ဦးဝင်းမြင့်

December 30, 2022

နိုင်ငံတော်သမ္မတ ဦးဝင်းမြင့်နှင့် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ကို ထောင်ဒဏ် ၇ နှစ်စီ ထပ်မံချမှတ်

ရဟတ်ယာဉ်အမှုတွေအတွက် နိုင်ငံတော်သမ္မတ ဦးဝင်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ကို ဒီဇင်ဘာ ၃၀ ရက်နေ့က နေပြည်တော်အချုပ်ထောင်ရှိ အထူးသီးသန့်တရားရုံးက ထောင်ဒဏ် ၇ နှစ် စီအမိန့်ချလိုက်တယ်လို့ တရားရုံးနဲ့နီးစပ်တဲ့ အသိုင်းအဝိုင်းကနေ သိရပါတယ်။

၂၀၂၁ ခုနှစ်အတွင်းမှာ သဘာဝဘေးအန္တရာယ်ကာကွယ်ရေးလုပ်ငန်းတွေ ဆောင်ရွက်တာမှာ အသုံးပြုဖို့ ရဟတ်ယာဉ်တစီး ဝယ်ယူအသုံးပြုတာ၊ ငှားရမ်းတာ၊ သက်တမ်းတိုးတာ၊ ပြုပြင်ထိန်းသိမ်းတာတွေနဲ့ ပတ်သက်ပြီး စစ်ကောင်စီက နိုင်ငံတော်သမ္မတ ဦးဝင်းမြင့်၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ ဒေါက်တာဝင်းမြတ်အေးတို့ကို အဂတိလိုက်စားမှုတိုက်ဖျက်ရေးဥပဒေ ပုဒ်မ ၅၅ နဲ့ တရားစွဲဆိုထားတာ ဖြစ်ပါတယ်။

တရားရုံးနဲ့ နီးစပ်သူတဦးက “ရဟတ်ယာဉ်ငှားတာနဲ့ပတ်သက်တဲ့ အမှုသုံးမှုနဲ့ ပြုပြင်ထိန်းသိမ်းတဲ့တမှုအတွက် လေးမှုကို တမှု သုံးနှစ်စီချတယ်။ အဲဒါက တပေါင်းတည်း ကျခံရမှာ။ နောက် ရဟတ်ယာဉ်ဝယ်တဲ့အမှုကို လေးနှစ်ချလိုက်တယ်၊ အဲဒါသီးခြား။ အဲတော့ အားလုံး စုစုပေါင်း ၇ နှစ်ဖြစ်သွားတာပေါ့” လို့ ပြောပါတယ်။

ဒီအမှုနဲ့ပတ်သက်ပြီး စွဲဆိုခံထားရတဲ့ နိုင်ငံတော်သမ္မတ ဦးဝင်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့အနေနဲ့ ထောင်ဒဏ် ၇ နှစ် ကျခံရမှာ ဖြစ်ပါတယ်။

ဒီရဟတ်ယာဉ်ဝယ်ယူတာ၊ ငှားရမ်းတာ၊ ပြုပြင်ထိန်းသိမ်းတာတွေနဲ့ ပတ်သက်လို့ အာဏာသိမ်းစစ်ကောင်စီက အဂတိလိုက်စားမှုတိုက်ဖျက်ရေး ဥပဒေပုဒ်မတွေနဲ့ စွပ်စွဲတရားစွဲဆိုထားပေမဲ့ စွပ်စွဲခံရသူတွေဖြစ်တဲ့ နိုင်ငံတော်သမ္မတ ဦးဝင်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ကတော့ လုပ်ထုံးလုပ်နည်းတွေနဲ့ အညီပဲ ဆောင်ရွက်ဖို့ ညွှန်ကြားခဲ့တယ်လို့ ထွက်ဆိုထားပါတယ်။

အခုအမိန့်ချလိုက်တဲ့အမှုဟာ နိုင်ငံ့ခေါင်းဆောင်တွေအပေါ် စွဲဆိုထားတဲ့အားလုံးထဲမှာ နောက်ဆုံး အမိန့်ချတဲ့အမှုဖြစ်ပြီး နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အနေနဲ့ စစ်ကောင်စီစွဲဆိုထားတဲ့ အမှု ၁၉ မှုအတွက် ကျခံရမယ့်ထောင်ဒဏ်ဟာ စုစုပေါင်း ၃၃ နှစ် ဖြစ်ပါတယ်။

နိုင်ငံတော်သမ္မတ ဦးဝင်းမြင့်နဲ့ နိုင်ငံတော်အတိုင်ပင်ခံ ဒေါ်အောင်ဆန်းစုကြည်တို့အပေါ် အမိန့်ချပြီးသားအမှုတွေကိုလည်း ပြည်ထောင်စုတရားလွှတ်တော်ချုပ်ကို အယူခံတင်ထားတယ်လို့ သိရပါတယ်။

1 month Ago

May 13, 2022

နိုင်ငံခေါင်းဆောင်များအပေါ် စွဲဆိုထားသည့် ရွေးကောက်ပွဲအမှု လိုပြသက်သေအချို့ ပယ်ချခံရ

နိုင်ငံတော်သမ္မတနဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အပေါ် စစ်ကောင်စီက စွဲဆိုထားတဲ့ ရွေးကောက်ပွဲအမှုနဲ့ပတ်သက်ပြီး မေ ၁၃ ရက်က ဆက်လက်ရုံးထုတ် စစ်ဆေးခဲ့တယ်လို့ တရားရုံးနဲ့နီးစပ်တဲ့ အသိုင်းအဝိုင်းကနေ သိရပါတယ်။

ဒီအမှုမှာ လိုပြသက်သေ အယောက် ၂၀ ရှိပြီး လိုပြသက်သေတွေကို ဧပြီ ၁၈ ရက်နေ့ အပြီးစစ်ဖို့ CMP နဲ့ ဆုံးဖြတ်ထားတာ ဖြစ်ပါတယ်။

ဧပြီ ၂၅ ရက်မှာ စွဲချက်လျှောက်လဲချက်တင်ပြီး မေ ၂ ရက်မှာ စွဲချက်အမိန့်ချဖို့ တရားရုံးက ဆုံးဖြတ်ထားတာဖြစ်ပါတယ်။ စွဲချက်တင်ရင် စွပ်စွဲခံရသူတွေဘက်က CMP ထပ်လုပ်မှာ ဖြစ်ပါတယ်။

ဒီအမှုနဲ့ပတ်သက်ပြီး လက်ရှိအချိန်ထိ တရားလိုပြသက်သေ ၉ ဦးထိ စစ်ဆေးပြီးဖြစ်ပေမဲ့ ဒီနေ့ရုံးချိန်းမှာ အမှုနဲ့ပတ်သက်တဲ့ ကျန်မစစ်ရသေးတဲ့ တရားလိုပြသက်သေတွေကို ပယ်ချလိုက်တယ်လို့ တရားရုံးနဲ့နီးစပ်သူက ပြောပါတယ်။

အခုလို တရားလိုပြသက်သေတွေ ပယ်လိုက်တဲ့အတွက် နောက်ရုံးချိန်းဖြစ်တဲ့ မေ ၂၇ ရက် ရုံးချိန်းမှာ စွဲချက် တင်သင့် မတင်သင့် လျှောက်လဲချက်ပေးမယ်လို့လည်း ဆိုပါတယ်။

၂၀၂၀ ပြည့်နှစ် အထွေထွေရွေးကောက်ပွဲမှာ နိုင်ငံတော်သမ္မတ ဦးဝင်းမြင့်၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ ပြည်ထောင်စုအစိုးရအဖွဲ့ရုံး ဝန်ကြီးဌာန ပြည်ထောင်စုဝန်ကြီး ဦးမင်းသူတို့က ပြည်ထောင်စုရွေးကောက်ပွဲ ကော်မရှင်အပေါ်မှာ မလျော်သြဇာ လွှမ်းမိုးခဲ့တယ်ဆိုပြီး ရာဇသတ်ကြီးပုဒ်မ ၁၃၀-က နဲ့ စွဲဆိုထားတဲ့အမှု ဖြစ်ပါတယ်။

၂၀၂၀ ပြည့်နှစ်အထွေထွေရွေးကောက်ပွဲမှာ NLD ပါတီက ကြံ့ခိုင်ရေးပါတီကို အပြတ်အသတ် အနိုင်ရပြီးနောက်မှာ စစ်တပ်က နိုင်ငံခေါင်းဆောင်တွေကို ဥပဒေနဲ့မညီဘဲ ဖမ်းဆီး အာဏာသိမ်းခဲ့ပြီး နောက်ပိုင်းမှာ စွပ်စွဲချက်အမျိုးမျိုးနဲ့ အမှုဖွင့် တရားစွဲနေတာ ဖြစ်ပါတယ်။

9 months Ago
More News
Up