ကျောက်မီးသွေးစီမံကိန်း

A d v e r t i s e m e n t With Us

November 8, 2017

ကျောက်မီးသွေးစီမံကိန်း ကန့်ကွက်သည့် ၀တ်ပြုဆုတောင်းပွဲလာ လူ ၃၀၀ ကျော် တားဆီးခံရ

  ကျောက်မီးသွေးသုံး လျှပ်စစ်ဓာတ်အားပေးစက်ရုံစီမံကိန်းကို ကန့်ကွက်တဲ့ ၀တ်ပြု ဆုတောင်းပွဲပြုလုပ်ပြီး ကရင်ပြည်နယ်နေ့အထိမ်းအမှတ်ပြခန်းကို လာရောက်တဲ့ ဒေသခံ ဆရာတော်နဲ့ လူအင်အား ၃၀၀ ကျော်ခန့် စီးနင်းလိုက်ပါလာတဲ့ မော်တော်ယာဉ် ၁၂ စီးကို ခရိုင်ရဲတပ်ဖွဲ့က တားဆီးခဲ့ပါတယ်။ နိုဝင်ဘာ ၇ မနက် ၁၀ နာရီလောက်က ဘားအံမြို့နယ် ၀တ်ကြီးကျေးရွာအုပ်စု သုံးအိမ် ကျေးရွာအထွက် ဘားအံ-ကမမောင်းလမ်းမကြီးပေါ်မှာ ဘားအံခရိုင်ရဲတပ်ဖွဲ့မှူး ဦးဇော်ဝင်း ဦးစီးတဲ့ အဖွဲ့က တားဆီးခဲ့တာပါ။ ကရင်မြစ်ကြောင်း စောင့်ကြည့်ရေးအဖွဲ့ တာဝန်ခံ စောသာဘိုး က “အပြန်မှာမှ ရွာထိပ် အ၀မှာ ၀င်ဖမ်းတာဗျ။ ပထမဆုံးကား ၃ စီးကို ပိတ်တယ်။ ကားသော့တွေ ယူတယ်။ ကားသော့ တွေ ယူတော့ ကျနော်တို့က လာမေးတယ်။ ဘာကြောင့် ဖမ်းသလဲ။ ဘာကြောင့်လဲဆိုတာ သူတို့က ပြောတာ ဒီဆုတောင်းပွဲနဲ့ မဆိုင်ပါဘူးတဲ့။ ဒီက ရှောင်တခင် ၀ပ်စ်သောက် ဖမ်းတာပါတဲ့။ ရှောင်တခင် ၀ပ်စ်သောက်ဖမ်းတာပါဆိုရင် လမ်းမှာဖြတ်သွားတဲ့ကားတွေ အများကြီး တွေ့တယ်ဗျ။ အဲဒီ ၀ပ်စ်သောက်တွေကျ မဖမ်းဘူးဗျ။ ဒီဆုတောင်းပွဲ အ၀တည့်တည့်က ထွက်လာတဲ့ ကားမှန်သမျှကို တားတယ်။ ဖမ်းတယ်။ အဲလိုပုံစံမျိုးလုပ်တယ်။ လုပ်တဲ့အခါကျတော့ ကျနော်တို့ မြင်တာကတော့ ဒီဆုတောင်းတာကို တမင်တကာခြိမ်းခြောက်တာ ဖိနှိမ့်တာပေါ့”လို့ ပြောပါတယ်။ ကရင်ပြည်နယ်နေ့မှာ ရောက်ရှိနေတဲ့ နိုင်ငံတော် ဒုသမ္မတနဲ့ ပြည်ထောင်စုဝန်ကြီး ခရီးစဉ်တွေကြောင့် လုံခြုံရေးအရ မော်တော်ယာဉ်တွေကို တားဆီးဆောင်ရွက်ရခြင်းဖြစ်တယ်လို့ ကရင်ပြည်နယ်အစိုးရအဖွဲ့ ပြောရေးဆိုခွင့်ရှိသူ ၀န်ကြီးက ပြောပါတယ်။ ကရင်ပြည်နယ် အစိုးရအဖွဲ့၊ ပြောရေးဆိုခွင့်ရှိသူ ဗမာတိုင်းရင်းသားရေးရာဝန်ကြီး ဦးတေဇထွဋ်လှိုင်ထွေးက “ကျနော်တို့ လက်ရှိ ၇ ရက်နေ့က စပြီး ၆ ရက်ပွဲခင်းကာလ အတောအတွင်းမှာ နိုင်ငံတော်ဒုသမ္မတကြီးလည်း လာတယ်။ ပြည်ထောင်စုအဆင့် ၀န်ကြီးတွေ လည်းလာတော့ လုံခြုံရေးကိုကျနော်တို့ တင်းတင်းကျပ်ကျပ် ဆောင်ရွက်ဖို့ဆိုပြီးတော့ ၀န်ကြီးချုပ် နဲ့ သက်ဆိုင်ရာဌာနဆိုင်ရာတွေ ငြိမ်းချမ်းရေးအဖွဲ့အစည်းတွေကို ပူးပေါင်းဆောင်ရွက်ဖို့ ကျနော်တို့ ညွှန်ကြားထားတယ်။ ဒီလို ညွှန်ကြားတဲ့နေရာမှာ မနေ့ကဖြစ်သွားတဲ့ အဖြစ်အပျက် အွန်းလိုင်း ပေါ်မှာ တွေ့ရတဲ့အချိန်မှာ ဒါကလည်း ကျေးရွာသူ ကျေးရွာတွေရဲ့ အမြင်ပေါ့”လို့ ပြောပါတယ်။ သုံးအိမ်ကျေးရွာ ချမ်းအေးလင်းမြိုင်ကျောင်း ဆရာတော်ဦးတေဇနိယ က “တားဆီးခံရတာ မဟုတ်ဘူး။ သူတို့က ဖမ်းကိုဖမ်းတာ။ သော့ပါ အကုန်သိမ်းတယ်။ ဦးဇင်းတို့ပွဲကို ဒီလိုမျိုး ဆုတောင်းပွဲကိုလာကျတဲ့ ဒီနယ်တစ်ဝိုက်က ဒကာတွေကို ဒီလိုမျိုး ကားအဖမ်းခံရတယ်ဆိုတော့ ဦးဇင်းတို့ စိတ်မကောင်းပါဘူး။ အဲဒါ ဦးဇင်းတို့အနေနဲ့ မဖမ်းစေချင်ဘူးပေါ့။ လွတ်လပ်ခွင့် တန်းတူအခွင့်အရေးတော့ ရှိစေချင်တာပေါ့။ ဒီလိုမျိုးလာပြီးတော့ တစ်ဖက်သပ် အနိုင်ယူ အနိုင်ကျင့်တာကတော့ ဦးဇင်းတို့က မဖြစ်သင့်ဘူးလေ။ ဦးဇင်းတို့ကား ၀ပ်စ်သောက်ကား အကြောင်းပြပြီးတော့ ဒီက ဆုတောင်းပွဲလာတဲ့သူကို ကားပဲဖမ်းတယ်။ ကျန်တဲ့ လမ်းမပေါ်က ၀ပ်စ်သောက်တွေကျတော့သူတို့ မဖမ်းပြန်ဘူး။ အဲဒါကျတော့ တရားမျှတမှုမရှိဘူး”လို့ မိန့်ကြားပါတယ်။ အဆိုပါ ၀တ်ပြုဆုတောင်းပွဲကို သတ္တ၀ါတွေ အေးချမ်းပြီး အမြဲတမ်း ရှင်သန်နေထိုင်နိုင်ဖို့၊ တောတောင်ရေမြေတွေ သဘာဝအတိုင်း ရှင်သန်နိုင်ဖို့နဲ့ မြန်မာပြည်ကြီး အမြန်ငြိမ်းချမ်းဖို့အတွက်ရည်ရွယ် ပြုလုပ်တာလို့ သိရပါတယ်။ ဖြစ်စဉ်ဖြစ်ပွားပြီး မနက် ၁၁ နာရီခန့်မှာ ဒေသခံဆရာတော်တွေနဲ့ ကျေးရွားသူ ကျေးရွာသား ၁၀၀ ကျော်ခန့်က ဘားအံမြို့ကို လိုင်စင်ရှိ မော်တော်ယာဉ်တွေနဲ့ ဆက်လက်ထွက်ခွာလာခဲ့ရာမှာ သံလွင်တံတား စုပေါင်းစစ်ဆေးရေးဂိတ်မှာ ဆက်လက် စစ်ဆေးခံခဲ့ရတယ်လို့ သိရပါတယ်။ အဆိုပါ ဆုတောင်းပွဲကို မြန်မာနိုင်ငံ ပွင့်လင်းမြင်သာမှုနှင့် တာဝန်ယူမှု တာဝန်ခံမှုဆိုင်ရာ အရပ်ဖက်မဟာမိတ်အဖွဲ့(MATA)က ဦးဆောင်ပြုလုပ်ဖြစ်ပြီး နိုင်ဝင်ဘာ ၆ ရက်နေ့ ညနေ့ ၄ နာရီလောက်က ပြည်နယ်ပွဲအတွင်း သဘာဝပတ်ဝန်းကျင် ချစ်မြတ်နိုးသူများ အမှတ်တရ အင်္ကျီအရောင်းဆိုင်မှာ အစိမ်းရောင်အနာဂတ်ကို မီးလောင်းတိုက်သွင်းခြင်း ခေါင်းစဉ်နဲ့ ရေးသား ထားတဲ့ လက်ကမ်းစာစောင်တွေကို ပုံနှိပ်ထုတ်ဝေဖြန့်ချိဖို့ ကြိုးစားခဲ့တဲ့အတွက် မြို့နယ် စုပေါင်းရုံးမှာ (MATA)တာဝန်ရှိသူတွေကို ခေါ်ယူသတိပေးခဲ့တာတွေ ရှိတယ်လို့ သိရပါတယ်။ သတင်း - ရဲမင်းခေါင်
3 years Ago

January 20, 2017

တကြော့ပြန်ကျောက်မီးသွေးစီမံကိန်း ပအိုဝ်းလူငယ်များကန့်ကွက်

ရှမ်းပြည်တောင်ပိုင်း ပင်လောင်းမြို့နယ် တီကျစ်ကျေးရွာအနီးမှာ အစိုးရနဲ့ အကျိူးတူကုမ္ပဏီတွေ ကျောက်မီးသွေးတူးဖော်ရေးလုပ်ငန်း လုပ်ဆောင်ခဲ့ပြီး လျာထားချက်မပြည့်မီတာကြောင့် ၂၀၁၄ ခုနှစ်မှာ ရပ်ထားခဲ့ပေမယ့်လည်း ဒီ ၂၀၁၆ နှစ်ထဲမှာ လုပ်ငန်းပြန်စဖို့ စမ်းသပ်လာတာကြောင့် ပအိုဝ်းလူငယ်အစည်းအရုံးနဲ့ ဒေသခံတို့က ထပ်မံကန့်ကွက်လိုက်ပါတယ်။ ကျောက်မီးသွေးတူးဖော်ထုတ်လုပ်ရေးလုပ်ငန်းတွေကြောင့် သဘာဝပတ်ဝန်းကျင်နဲ့ အနီးနားနေ ပြည်သူတို့ ကျန်းမာရေး၊ အလုပ်အကိုင်တွေ ထိခိုက်နစ်နာနေရတာကြောင့် စီမံကိန်းကို ရပ်ပေးဖို့ ဒီကနေ့ ရန်ကုန်မြို့မှာ သတင်းစာရှင်းလင်းပွဲလုပ်ပြီး သက်ဆိုင်ရာကို တောင်းဆိုတယ်လို့ ပအိုဝ်း လူငယ်အစည်းအရုံး တာဝန်ခံ ခွန်ရဲသွေးက ဒီဗွီဘီကို ပြောပါတယ်။ “ဒီမှာကျောက်မီးသွေးလာတူးတာ လွန်ခဲ့တဲ့ ဆယ်နှစ်လောက်က၊ ကျောက်မီးသွးတူးတော့ စက်ရုံက ရေဆိုးရေညစ်တွေက ကျနော်တို့စိုကိပျိုးရေးလုပ်ကိုင်စားသောက်နေတဲ့ ချောင်းထဲကို ၀င်လာတယ်။ ရေတွေမကောင်းတော့ဘူး။ အဲဒီရေချိုးပြီး အရေပြားယားနာဖြစ်တာ ရှိတယ်။ စက်ရုံက လွင့်လာတဲ့ ပြာတွေ လေထုထဲပါပြီး အနံ့ အသက်မကောင်းဘူး။ စက်ရုံက ဆူညံတဲ့အသံကြောင့် ကောင်းကောင်း အိပ်လို့မရဘူး။ နှလုံးရောဂါ သွေးတိုးရောဂါရတယ်၊ မွေးလာတဲ့ ကလေးပေါင်မပြည့်တဲ့ ပြဿ နာတွေ ရှိတယ်။ စီမံကိန်းက ၂၀၁၄ ခုနှစ်က ရပ်သွားပေမယ့် ၂၀၁၅ အောက်တိုဘာမှာ ၅ ကြိမ် ပြန်ပြီး စမ်းသပ်လည်ပတ်လာတယ်။ အစိုးရနဲ့ တရုတ်နိုင်ငံက Wuxi Huanggaung လျှပ်စစ်စွမ်းအား ကုမ္ပဏီတို့ ရင်းနှီးမြှုပ်နှံမှုလက်မှတ်ထိုးထားပြီလို့ ကျနော်တို့ သိရပါတယ်၊ အဲဒီအတွက် အင်မတန် စိုးရိမ်လို့ စီမံကိန်းကို ရပ်ပေးဖို့ တောင်းဆိုပါတယ်ခင်ဗျာ။” တီကျစ်ကျောက်မီးသွေးစီမံကိန်းဧရိယာ နဲ့ ၂ မိုင်ပတ်လည်မှာ ရွာပေါင်း ၁၃ ရွာနဲ့ လူဦးရေ ၈ ထောင်ကျော်နေထိုင်ပြီး ကျောက်မီးသွေးစီမံကိန်းပြန်စရင် ဆိုးကျိုးက ဒီလူတွေပေါ် သက်ရောက် စေနိုင်တယ်လို့ ဆိုပါတယ်။ ဒါကြောင့် ပြည်သူ့ဆန္ဒကို ဆန့်ကျင်တဲ့ ကျောက်မီးသွေးသတ္တုမိုင်းတွင်းနဲ့ ကျောက်မီးသွေးသုံး လျှပ်စစ်ဓာတ်အားပေးစက်ရုံ ရပ်ဆိုင်းပေးရေး၊ ဖွံ့ဖြိုးရေးစီမံကိန်းတွေ ဖော်ဆောင်ရာမှာ ဒေသခံတွေရဲ့ ဆုံးဖြတ်ပါဝင်ခွင့် အကျိုးအမြတ်ပါဝင်ခံစားဖို့နဲ့ စီမံပိုင်ခွင့်တွေကို သက်ဆိုင်ရာကုမ္ပဏီနဲ့ အစိုးရက လေးစားလိုက်နာဖို့၊ အနာဂတ်ဖက်ဒရယ်ပြည်ထောင်စု ဖွဲ့စည်းပုံရေးဆွဲရာမှာ သဘာဝသယံဇာတ အရင်းအမြစ်တွေကို ပြည်နယ်နဲ့ ဒေသန္တရအစိုးရ ကိုယ်ပိုင်ဆုံးဖြတ်လုပ်ပိုင်ခွင့်ရရေးပါ ထည့်သွင်းဖို့ တောင်းဆိုကြောင်း ခွန်ရဲသွေးက ပြောပါတယ်။ ပအိုဝ်းလူငယ်အစည်းအရုံးဟာ မြန်မာနိုင်ငံမှာရှိတဲ့ ကျောက်မီးသွေးစက်ရုံများအကြောင်း၊ လုပ်ကိုင်တဲ့ ကုမ္ပဏီများ၊ သဘာဝစွမ်းအင်အကြောင်း၊ ကျောက်မီးသွေးစီမံကိန်းကြောင့် သဘာဝ ၀န်းကျင်ဆုံးရှုံးမှု၊ အနီးနားနေပြည်သူတို့ပေါ် ထိခိုက်မှုစတဲ့ အချက်အလက်တွေပါတဲ့ (တီကျစ်မြေမှခေါင်းလောင်းသံ) လို့အမည်ရ အစီရင်ခံစာတစောင်ကို ရေးသားပြီး ဒီကနေ့ မနက် သတင်းစာရှင်းလင်းပွဲမှာ ဖြန့်ဝေခဲ့ပါတယ်။
4 years Ago
Up