အောက်ဆီဂျင်စက်ရုံ

September 25, 2021

သာပေါင်းတွင် အောက်ဆီဂျင်စက်ရုံတည်ဆောက်ရေး စစ်ကောင်စီက ငွေကြေးအဓမ္မကောက်နေ

ဧရာဝတီတိုင်း၊ သာပေါင်းမြို့နယ်ထဲက ကျေးရွာတွေကို အောက်ဆီဂျင်စက်ရုံတည်ဆောက်ဖို့အတွက် အကြောင်းပြကာ စစ်ကောင်စီက ငွေအတင်းအဓမ္မကောက်ယူတာတွေ ပြုလုပ်နေတယ်လို့ သိရပါတယ်။

စစ်ကောင်စီရဲ့ သြဇာခံကျေးရွာအုပ်ချုပ်ရေးမှူးတွေက ကျေးရွာ အုပ်စု ၁ စုကို ၁၅ သိန်းကနေ သိန်း ၂၀ အထိရအောင် ကောက်ယူနေတာကြောင့် စားဝတ်နေရေးမပြေလည်သူတွေပါ မဖြစ်မနေ ပေးနေရတယ်လို့ ဒေသခံတွေက ပြောပါတယ်။

လုံခြုံရေးအရအမည်အဖော်လိုတဲ့ သာပေါင်းဒေသခံတဦးက "အရင်ကဆို သဒ္ဒါသလောက်ထည့်ခိုင်းတာ ဘာလုပ်လုပ် အဲ့ပုံစံသွားတာ။ ခုက ခေတ်ကမကောင်းတဲ့ကြားထဲ အေးဓားမြတိုက်သလို ပုံစံဖြစ်နေတယ်။ ရှိတဲ့သူလည်း ထည့်၊ မရှိသူလည်းထည့်ဆိုတဲ့ ပုံစံကြောင့် တချို့ဆို စားဖို့မရှိတဲ့ကြားက ကြောက်လို့ ပိုက်ဆံချေးထည့်ပေးရတာတွေရှိတယ်” လို့ ပြောပါတယ်။

ကျေးရွာအုပ်စု ၁ စုကို ၁၅ သိန်းကနေ သိန်း ၂၀ ကြားရရှိဖို့အတွက် ကျေးရွာအုပ်ချုပ်ရေးမှူးတွေနဲ့ စစ်တပ်သတင်းပေးတွေပေါင်းပြီး အိမ် ၁ အိမ်ကို ၃ ထောင်ကနေ စက်လှေနဲ့ စျေးဆိုင်ရှိရင် ၅ သောင်း စတဲ့နှုန်းထားတွေခွဲပြီး ကောက်ခံနေတာလို့ ဆိုပါတယ်။

ဧရာဝတီတိုင်းအတွင်းကမြို့နယ်တွေမှာ ဒေသခံပြည်သူတွေ စုပေါင်းအလှူငွေနဲ့ရရှိလာတဲ့ အောက်ဆီဂျင်စက်ရုံတွေကိုလည်း စစ်ကောင်စီက လိုက်လံထိန်းချုပ်ထားတယ်လို့ သိရပါတယ်။

4 months Ago

August 25, 2021

ဗန်းမော်မြို့ရှိ အောက်ဆီဂျင်စက်ရုံ ထရမ်စမော်မာတစ်လုံး မီးလောင်ပေါက်ကွဲ

ကချင်ပြည်နယ် ဗန်းမော်မြို့ရှိ ၃ မိုင်ရွှေပြည်သာရပ်ကွက်က အောက်ဆီဂျင်အခမဲ့ပေးဝေနေတဲ့ OK Group အောက်ဆီဂျင်စက်ရုံမှာ ဩဂုတ်လ ၂၄ ရက် ညနေပိုင်းက ထရမ်စဖော်မာတစ်လုံး မီးလောင်ပေါက်ကွဲခဲ့တယ်လို့ ဒေသခံတွေက ပြောပါတယ်။

မီးလောင်ပေါက်ကွဲမှုအချိန် မိနစ် ၂၀ လောက်သာ ကြာမြင့်ခဲ့ပြီး မီးသတ်သမားတွေ လာရောက် ငြှိမ်းသတ်ခဲ့ကြတယ်လို့ ဆိုပါတယ်။

OK Group အောက်ဆီဂျင်စက်ရုံက ထရမ်စဖော်မာ မီးလောင်ပေါက်ကွဲရတဲ့ အကြောင်းအရင်းကိုတော့ မသိရသေးပါဘူး။

ပြီးခဲ့တဲ့ရက်ပိုင်းအတွင်းက OK Group က တာဝန်ရှိသူတစ်ဦးကို မည်သူမည်ဝါမသိရသူတဦးက ဗုံးခွဲပစ်မယ်ဆိုပြီး ဖုန်းဆက်ခြိမ်းခြောက်ခဲ့တယ်လို့ စက်ရုံနဲ့ နီးစပ်သူတစ်ဦးက ပြောပါတယ်။
“ဒီကိစ္စဟာ မရိုးသားဘူးထင်တယ်၊ ဘာကြောင့်လဲဆိုတော့ ခြိမ်းခြောက်ခံထားရတယ်လို့ သတင်းထွက်ပြီး ရက်ပိုင်းအတွင်း ဖြစ်တာဆိုတော့ တိုက်ဆိုင်မှုလားပေါ့။ အားမနိုင်လို့ ပေါက်ကွဲတာလို့လည်း ပြောကြတယ်။ တော်သေးတယ် အောက်ဆီဂျင်အိုးထားတဲ့ နေရာနဲ့ဝေးနေလို့ မဟုတ်ရင် မလွယ်ဘူး။” 

အောက်ဆီဂျင်စက်ရုံတည်ဆောက်ပြီးနောက် ဗန်းမော်မြို့ရှိ အောက်ဆီဂျင် လိုအပ်နေတဲ့ ကိုဗစ်လူနာတွေကို အလုံးရေ ၃၀၀ ကျော်နဲ့ အခမဲ့ပေးဝေနေတာ ၁၀ ရက်လောက် ရှိပြီလို့ သိရပါတယ်။ 

ဗန်းမော်မြို့မှာ အောက်ဆီဂျင်လိုအပ်ချက် ပိုမိုမြင့်မားနေပြီး တစ်ရက်ကို အလုံးရေ ၁၅၀ နီးပါး သုံးစွဲနေရတယ်လို့ သိရပါတယ်။

5 months Ago
More News
Up