ဦးထွန်းထွန်းဟိန်

May 10, 2019

လွှတ်တေ်ာအစည်းအဝေးတွင် မေးခွန်းအချို့ မပါလာခြင်း ဥက္ကဋ္ဌ၏ ဆုံးဖြတ်ချက်ဖြစ်ဟုဆို

“တပ်မတော်သည် အစိုးရလက်အောက်တွင် ရှိ/မရှိ” မေးခွန်း လွှတ်တော်အစည်းအဝေးမှာ ပါမလာတာဟာ ဥက္ကဋ္ဌရဲ့ ဆုံးဖြတ်ချက် ဖြစ်တယ်လို့ ပြည်သူ့လွှတ်တော် ဒုတိယဥက္ကဋ္ဌ ဦးထွန်းထွန်းဟိန်က ပြောပါတယ်။ မေလ ၁၀ ရက်နေ့ ကျင်းပမယ့် ပြည်သူ့လွှတ်တော်အစည်းအဝေးအစီစဉ်ကို မေလ ၉ ရက်နေ့ ညနေပိုင်းမှာ ကြိုတင်ထုတ်ပြန်ခဲ့ပါတယ်။ အဲဒီထုတ်ပြန်ချက်ထဲမှာ “တပ်မတော်သည် ပြည်ထောင်စု အစိုးရရဲ့ ဦးဆောင်မှုအောက်တွင် ရှိမရှိနှင့် အစိုးရနှင့် တိုင်းရင်းသားလက်နက်ကိုင် အဖွဲ့အစည်းတွေအကြား ပရိပက္ခများ ဖြစ်ပွားခဲ့ခြင်း ရှိမရှိ” သိရှိလိုတဲ့ မေးခွန်းပါဝင်ခဲ့ပေမယ့် အမှန်တကယ် လွှတ်တော်ကျင်းပချိန်မှာတော့ ပါဝင်ခြင်းမရှိခဲ့ပါဘူး။ ဒီအခြေအနေနဲ့ ပတ်သက်ပြီး သတင်းမီဒီယာတွေက လွှတ်တော်ဒုဥက္ကဋ္ဌ ဦးထွန်းထွန်းဟိန်ကို လွှတ်တော်အစည်းအဝေးပြီးဆုံးချိန်တွင် တွေ့ဆုံမေးမြန်းခဲ့ရာမှာတော့ လွှတ်တော်ဥက္ကဋ္ဌရဲ့ ဆုံးဖြတ်ချက်ဖြစ်တယ်လို့ ပြန်လည်ဖြေဆိုခဲ့ပါတယ်။ “အဲတာက ဥက္ကဋ္ဌက ဆုံးဖြတ်ရတဲ့ကိစ္စပါ။ အန်ကယ်တို့ ဆုံးဖြတ်ရတဲ့ ကိစ္စမဟုတ်ပါဘူး။ ဥက္ကဋ္ဌ ဆုံးဖြတ်ချက်အရ မပါတာ။ လျှာထားချက်ဆိုတာက လျှာထားချက်တွေကတော့ အများကြီးရှိတာပေါ့။ မေးခွန်းတွေကလည်း အများကြီးရှိပါတယ်။ အဲတာကို ဒီနေ့ အာဂျန်တာမှာ ဘာထည့်မယ် ဘာမထည့်ဘူးဆိုတာကို ဥက္ကဋ္ဌရဲ့ ဆုံးဖြတ်ချက်ပဲ ဖြစ်ပါတယ်” လို့ ပြည်သူ့လွှတ်တော် ဒုတိယ ဥက္ကဋ္ဌ ဦးထွန်းထွန်းဟိန်က ပြောပါတယ်။ ပြီးခဲ့တဲ့ ရက်ပိုင်းအတွင်းကလည်း ရဲတပ်ဖွဲ့နဲ့ သက်ဆိုင်တဲ့ အဆိုတခုအား အလားတူ လွှတ်တော်အစည်းအဝေး အစီစဉ် လျှာထားချက်မှာ ထည့်သွင်းဖော်ပြခဲ့ပြီး အစည်းအဝေး ကျင်းပချိန်မှာတော့ ပါဝင်ခြင်းမရှိခဲ့တဲ့ ဖြစ်စဉ်တခုလည်း ဖြစ်ပွားခဲ့ပါတယ်။ ဒီဖြစ်စဉ်တွေအပေါ်မှာတော့ အမျိုးမျိုးသုံးသပ်ချက်တွေရှိနေခဲ့ပြီး ကိုယ်စားလှယ်အချို့ရဲ့ အဆိုအရ တပ်မတော်နဲ့ ဆက်ဆံရေး ထိခိုက်မှုမရှိစေဖို့အတွက် အစည်းအဝေးလျှာထားချက်မှာ ပါဝင်ခဲ့ပေမယ့် အမှန်တကယ် အစည်းအဝေး ကျင်းပချိန် ပယ်ဖျက်ခဲ့တာ ဖြစ်နိုင်တယ်လို့ ဆိုပါတယ်။ လွှတ်တော်ကိုယ်စားလှယ်အချို့ကတော့ “တပ်မတော်သည် အစိုးရလက်အောက်တွင်ရှိ/မရှိ” မေးခွန်းသည် မေးမြန်းဖို့ မသင့်တော်သည့်မေးခွန်းအဖြစ် ရှုမြင်ကြပြီး မေးခွန်းအဖြစ် မေးမြန်းခွင့်ပြုလိုက်ပါက အစိုးရရဲ့ ဂုဏ်သိက္ခာ ထိခိုက်စေနိုင်တဲ့ မေးခွန်းမျိုးဖြစ်တယ်လို့ သုံးသပ်သူတွေလည်း ရှိနေပါတယ်။ အောင်ဆန်းဦး
2 years Ago

March 15, 2019

ဦးထွန်းထွန်းဟိန်နှင့် အမေရိကန်၊ နော်ဝေ သံအမတ်ကြီးတို့ လွှတ်တော်ဥပဒေပြုရေး ကိစ္စရပ်များ ဆွေးနွေး

ပြည်သူ့လွှတ်တော် ဒုတိယဥက္ကဋ္ဌ ဦးထွန်းထွန်းဟိန်ဟာ အမေရိကန်သံအမတ်ကြီး၊ နော်ဝေနိုင်ငံ သံအမတ်ကြီးတို့နဲ့ သီးခြားစီတွေ့ဆုံပြီး လွှတ်တော်ဥပဒေပြုရေးဆိုင်ရာ ကိစ္စရပ်တွေ ဆွေးနွေးခဲ့ပါတယ်။ ဦးထွန်းထွန်းဟိန်ဟာ မြန်မာနိုင်ငံဆိုင်ရာ အမေရိကန်နိုင်ငံ သံအမတ်ကြီး H.E.Mr. Scot Marciel၊ နော်ဝေနိုင်ငံ သံအမတ်ကြီး H.E. Mrs. Tone Tinnes တို့နဲ့ မတ် ၁၄ ရက် မနက်က နေပြည်တော်ရှိ လွှတ်တော်အဆောက်အဦ၊ ပြည်သူ့လွှတ်တော် ဒုတိယဥက္ကဋ္ဌရုံးခန်းမှာ သီးခြားစီ တွေ့ဆုံခဲ့တာလို့ ပြည်သူ့လွှတ်တေ်ာက သတင်းထုတ်ပြန်ပါတယ်။ အမေရိကန်နိုင်ငံ သံအမတ်ကြီးနဲ့ အဖွဲ့ကို တွေ့ဆုံရာမှာ နှစ်နိုင်ငံချစ်ကြည်ရင်းနှီးမှုနဲ့ သံတမန်ဆက်ဆံရေး ပိုမိုတိုးမြှင့်ရေး၊ ငြိမ်းချမ်းရေးနဲ့ ဖွံ့ဖြိုးရေး၊ မူးယစ်ဆေးဝါးအန္တရာယ် တားဆီးကာကွယ် ထိန်းချုပ်ရေးနဲ့ လွှတ်တော်ဥပဒေပြုရေးဆိုင်ရာ ကိစ္စရပ်တွေကို ဆွေးနွေးခဲ့ကြပါတယ်။ နော်ဝေနိုင်ငံ သံအမတ်ကြီးနဲ့ အဖွဲ့ကို တွေ့ဆုံပွဲမှာလည်း မြန်မာနိုင်ငံရဲ့ ပြည်တွင်းငြိမ်းချမ်းရေးနဲ့ ဒီမိုကရေစီ ပြုပြင်ပြောင်းလဲရေး လုပ်ငန်းတွေ အကူအညီပေးနေတဲ့ ကိစ္စရပ်တွေ၊ လွှတ်တော်မှာ ဆောင်ရွက်နေတဲ့ ဖွဲ့စည်းပုံအခြေခံဥပဒေ ပြင်ဆင်ရေးဆွဲရေးဆိုင်ရာ ကိစ္စရပ်တွေကို ဆွေးနွေးခဲ့တယ်လို့ ဆိုပါတယ်။ ဆွေးနွေးပွဲကို ပြည်သူ့လွှတ်တော် ဒုတိယဥက္ကဋ္ဌနဲ့အတူ ပြည်သူနဲ့ အမျိုးသားလွှတ်တော် ကိုယ်စားလှယ်တွေ၊ ပြည်သူ့လွှတ်တော်ရုံးက တာဝန်ရှိသူတွေ တက်ရောက်ခဲ့ကြပါတယ်။
2 years Ago
Up