အေးသာယာ

September 8, 2021

အောင်ပန်း၊ အေးသာယာ၊ ရွှေညောင်၊ တောင်ကြီး PDF ၄ ဖွဲ့ပူးပေါင်း

ဘုံရန်သူဖြစ်တဲ့ အကြမ်းဖက်စစ်တပ်နဲ့ နောက်လိုက်လက်ပါးစေတွေကို တော်လှန်သွားဖို့ အောင်ပန်း၊ အေးသာယာ၊ ရွှေညောင်၊ တောင်ကြီး မြို့ ပြည်သူ့ကာကွယ်ရေးတပ်ဖွဲ့ ၄ ဖွဲ့ ပူးပေါင်းလိုက်တယ်လို့ ဒီကနေ့ စက်တင်ဘာ ၈ ရက်မှာ ကြေညာပါတယ်။

ညီနောင်မဟာမိတ် ၄ ဖွဲ့အနေနဲ့ နွေဦးတော်လှန်ရေး ရှေ့ဆက်လုပ်ငန်းစဉ်တွေမှာ   စစ်အာဏာရှင်စနစ်အပြီးတိုင် ချုပ်ငြိမ်းရေး၊  စစ်မှန်တဲ့ ဖက်ဒရယ် ဒီမိုကရေစီရရှိရေးအတွက် အမျိုးသားညီညွတ်ရေးအစိုးရ(NUG)က ချမှတ်ထားတဲ့ စည်းမျဉ်းစည်းကမ်းတွေနဲ့အညီ အတူတကွ တိုက်ပွဲဝင်သွားမယ်လို့ ကြေညာချက်ထဲမှာ ဖော်ပြပါတယ်။

မြန်မာနိုင်ငံမှာ ပြီးခဲ့တဲ့ ဖေဖော်ဝါရီ ၁ ရက်နေ့က စတင်ကာ အကြမ်းဖက်စစ်အုပ်စုက မတရားအာဏာသိမ်းယူခဲ့တာကို ဆန့်ကျင်ဆန္ဒပြခဲ့ကြတဲ့ နွေဦးတော်လှန်ရေး ကာလဟာ ၇ လကျော် ကြာမြင့်ခဲ့ပြီ ဖြစ်ပါတယ်။

ဒီကာလတွေအတွင်း အကြမ်းဖက်ဖြိုခွင်းမှုတွေကြောင့် ထိခိုက်ကျဆုံးရသူတွေ၊ ဖမ်းဆီးထောင်ချခံရသူတွေနဲ့အတူ နိုင်ငံအဝန်း တောရောမြို့ပါမကျန် ဒေသခံပြည်သူ့ကာကွယ်ရေးတပ်တွေနဲ့ စစ်ကောင်စီတပ်တွေကြား တိုက်ပွဲတွေလည်း ပြင်းထန်နေတာပါ။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) ရဲ့ ထုတ် ပြန်ချက်အရ လတ်တလောအချိန်ထိ အာဏာသိမ်းစစ်ကောင်စီတပ်ရဲ့ ပစ်ခတ်သတ်ဖြတ်မှုကြောင့် အပြစ်မဲ့ ကျဆုံးပြည်သူ ၁၀၅၀ ကျော်၊ ဖမ်းဆီးထိန်းသိမ်းခံခဲ့ရသူပေါင်း ၈,၀၀၀ နီးပါး ရှိခဲ့တယ်လို့ ဆိုပါတယ်။

လတ်တလောမှာတော့ အမျိုးသားညီညွတ်ရေးအစိုးရ(NUG)က စစ်အာဏာရှင် ဆန့်ကျင်ရေး ခုခံတွန်းလှန်စစ်စတင်ကြောင်းနဲ့ မင်းအောင်လှိုင် ဦးဆောင်တဲ့ အကြမ်းဖက် စစ်အုပ်ချုပ်ရေးကို လှည်းနေလှေအောင်း မြင်းဇောင်းမကျန် တွန်းလှန်တိုက်ဖျက်ကြဖို့ စက်တင်ဘာ ၇ ရက်က ကြေညာထားခဲ့တာ ဖြစ်ပါတယ်။

1 year Ago

January 21, 2021

တပ်မတော်ထောက်ခံပွဲ ဒေသခံတိုင်းရင်းသားများ၏ သဘောဆန္ဒမပါဟု ရှင်းလင်း

ရှမ်းပြည်နယ်၊ တောင်ကြီးမြို့နယ်၊ အေးသာယာမြို့မှာ မနက်ဖန် ဇန်နဝါရီ ၂၂ ရက် မွန်းလွဲပိုင်းမှာ ပြုလုပ်ဖို့စီစဉ်ထားတဲ့ တပ်မတော်ထောက်ခံကြိုဆိုပွဲဟာ ဒေသခံတိုင်းရင်းသားတွေရဲ့ သဘောဆန္ဒ မပါဘူးလို့ ဒေသခံတွေက မီဒီယာတွေကို ကြိုတင်ရှင်းလင်းပြောကြားလိုက်ပါတယ်။ အေးသာယာမှာနေထိုင်တဲ့ ဒေသခံတိုင်းရင်းသားတွေဖြစ်တဲ့ ပအိုဝ်း၊ ထနော့၊ ချင်းနဲ့ ဒေသခံလူထုတွေက မနက်ဖန် အေးသာယာမှာပြုလုပ်မယ့် တပ်မတော် ထောက်ခံပွဲကို မထောက်ခံတဲ့အကြောင်းနဲ့ တိုင်းရင်းသားတွေကို အသုံးချပြီး အလွဲသုံးစားမလုပ်ဖို့လည်း ပြောပါတယ်။ အေးသာယာဒေသခံ ကိုရွှေဝင်း “ ရွာမှာက သူကြီးရဲ့အမိန့်ပေါ့။ သူကြီးက  မသွားတဲ့သူ ဒဏ်ရိုက်ပြီး အဲလိုမျိုးနဲ့ အနိုင်ကျင့်ပြီးသွားခိုင်းတာပေါ့။ အဲဒါကြောင့် ဒီထောက်ခံပွဲကို လုံးဝ အလိုမရှိတာ။ ရင်နာတာပေါ့ တိုင်းရင်းသားတွေက ဘာမှနားမလည်ဘူးလေ။ တိုင်းရင်းသားတွေကို အသုံးချသွားတာဆိုတော့ ဒါမဖြစ်သင့်ဘူးပေါ့ အသုံးချတာပေါ့”လို့ပြောပါတယ်။ နမ့်ဟူးရွာဒေသခံ ခွန်ထွန်းထွန်းလေးကလည်း "အရင်တုန်းကလည်းမီဒီယာတွေပေါ်မှာ ကျနော်တို့ ပအိုဝ်းတိုင်းရင်းသားတွေ ဘယ်သွားသွားပါတယ်။  သူများအသုံးချကြတယ်။ တချို့က သူကြီးအမိန့်လား။ အာဏာရှိသူအမိန့်လား။  အဲလိုရိုးသားတဲ့ ကျနော်တို့ ပအိုဝ်းတိုင်းရင်းသားတွေက သူတို့ဆန္ဒမဟုတ်ဘဲ အမိန့်ကြောင့်သွားရတယ်။ သူတို့နဲ့ သူတို့ထောက်ခံပွဲသွားချင်လို့ မဟုတ်ဘူးဆိုတာ သူများ ကိုသိစေချင်တယ်”။ လို့ပြောပါတယ်။ ဒီထောက်ခံပွဲနဲ့ပတ်သက်ပြီး ဒေသခံ တိုင်းရင်းသားအများစုက ဘာမှမသိတဲ့အကြောင်း နဲ့ ခုအချိန်ဟာ ကိုဗစ်ကပ်ဘေးကာလလည်းဖြစ်တဲ့အတွက် ထောက်ခံပွဲတွေ မလုပ်သင့်ဘူးလို့ ဒေသခံ တိုင်းရင်းသားတွေက ပြောပါတယ်။ အေးသာယာကဒေသခံ ချင်းတိုင်းရင်းသား ဦးတွမ်ပူက  “ ဒီအချိန် ဒီကာလနဲ့ဆိုရင် ဒီထောက်ခံပွဲက မလုပ်သင့်တဲ့အရာတခုလို့ပဲမြင်ပါတယ်။ ဘာဖြစ်လို့လည်းဆိုတော့ ဒါကိုဗစ်ကာလလည်း ဖြစ်တယ်။ တပ်မတော်ဆိုတာကတော့ နိုင်ငံတခုအတွက် လိုအပ်တဲ့ အရာဖြစ်တယ်။ ဒါပေမဲ့ သူတို့ ဘာရည်ရွယ်ချက်နဲ့ လုပ်တယ်ဆိုတာ ကိုယ်ဘာမှမသိဘူးလေနော်၊ အဲဒါကြောင့်ကျနော်တို့အနေနဲ့တော့ ဒါထောက်ခံတယ်မထောက်ခံဘူးဆိုတာ၊ ဘာရည်ရွယ်ချက်နဲ့ လုပ်တယ်ဆိုတာ ကိုယ်က ဂဃနဏ မသိတဲ့အခါကျတော့ ဒါကတော့ မလုပ်သင့်ဘူးလို့ ပြောတာ။”လို့ ပြောပါတယ်။  အေးသာယာမှာ ထောက်ခံပွဲကို လူအင်အား ၂၉ လောက်နဲ့  မနက်ဖန်ကျင်းပမှာဖြစ်ပြီး ၂၀၂၀ ရွေးကောက်ပွဲမှ မဲသမာမှုတွေကို တပ်မတော်က စိစစ်ဆောင်ရွက်နေတာကို ထောက်ခံကြောင်းနဲ့ နိုင်ငံတော်ဖွဲ့ စည်းပုံအခြေခံဥပဒေက ပေးအပ်ထားတဲ့ တာဝန်တွေကို ပြတ်သားတိကျစွာ ဆောင်ရွက်ပေးဖို့ ဆန္ဒထုတ်ဖော် ဟောပြောတာတွေ  ပြုလုပ်မယ်လို့ သိရပါတယ်။ နိုင်ငံတော်ရဲ့ ဖွဲ့စည်းပုံအခြေခံဥပဒေကို ကာကွယ်စောင့်ရှောက်နေတဲ့ တပ်မတော်ကို ဒေသခံတိုင်းရင်းသားတွေက ထောက်ခံတယ်ဆိုပြီး စီတန်းလှည့်လည်ဆန္ဒပြသွားတာတွေ လုပ်မယ်လို့လည်း သိရပါတယ်။ သတင်း-ခွန်ရာဇာ
2 years Ago
Up