ဩစတြေးလျ

September 24, 2021

ဩစတြေးလျတွင် ၁၆ နှစ်အထက် ၅၀ ရာခိုင်နှုန်းကျော် ကိုဗစ်ကာကွယ်ဆေးထိုးပြီး

ဩစတြးလျနိုင်ငံမှာ အသက် ၁၆ နှစ်နဲ့အထက် အရွယ်ရောက်ပြီးသူ ၅၀ ရာခိုင်နှုန်းကျော် ကိုဗစ်-၁၉ ကာကွယ်ဆေးထိုးနှံပြီးဖြစ်တယ်လို့ သိရပါတယ်။

ကာကွယ်ဆေးထိုးနှံမှုတွေ နှေးကွေးတယ်လို့ ဝေဖန်ခံရမှုတွေရှိလာပြီးနောက် ပြီးခဲ့တဲ့ စက်တင်ဘာ ၂၃ ရက်မှာတော့ တရက်တည်း ကာကွယ်ဆေးထိုးနှံပြီးစီးမှု ၃၄၇,၀၀၀ ယောက်နဲ့ စံချိန်တင်နိုင်ခဲ့တယ်လို့ ဩစတြေးလျဖက်ဒရယ်အစိုးရက ပြောပါတယ်။

လတ်တလောမှာတော့ အသက် ၁၆ နှစ်နဲ့အထက် အရွယ်ရောက်ပြီးသူ ၅၀ ရာခိုင်နှုန်းကျော် ကိုဗစ်-၁၉ ကာကွယ်ဆေး ၂ ကြိမ် အပြည့်အဝထိုးနှံပြီးစီးမှုဟာ အစိုးရရဲ့ မိုင်တိုင် တခုဖြစ်လာခဲ့ပြီလို့ ဆိုပါတယ်။

ဒါ့အပြင် နောက်ထပ်မှတ်တမ်းတခုအနေနဲ့ တပတ်အတွင်း ကိုဗစ်-၁၉ ကာကွယ်ဆေး ၂ သန်းထုတ်နိုင်ခဲ့ပြီး လက်ရှိကာကွယ်ဆေးစုစုပေါင်း ၂၆ သန်းလက်ဝယ်ရှိနေတယ်လို့ ဆို ပါတယ်။

အသက် ၁၆ နှစ်နဲ့အထက် အရွယ်ရောက်ပြီးသူ ၄ ပုံ ၃ ပုံကလွဲလို့ ပြည်သူအားလုံးကတော့ ကိုဗစ်-၁၉ ကာကွယ်ဆေး ၁ ကြိမ်စီထိုးနှံပြီးသူတွေဖြစ်တယ်လို့ ဆိုပါတယ်။

အစိုးရကတော့ ဩစတြေးလျနိုင်ငံမှာ တဦးချင်းကာကွယ်ဆေးထိုးနှံမှုနှုန်းဟာ တခြား ကမ္ဘာ့နိုင်ငံတွေဖြစ်ကြတဲ့ ပြင်သစ်၊ ဂျာမနီ၊ အီတလီ၊ ဆွီဒင်၊ ယူကေနဲ့ အမေရိကန်တို့ထက် ပိုပြီးတော့ မြန်ဆန်တယ်လို့ ပြောပါတယ်။

လက်ရှိအချိန်ထိ အရွယ်ရောက်ပြီးသူတွေ ကိုဗစ်-၁၉ ကာကွယ်ဆေးထိုးနှံပြီးစီးမှုမှာတော့ သြစတြေးလျတော်နယ်မြေက အပြည့်အဝထိုးနှံပြီးစီးသူ ၆၀ ရာခိုင်နှုန်းနဲ့ ဦးဆောင်နေ ပြီး သူ့နောက်မှာတော့ နယူးဆောက်သ်ဝေးပြည်နယ်က ၅၇ ဒသမ ၈ ရာခိုင်နှုန်း၊ ကွင်းစ လန်ပြည်နယ်က ၄၄ ရာခိုင်နှုန်းစီ အသီးသီး ရှိနေတာ ဖြစ်ပါတယ်။

ဩစတြေးလျနိုင်ငံတဝန်းမှာတော့ လတ်တလောအချိန်ထိ ကိုဗစ်-၁၉ ရောဂါကူးစက်ခံရ သူပေါင်း ၉၃,၀၀၀ ကျော်၊ သေဆုံးသူ ၁,၂၀၀ ကျော်နဲ့ ရောဂါပြန်လည်ပျောက်ကင်းသက် သာလာသူပေါင်း ၇၁,၀၀၀ ကျော် ရှိနေတာ ဖြစ်ပါတယ်။

4 days Ago

September 23, 2021

ပါမောက္ခရှောင်တာနယ်လ်အပေါ်စွဲထားသည့်အမှု နေပြည်တော်တရားရုံးတွင် စတင်စစ်ဆေး

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ စီးပွားရေးအကြံပေး ပါမောက္ခရှောင်တာနယ်လ်ကို စွဲဆိုထားတဲ့ အမှုနှစ်ခုအတွက်  နေပြည်တော်၊ ဒက္ခိဏခရိုင်တရားရုံးမှာ စက်တင်ဘာ ၂၃ရက် ဒီမနက် ၁၀ နာရီမှာ   စတင်ရုံးထုတ်ခဲ့ပါတယ်။ 

ဩစတြေးလျနိုင်ငံသား ပါမောက္ခရှောင်တာနယ်လ်ကို စစ်အာဏာသိမ်းပြီးကတည်းက  ဖမ်းဆီးခဲ့တာဖြစ်ပြီး နိုင်ငံတော်လျှို့ဝှက်ချက်ဥပဒေ၊ လူဝင်မှုကြီးကြပ်ရေးဥပဒေတွေနဲ့ တရားစွဲခဲ့တာပါ။

ပါမောက္ခရှောင်တာနယ်လ်ကိုစွဲဆိုထားတဲ့ လျှို့ဝှက်ချက်ဉပဒေပုဒ်မအမှုမှာ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်နဲ့ အန်အယ်လ်ဒီအစိုးရ ပြည်ထောင်စုဝန်ကြီးတွေဖြစ်တဲ့ ဦးကျော်ဝင်း၊ ဦးစိုးဝင်းနဲ့ ဦးဆက်ပိုင်တို့ကိုလည်း စစ်ကောင်စီက အမှုတွဲအဖြစ် တရားစွဲထားပါတယ်။ 

ဒီနေ့ရုံးချိန်းမှာ  တရားစွဲခံရသူတွေရဲ့ရှေ့နေတွေကို တရားရုံးက ကိုယ်စားလှယ်လွှဲခွင့် ပေးခဲ့ပါတယ်။

ရှေ့နေ ဦးခင်မောင်ဇော်က  "စက်တင်ဘာ ၂၃ ရက် ဒီနေ့ရုံးချိန်းမှာ ပါမောက္ခရှောင်တာနယ်လ်၊ ၊ ဦးကျော်ဝင်း၊ ဦးစိုးဝင်းနဲ့ ဦးဆက်ပိုင်တို့ လေးဦးကို ကိုဗစ်အကာအကွယ်တွေနဲ့ရုံး ထုတ်ခဲ့ပြီး အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကတော့ အွန်လိုင်းကနေ ဗီဒီယိုနဲ့ရုံးချိန်းမှာ ပါဝင်ခဲ့ပါတယ်။ သူတို့လေးယောက်စလုံးကိုကြည့်ရတာ အရမ်းပင်ပန်းနေတဲ့ပုံပေါက်ပြီး ယဲ့ယဲ့လေးဖြစ်နေတယ်" လို့ ပြောပါတယ်။

ပါမောက္ခရှောင်တာနယ်လ်ရဲ့ အမှုတွေကို ရန်ကုန်အရှေ့ပိုင်းခရိုင်တရားရုံးကနေ နေပြည်တော်ကိုလွှဲပြောင်းခဲ့တာဖြစ်ပါတယ်။ နောက်ရုံးချိန်းကို စက်တင်ဘာ ၃၀ ကြာသပတေးနေ့မှာပြန်ခေါ်ထားပြီး နှစ်ဖက်ကြားနာမှုတွေစတင်မှာဖြစ်ပါတယ်။

ပါမောက္ခရှောင်တာနယ်လ်ကို စစ်ကောင်စီက အင်းစိန်ထောင်မှာ ထိန်းသိမ်းခဲ့တာဖြစ်ပြီး ကိုဗစ်-၁၉ကူးစက်ခံရတယ်လို့ သတင်းတွေထွက်ပေါ်ခဲ့ပေမယ့် စစ်ကောင်စီက အတည်ပြုချက်မထုတ်ပြန်ခဲ့ပါဘူး။

ပါမောက္ခရှောင်တာနယ်လ်ကို နောက်ထပ်စွဲဆိုထားတဲ့ လူဝင်မှုကြီးကြပ်ရေးဥပဒေအမှုကတော့ အာဏာသိမ်းပြီးချိန်မှာ ဥပဒေမဲ့ ထွက်ပြေးဖို့ကြိုးစားတာကြောင့် စွဲဆိုတာလို့ စစ်ကောင်စီက အကြောင်းပြထားပါတယ်။ 

ဒီအမှုတွေနဲ့ပတ်သက်ပြီး ပြစ်မှုမြောက်တယ်လို့ တရားရုံးက ဆုံးဖြတ်ရင် ရှောင်တာနယ်လ်ဟာ အမြင့်ဆုံးပြစ်ဒဏ်အဖြစ်ထောင်ဒဏ် ၁၄ နှစ်အထိ ကျခံရဖွယ်ရှိနေပါတယ်။ သူ့ကို ပြန်လွှတ်ပေးဖို့ သြစတြေးလျအစိုးရက တောင်းဆိုထားပေမဲ့ စစ်ကောင်စီက လွှတ်မပေးဘဲ ဆက်လက်ဖမ်းဆီး တရားစွဲဆိုနေတာဖြစ်ပါတယ်။

Photo-Sean Turnell

5 days Ago
More News
Up