ဦးဇော်ဌေး

May 23, 2022

သမ္မတရုံးညွှန်ချုပ်ဟောင်း ဦးဇော်ဌေး နှလုံးရောဂါဖြင့် ရုတ်တရက် ကွယ်လွန်

သမ္မတရုံးပြောခွင့်ရပုဂ္ဂိုလ်နဲ့ ညွှန်ကြားရေးမှူးချုပ်ဟောင်း ဦးဇော်ဌေး အသက် ၅၀ နှစ်ဟာ မေ ၂၃ ရက် ဒီနေ့မနက်က နှလုံးရောဂါနဲ့ ကွယ်လွန်သွားတယ်လို့ သူနဲ့နီးစပ်တဲ့ အသိုက်အဝန်းက သိရပါတယ်။

ဦးဇော်ဌေးဟာ နေအိမ်မှာ ဒီမနေ့ မနက် ၉ နာရီ ၁၅ မိနစ်လောက်က Heart Attack ဖြစ်လို့ ဆေးရုံသွားတာ လမ်းမှာတင် ဆုံးသွားတယ်လို့ သူနဲ့နီးစပ်သူတဦးက ပြောပါတယ်။

ဦးဇော်ဌေးဟာ သမ္မတဦးသိန်းစိန်လက်ထက် ၂၀၁၁ ခုနှစ်ကနေ ၂၀၁၆ ခုအထိ  သမ္မတရုံး ပြောရေးဆိုခွင့်ရှိသူအဖြစ် တာဝန်ယူခဲ့သလို အန်အယ်လ်ဒီအစိုးရကာလ သမ္မတဦးထင်ကျော်နဲ့ ဦးဝင်းမြင့်တို့ လက်ထက်မှာလည်း နိုင်ငံတော်သမ္မတရုံးနဲ့  နိုင်ငံတော်အတိုင်ပင်ခံပုဂ္ဂိုလ်ရုံး ညွှန်ကြားရေးမှူးချုပ်နဲ့  သမ္မတရုံးပြောရေးဆိုခွင့်ရှိသူအဖြစ် တာဝန်ယူခဲ့ပါတယ်။

၂၀၂၁ ဖေဖော်ဝါရီ ၁ ရက်နေ့ စစ်တပ်အာဏာသိမ်းချိန်မှာ ထိန်းသိမ်းခံခဲ့ရပြီးနောက် ၂၀၂၁ ခုနှစ် ဇွန်လမှာ  ပြန်လည်လွတ်မြောက်လာခဲ့သူ ဖြစ်ပါတယ်။ 

ဦးဇော်ဌေးဟာ စစ်တက္ကသိုလ် အပတ်စဉ် ၃၇ ဆင်းဖြစ်ပြီး တပ်မတော်မှာ ဗိုလ်မှူးအဆင့်အထိ တာဝန်ထမ်းဆောင်ခဲ့သူလည်း ဖြစ်ပါတယ်။

စစ်အစိုးရလက်ထက် ကွယ်လွန်သူ ဝန်ကြီးချုပ်ဟောင်း ဗိုလ်ချုပ်ကြီး စိုးဝင်း လက်အောက်က ဝန်ကြီးချုပ်ရုံးမှာလုပ်ကိုင်ခဲ့ပြီး ဗိုလ်ချုပ်ကြီးစိုးဝင်းကွယ်လွန်ပြီးနောက် ၂၀၀၇ ခုနှစ်မှာ စစ်ဘက်ကနေ အငြိမ်းစားယူခဲ့ပါတယ် ။

၂၀၁၀ ရွေးကောက်ပွဲကနေ တက်လာတဲ့ ဦးသိန်းစိန်ဦးဆောင်တဲ့ ကြံ့ခိုင်ရေးပါတီ အစိုးရလက်ထက်  ၂၀၁၁ ခုနှစ်က ဝန်ကြီးချုပ်ရုံးကို ဖျက်သိမ်းပြီး နိုင်ငံတော်သမ္မတရုံး ပေါ်ပေါက်လာတဲ့အခါ ဦးဇော်ဌေးဟာ နိုင်ငံတော်သမ္မတရုံးရဲ့ ညွှန်ကြားရေးမှူးတာဝန်နဲ့ နိုင်ငံတော်သမ္မတရဲ့ ပြောရေးဆိုခွင့်ရှိသူ ဖြစ်လာခဲ့ပါတယ်။

၂၀၁၆ ခုနှစ် အန်အယ်ဒီအစိုးရတက်လာချိန်မှာတော့ ဦးဇော်ဌေးဟာ ဒုတိယညွှန်ကြားရေးမှူးချုပ်၊ နိုင်ငံတော်အတိုင်ပင်ခံရုံးဝန်ကြီးဌာနရှိ ပြည်​ထောင်စုငြိမ်းချမ်း​ရေး​ ဖော်​ဆောင်​ရေးဦးစီးဌာနမှာ  ညွှန်ကြားရေးမှူးချုပ် ခန့်အပ်ခြင်း ခံခဲ့ရသလို အစိုးရအဖွဲ့ ပြောခွင့်ရှိသူအဖြစ်လည်း နိုင်ငံတော်သမ္မတ အိမ်တော်သတင်းစာရှင်းလင်းပွဲတွေကို  ဦးဆောင်ကျင်းပခဲ့ပါတယ်။

ဦးဇော်ဌေးဟာ မှူးဇော်ဆိုတဲ့ ကလောင်နာမည်နဲ့ လူမှုကွန်ရက်ဖေ့စ်ဘွတ်ခ်မှာလည်း ဆောင်းပါးတွေ ရေးသားခဲ့ပါတယ်။

6 months Ago

January 9, 2021

ရွေးကောက်ပွဲရလဒ် လက်မခံသူများ ကိုယ့်နိုင်ငံရေး ကိုယ်ပြန်သတ်နေခြင်းဖြစ်ဟု ဦးဇော်ဌေးပြော

နိုဝင်ဘာ ၈ ရက် ရွေးကောက်ပွဲရလဒ်နဲ့ ပတ်သက်ပြီး လက်သင့်မခံနိုင်ဘဲ ပြစ်တင်ဝေဖန်နေသူတွေဟာ ကိုယ့်နိုင်ငံရေး ကိုယ်ပြန်သတ်နေခြင်းသာဖြစ်တယ်လို့ သမ္မတရုံးပြောရေးဆိုခွင့်ရှိသူ ဦးဇော်ဌေးက ပြောတာပါ။ 

ဇန်နဝါရီ ၈ ရက်က ပြုလုပ်တဲ့ သမ္မတအိမ်တော်သတင်းစာရှင်းလင်းပွဲမှာ ပြောကြားခဲ့တာဖြစ်ပါတယ်။

“၁၉၉၀ ရွေးကောက်ပွဲ၊ ၂၀၁၅ ရွေးကောက်ပွဲ၊ အခုပြီးခဲ့တဲ့ ၂၀၂၀ ရွေးကောက်ပွဲ နေရာတိုင်း အပြတ်အသတ်နိုင်ပါတယ်။ လူထုရဲ့သဘောထား၊ လူထုရဲ့ ထောက်ခံမှုက ဒီတိုင်းပဲ ရှိနေပါတယ်။ ဒါကိုကြည့်ရှင် ရှင်းပါတယ်။ အဲတော့ ကျနော်ပြောချင်တာက မဟုတ်မမှန် ဝေဖန်ပြောကြားနေတာ၊ လုပ်နေတဲ့အဖွဲ့အစည်းတွေ၊ လူပုဂ္ဂိုလ်တွေအနေနဲ့ ပြောရရင် ကိုယ့်နိုင်ငံရေးကို ကိုယ်ပြန်သတ်တဲ့ Political Suicide ပေါ့နော်၊ နိုင်ငံရေး ဆွဲကြိုးချသလို ဖြစ်လိမ့်မယ့်လို့ ကျနော်ရှင်းရှင်းလင်းလင်း ပြောချင်ပါတယ်။”

လက်ရှိအာဏာရပါတီ အန်အယ်လ်ဒီပါတီပဲ ထပ်မံအနိုင်ရရှိခဲ့တဲ့ ရွေးကောက်ပွဲရလဒ်အပေါ် အတိုက်အခံကြံ့ခိုင်ရေးပါတီ အပါအဝင် နိုင်ငံရေးပါတီအချို့က ဝေဖန်မှုတွေပြုလုပ်နေကြသလို တပ်မတော်ကလည်း ရွေးကောက်ပွဲနဲ့ ပတ်သက်ပြီး လေ့လာ တွေ့ရှိချက်တွေကို အကြိမ်ကြိမ်ထုတ်ပြန်နေတာပါ။ 

ဒါ့အပြင် နိုင်ငံတော်သမ္မတ၊ နိုင်ငံတော်ရဲ့ အတိုင်ပင်ခံပုဂ္ဂိုလ်၊ တပ်မတော်ကာကွယ်ရေးဦးစီးချုပ်နဲ့ ရွေးကောက်ပွဲကော်မရှင် ဥက္ကဋ္ဌတို့အပေါ် စာချွန်လွှာထုတ်ဖို့ တရားလွှတ်တောချုပ်မှာ အမျိုးသားရေးရှေ့နေဦးဇော်ဝိတ်က လျှောက်ထားခဲ့မှုနဲ့ပတ်သက်ပြီးလည်း သမ္မတ၊ အတိုင်ပင်ခံပုဂ္ဂိုလ်တို့ဟာ ဥပဒေနဲ့အညီ ဆောင်ရွက်ခဲ့ခြင်းသာဖြစ်တယ်လို့လည်း ဦးဇော်ဌေးက ပြောပါတယ်။

“ဖွဲ့စည်းပုံအခြေခံဥပဒေပုဒ်မ ၂၁၅၊ ပြီးရင် ပြည်ထောင်စုအစိုးရအဖွဲ့ဥပဒေ ပုဒ်မ ၄၃ မှာ နိုင်ငံတော်သမ္မတဟာ ဖွဲ့စည်းပုံအခြေခံဥပဒေအရ လည်းကောင်း၊ ဥပဒေတစ်ရပ်ရပ်အရလည်းကောင်း မိမိအားအပ်နှင်းထားသည့်တာဝန်နှင့် လုပ်ပိုင်ခွင့်များကို ကျင့်သုံးဆောင်ရွက်မှု သို့မဟုတ် ကျင့်သုံးဆောင်ရွက်သည့်အနေဖြင့် ပြုခဲ့သော ပြုလုပ်မှုအတွက် မည်သည့်လွှတ်တော်၊ မည်သည့်တရားရုံးတွင် မျှဖြေရှင်းရန် တာဝန်မရှိကြောင်း ပြဋ္ဌာန်းထားတာလည်း တွေ့ရှိနိုင်ပါတယ်။ ပြန်ချုပ်ရရင် နိုင်ငံတော်သမ္မတကြီးရော၊ နိုင်ငံတော်အတိုင်ပင်ပုဂ္ဂိုလ်ရော ဥပဒေနဲ့အညီ လုပ်ကိုင်ဆောင်ရွက်ခဲ့တာဖြစ်တယ်။ ဥပဒေနဲ့မညီညွတ်တာ ဘာတစ်ခုမျှလုပ်ခဲ့တာမရှိဘူး။ ပြည်သူတွေကိုလည်း ကျနော်တို့ အထင်အရှားပေါ့၊ မီဒီယာတွေကနေတဆင့် ဒီနေရာကနေ ရှင်းရှင်းလင်းလင်း အသိပေးလိုပါတယ်။

နိုင်ငံတော်သမ္မတဦးဝင်းမြင့်၊ အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်တို့ အပါအဝင် ၄ ဦးကို စာချွန်လွှာထုတ်ဖို့ ကိစ္စရပ်ကို တရားလွှတ်တော်ချုပ်အနေနဲ့ လက်ခံဖို့ သင့်မသင့်ကိုတော့ လာမယ့် ဇန်နဝါရီ ၂၉ ရက်မှာ ဆုံးဖြတ်မှာလည်း ဖြစ်ပါတယ်။ 

2 years Ago
More News
Up