ဥရုချောင်း

June 12, 2022

ဖားကန့်တွင် မိုးသည်းထန်၊ ဥရုချောင်းရေမြင့်တက်ပြီး ရေကြီး

ကချင်ပြည်နယ်၊ ဖားကန့်မြို့မှာ မိုးသည်းထန်စွာ ရက်ဆက်ရွာသွန်းတာကြောင့် ဥရုချောင်းရေ မြင့်တက်ပြီး ရပ်ကွက်တွေအတွင်း လူနေအိမ်တွေနဲ့ လမ်းတွေပေါ် ရေဝင်ရောက်နေတယ်လို့ ဒေသခံတွေက ပြောပါတယ်။ 

ဖားကန့်ဒေသအတွင်း အခုရက်ပိုင်း မိုးဆက်တိုက်ရွာသွန်းနေတာ ရက်သတ္တပတ်လောက် ရှိနေပြီဖြစ်ပြီး ဇွန် ၁၁ ရက် ညနေပိုင်းကစပြီး ရေကြီးလာခဲ့တယ်လို့  သိရပါတယ်။ 

ဒေသခံတစ်ဦးက "မြို့မရပ်ကွက်၊ ကျောက်ဝိုင်း၊ ငှက်ပျောတော့၊ မရှီကထောင်ဘက်တွေ ရေဝင်နေပြီ။ ကြိုးတံတားလည်း ရေထိနေပြီ။ နှစ်တိုင်း ရေကြီးနေတာ။ ရေဝင်တဲ့ လူနေရပ်ကွက်တချို့ကတော့ စပြောင်းနေကြပြီ။ မိုးကလည်း ဆက်တိုက်ရွာနေတုန်းပဲ" လို့ ပြောပါတယ်။ 

ကျောက်တူးဖော်တဲ့ ကုမ္ပဏီတွေ ဆယ်စုနှစ်ကျော်ကြာ စည်းမဲ့ကမ်းမဲ့ ကျောက်တူးဖော်တာ၊ မြေစာ တွေကို သတ်မှတ်တဲ့ နေရာမှာ မစွန့်ပစ်တာတွေကြောင့် သဘာဝဘေးအန္တရာယ်အမျိုးမျိုးနဲ့ ရင်ဆိုင်နေရတယ်လို့ ဒေသခံတွေက ပြောပါတယ်။ 

ကျောက်စိမ်းဥပဒေမှာ ဥရုချောင်းရဲ့ ဘေးပတ်လည် ပေ ၃၀၀မှာ မြေစာပုံ မပစ်ရဘူးလို့ ပါရှိပေမဲ့ ကျောက်တူးဖော်တဲ့ ကုမ္ပဏီတွေက စည်းကမ်း မလိုက်နာတာကြောင့် မိုးရွာသွန်းချိန်တိုင်း မြေစာပုံတွေ ချောင်းအတွင်း မျောပါလာပြီး မြစ်ကောလာကာ ရေကြီးရေလျှံ ပြသနာတွေ နှစ်စဉ် ကြုံတွေ့နေရတာ ဖြစ်ပါတယ်။ 

ရေကြီးရေလျှံမှုမှာ ဖားကန့်မြို့ပေါ်ရပ်ကွက်ဖြစ်တဲ့ လုံးခင်း၊ အေးမြသာယာ၊ ငှက်ပျောတော့နဲ့ မရှီကထောင် စတဲ့ ရပ်ကွက်ပြည်သူတွေက ရေဘေးဒဏ်ကို အများဆုံးကြုံတွေ့ခဲ့ရတာပါ။ 

ဥရုချောင်း ရေစီးရေလာကောင်းစေဖို့ နှစ်စဉ် ဖားကန့်မြို့ အနီး ဥရုချောင်း သန့်ရှင်းရေး ပြုလုပ်နေပေမဲ့ ရေကြီး ရေလျှံတာတွေ နှစ်စဉ် ဖြစ်ပေါ်နေဆဲလို့ ဒေသခံတွေက ပြောပါတယ်။

2 weeks Ago

January 20, 2022

ကျောက်စိမ်းတူးလုပ်ငန်းများက စည်းကမ်းမဲ့ မြေစာစွန့်ပစ်နေသဖြင့် ဥရုချောင်းအတွင်း ရွှံနွံများ ပိတ်နေ

ကချင်ပြည်နယ်၊ မိုးညှင်းခရိုင်၊ ဖားကန့်မြို့နယ် ဖားကန့်-လုံးခင်းရတနာနယ်မြေမှာ တရားမဝင်ကျောက်စိမ်းတူးဖော်ရေးလုပ်ငန်းတွေက စည်းမဲ့ကမ်းမဲ့ မြေစာသွန်မှုတွေကြောင့် ဥရုချောင်းအတွင်းကို ရွှံနွံတွေ စီးဝင်လာနေတယ်လို့  ဒေသခံတွေက ပြောပါတယ်။

ဆိပ်မူအုပ်စု မမုံကျေးရွာအနောက်မှာရှိတဲ့ လုပ်ကွက်ဟောင်းရေကန်ထဲကို  ဒေသအခေါ် YTT တောင်ကုန်းမှာ တရားမဝင်ကျောက်စိမ်းတူးသူလုငန်းရှင်တွေက မြေစာသွန်မှုကြောင့် ဥရုချောင်း အတွင်းကို ရွှံ့နွံတွေ စီးဝင်နေတာဖြစ်ပါတယ်။

အဲဒီလို စီးဝင်နေမှုကြောင့် ဥရုချောင်းရေစီးဆင်းမှု ပိတ်နေပြီး ဥရုချောင်းပေါ်မှာ ဆောက်လုပ်ထားတဲ့ ယာယီတံတားတွေဟာ ရေနစ်မြုပ်မဲ့အန္တရာယ်ကြုံနေရတယ်လို့ ဒေသခံတွေက ပြောပါတယ်။

မမုံ ကျေးရွာသားတဦးက "မြေကြီးနဲ့ရေနဲ့ရောထားတဲ့ အနယ်တွေဆိုတော့ စီးမသွားဘဲ ချောင်းကို ကန့်လန့်ဖြတ်ပိတ်လိုက်သလိုကြီးဖြစ်နေတယ်။ ချောင်းရေက နည်းနည်းရှိတာဆိုပေမဲ့ နွံကြောင့် ဖြတ်ပိတ်လိုက်သလို ဖြစ်နေပြီးရေက အပေါ်ဘက်ကို လျှံပြီး အိုင်နေပြီ။ ဒီပုံဆို တံတားတွေပါ မြုပ်သွားနိုင်တယ် "လို့ ပြောပါတယ်။

ဥရုချောင်းအတွင်းကိုအခုလို ရွှံနွံကနယ်တွေ စီးဝင်မှုကြောင့် မိုးရာသီမှာ ရေနစ်မြုပ်မှုအန္တရာယ်ကို ဒေသခံတွေက အထူးစိုးရိမ်နေကြပါတယ်။

အာဏာသိမ်းပြီးနောက်ပိုင်းမှာ  စက်ယန္တရား အမြောက်အမြားနဲ့ တရားမဝင်ကျောက်စိမ်းတူးဖော်မှု တွေကို စစ်ကောင်စီက ခွင့်ပြုခဲ့တာဖြစ်ပါတယ်။ 

တရားမဝင်ကျောက်စိမ်းတူးဖော်မှုတွေကြောင့် မြေပြိုမှုနဲ့ လူသေဆုံးမှုတွေ မကြာခဏ ဖြစ်ပေါ်ခဲ့ ပေမဲ့ လုပ်ဆောင်မှုတွေ လျော့မသွားတဲ့အပြင် ပိုပြီးတိုးလာနေတယ်လို့ ဒေသခံတွေက ပြောပါတယ်။

5 months Ago
More News
Up