ဥရုဂွေး

June 25, 2019

ချီလီကို အနိုင်ယူပြီး ဥရုဂွေးအသင်း ကိုပါအမေရိကဖလား ကွာတားတက် (ရုပ်သံ)

ကိုပါအမေရိကဖလား အုပ်စု စီ နောက်ဆုံးပွဲစဉ်အဖြစ် လက်ရှိချန်ပီယံ ချီလီနဲ့ နာမည်ကြီး ဥရုဂွေးတို့ ဒီနေ့မနက် အစောပိုင်းက ယှဉ်ပြိုင်ရာ ဥရုဂွေးက တဂိုး ဂိုးမရှိနဲ့ အနိုင်ရသွားပါတယ်။ ဂျပန်နဲ့ အုပ်စုဒုတိယပွဲစဉ်မှာ သရေကျပြီး အမှတ်လျော့ခဲ့တဲ့ ဥရုဂွေးအသင်းဟာ ဒီပွဲမှာ အနိုင်ရဖို့အတွက် အဓိက တိုက်စစ်အတွဲ ဆွာရက်ဇ်၊ ကာဗာနီတို့နဲ့ ပွဲထွက်ခဲ့သလို ချီလီအသင်းကလည်း ဆန်းချက်ဇ်၊ ဗားဂတ်စ် တိုက်စစ်အတွဲ အသုံးပြုသွားပါတယ်။ ဒီပွဲမှာ ချီလီအသင်းက ဘောလုံးပိုင်ဆိုင်မှု အနည်းငယ် အသာရခဲ့ပြီး ထိုးဖောက်ကန်သွင်းခွင့်မှာတော့ နှစ်သင်း မတိမ်းမယိမ်း ရှိခဲ့ပါတယ်။ ပထမပိုင်းမှာ တဖက်နဲ့တဖက် ဂိုးမသွင်းနိုင်ဘဲ သရေကျနေခဲ့ပြီး ဥရုဂွေးအသင်းအတွက် တလုံးတည်းသော အနိုင်ဂိုးကိုတော့ ပွဲချိန် ၈၂ မိနစ်မှာ တိုက်စစ်မှူး ကာဗာနီက ခေါင်းတိုက်ပြီး သွင်းယူပေးခဲ့ပါတယ်။ ဒီနေ့မနက် အစောပိုင်းမှာပဲ ယှဉ်ပြိုင်ခဲ့တဲ့ အုပ်စု စီက အီကွေဒေါနဲ့ ဂျပန်အသင်း ပွဲစဉ်မှာတော့ တဖက်တဂိုးစီ သရေကျသွားပါတယ်။ အုပ်စု ပွဲစဉ်တွေ အပြီးမှာတော့ ဥရုဂွေးက ရမှတ် ၇ မှတ်နဲ့ အုပ်စု ပထမ၊ ချီလီက ၆ မှတ်နဲ့ ဒုတိယ၊ ဂျပန်အသင်းက ၂ မှတ်နဲ့ တတိယ၊ အီကွေဒေါက ၁ မှတ်နဲ့ စတုတ္ထနေရာမှာ အသီးသီး ရပ်တည်နိုင်ခဲ့ပါတယ်။ ကိုပါအမေရိကဖလားပြိုင်ပွဲ အုပ်စုပွဲစဉ်တွေ အပြီးမှာတော့ အုပ်စု တခုစီက ပထမနဲ့ ဒုတိယ နှစ်သင်းစီနဲ့ အကောင်းဆုံး အုပ်စုတတိယ အသင်းနှစ်သင်း ကွာတားဖိုင်နယ်ကို တက်ရောက်သွားပါတယ်။ ဒါကြောင့် အုပ်စု အေ က ဘရာဇီး၊ ဗင်နီဇွဲလားနဲ့ ပီရူး၊ အုပ်စု ဘီ က ကိုလံဘီယာ၊ အာဂျင်တီးနားနဲ့ ပါရာဂွေး၊ အုပ်စု စီ က ဥရုဂွေး၊ ချီလီတို့ ကွာတားဖိုင်နယ် တက်ရောက်သွားပါတယ်။ အုပ်စု စီ က တတိယရတဲ့ ဂျပန်အသင်းဟာ ပါရာဂွေးနဲ့ ရမှတ် ၂ မှတ်စီ တူနေပေမယ့် ဂိုးကွာခြားချက်ကြောင့် အကောင်းဆုံး တတိယအသင်းထဲ မပါဘဲ အုပ်စုအဆင့်ကနေ လှည့်ပြန်သွားရပါတယ်။
2 years Ago

June 21, 2019

ကိုပါအမေရိကဖလားတွင် ဥရုဂွေးနှင့် ဂျပန် ၂ ဂိုးစီသရေကျ (ရုပ်သံ)

ကိုပါအမေရိကဖလား အုပ်စု စီ ဒုတိယပွဲစဉ်အဖြစ် နာမည်ကြီး ဥရုဂွေးအသင်းနဲ့ ဒီနှစ်မှ ဖိတ်ခေါ်ထားတဲ့ အာရှထိပ်သီး ဂျပန်အသင်းတို့ ဒီနေ့အစောပိုင်းက ယှဉ်ပြိုင်ရာ တဖက် နှစ်ဂိုးစီ သရေကျသွားပါတယ်။ ဒီနှစ်ပြိုင်ပွဲမှာ ဗိုလ်စွဲဖို့ရေပန်းစားတဲ့အထဲ ပါဝင်နေတဲ့ ဥရုဂွေးအသင်းဟာ တိုက်စစ်မှူး ဆွာရက်ဇ်၊ ကာဗာနီတို့နဲ့အတူ ဂိုဒင်၊ ဂျီမီနက်ဇ်၊ တော်ရဲယားတို့ ဦးဆောင်ပြီး ပွဲထွက်ခဲ့ပါတယ်။ ဂျပန်အသင်းကလည်း အဓိကဂိုးသမား ကာဝါရှီးမားနဲ့အတူ အိုကာဇာကီ၊ မီယိုရှီ၊ နာကာဂျီးမား၊ အူအီဒါ စတဲ့ ကစားသမားတွေ အသုံးပြုသွားပါတယ်။ ဒီပွဲမှာ ဂျပန်အသင်းရဲ့ အမှတ်မထင် တိုက်စစ်ဆင် ရုန်းကန်မှုကြောင့် ဥရုဂွေးအသင်း အခက်တွေ့ခဲ့ပြီး ဦးဆောင်ဂိုးတွေ ပေးခဲ့ရပြီးမှ ပြန်ချေပနိုင်ခဲ့တာပါ။ ဒါ့အပြင် ဂျပန်ဂိုးသမားရဲ့ လက်စွမ်းပြ ကာကွယ်နိုင်တာကြောင့်လည်း ဥရုဂွေး နိုင်ပွဲနဲ့ ဝေးခဲ့ရတာပါ။ ဂျပန်အတွက် ဦးဆောင်ဂိုးတွေကို တိုက်စစ်မှူး မီယိုရှီ တဦးတည်းက ပွဲချိန် ၂၅ မိနစ်နဲ့ ၅၉ မိနစ်တွေမှာ သွင်းယူပေးခဲ့ပါတယ်။ ဥရုဂွေးအတွက် ချေပဂိုးတွေကိုတော့ ပွဲချိန် ၃၂ မိနစ်မှာ ပယ်နယ်တီကတဆင့် တိုက်စစ်မှူး ဆွာရက်ဇ်နဲ့ ၆၆ မိနစ်မှာ ဂျီမီနက်ဇ်တို့က သွင်းယူပေးခဲ့ပါတယ်။ ဥရုဂွေးအသင်းဟာ အုပ်စု စီမှာ နှစ်ပွဲကစားအပြီး ရမှတ် လေးမှတ်နဲ့ ထိပ်ဆုံးက ဦးဆောင်နေသလို ဂျပန်အသင်းကတော့ နှစ်ပွဲကစား တမှတ်ပဲရသေးပြီး အဆင့် ၃ မှာ ရပ်တည်နေပါတယ်။
2 years Ago
More News
Up