အကြမ်းဖက်အဖွဲ့အစည်းတွေနဲ့ပတ်သက်လို့ သံသယရှိသူတွေကို အစိုးရနဲ့ တပ်မတော်တို့က ဥပဒေအရ စစ်ဆေးအရေးယူနေတာ ဖြစ်ပြီး သုံ့ပန်းလို့ ခေါ်ဆိုတာ လက်မခံနိုင်ကြောင်း သမ္မတရုံး ညွှန်ကြားရေးမှူးချုပ် ဦးဇော်ဌေးက ပြောလိုက်ပါတယ်။
နိုဝင်ဘာ ၁၀ ရက်နေ့ နိုင်ငံတော်သမ္မတရုံးရဲ့ ပုံမှန်သတင်းစာရှင်းလင်းပွဲမှာ ဦးဇော်ဌေးက အေအေအဖွဲ့ရဲ့ သုံ့ပန်းလို့ ပြောဆိုသုံးနှုန်းတာနဲ့ပတ်သက်လို့ ပြောဆိုလိုက်တာပါ။
“အစိုးရဘက်က၊ တပ်မတော်ဘက်က စစ်ဆေးအရေးယူနေတာတွေက သုံ့ပန်းမဟုတ်ပါဘူး။ သံသယရှိသူတွေကို ဥပဒေနဲ့အညီ လုပ်နေတာပါ။ ဒီလိုဥပဒေနဲ့အညီ လုပ်နေတာတွေကို သုံ့ပန်းလို့ ခေါ်ရင် လက်မခံဘူး။”
အခုလထဲမှာ အေအေအဖွဲ့က သူတို့ ဖမ်းထားတဲ့ လူတွေကို တပ်မတော်က ဖမ်းထားသူတွေနဲ့ သုံ့ပန်းချင်း လဲမယ်ဆိုတဲ့ ကြေညာချက်ကို ထုတ်ပြန်ထားပါတယ်။
အဲဒီအပေါ်မှာတော့ ဦးဇော်ဌေးက အဓိပ္ပာယ်မရှိတဲ့ တောင်းဆိုချက် ဖြစ်တယ်လို့လည်း မှတ်ချက်ပြု ပြောဆိုလိုက်ပါတယ်။
အခုလို အေအေရဲ့ ကြေညာချက် ထွက်လာအပြီးမှာ အကြမ်းဖက်အဖွဲ့အစည်းတွေနဲ့ ညှိနှိုင်းဆွေးနွေးမှာ မဟုတ်ဘူးလို့ တပ်မတော်ဘက်က အတိအလင်း ပြောဆိုခဲ့ပါတယ်။
လတ်တလောမှာ အေအေဘက်က အမျိုးသားလွှတ်တော်ကိုယ်စားလှယ်ကို ဦးဝှေ့တင်း အပါအဝင် တပ်မတော်သားတွေ၊ ရဲတပ်ဖွဲ့ဝင်တွေ၊ နိုင်ငံဝန်ထမ်းတွေကို ဖမ်းဆီးထားပါတယ်။
“ဒါဟာ မမှန်ကန်တဲ့ လုပ်ရပ်ပေါ့။ ဆိုမာလီယားပင်လယ်ဓားပြတွေရဲ့ လုပ်ရပ်သဘောမျိုး ဖြစ်တယ်။ ဒါဟာ တိုင်းရင်းသားအခွင့်အရေး တောင်းဆိုတာ မဟုတ်ဘူး”လို့ ဦးဇော်ဌေးက ဆိုပါတယ်။
ဒါ့အပြင် ရခိုင်ပြည်နယ်မှာ အေအေအဖွဲ့တွေ စပြီး လှုပ်ရှားလာတဲ့အချိန် သောင်းကျန်းသူ နှိမ်နင်းရေးစစ်ဆင်ရေးကို တပ်မတော်ဘက်က ထိထိရောက်ရောက် ဆောင်ရွက်ဖို့ အစိုးရက ညွှန်ကြားထားတယ်လို့ သူက အသိပေး ပြောဆိုခဲ့ပါတယ်။
အစိုးရအနေနဲ့ ဖမ်းဆီးခံထားရသူတွေရဲ့ လုံခြုံရေးအတွက် စိုးရိမ်နေပြီး အမြန်ဆုံးလွှတ်ဖို့ ဆောင်ရွက်ရာမှာ အေအေအဖွဲ့နဲ့ ဆွေးနွေးတာတွေ၊ ငြိမ်းချမ်းရေးကော်မရှင်ကတဆင့် ပြန်လွှတ်ပေးဖို့ ပြောဆိုထားတာတွေ၊ အေအေအပေါ် ဩဇာလွှမ်းတဲ့ အဖွဲ့အစည်း၊ လူပုဂ္ဂိုလ်တွေက တဆင့်ပြောဆိုထားတာတွေ ရှိတယ်လို့ ဦးဇော်ဌေးက ပြောပါတယ်။
တိုက်ပွဲတွေ ဖြစ်နေပေမယ့် တဖက်မှာ ဆွေးနွေးပွဲတွေကို လုပ်မှာဖြစ်ပေမယ့် လက်နက်ကိုင် ၄ ဖွဲ့အနေနဲ့ ငြိမ်းချမ်းရေး တကယ် လိုချင်သလား၊ အသိအမှတ်ပြုရင် ဘယ်ကို သွားချင်တာလဲ ရှင်းရှင်းလင်းလင်း သေချာသိမှ တရားဝင် ဆွေးနွေးမယ်လို့ ပြောဆိုခဲ့ပါတယ်။
3 years Ago
