အေအေ

August 24, 2021

အေအေ လှုပ်ရှားမှုကို သတင်းပေးရန် အုပ်ချုပ်ရေးမှူးများကို စစ်တပ်က ခေါ်ယူသတိပေး

ရခိုင်ပြည်နယ်၊ ကျောက်ဖြူမြို့မှာ ရက္ခိုင့်တပ်တော်(အေအေ)ရဲ့ လှုပ်ရှားမှုတွေကို သတင်းပေးတိုင်ကြားကြဖို့ သြဂုတ် ၂၃ ရက်က မြို့ပေါ်ရှိ ရပ်ကွက်အုပ်ချုပ်ရေးမှူးတွေကို စစ်ကောင်စီတပ် အမှတ် ၃၄ တပ်ရင်းမှူးက ခေါ်ယူသတိပေးပြောဆိုခဲ့တယ်လို့ အမည်မဖော်လိုတဲ့ ရပ်ကွက်အုပ်ချုပ်ရေးမှူး တစ်ဦးက ပြောပါတယ်။

ရပ်ကွက်အုပ်ချုပ်ရေးမှူး ၁ ဦးက “ကျနော်တို့ကို အစည်းအဝေးမတက်မနေရဆိုပြီး ၃၄ တပ်က တပ်ရင်းမှူးကခေါ်တယ်။ အေအေက ကိုဗစ်ကာကွယ်ရေးနဲ့ပတ်သက်ပြီးတော့ မြို့ပေါ်ရပ်ကွက်တွေမှာ စာလိုက်ကပ်တာ၊ အဲဒီစာရွက်ကပ်တဲ့သူတွေကို မသိဘူးလားပေါ့၊ ပြီးရင် ကျနော်တို့ကို အေအေကလှုပ်ရှားမှုတွေကို မသိဘူးလားဆိုပြီး မေးတယ်။ သိရင်သူတို့ကို အကြောင်းကြားဖို့ပေါ့၊ သိရဲ့နဲ့ထိမ်ချန်ထားတယ်ဆိုပြီးတော့ အပြစ်တင်တာပေါ့။ ရပ်ကွက်တွေမှာလည်း မှုခင်းတွေဖြစ်လာရင် သူတို့ကိုအ​ကြောင်းကြားပေးဖို့နဲ့ ရပ်ကွက်တွေမှာ လူစိမ်းတွေဝင်လာရင်လည်း သတင်းပေးဖို့” လို့ ပြောပါတယ်။

အေအေက ကိုဗစ်ကာကွယ်ထိန်းချုပ်နိုင်ဖို့ Stay at Home ကာလသတ်မှတ်ခဲ့သလို ရခိုင်ပြည်သူတွေအနေနဲ့ မတရားပြုကျင့်ခံရတာတွေကို တိုင်ကြားနိုင်ဖို့ ရက္ခိုင်အမျိုးသားအဖွဲ့ချုပ် တရားရေးဌာနဖွင့်လှစ်ထားတယ်လို့ ထုတ်ပြန်ခဲ့ပါတယ်။

စစ်တပ်က ရခိုင်ပြည်နယ်မှာ အင်းအားတိုးချဲ့တာတွေနဲ့ မြို့နယ်တွေမှာနေအိမ်တွေကို ဝင်ရောက်ရှာဖွေစစ်ဆေး လုပ်ဆောင်လာနေတာကြောင့် တိုက်ပွဲတွေ တကျော့ပြန်တိုက်ပွဲတွေ ဖြစ်လာနိုင်တဲ့အတွက် ဒေသခံတွေ စိုးရိမ်နေကြပါတယ်။

4 weeks Ago

July 16, 2021

မန္တလေးတွင် အေအေတပ်ဖွဲ့ဝင်များ အပါအဝင် ၆ ဦးကို နှစ်ရှည်ထောင်ဒဏ်များ ချမှတ်

မန္တလေးမြို့မှာ ဖောက်ခွဲရေး ပစ္စည်းတွေ၊ ဆက်သွယ်ရေးပစ္စည်းတွေနဲ့အတူ ဖမ်းဆီးရမိခဲ့တဲ့ ရက္ခိုင့်တပ်တော် (အေအေ) လက်နက်ကိုင် တပ်ဖွဲ့ဝင်တွေကို ဇူလိုင် ၁၆ ရက်နေ့က အွန်လိုင်းကနေ တရားရုံးက နှစ်ရှည်ထောင်တွေ အမိန့်ချခဲ့ပါတယ်။

အေအေတပ်ဖွဲ့မှ ဒုရာခံဗိုလ် အောင်လင်းထက် (ခ) လင်းထက် (ခ) ကျော်သူရ ၊ ဒုတပ်ကြပ် ချမ်းငြိမ်း ၊ ဒုတပ်ကြပ် မြတ်ခိုင်နဲ့ ကားဂိတ်မှူး ကျော်ကျော်ဖြိုး (ခ) ကိုဖြိုး တို့ကို အကြမ်းဖက်ဥပဒေပုဒ်မ ၅၁(ဂ) အရ အလုပ်ကြမ်းနဲ့ ထောင်ဒဏ် (၈) နှစ်၊ အကြမ်းဖက်ဥပဒေ ပုဒ်မ ၅၂ (က) အရ အလုပ်ကြမ်းနဲ့ ထောင်ဒဏ် (၃) နှစ် သီးခြားစီကျခံဖို့ အမိန့်ချခဲ့ပါတယ်။

ဒါ့အပြင် ပတ်သက်ဆက်နွှယ်တဲ့ ကျောက်အရောင်းအဝယ် လုပ်ကိုင်သူ မိုးကျော် (ခ) ဦးမိုးကျော် နဲ့ ဝင်းသိန်း တို့ကိုလည်း အကြမ်းဖက်ဥပဒေ ပုဒ်မ ၅၁(ဂ) အရ အလုပ်ကြမ်းနဲ့ ထောင်ဒဏ် (၅) နှစ် ၊ အကြမ်းဖက်ဥပဒေ ပုဒ်မ ၅၂ (က) အရ အလုပ်ကြမ်နဲ့ ထောင်ဒဏ် (၃) နှစ် သီးခြားစီကျခံဖို့ အမိန့်ချခဲ့ကြပါတယ်။

ဖောက်ခွဲရေး ပစ္စည်းတွေ၊ ဆက်သွယ်ရေးပစ္စည်းတွေနဲ့ အတူ အေအေတပ်ဖွဲ့ဝင်တွေကို  ၂၀၁၉ ခုနှစ် စက်တင်ဘာလ ၁၀ ရက်နေ့က မန္တလေးမြို့ ချမ်းမြသာစည်မြို့နယ် မြို့သစ်(၅)ရပ်ကွက် လမ်း ၇၀၊ ဒဿနလမ်းရှိ နေအိမ်တစ်ခုမှာ ဖမ်းဆီးရမိခဲ့တာပါ။

ဖမ်းဆီးရမိသူတွေနဲ့ အတူ Satellite Phone တွေ ၊ ယမ်းတုံးတွေ၊  ဖောက်ခွဲရာမှာ အသုံးပြုတဲ့ ဒီတိုနီတာတွေနဲ့ ဆက်စပ်ပစ္စည်းတွေကို သိမ်းဆည်းရမိခဲ့တယ်လို့ သိရပါတယ်။

2 months Ago
More News
Up