ကေဘယ်လ်ကား

December 26, 2017

ကောင်းကင် ကေဘယ်လ်ကားတွဲထဲ ပိတ်မိနေသည့် စကိတ်စီးသမားများကို ကယ်တင် (ရုပ်သံ)

အဲ့လ်ပ်စ်တောင်တန်းတွေမှာ ကောင်းကင်ကေဘယ်လ်ကား ပျက်သွားပြီး စကိတ်သမား ၁၅၀ လောက် ကေဘယ်လ်ကားတွဲတွေထဲ နာရီအတော်ကြာအောင် ပိတ်မိနေလို့ ကယ်တင်ခဲ့ရပါတယ်။ ပြင်သစ်နိုင်ငံ အီဇာဒေသ အရှေ့ဘက် အပန်းဖြေရိပ်သာတခုရဲ့ ၂၅ မီတာအမြင့် လေထဲမှာ စကိတ်သမားတွေ တွဲလောင်းဖြစ်နေပြီး ရုပ်သံထဲမှာ လုံခြုံရေး ဟယ်လီကော်ပတာ ၂ စီးနဲ့ ကယ်ဆယ်ရေး ဝန်ထမ်းတွေက ကယ်တင်နေတာ တွေ့ရပါတယ်။ ကယ်ဆယ်ရေးသမားတွေက စကိတ်သမားတွေကို ကယ်တင်နိုင်ဖို့ တွဲတွေဆီ သိုင်းကြိုးနဲ့ ဆင်းလာ၊ တံခါးတွေ ဖွင့်ပြီး အတွင်းထဲ ဝင်ခဲ့ကြတာပါ။ အဲဒီနောက် စိုးရိမ်ပူပန်နေတဲ့ အားလပ်ရက် အပန်းဖြေ စကိတ်သမားတွေကို ကြိုးတွေနဲ့သိုင်းချီပြီး မြေပြင်ပေါ်ကို ချပေးပါတယ်။ ဒေသစံတော်ချိန် ညနေ ၃ နာရီမှာ စခဲ့တဲ့ ကယ်ဆယ်ရေးလုပ်ငန်းက အောင်မြင်စွာ ပြီးဆုံးခဲ့တယ်လို့ ခရီးသွားလာရေး အာဏာပိုင် ဖရန့်က်က သတင်းထုတ်ပြန်ခဲ့ပါတယ်။ အခုအချိန်အထိ တဦးမှ ထိခိုက်ဒဏ်ရာ ရတာ မရှိပါဘူး။ ဒါပေမယ့် ဘာကြောင့် ဂွန်ဒိုလာ ကောင်းကင်ကေဘယ်လ်ကား ပျက်သွားရတဲ့ အကြောင်းရင်းကိုတော့ မသိရသေးပါဘူး။ ပြင်သစ်နိုင်ငံမှာရှိတဲ့ အဲ့လ်ပ်စ်တောင်တန်းတွေက ဗြိတိန်နိုင်ငံ အပါအဝင် ကမ္ဘာတဝန်းလုံးက ခရီးသွားဧည့်သည်တွေကို ဆွဲဆောင်ထားတယ်လို့ မေရာသတင်းတပုဒ်မှာ ဒီဇင်ဘာ ၂၅ ရက်နေ့က ဖော်ပြထားပါတယ်။
4 years Ago

August 1, 2017

ဂျာမနီတွင် ကေဘယ်လ်ကားတစီး ဘီးချော်၊ ပိတ်မိနေသည့်ခရီးသည်များကို ကယ်ဆယ် (ရုပ်သံ)

ဂျာမနီနိုင်ငံ ကိုလုံးမြို့မှာ ဇူလိုင် ၃၀ ရက်နေ့က ကေဘယ်လ်ကားတစီး ဘီးချော်မှုကြောင့် လူ ၁၀၀ ကျော် ပိတ်မိခဲ့ပြီး ကယ်ဆယ်ရေးဝန်ထမ်းတွေက အရေးပေါ် ကယ်ဆယ်ခဲ့ရပါတယ်။ ရိုင်းမြစ်ပေါ် ဖြတ်သန်းတည်ဆောက်ထားတဲ့ ကေဘယ်လ်ကားတစီး မတော်တဆမှု ဖြစ်ပြီးနောက် ကေဘယ်လ်ကား ၃၂ စီးဟာ လုပ်ငန်းဆောင်တာတွေ ရပ်တန့်ခဲ့ပါတယ်။ ကယ်ဆယ်ရေးဝန်ထမ်းတွေဟာ ဝန်ချီစက်နဲ့ ရွေ့လျားကရိန်းတွေ အသုံးပြုပြီး ကလေးတွေ အပါအဝင် ကေဘယ်လ်ကားတွေအတွင်း ပိတ်မိနေသူတွေကို ကယ်ဆယ်ခဲ့ပါတယ်။ ကိုလုံး မီးသတ်ဌာန ပြောခွင့်ရပုဂ္ဂို်လ်က “ညနေ ၃ နာရီ ၂၅ မိနစ်မှာ ကိုလုံးမီးသတ်ဌာန အရေးပေါ်ဖုန်းနံပါတ်ကို ဖုန်းဝင်လာပါတယ်။ ရိုင်းမြစ် ကေဘယ်လ်ကား အလုပ်လုပ်တာ ရပ်သွားတယ်ပေါ့။ အရေးပေါ်ဝန်ထမ်းတွေ အဲဒီကို ရောက်သွားတယ်။ မကြာပါဘူး ဘယ်ဘက်ခြမ်းက ကေဘယ်လ်ကားတစီး ကေဘယ်လ်ကြိုးကနေ ဘီးလွတ်နေတယ်” လို့ ပြောခဲ့ပါတယ်။ “ကုမ္ပဏီက ကေဘယ်လ်ကားတွေ ပြန်သွားအောင်လုပ်ဖို့ဆိုတာ မဖြစ်နိုင်ပါဘူး။ ကေဘယ်လ်ကား  ၃၂ စီးမှာ လူ ၁၀၀ လောက် ပိတ်မိနေတာပါ။ အခုထိ ကျနော်တို့ လူအယောက် ၆၀ ကို ကယ်ပြီးပါပြီ” လို့ အဲဒီပုဂ္ဂိုလ်က ဆက်ပြောပါတယ်။ ကယ်ဆယ်ရေးဝန်ထမ်းတွေဟာ ပိတ်မိနေတဲ့ ခရီးသည်တွေကို လုံခြုံရေးကြိုးတွေနဲ့ ချည်ပြီးတော့ ကယ်ဆယ်ခဲ့ရပါတယ်။ ကေဘယ်လ်ကား ဘီးချော်ရတဲ့ အကြောင်းရင်းကိုတော့ မသိရသေးဘူးလို့ သိရပါတယ်။
4 years Ago
Up