ဧရာဝတီတိုင်း

November 28, 2022

လေးကေ့ကော်တွင်ဖမ်းဆီးခံရသည့် ဧရာဝတီတိုင်းက အမတ် ၂ ဦး ထောင်ဒဏ် ၂၆ နှစ် စီချမှတ်ခံရ

ကရင်ပြည်နယ်၊ မြဝတီမြို့နယ်၊ လေးကေ့ကော်မြို့သစ်မှာ ပြီးခဲ့တဲ့ ၂၀၂၁ ခုနှစ်တုန်းက စစ်တပ်ရဲ့ ဖမ်းဆီးခံခဲ့ရတဲ့ ဧရာဝတီတိုင်းဒေသကြီးက အန်အယ်လ်ဒီ လွှတ်တော်ကိုယ်စားလှယ် ၂ ဦးကို စစ်ကောင်စီက ထောင်ဒဏ် ၂၆ နှစ်စီ အမိန့် ချမှတ်လိုက်ပါတယ်။ 

မြောင်းမြပြည်သူလွှတ်တော်ကိုယ်စားလှယ် ဦးဝေလင်းအောင်နဲ့ အိမ်မဲမြို့နယ် အမျိုးသားလွှတ်တော် ကိုယ်စားလှယ် ဒေါက်တာ ပြည့်ဖြိုးတို့ နှစ်ဦးစလုံးကို ဒီကနေ့ နိုဝင်ဘာလ ၂၈ ရက်နေ့မှာ အမိန့်ချမှတ်ခဲ့တာလို့ အမျိုးသားဒီမိုကရေစီအဖွဲ့ချုပ်နဲ့ နီးစပ်သူတွေက ပြောပါတယ်။ 

အန်အယ်လ်ဒီပါတီနဲ့နီးစပ်သူတဦးက “အမိန့်ချလိုက်တာက နှစ်ယောက်လုံးကို ချလိုက်တာ  တနှစ်ကျော်ကြာပြီ အဲ့ကြားမှာ ဘာသတင်းမှ စုံစမ်းလို့မရဘူး။ စွဲထားတဲ့ ပုဒ်မတွေနဲ့ အမြင့်ဆုံးပြစ်ဒဏ်တွေချတာပေါ့။ မဖြစ်သင့်ဘူးပေါ့။ သူတို့လက်ထဲမှာ လက်နက်တွေမိတာလည်း မဟုတ်ဘဲနဲ့ အကြမ်းဖက်ပုဒ်မတွေနဲ့ ထောင်ချတာ”လို့ ပြောပါတယ်။ 

မြောင်းမြပြည်သူလွှတ်တော်ကိုယ်စားလှယ် ဦးဝေလင်းအောင်နဲ့ အိမ်မဲမြို့နယ် အမျိုးသားလွှတ်တော် ကိုယ်စားလှယ် ဒေါက်တာ ပြည့်ဖြိုးတို့ ၂ ဦးလုံးကို အကြမ်းဖက်တိုက်ဖျက်ရေးပုဒ်မ ၅၂ (က)၊ ၅၀ (က)၊ ၅၀ (ည)နဲ့ နိုင်ငံတော်သစ္စာဖောက်မှုတွေနဲ့ တရားစွဲဆိုပြီး မြဝတီခရိုင်တရားရုံးမှာ အပြီးသတ်အမိန့်ချမှတ်ခဲ့ တာလို့ ဆိုပါတယ်။ 

အဆိုပါ လွှတ်တော်အမတ် ၂ ဦးဟာ စစ်တပ်အာဏာသိမ်းပြီးနောက်ပိုင်း လေးကေ့ကော်မြို့သစ်မှာ သွားရောက်တိမ်းရှောင်ရင်း စစ်ကောင်စီတပ်သားတွေ စစ်ကြောင်းထိုးရှာဖွေစီးနင်းခဲ့လို့ ၂၀၂၁ ခုနှစ် ဒီဇင်ဘာလ ၁၄ ရက်နေ့က ဖမ်းဆီးခံခဲ့ရတာ ဖြစ်ပါတယ်။

2 days Ago

November 25, 2022

သာပေါင်းမြို့နယ်တွင် အမျိုးသား ၁ ဦး ဓားထိုးခံရပြီး သေဆုံး

ဧရာဝတီတိုင်း၊ သာပေါင်းမြို့နယ်မှာ နိုဝင်ဘာ ၂၄ ရက်က အရက်အတူသောက်ရင်း ဓားထိုးခံရလို့ အမျိုးသား တယောက်  သေဆုံးခဲ့တယ်လို့ ရဲတပ်ဖွဲ့အသိုင်းအဝိုင်းက သိရပါတယ်။

ဆီဆုံကျေးရွာအုပ်စု၊ အောက်ဒညင်းကုန်းကျေးရွာမှာ နေထိုင်တဲ့ ဦးအောင်ကြိုင်ဟာ တရွာတည်းနေသူတွေနဲ့ အရက်အတူသောက်စားရင်း စကားများရာကနေ သက်ခိုင်စိုးက ဓားနဲ့ထိုးခဲ့လို့ သေဆုံးခဲ့တာလို့ ရဲမှတ်တမ်းတွေအရ သိရပါတယ်။

ရဲတပ်ဖွဲ့ဝင်တဦးက “ဖြစ်တာက ရွာထဲကအိမ်မှာ၊ သူက သွားရောက်ရင်း ဓားထိုးခံရတာ၊ သောက်စားရင်း မူးလာတော့ စကားများတယ်။ အဲ့မှာ ဒေါသစိတ်မထိန်းနိုင်တော့ ဓားနဲ့ထိုးလိုက်တဲ့ပုံစံပါ” လို့ ပြောပါတယ်။

တရွာတည်းနေ အသက် ၃၂ နှစ်အရွယ် သက်ခိုင်စိုးရဲ့ ဓားနဲ့ထိုးခံရပြီး သေဆုံးခဲ့တဲ့ ဦးအောင်ကြိုင်ကို သာပေါင်းပြည်သူ့ဆေးရုံကြီး ပို့ဆောင်ထားပါတယ်။

ဦးအောင်ကြိုင် သေဆုံးအောင် ဓားနဲ့ထိုးခဲ့တဲ့ သက်ခိုင်စိုးကို သာပေါင်းမြို့မရဲစခန်းမှာ (ပ) ၈၉/၂၀၂၂၊ ရာဇသတ်ကြီးပုဒ်မ ၃၀၂ နဲ့ အမှုဖွင့်စစ်ဆေးနေပါတယ်။

5 days Ago

ဧရာဝတီတိုင်း၌ ဌာနဆိုင်ရာရုံးများအနီး ဒရုန်းတွေ့လျှင် ပစ်ချရန် စစ်ကောင်စီ ညွှန်ကြား

ဧရာဝတီတိုင်းမှာရှိတဲ့ စစ်ကောင်စီလက်အောက်ခံ ဌာနဆိုင်ရာရုံးတွေ အနီးတဝိုက်မှာ မောင်းသူမဲ့ဒရုန်းတွေ့ရင် ပစ်ချဖို့အတွက် စစ်ကောင်စီက နိုဝင်ဘာလဆန်းပိုင်းမှာ ညွှန်ကြားထားတယ်လို့ ရဲတပ်ဖွဲ့နဲ့ နီးစပ်သူတွေဆီက သိရပါတယ်။

စစ်ကောင်စီတပ်တွေ တပ်စွဲထားတဲ့ အနီးတဝိုက်မှာ မောင်းသူမဲ့ဒရုန်းတွေ တွေ့ရှိတဲ့အခါ ခွင့်ပြုချက် တောင်းခံစရာမလိုဘဲ ပစ်ချဖို့အတွက် ညွှန်ကြားထားတာလို့ ဆိုပါတယ်။

ရဲတပ်ဖွဲ့နဲ့ နီးစပ်သူတဦးက “ခုက ဒရုန်းနဲ့ ဗုံးချိတ်ပြီး တိုက်ခိုက်တာတွေ များလာလို့ ခုလိုမျိုး ညွှန်ကြားတာထင်တယ်။ တခြားတော့ မပါဘူး။ ဒရုန်းတွေ့ရင် ပစ်ချဖို့၊ ပစ်မချနိုင်ရင် ဘေးကင်းရာရှောင်ဖို့ အဲ့လိုမျိုးပဲပြောတယ်” လို့ ဒီဗွီဘီကို ပြောပါတယ်။

ဧရာဝတီတိုင်းမှာ စစ်ကောင်စီတပ်နဲ့ ရဲစခန်းတွေကို ဒရုန်းနဲ့ ဗုံးပစ်တိုက်ခိုက်တာမျိုး မရှိသေးပေမဲ့ ဖြစ်လာနိုင်လို့ ကြိုတင်သတိပေး ထုတ်ပြန်ထားတာမျိုး ဖြစ်နိုင်တယ်လို့ ဆိုပါတယ်။

၂၀၂၂ ခုနှစ် နှစ်ဆန်းပိုင်းမှာပဲ ဧရာဝတီတိုင်းအတွင်းက ပြည်သူတွေမှာရှိတဲ့ အလှူ၊ မင်္ဂလာဆောင်နဲ့ ရိုက်ကူးရေးတွေမှာ အသုံးပြုလို့ရတဲ့ ဒရုန်းတွေကိုလည်း လာအပ်ဖို့နဲ့ မအပ်ဘဲ တွေ့ရှိရင် အရေးယူမယ်ဆိုပြီး လိုက်ကြေညာတာတွေ ပြုလုပ်ခဲ့တယ်လို့ ဒေသခံတွေက ပြောပါတယ်။

နိုဝင်ဘာ ၂၂ ရက်ကလည်း ညောင်တုန်းမြို့က အထွေထွေအုပ်ချုပ်ရေးမှူးရုံးအပေါ် ဒရုန်း ၁ စင်း ပျံဝဲလာတာကြောင့် စစ်ကောင်စီတပ်သားတွေနဲ့ ရဲတွေက သေနတ်တွေနဲ့ လိုက်လံပစ်ခတ်ခဲ့တာ ရှိတယ်လို့ ဒေသခံတွေက ပြောပါတယ်။

5 days Ago
More News
Up