အောင်လံ

December 5, 2021

အောင်လံမြို့နယ် ဓာတ်မြေသြဇာစက်ရုံလိုင်းခန်းနေ CDM ဝန်ထမ်းများကို ဖယ်ရှား

မကွေးတိုင်း၊ အောင်လံမြို့နယ်၊ ကျော်စွာဓာတ်မြေသြဇာစက်ရုံက ဝန်ထမ်းလိုင်းခန်းတွေမှာ နေတဲ့ အာဏာဖီဆန် CDM လှုပ်ရှားမှုမှာပါဝင်တဲ့ ဝန်ထမ်းတွေကို ဒီဇင်ဘာလ ၃ ရက်နေ့ကစပြီး စစ်ကောင်စီက အင်အားသုံး ဖယ်ရှားနေတယ်လို့ သိရပါတယ်။

CDM ဝန်ထမ်း ၁ ဦးက ''အရင်ရက်တွေကတည်းက သူတို့လာလိမ့်မယ်လို့ သတင်းရထားလို့ ကြိုပြီးရှောင်နေကြတော့ အဖမ်းခံရတဲ့သူတော့ မရှိပါဘူး။ အသုံးအဆောင်ပစ္စည်းတွေတော့ ကျန်နေခဲ့တာပေါ့။ စစ်သားတွေက လိုင်းခန်းက ပစ္စည်းတွေကို သူတို့ကားတွေပေါ်တင်ပြီး ယူသွားကြတယ်လို့ သိရတယ်။ သူတို့က စစ်ကား ၅ စီး၊ အင်အားအပြည့်လာကြတာ'' လို့ ပြောပါတယ်။

ကျော်စွာဓာတ်မြေသြစာစက်ရုံဟာ စက်ရုံလည်ပတ်ဖို့ ဂက်စ်လုံလောက်စွာ မရရှိတဲ့အတွက် စပ်ဆိုင်းထားရတာ ကြာမြင့်ပြီလို့ သိရပါတယ်။

စက်ရုံဝန်ထမ်းတဦးက ''စကစက စက်ရုံပြန်လည်ဖို့ကြိုးစားနေပုံပေါ်တယ်ဗျ။ အရင်တုန်းကတော့ ဝန်ထမ်း ၂၅၀ လောက်ရှိတယ်။ ၈၀ ဝန်းကျင်လောက်က CDM ဝင်သွားကြတော့ လူအသစ်ပြန်ခန့်ဖို့ လုပ်နေတယ်လို့လည်း ကြားတယ်'' လို့ ပြောပါတယ်။

ဖေဖော်ဝါရီ ၁ ရက်နေ့ စစ်တပ်က အရပ်သားအစိုးရဆီကနေ အာဏာသိမ်းချိန်ကစတင်ပြီး ဌာနပေါင်းစုံက ဝန်ထမ်းအချို့ဟာ အာဏာဖီဆန်ရေးလှုပ်ရှားမှု CDM ပြုလုပ်နေကြကာ ၁၀ လကျော်ကြာမြင့်ချိန်အထိ ပြေးလွှား တိမ်းရှောင်ရင်း ချို့ချို့တဲ့တဲ့နဲ့ ဘဝကိုဖြတ်သန်းနေကြရပြီး စစ်အာဏာရှင်အမြတ်ပြတ်တဲ့အထိ ပြည်သူနဲ့အတူ တိုက်ပွဲဝင်သွားမယ်လို့ CDM ပြုလုပ်နေသူတွေဆီက သိရပါတယ်။

2 months Ago

November 21, 2021

အောင်လံမြို့နယ် PDF စခန်းငယ်တစ်ခု ဝင်စီးခံရပြီး ၁ ဦးကျဆုံး၊ ၂ ဦးအဖမ်းခံရ

မကွေးတိုင်းဒေသကြီး အောင်လံမြို့နယ်မှာ နိုဝင်ဘာ ၂၀ ရက်နေ့ မနက်အစောပိုင်းက PDF စခန်းငယ်တစ်ခုကို အကြမ်းဖက်စစ်အုပ်စုက ဝင်စီးနင်းခဲ့တာကြောင့် အောင်လံ PDF ပြောက်ကျားတပ်ဖွဲ့ တပ်ခွဲမှူး ၁ ယောက်ကျဆုံးပြီး ၂ ယောက်အဖမ်းခံရတယ်လို့ သိရပါတယ်။

အောင်လံမြို့နယ် ကင်းမွန်းခြုံရွာနားက PDF စခန်းငယ်တစ်ခုကို နိုဝင်ဘာလ ၂၀ ရက်နေ့ မနက် ၂ နာရီလောက်က အကြမ်းဖက်စစ်ကောင်စီ အင်အား ၃၀ လောက်ဟာ ကားလေး ၂ စီး၊ ဆိုင်ကယ် ၅ စီးနဲ့ ဝင်ရောက်စီးနင်းခဲ့တာလို့ အောင်လံ PDF ပြောက်ကျားတပ်ဖွဲ့မှ ဗိုလ်လင်းယုန်က  ပြောပါတယ်။

“ကင်မွန်းခြုံရွာရဲ့ အထက် ၄ မိုင်လောက်မှာ PDF ပြောက်ကျား စခန်းငယ်တစ်ခုကို စစ်ကောင်စီက ဝင်စီးခဲ့တာပါ။ တပ်ခွဲမှူး ဗိုလ်သဲမိုးခေါ် ကိုမင်းခန့်သစ္စာ တိုင်ပြည်အတွက် အသက်ပေးခဲ့ရပြီးတော့ ကိုသူရနဲ့ လမင်းငယ်တို့ အဖမ်းခံလိုက်ရတယ်ဗျ။ စခန်းက ဖောက်ခွဲရေးပစ္စည်း နည်းနည်းကိုလည်း စစ်အုပ်စုတွေကသိမ်းသွားတယ်။”

အောင်လံ PDF ပြောက်ကျားတပ်ဖွဲ့ဟာ အောင်လံမြို့နယ်ထဲမှာ ပြောက်ကျားစနစ်နဲ့ စစ်အုပ်စုကို တော်လှန်တိုက်ခိုက်နေတာဖြစ်ပြီး နောက်ပိုင်းမှ အမည်တစ်ခုပေးသွားမယ်လို့ ပြောပါတယ်။

အခုလို ဖမ်းဆီးခံရတာဟာ စစ်ကောင်စီခန့် ကင်မွန်ခြုံအုပ်ချုပ်ရေးမှူ ဒလန်က အကြမ်းဖက်စစ်အုပ်စုကို သတင်းပေးတာကြောင့် ဖြစ်ပြီး ကျဆုံးခဲ့ရတဲ့ တပ်ခွဲမှူးနဲ့ တပ်ဖွဲ့ဝင်တွေအတွက် စစ်အုပ်စုကို လက်တုံ့ပြန်တိုက်ခိုက်သွားမယ်လို ဆိုပါတယ်။

2 months Ago
More News
Up