မကွေးတိုင်း အောင်လံမြို့နယ် NLD လူငယ်တာဝန်ခံ ကိုသူရနိုင်ရဲ့ ဖခင် ဦးဝင်းနိုင်ကို စက်တင်ဘာ ၂၃ ရက်နေ့ ညနေ ၃ နာရီဝန်းကျင်မှာ အကြမ်းဖက်စစ်ကောင်စီတပ်က အကြောင်းမဲ့ ဖမ်းဆီးခေါ်ဆောင်သွားခဲ့တယ်လို့ မိသားစုနဲ့နီးစပ်သူတွေက ပြောပါတယ်။
အောင်လံမြို့နယ်၊ ကန်ကြီးရပ်ကွက်မှာ ဦးဝင်းနိုင်ကို အကြမ်းဖက်စစ်တပ်က အရပ်ဝတ်တွေနဲ့ ရောက်လာပြီး ဖမ်းဆီးခေါ်ဆောင်သွားခဲ့တယ်လို့ ဆိုပါတယ်။
မိသားစုနဲ့နီးစပ်သူတဦးက “အကြမ်းဖက် စစ်ကောင်စီတပ်က အရပ်ဝတ်တွေနဲ့ ဆိုင်ကို ရောက်လာပြီး အိမ်စီးကားနဲ့ လာဖမ်းသွားတာပါ။ ဘာမှလည်း မပြောသွားဘူး။ မေးစရာရှိလို့ လိုက်ခဲ့ဆိုပြီး ခေါ်သွားတာပဲ။”
အောင်လံမြို့နယ် NLD လူငယ်တာဝန်ခံ ကိုသူရနိုင်ဟာ စစ်အာဏာရှင်ဆန့်ကျင်ရေး ဆန္ဒပြပွဲတွေမှာ တက်တက်ကြွကြွပါဝင်ခဲ့သူဖြစ်ပြီး ၂၀၂၁ နိုဝင်ဘာလကတည်းက အကြမ်းဖက်စစ်ကောင်စီက ၅၀၅(က) နဲ့ ဖမ်းဝရမ်းထုတ်ခံထားရသူ ဖြစ်ပါတယ်။
“ကိုသူရနိုင်ကတော့ ၅၀၅ ထုတ်ခံထားရတာကြောင့် ထွက်ပြေးတိမ်းရှောင်နေရသူပါ။ မိသားစုနဲ့လည်း အဆက်အသွယ် ပြတ်နေတာ ကြာပါပြီ။ ဦးဝင်းနိုင်က ကျန်းမာရေးလည်း သိပ်ကောင်းတာ မဟုတ်ဘူး။ ပုံမှန်ဆေးသောက်နေရတာ။ သူတို့က ဘယ်ခေါ်သွားမှန်းလည်း မသိတော့ လူမသိ သူမသိ နှိပ်စက် သတ်ဖြတ်ခံမှာကို မိသားစုက စိတ်ပူနေရတာပေါ့” လို့ မိသားစုနဲ့ နီးစပ်သူက ပြောပါတယ်။
ကိုသူရနိုင်ရဲ့ ဖခင်ဖြစ်သူ ဦးဝင်းနိုင်ဟာ နှလုံးနဲ့ သွေးတိုးရောဂါ အခံရှိတာကြောင့် ပုံမှန်ဆေးသောက်နေရသူ ဖြစ်တယ်လို့ သိရပါတယ်။
ကဆုန်လပြည့်ကျော် ၁ ရက် မေလ ၁၅ ရက်နေ့ ကျရောက်တဲ့ ၉ ကြိမ်မြောက် ရခိုင်အမျိုးသားနေ့ မှာ မောင်တောမြို့က ဈေးဆိုင်တွေမှာ ရခိုင်အမျိုးသားအောင်လံ လွှင့်ထူခဲ့ကြပါတယ်။
ရခိုင်အမျိုးသားအောင်လံတွေကို မောင်တောဒေသမှာ ရခိုင်လူမျိုး စျေးဆိုင်တွေသာမက မွတ်ဆလင် စျေးဆိုင်တွေမှာလည်း လွှင့်ထူလာခဲ့ကြပြီး အခုလို လွှင့်ထူတာဟာ တစိတ်တဝမ်းတည်း ရှိနေကြတာကို ပြသလိုက်ကြတာလို့ နိုင်ငံရေးလေ့လာသူတွေက သုံးသပ်ကြပါတယ်။
"ဒီမောင်တောဒေသမှာ ရခိုင် နဲ့ မွတ်ဆလင် အတူတကွ ယဥ်တွဲနေထိုင်လာကြတာ ဟိုးရှေ့ခေတ်ကတည်းကပါ။ ၂၀၁၂ ခုနှစ်ကစပြီး အမျိုးမျိုးသွေးထိုးလှုံ့ဆော်မူတွေကြောင့် မလိုလားအပ်တဲ့ လူမျိုးရေးပဋိပက္ခတွေဖြစ်ခဲ့ကြတယ်။ အဲ့ဒါတွေကို လူမျိုးနှစ်မျိုးလုံးက အခုအချိန်မှာ နားလည်သဘောပေါက်လာခဲ့ကြပြီး စည်းလုံးမူတွေ ဖြစ်ပေါ်လာကြတယ်လို့ ပြောလို့ရတယ်” လို့ နိုင်ငံရေးလေ့လာသူတဦးက ပြောပါတယ်။
ရခိုင်ပြည်နယ်အတွင်း ၂၀၁၂ ခုနှစ် လူမျိုးရေး ဘာသာရေး ပဋိပက္ခတွေကြောင့် လူမျိုးနှစ်ခု အကြား ဆက်ဆံရေး တင်းမာခဲ့တာပါ။
အခုလက်ရှိအချိန်မှာ ရက္ခိုင်တပ်တော် AA လွမ်းမိုးရာဒေသတွေအတွင်း တဖြည်းဖြည်း ပြေလျော့လာပြီး ရခိုင်နဲ့ မွတ်စလင် ချစ်ခင်ရင်းနှီးမှု ဘောလုံးပွဲတွေ ကျင်းပခဲ့ကြပြီး ဗုဒ္ဓဘာသာဆရာတော်တွေ၊ မွတ်ဆလင်ဗလီဆရာတို့ အတူတကွ တက်ရောက်ခဲ့ကြသလို နှစ်ဖက် ပရိသတ်တွေလည်း ကြိတ်ကြိတ်တိုး အားပေးခဲ့ကြတယ်လို့ ဒေသခံတွေက ပြောပါတယ်။
