့်ကြည့်စစ်ဆေးနေတယ်လို့ ဒုဝန်ကြီးက ဆိုပါတယ်။ မေးခွန်းရှင်ကတော့ လဆန်းပိုင်းလောက်က အက်ကွဲကြောင်းများ ထွက်ပေါ်ခဲ့တဲ့ တောင်နဝင်း ရေလှောင်တမံဟာ မိုးရာသီရေလှောင်ကာလအတွင်း ဆည်ကျိုးပေါက်မှာကို ဒေသခံတွေ စိုးရိမ်နေကြတယ်လို့ ပြောပါတယ်။ ပဲခူးတိုင်း ပေါက်ခေါင်းမြို့နယ် တောင်နဝင်းရေလှောင်တမံကိစ္စဟာ အများပြည်သူနဲ့သက်ဆိုင်ပြီး ပြည်သူတွေသိရှိလိုတဲ့ ကိစ္စဖြစ်တာကြောင့် မေးမြန်းဖြေဆိုမှုအားလုံးကို နိုင်ငံတော်ပြန်တမ်းမှာ ထည့်သွင်းသွားမှာဖြစ်တဲ့အပြင် အများပြည်သူသိရှိနိုင်ဖို့အတွက် နိုင်ငံပိုင် သတင်းစာတွေကလည်း ဖော်ပြသွားမယ်လို့ ပြည်သူ့လွှတ်တော်ဥက္ကဋ္ဌက ကြေညာခဲ့ပါတယ်။ အောင်ဆန်းဦး
2 years Ago

February 8, 2019

တောင်န၀င်းဆည် ကောလာဟလသတင်းကြောင့် ဒေသခံများထိတ်လန့် ထွက်ပြေးနေ

ပဲခူးတိုင်းဒေသကြီး၊ ပြည်ခရိုင်၊  ပေါက်ခေါင်းမြို့နယ်ရှိ တောင်နဝင်းဆည်ကြီး တာကျိုးသွားတယ်ဆိုတဲ့ ကောလာဟာလသတင်းတွေကြောင့် ပေါက်ခေါင်းမြို့နဲ့ အနီးအနား က ကျေးရွာတွေက ဒေသခံတွေ ထိတ်လန့်နေကြပါတယ်။ ဒီကနေ့ ဖေဖော်ဝါရီ ၈ ရက်နေ့မနက်မှာ တာဆည်ကျိုးပြီဆိုပြီး ကောလာဟလ သတင်းတွေထွက်ပေါ်လာပြီး ပေါက်ခေါင်းမြို့ပေါ်နဲ့ ဆည်အောက်က ကျေးရွာတွေမှာ နေထိုင်သူတွေ ထိတ်လန့်တကြား စိုးရိမ်ထွက်ပြေးနေကြတာပါ။ တာဘောင်ရောက်နေတဲ့ ဒီဗွီဘီသတင်းထောက် ကိုမင်းညိုက “ ပေါက်ခေါင်းမြို့ အ၀င်ကစပြီးလူတွေ ရုတ်ရုတ်သဲသဲနဲ့ တောင်န၀င်းဆည်ကြီး ကျိုးပြီဆိုပြီးတော့ အုန်းအုန်းကျွက်ကျွက်တွေဖြစ်နေပြီး ရွာသားတွေပါ ဆောက်တည်ရာမဲ့ ထွက်ပြေးနေတာကို တွေ့တယ်။ ဆည်အောက်က ကပ်လျက်ရှိတဲ့ ရွက်သစ်ရွာက စာသင်ကျောင်းကလည်း ကလေးတွေကို ဘယ်လိုမှ ခေါ်မရတော့ဘူး။ ဆည်ကျိုးတယ်ဆိုတဲ့ ကောလာဟာလနဲ့ အကုန်လုံး ထွက်ပြေးနေကြပါတယ်။ ကျနော်တို့ အခုဆည်ပေါ် ရောက်နေပါတယ်။ ဆည်ပေါ်မှာတော့ ဆည်ကျိုးတဲ့ အရိပ်အရောင်မမြင်ရသေးပါဘူး။ ဒါပေမယ့် အရင်တုန်းက အခြေအနေထက် စာရင်တော့ တရက်အတွင်းမှာ ခြေလက်မလောက်တော့ နိမ့်ကျသွားတာကို တွေ့ရပါတယ်။ ပက်ကြားအက်တွေလည်း နဂိုထက် တော်တော်များများ ကြီးလာတာကို တွေ့ရပါတယ်။”လို့ ပြောပါတယ်။ ပြီးခဲ့တဲ့လကလည်း တောင်နဝင်းဆည်ကြီးမှာ ပတ်ကြားအက်တွေနဲ့ ဆည်နိမ့်လာတာ ပိုဆိုးလာလို့ ဆည်အောက်ကကျေးရွာတွေ ရေလွတ်မယ်ထင်တဲ့ နေရာတွေကို ရွှေ့ပြောင်းတာ ရှိခဲ့ပါတယ်။ တောင်နဝင်းဆည်ကို ဆည်မြောင်းဦးစီးဌာနက ဒု ညွှန်ချုပ်နဲ့ ဘူမိဗေဒပညာရှင်တွေ လာရောက်စစ်ဆေးခဲ့ပြီး တာကျိုးပေါက်ဖို့ မစိုးရိမ်ရဘူးလို့ ပြီးခဲ့တဲ့ ဇန်နဝါရီ ၂ ရက်က ဒေသခံ လွှတ်တော်ကိုယ်စားလှယ်တွေကိုလည်း ရှင်းပြခဲ့ပါတယ်။ တိုင်းလွှတ်တော်ကိုယ်စားလှယ် ဦးသက်မင်းဇော်က“တမံကို ဒေါင့်ဖြတ်ကွဲတယ်ဆိုရင်တော့ စိုးရိမ်ရတယ်ပေါ့။ ခုက တမံနဲ့ မျဉ်းပြိုင်ကွဲတာ ကတော့ စိုးရိမ်စရာမရှိဘူး။ ဆည်တိုင်းမှာ ဒီလို အက်ရာကတော့ ရှိတယ်လို့လည်း ပြောတယ်။ ငလျင်ကြောတွေက ဒီဆည်ကို ဖြတ်သွားတာကိုး” လို့ ဒီဗွီဘီကို ပြောခဲ့ဖူးပါတယ်။ ပြီးခဲ့တဲ့ ဒီဇင်ဘာလထဲမှာ ငလျင် ၄ ကြိမ် လှုပ်ခဲ့တာကြောင့် ဆည်အပေါ်မှာ အက်ကြောင်း လာထင်တာ ဖြစ်တယ်လို့လည်း ရှင်းပြခဲ့ပါတယ်။ တောင်နဝင်းဆည်ဟာ ဂျပန်နည်းပညာနဲ့  တည်ဆောက်ထားတာဖြစ်ပြီး မြေသားတမံဖြစ်တာ၊ အောက်ခြေမြေသားရဲ့ ကျောက်ပါဝင်မှုဟာ သက်ရင့်ကျောက် အမျိုးအစားဖြစ်တာ၊ ဆည်စဆောက်စဉ်ကတတည်းက  ဂျပန်ပညာရှင်တွေက မြေငလျင်ဒဏ်ကို ထည့်သွင်းတွက်ချက် တည်ဆောက်ထာားတာဖြစ်လို့ ဆည်ကျိုးပေါက်မှာ မစိုးရိမ်ရဘူးလို့ ဆည်မြောင်းဌာန ဒုညွှန်ကြားရေးမှူးချုပ် ဦးဘိုဘိုကျော်က လွှတ်တော် အမတ်တွေကို ရှင်းလင်းပြောပြထားပါတယ်။
2 years Ago
Up