ဩစတြေးလျ

November 28, 2022

နိုင်ငံခေါင်းဆောင် ဒေါ်အောင်ဆန်းစုကြည် စိတ်ဓာတ်ခိုင်မာပြီး ပြန်လွတ်မြောက်မည်ဟု ယုံကြည်နေဟု ရှောင်တာနယ်ပြော

နေပြည်တော်ထောင်မှာ စစ်အာဏာရှင်ရဲ့ မတရား ဖမ်းဆီးအကျဉ်းချတာ ခံနေရတဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ဟာ စိတ်ဓာတ်ခိုင်မာလျက်ရှိပြီး သူပြန်လည်လွတ်မြောက်လာမယ်လို့ ယုံကြည်နေတဲ့အကြောင်း မကြာသေးခင်ကမှ ပြန်လွတ်လာတဲ့ ဩစတြေးလျ စီးပွားရေးပညာရှင် ပါမောက္ခ ရှောင်တာနယ်က ထုတ်ဖော် ပြောကြားလိုက်ပါတယ်။

စစ်တပ်အာဏာသိမ်းပြီးနောက်ပိုင်းမှာ ဒေါ်အောင်ဆန်းစုကြည်ကို တွေ့ခွင့်ရခဲ့သူ အနည်းငယ်ထဲက တယောက်ဖြစ်တဲ့မစ္စတာရှောင်တာနယ်က သူ့ရဲ့ ထောင်တွင်းအတွေ့အကြုံတွေကို ယူကေအခြေစိုက်  Financial Times သတင်းစာနဲ့ အင်တာဗျူးမှာ ထုတ်ဖော်ပြောဆိုထားတာ ဖြစ်ပါတယ်။

တောရှင်းပြီး တည်ဆောက်ထားတဲ့ နေပြည်တော် အကျဉ်းထောင်နယ်မြေထဲက ခန်းဆီးလိုက်ကာတောင် မရှိ၊ ထုံးဖြူသုတ်ထားတဲ့ ကွန်ကရစ်တိုက်အိမ်ငယ်လေးထဲမှာ    ဒေါ်အောင်ဆန်းစုကြည်ကို စစ်တပ်က ဖမ်းဆီးထိန်းသိမ်းထားတဲ့ အကြောင်း၊ နေပြည်တော်အနီးက အကျဉ်းထောင်ပတ်ဝန်းကျင်မှာ မိုဘိုင်းဖုန်းဆက်သွယ်ရေး ကွန်ရက်တွေကို ဖြတ်တောက်ပေးတဲ့ တာဝါတိုင် ၁၂ တိုင် တပ်ဆင်တည်ဆောက်ထားကြောင်း မစ္စတာရှောင်တာနယ်က ပြောပါတယ်။

အဲဒီလို ဆက်သွယ်ရေးကွန်ရက်ဖြတ်တောက်တဲ့ တာဝါတိုင်တွေ တပ်ဆင်ထားရတာဟာ ဒေါ်အောင်ဆန်းစုကြည်ရဲ့ပုံတွေ ပြင်ပမရောက်အောင် တားဆီးလိုတဲ့သဘော ဖြစ်မယ်လို့ ယုံကြည်ကြောင်း ဒေါ်အောင်ဆန်းစုကြည်နဲ့အတူ နိုင်ငံတော်လျှို့ဝှက်ချက်ဥပဒေနဲ့ တရားစွဲဆို ပြစ်ဒဏ်ချမှတ်ခံခဲ့ရတဲ့ ဩစတြေးလျနိုင်ငံသား စီးပွားရေးပညာရှင် ရှောင်တာနယ်က ပြောပါတယ်။

မင်းအောင်လှိုင်တို့ စစ်အာဏာရှင်အဖွဲ့ရဲ့ မတရားဖမ်းဆီးထားမှုကို ခံနေရပေမဲ့ ဒေါ်အောင်ဆန်းစုကြည်ဟာ စိတ်ဓာတ်ခိုင်မာလျက်ရှိကြောင်းနဲ့ ကမ္ဘာ့အဖြစ်အပျက်တွေကိုလည်း မျက်ခြည်မပြတ်ရှိနေကြောင်း သူက ဆိုပါတယ်။

ဘောရစ်ဂျွန်ဆင်နဲ့ လစ်ဇ်ထရပ်စ်တို့ရဲ့ ညှိနှိုင်းစေ့စပ်ဆောင်ရွက်မှုတွေကို သဘောကျနေခဲ့ပြီး ပူတင်ရဲ့ ဆောင်ရွက်ချက်တွေနဲ့ ကမ္ဘာ့အခြေအနေကိုတော့ ဒေါ်အောင်ဆန်းစုကြည်က စိုးရိမ်ထိတ်လန့်မိခဲ့ကြောင်းနဲ့ သူပြန်လည်လွတ်မြောက်လာမယ်လို့ ယုံကြည်နေကြောင်း မစ္စတာရှောင်တာနယ်က Financial Times ကို ပြောခဲ့ပါတယ်။

အကျဉ်းထောင်အာဏာပိုင်တွေက ဒေါ်အောင်ဆန်းစုကြည်အတွက် ဖတ်စရာ ဘာတခုမှ ပေးပို့ခွင့်မပေးပေမဲ့ မစ္စတာရှောင်တာနယ်က တရားမဝင် ရှုပ်ထွေးတဲ့ လမ်းကြောင်းတွေကနေ တဆင့် ဒေါ်အောင်ဆန်းစုကြည့်ထံ စာအုပ်တွေ ပေးပို့နိုင်ခဲ့ပါတယ်။

မစ္စတာရှောင်တာနယ်ရဲ့ ပြန်လည်ပြောပြချက်တွေကနေတဆင့် ရွေးကောက်ပွဲမှာ ဒုတိယအကြိမ် အနိုင်ရခဲ့ပြီး စစ်တပ်ရဲ့ အာဏာလုခံခဲ့ရတဲ့ ဒေါ်အောင်ဆန်းစုကြည်ရဲ့ အကျဉ်းထောင်ထဲက နေ့စဉ်ဘဝကို အနည်းအကျဉ်း သိခွင့်ရခဲ့ကြပါတယ်။

ဒေါ်အောင်ဆန်းစုကြည်ရဲ့ ရှေ့နေတွေကိုလည်း စစ်ကောင်စီက မီဒီယာတွေနဲ့ စကားပြောခွင့် ပိတ်ပင်ထားပါတယ်။

ဒေါ်အောင်ဆန်းစုကြည်၊ မစ္စတာရှောင်တာနယ်နဲ့ တခြား ၃ ယောက်တို့ကို နိုင်ငံတော် လျှို့ဝှက်ချက်ဥပဒေနဲ့ စစ်ကောင်စီက အမိန့်ချပြီးနောက်မှာ ဒေါ်အောင်ဆန်းစုကြည်ကို ထောင်ကပေးတဲ့ အညိုရောင် (ယောဂီရောင်) ထမီနဲ့ နို့နှစ်ရောင်အင်္ကျီဝတ်စုံကိုသာ ဝတ်ဆင်စေပါတယ်။

“အရင်ကတည်းက သူက ပိန်တဲ့သူဆိုပေမဲ့ အခု ပိုပိန်သွားတယ်။ စိတ်ကတော့ အရင်တုန်းကအတိုင်း ခိုင်ခိုင်မာမာပဲ” လို့ မစ္စတာရှောင်တာနယ်က ပြောပါတယ်။

အင်းစိန်ထောင်ကို စတင်ရောက်ရှိခဲ့ချိန်ကနေစပြီး သူ့ရဲ့ အကျဉ်းစံဘဝ အကြောင်းတွေကိုလည်း အသက် ၅၈ နှစ်အရွယ် မစ္စတာရှောင်တာနယ်က ပြန်လည်ပြောပြခဲ့ပါတယ်။

မြန်မာစစ်တပ်ရဲ့ ပြောရေးဆိုခွင့်ရှိသူကို ဒီဖြစ်ရပ်တွေနဲ့ပတ်သက်လို့ ဆက်သွယ်မေးမြန်းရာမှာ ပြန်လည်ဖြေကြားခြင်း မရှိခဲ့ပါဘူးလို့ Financial Times သတင်းက ရေးပါတယ်။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) ရဲ့ အချက်အလက်တွေအရ အာဏာသိမ်းပြီးနောက်ပိုင်းမှာ စစ်အာဏာရှင်တပ်ဖွဲ့တွေရဲ့ လက်ချက်ကြောင့် သေဆုံးခဲ့ရတဲ့ ပြည်သူ အယောက်  ၃,၄၀၀ ကျော်ရှိခဲ့ပြီး လူဦးရေ ထောင်ပေါင်းများစွာ ဖမ်းဆီးထောင်ချခံခဲ့ရတယ်လို့ သိရပါတယ်။

အေအေပီပီရဲ့ တွဲဘက်အတွင်းရေးမှူး ဦးဘိုကြည်က မစ္စတာရှောင်တာနယ် လွတ်မြောက်လာမှုကို ကြိုဆိုခဲ့ပြီး သူ့ရဲ့ဖမ်းဆီးထိန်းသိမ်းခံရမှုကို နိုင်ငံရေးဓားစာခံအဖြစ် အသုံးချခံရတာလို့ ခိုင်းနှိုင်းပြောဆိုခဲ့ပြီး တခြားနိုင်ငံရေးအကျဉ်းသားတွေကို လွှတ်ပေးဖို့ တောင်းဆိုခဲ့တယ်လို့ ဆိုပါတယ်။

နောက်ထပ် ဖမ်းဆီးထိန်းသိမ်းခံထားရသူ ၁၂,၀၀၀ ကျော်ရှိပြီး ဒါဟာ မှတ်တမ်းရှိတဲ့ အရေအတွက်သာဖြစ်ကာ အခုလို အယောင်ပြပြန်လွှတ်ပေးတာဟာလည်း နိုင်ငံတကာကို အာရုံလွှဲဖို့အတွက်သာ ဖြစ်တယ်လို့ ဆိုပါတယ်။

ဩစတြေးလျ မက်ကွာရီတက္ကသိုလ်နဲ့ ဩစတြေးလျ ဗဟိုဘဏ်တို့ရဲ့ စီးပွားရေးပညာရှင် မစ္စတာရှောင်တာနယ်ဟာ အာဏာသိမ်းပြီးနောက် ရက်ပိုင်းအကြာ ရန်ကုန်ဟိုတယ်က အထွက် စစ်ကောင်စီရဲ့ ဖမ်းဆီးထိန်းသိမ်းခံခဲ့ရတာ ဖြစ်ပါတယ်။

အဲဒီနောက် သူ့ကို အင်းစိန်ထောင်အပြင်ဘက်က ပြတင်းပေါက်မရှိတဲ့အခန်းမှာ ဖမ်းဆီးထားပြီး နှစ်လကြာ စစ်ကြောမေးမြန်းခဲ့တယ်လို့ မစ္စတာရှောင်တာနယ်က ပြောပါတယ်။

အဲဒီအခန်းထဲမှာ ကြမ်းပြင်မှာ မူလီနဲ့စွဲထားတဲ့ သံထိုင်ခုံတလုံးသာရှိပြီး အဲဒီသံထိုင်ခုံမှာ တခါတလေ သူ့ကို  ခြေချင်းခတ်ထားခံရတယ်လို့ ပြောပါတယ်။

သူ့ရဲ့ Laptop ကွန်ပျူတာထဲက ယူထားတဲ့ဖိုင်တွေနဲ့ ပတ်သက်ပြီး သူ့ကို စစ်ဆေးခဲ့ကြကြောင်း၊ ရုရှားနဲ့ တရုတ်နိုင်ငံထုတ် စက်တွေကို အသုံးပြုပြီး အဲဒီဖိုင်တွေကို ယူခဲ့တာဖြစ်ကြောင်း သူ့ကိုပြောခဲ့တယ်လို့ မစ္စတာရှောင်တာနယ်က ပြောပါတယ်။

“အဲဒီတော့ သူတို့က ကျနော့်ကိုအသုံးချပြီး ဒေါ်စုနဲ့ နိုင်ငံခြားသားတွေ ဆက်သွယ်ပြီး စီးပွားရှာနေတယ်လို့ ပုံဖော်ချင်ကြတယ်ဆိုတာ ကျနော်သဘောပေါက်မိတယ်” လို့  ရှောင်တာနယ်က ပြောပါတယ်။

အဲဒီနောက် သူ့ကို လမ်းပေါ်မှာ ဆန္ဒပြခဲ့တာကြောင့် ဖမ်းဆီးထိန်းသိမ်းထားသူတွေနဲ့ ပြည့်နေတဲ့ အင်းစိန်ထောင်ကို ပို့ဆောင်ခဲ့ပြီး အဲဒီမှာ တခြားအကျဉ်းသားတွေဆီကနေ ထောင်ထဲမှာ တတ်ထားရမယ့် ပညာရပ်တချို့ကိုလည်း သင်ယူနိုင်ခဲ့တယ်လို့ ပြောပါတယ်။

အဲဒီနောက် ဇူလိုင် ၂၀၂၁ ခုနှစ်မှာ သူ့ကို နေပြည်တော်ကို ပို့ဆောင်ကာ ဒေါ်အောင်ဆန်းစုကြည်အပြင် တခြားစီးပွားရေးပညာရှင် ၃ ယောက်နဲ့အတူ နိုင်ငံတော် လျှို့ဝှက်ချက်ဥပဒေနဲ့ ပြစ်ဒဏ်ချမှတ်ခဲ့တယ်လို့ ဆိုပါတယ်။

နေပြည်တော် အကျဉ်းထောင်နားက အုပ်ချုပ်ရေးရုံးထဲက အခန်းတခုကို ပြန်လည်ပြင်ဆင်ကာ တရားရုံးအခန်းအဖြစ် ပြုပြင်ထားတဲ့ တရားခွင်မှာ စစ်ဆေးမခံရမီ ဒေါ်အောင်ဆန်းစုကြည်နဲ့ တပတ်တကြိမ် စကားပြောခွင့်ရခဲ့တယ်လို့ မစ္စတာရှောင်တာနယ်က ပြောပါတယ်။ အဲဒီနေရာကို လက်နက်ကိုင်အစောင့်အရှောက်တွေနဲ့ ခေါ်ဆောင်သွားခံရတယ်လို့ ဆိုပါတယ်။

စီးပွားရေး ပြန်လည်ထူထောင်ရေးဆိုင်ရာ သာမန်လုပ်ငန်းစဉ်တွေဖြစ်တဲ့ ငွေလဲနှုန်းမူဝါဒလို စာရွက်စာတမ်းတွေကို လျှို့ဝှက်သတင်းအချက်အလက်အနေနဲ့ အစိုးရဆွဲချရှေ့နေတွေက တရားရုံးမှာ တင်ပြခဲ့ကြတယ်လို့ သူကပြောပါတယ်။ သူ မယုံကြည်တဲ့ စစ်ကောင်စီက စီစဉ်ပေးတဲ့ စကားပြန်ကနေတဆင့်သာ တရားခွင်မှာ ရင်ဆိုင်ဖို့အတွက် ရှေ့နေကို အကန့်အသတ်နဲ့ တွေ့ဆုံရတယ်လို့ ဆိုပါတယ်။

“တရားရုံးရော၊ အပြစ်ရှိတယ်ဆိုတာကလွဲလို့ ချမှတ်ဖို့ တခြားအမိန့်မရှိတဲ့ အခြေအနေရော၊ သူတို့ရဲ့ အဲဒီလုပ်ရပ်တွေဟာ တရားဝင် မှန်ကန်တယ်လို့ ဟန်ဆောင်ပန်ဆောင်တောင် သူတို့မလုပ်ကြဘူး” လို့ မစ္စတာရှောင်တာနယ်က ပြောပါတယ်။

အရပ် ၅ ပေ ၁ လက်မလောက်ရှိတဲ့ မစ္စတာရှောင်တာနယ်ဟာ ၅၀ ကီလိုဂရမ်လောက် ရောက်တဲ့အထိ မူလကိုယ်အလေးချိန်ထက် ၂၀ ရာခိုင်နှုန်းလောက် လျော့ကျသွားခဲ့ပြီး ထောင်ထဲမှာ ကိုဗစ်ရောဂါပိုး ၅ ကြိမ် ကူးစက်ခံခဲ့ရကြောင်း၊ နေပြည်တော်ထောင်ထဲမှာလည်း သွားကျိုးလောက်အောင် ခဲတွေပါတဲ့ ဆန်ပြုတ်ကိုပဲ သောက်ခဲ့ရကြောင်းတွေကို ပြောပြပါတယ်။

အဲဒီနောက် ယူကေသံအမတ်ဟောင်း ဗစ်ကီဘိုးမန်း အပါအဝင် နိုင်ငံခြားသား အကျဉ်းသားတွေနဲ့အတူ သူတို့ကို ပြန်လွှတ်ပေးခဲ့ပါတယ်။ စစ်ကောင်စီရဲ့ ဒီလုပ်ရပ်ဟာ သူတို့လုပ်မယ့် ရွေးကောက်ပွဲအတွက် နိုင်ငံတကာရဲ့ ဆန့်ကျင်မှုတွေ လျော့ကျသွားစေဖို့ ရည်ရွယ်တာ ဖြစ်တယ်လို့ နိုင်ငံရေးသုတေသီတွေက ယုံကြည်ထားပါတယ်။

ဆစ်ဒနီမြို့ကို သူပြန်ရောက်ပြီးနောက်မှာ မြန်မာနိုင်ငံသားတွေဆီကနေ သူကြုံတွေ့ခဲ့ရတဲ့ စက်ဆုပ်ဖွယ်ရာ အတွေ့အကြုံတွေအတွက် တောင်းပန်ကြောင်း စာတွေအမြောက်အမြား လက်ခံရရှိခဲ့တယ်လို့ မစ္စတာရှောင်တာနယ်က ပြောပါတယ်။

“အကောင်းဆုံးလူတွေကို အဆိုးဆုံးလူတွေက အုပ်စိုးခြယ်လှယ်တာ ခံနေကြရတယ်။ သူတို့တွေ ဒီလိုခံစားကြုံတွေ့ရဖို့ မထိုက်တန်ပေမဲ့ ဝဋ်ကြွေးပါလာတယ်လို့ပဲ ပြောရမယ်ထင်တယ်” လို့ မစ္စတာရှောင်တာနယ်က ပြောခဲ့ကြောင်း Financial Times ရဲ့ သတင်းမှာ ရေးသားဖော်ပြထားပါတယ်။

Ref- Financial Times

22 hours Ago

November 22, 2022

ဩစတြေးလျ ANZ ဘဏ် မြန်မာပြည်မှ ထွက်ခွာမည်

ဩစတြေးလျနိုင်ငံ အခြေစိုက် ANZ ဘဏ်ဟာ လုပ်ငန်းလည်ပတ်မှုဆိုင်ရာ ရှုပ်ထွေးမှုတွေကြောင့် မြန်မာနိုင်ငံကနေ လာမယ့်နှစ်ထဲမှာ ထွက်ခွာတော့မယ်လို့ ကြေညာပါတယ်။

ANZ ဘဏ်ရဲ့ အပြည်ပြည်ဆိုင်ရာ အုပ်ချုပ်မှုဒါရိုက်တာ ဆိုင်မွန် အိုင်ယာလန်က “ခုလိုဆုံးဖြတ်ချက်ထဲမှာ ဒေသတွင်း လုပ်ငန်းလည်ပတ်မှု အခြေအနေတွေကို ဂရုတစိုက် ထည့်သွင်းစဉ်းစားသွားမှာ ဖြစ်ပါတယ်။ ကျနော်တို့ရဲ့ နိုင်ငံတကာကွန်ရက်နဲ့ ဒေသတွင်း ဖောက်သည်တွေရဲ့ ကုန်သွယ်မှုနဲ့ အရင်းအနှီးစီးဆင်းမှုကို ပံ့ပိုးပေးခြင်းက ကျနော်တို့ မဟာဗျူဟာရဲ့ အရေးပါတဲ့ အစိတ်အပိုင်းတခုဖြစ်ပြီး ရေရှည်အတွက် ဆက် လက်တည်ရှိနေပါလိမ့်မယ်” လို့ ထုတ်ပြန်ချက်ထဲမှာ ထည့်သွင်းပြောကြားထားပါတယ်။

စစ်အာဏာသိမ်းပြီးနောက်ပိုင်း မြန်မာစစ်တပ်ပိုင် အင်းဝဘဏ်နဲ့ ငွေကြေးလွှဲပြောင်းတာ ကြိမ်ဖန်များစွာ ပြုလုပ်ခဲ့တဲ့ထဲမှာ ANZ ဘဏ်လည်း ပါဝင်နေတယ်လို့ သတင်းထောက်အဖွဲ့အစည်းတစ်ခုဖြစ်တဲ့ Distributed Denial of Secrets က ပေါက်ကြားလာတဲ့ အချက်အလက်တွေကို ထုတ်ပြန်ခဲ့ပါတယ်။

အဲဒီမှတ်တမ်းဖိုင်ထဲမှာ ငွေလွှဲမှတ်တမ်းပေါင်း ၂၀,၀၀၀ နီးပါး ပါဝင်ပြီး ဩစတြေးလျနိုင်ငံ အခြေစိုက် ANZ ဘဏ်၊ စင်ကာပူနိုင်ငံအခြေစိုက် UOB ဘဏ်တို့ဟာ အင်းဝဘဏ်နဲ့ ငွေလွှဲခဲ့ကြတာကို ဖော်ပြထားပါတယ်။ ဒါ့အပြင် မှတ်တမ်းဖိုင်တွေအရ နော်ဝေးနိုင်ငံက ရင်းနှီးမြှုပ်နှံထားတဲ့ ရိုးမဘဏ်လည်း ပါဝင်ပတ်သက်နေတာကို တွေ့ရတယ်လို့ ဆိုပါတယ်။

ANZ ဘဏ်ဟာ မြန်မာနိုင်ငံမှာ လွန်ခဲ့တဲ့ ၂၀၁၅ ခုနှစ်ကတည်းက စတင်ပြီးတော့ မြန်မာနိုင်ငံမှာ လုပ်ငန်းစတင်ခဲ့တာဖြစ်ပြီး ခုလိုစစ်ကောင်စီနဲ့ ဆက်နွှယ်ပတ်သက်နေတဲ့ ANZ ဘဏ်အပါအဝင် အဖွဲ့အစည်းတွေရဲ့ လုပ်ငန်းလည်ပတ်မှုတွေကို ပြန်လည်သုံးသပ်ဖို့နဲ့ စစ်ကောင်စီကို ဖိအားပေးဖို့လည်း တောင်းဆိုခံထားရတာလည်း ဖြစ်ပါတယ်။

7 days Ago

ရက်ပေါင်း ၆၅၀ အကျဉ်းကျခံခဲ့ရသည့် ပါမောက္ခရှောင်တာနယ် မြန်မာစစ်တပ်ကို စီးပွားရေးပိတ်ဆို့ရန်ပြော

ဩစတြေးလျအစိုးရအနေနဲ့ မြန်မာစစ်တပ်အပါအဝင် သူ့နဲ့ ပတ်သက်ဆက်နွှယ်နေတဲ့ ဘဏ်လုပ်ငန်းရှင်တွေကို စီးပွားရေးပိတ်ဆို့ဒဏ်ခတ်မှုတွေ ချမှတ်သင့်တယ်လို့ မြန်မာအကျဉ်းထောင်ကနေ ပြန်လည်လွတ်မြောက်လာခဲ့တဲ့ ဩစတြေးလျ စီးပွားရေးပညာရှင် ပါမောက္ခ မစ္စတာရှောင်တာနယ်က ပြောတဲ့အကြောင်း ရိုက်တာသတင်းမှာ ဖော်ပြထားပါတယ်။

၂၀၂၁ ခုနှစ် ဖေဖော်ဝါရီ ၆ ရက်က စတင်ကာ ရက်ပေါင်း ၆၅၀ ကြာအကျဉ်းကျခံနေရတဲ့ ကာလအတွင်း ခြေကျင်းစွပ်စစ်မေးခံခဲ့ရပုံတွေ၊ အကျဉ်းအခန်းတွေရဲ့ ညစ်ပတ်စုတ်ပြတ်မနှစ်မြို့စရာကောင်းပုံတွေ၊ နှိပ်စက်ခံရလို့ အော်ဟစ်နေကြတဲ့အသံတွေကြားရတဲ့  အတွေ့အကြုံတွေကို The Australian သတင်းစာနဲ့ အင်တာဗျူးမှာ ပြောပြခဲ့တယ်လို့ ဆိုပါတယ်။

နာမည်ဆိုးနဲ့ကျော်ကြားတဲ့ ကိုလိုနီခေတ်တည်းက တည်ဆောက်ထားတဲ့ အင်းစိန်ထောင်မှာ အရင်နေခဲ့ရပြီးနောက်မှာ နေပြည်တော်က အချုပ်ထောင်ကို မစ္စတာရှောင်တာနယ် ရွှေ့ပြောင်းခံခဲ့ရပါတယ်။

အင်းစိန်ထောင်ထဲမှာတုန်းက ၈ ပေ၊ ပေ ၂၀ အကျယ်ရှိတဲ့ အခန်းမှာနေခဲ့ရပြီး ထိုင်ခုံခြေထောက်မှာ ခြေကျင်းပါတဲ့ သံထိုင်ခုံတစ်ခုကို အခန်းရဲ့အလယ်မှာ မူလီနဲ့စွဲထားတာရှိတယ်လို့ သူကပြောပါတယ်။

အစပိုင်းစစ်ကြောရေးမှာ သူ့ကို ဗြိတိန်ထောက်လှမ်းရေးအဖွဲ့ MI6 အတွက်အလုပ် လုပ်ပေးနေသူ၊ လက်နက်မှောင်ခိုတင်သွင်းသူလို့  စွပ်စွဲကာ နှစ်လကြာ စစ်မေးခြင်းခံခဲ့ရတယ်လို့ ဆိုပါတယ်။ တခါတလေသူ့ကို  သူ့ကို အိပ်ယာထဲကနေဆွဲခေါ်ပြီး ထိုင်ခုံမှာခြေကျင်းခတ်ထားခဲ့တယ်လို့ ဆိုပါတယ်။ သူ့ကို ဆောင့်တွန်းတာတွေ ဆောင့်ဆွဲတာတွေရှိပေမယ့် ရိုက်နှက်တာမျိုးတော့ မရှိခဲ့ဘူးလို့ ဆိုပါတယ်။

အင်းစိန်ထောင်မှာ ဖမ်းဆီးခံထားရစဉ် အစောပိုင်းကာလတွေမှာ ပြည်သူတွေရဲ့ ဆန္ဒပြသံပုံးတီသံတွေကိုလည်း ကြားခဲ့ရကြောင်း မစ္စတာ ရှောင်တာနယ်ကပြောပါတယ်။ 

“နောက်တော့ ပေါက်ကွဲသံတွေ၊ သေနတ်ပစ်သံတွေနဲ့ နှိပ်စက်ခံရတဲ့အသံတွေကြားရတယ်။ ငါကိုတော့ သူတို့ အဲဒီလိုတွေ မလုပ်လောက်ပါဘူးလို့ တွေးမိပေမယ့် ခဏနေတော့ လုပ်ရင်လည်း လုပ်မှာပဲလို့ တွေးမိပြန်တယ်။  ဒါတွေ ငါ ကြားအောင် တမင်လုပ်နေတာဖြစ်နိုင်တာပဲ လို့လည်းတွေးမိပြန်တယ်” လို့ ဆိုပါတယ်။

ရှောင်တာနယ်က “ကျနော့်ကို လျှပ်စစ်နဲ့ တို့တာမျိုးတော့ မရှိပေမယ့် ညစ်ပတ်စုတ်ပြတ်နေတဲ့ အခန်းထဲမှာ ထည့်ထားတယ်။ အစာကိုလည်း ပုံးနဲ့ပဲလာပေးတော့ ရက် ၆၅၀ လုံး ကျနော်လည်း ပုံးနဲ့ပဲစားရတယ်။ နေပြည်တော်မှာဆိုရင်  ဆေးပြန်သုတ်ထားတဲ့ ပုံးအဟောင်းတွေနဲ့ စားစရာထည့်ပေးတာ” လို့ သူကပြောပါတယ်။

အမိုးတွေကလည်း မလုံပဲ မိုးရွာရင် ရေတွေယိုနေပြီး တချို့ညတွေဆို တညလုံးထိုင်နေရကြောင်း အဝတ်တွေ စောင်တွေနဲ့ ခြောက်အောင်ပြန်သုတ်ရကြောင်းတွေကိုလည်း ပြောပြခဲ့ပါတယ်။

အကျဉ်းကျနေစဉ်ကာလအတွင်းမှာ မစ္စတာရှောင်တာနယ်ဟာ ကိုဗစ်ရောဂါ ၅ ကြိမ်ကူးစက်ခံခဲ့ရပြီး သီးသန့်အကျဉ်းထောင်မှာ စာအုပ်မရှိ၊ အိပ်ယာမရှိနဲ့ လပေါင်းအတော်ကြာနေခဲ့ရတယ်လို့ ဆိုပါတယ်။ 

နိုင်ငံရေးအကျဉ်းသား မစ္စတာရှောင်တာနယ်အတွက် ဆစ်ဒနီမြို့မှာ နေထိုင်တဲ့ သူ့ရဲ့ ဇနီးဖြစ်သူက စာအုပ်တွေနဲ့၊ သူကိုယ်တိုင်လုပ်ထားတဲ့ ကွတ်ကီးတွေနဲ့ သစ်သီးကိတ်တွေကို  ရန်ကုန်ရှိ ဩစတြေးလျသံရုံးဆီကို ပို့ပေးခဲ့တာဖြစ်ပြီး သူ့ရဲ့ မိတ်ဆွေတဦးက အပတ်စဉ် ထောင်ဝင်စာပေးပို့ခဲ့တယ်လို့ သိရပါတယ်။ 

မစ္စတာရှောင်တာနယ်က သူ့မှာအပြစ်မရှိကြောင်း ငြင်းဆန်ခဲ့ပေမဲ့  မြန်မာတရားရုံးက သူ့ကို  မြန်မာနိုင်ငံလျှို့ဝှက်ချက် အက်ဥပဒေနဲ့ စက်တင်ဘာလမှာ ထောင်ဒဏ်သုံးနှစ်ချမှတ်ခဲ့ပါတယ်။ 

ရုံးထုတ်စစ်ဆေးခြင်းမပြုမီ ဒေါ်အောင်ဆန်းစုကြည်အပါအဝင် စွပ်စွဲဖမ်းဆီးခံရသူ အမှုတွဲ အစိုးရအဖွဲ့ဝင်တွေနဲ့ အချိန်အနည်းငယ်တွေ့ဆုံခွင့်ရခဲ့ကြောင်းနဲ့ ဒေါ်အောင်ဆန်းစုကြည်ဟာ ကျန်းကျန်းမာမာရှိနေကြောင်း၊ ရိုဟင်ဂျာလူနည်းစုတွေအပေါ်မှာ အကြမ်းဖက်နှိပ်ကွပ်မှုတွေကို ရပ်တန့်နိုင်မယ့် အစီအစဉ်တွေ ဒေါ်အောင်ဆန်းစုကြည်မှာရှိနေကြောင်း မစ္စတာရှောင်တာနယ်က ပြောပါတယ်။

မစ္စတာရှောင်တာနယ်ကို ပြန်မလွှတ်ပေးမီ စစ်ကောင်စီနဲ့ လပေါင်းများစွာ လျှို့ဝှက်ညှိနှိုင်းမှုတွေရှိခဲ့သလို ကမ္ဘောဒီးယားနဲ့ ထိုင်းတို့ကလည်း ဖိအားတွေပေးခဲ့တယ်လို့ ရိုက်တာသတင်းကပြောပါတယ်။ 

မြန်မာပြည်သူလူထုရဲ့ အိပ်မက်တွေပျက်စီးခဲ့ရပြီဖြစ်ကြောင်းနဲ့ စစ်တပ်အရာရှိတွေ၊ ဘဏ်လုပ်ငန်းရှင်တွေကို စီးပွားရေးပိတ်ဆို့မှုတွေချမှတ်ဖို့ ထောက်ခံကြောင်း ပြောခဲ့ပေမယ့် ဘယ်ဘဏ်တွေဆိုတာကိုတော့ နာမည်တပ်မပြောခဲ့ကြောင်း ရိုက်တာသတင်းက ရေးသားထားပါတယ်။ 

Ref- Reuters

Photo: Australian Department of Foreign Affairs

7 days Ago
More News
Up