အဝေးသင် အနီးကပ်သင်တန်း ၅ရက် နှစ်ကြိမ်ခွဲသင်မည့်ကိစ္စ  ပြန်စဉ်းစားဆောင်ရွက်ပေးမည်

A d v e r t i s e m e n t With Us

January 22, 2019

အဝေးသင် အနီးကပ်သင်တန်း ၅ရက် နှစ်ကြိမ်ခွဲသင်မည့်ကိစ္စ  ပြန်စဉ်းစားဆောင်ရွက်ပေးမည်

အဝေးသင်ဝိဇ္ဇာဘာသာရပ်တွေ အနီးကပ်သင်ကြားရက် ၅ ရက် နှစ်ကြိမ်ခွဲတာနဲ့ ပတ်သက်လို့ ကျောင်းသား ကျောင်းသူတွေအနေနဲ့ အဆင်မပြေတာတွေရှိတယ်ဆိုတဲ့ အသံတွေ ကြားနေရတဲ့အတွက် ပြန်စဉ်းစားပြီး အကောင်းဆုံးဖြစ်အောင် ဆောင်ရွက်ပေးသွားမယ်လို့ ပညာရေးဝန်ကြီးဌာန ဒုဝန်ကြီး ဦးဝင်းမော်ထွန်းက ပြောပါတယ်။ ဇန်န၀ါရီ ၂၂ ရက်နေ့ အမျိုးသားလွှတ်တော်အစည်းအဝေးမှာ မီဒီယာတွေရဲ့ မေးမြန်းချက်တွေကို အခုလို ပြန်လည်ဖြေဆိုခဲ့တာဖြစ်ပါတယ်။ ဒုဝန်ကြီး ဦးဝင်းမော်ထွန်းက “ပိုပြီး ထိရောက်အောင် သင်နိုင်အောင်၊ ပိုပြီး သင်ကြားရေးကောင်းလာအောင်ဆိုပြီး ကာလရှည် တောက်လျှောက်သင်မယ့်အစား နှစ်ပိုင်းခွဲပြီး လျာကြည့်တာပေါ့။ လျာကြည့်တော့ ကျနော်တို့လည်း တွေ့ပါတယ်။ ကလေးတွေ (အလုပ်လုပ်တဲ့ ကလေးတွေပေါ့နော်) အဆင်မပြေဘူး။ ခွင့်နှစ်ခါယူရမယ် အဆောင်နှစ်ခါငှားရမယ် ထမင်းဖိုး နှစ်ခါပေးရမယ် စသဖြင့် အခက်အခဲအများကြီး ကျနော်တို့ ကြားရပါတယ်။ ကြားရတော့ ကျနော်တို့ ရည်ရွယ်ချက်က ပညာသင်တာ ပိုထိရောက်အောင် ဆောင်ရွက်တယ်။ မထိရောက်ဘူး၊ ရည်ရွယ်ရင်း မမြောက်ဘူး ဆိုရင်တော့ ပြန်စဉ်းစားရမှာပေါ့" လို့ ပြောပါတယ်။ ပြန်စဉ်းစားဆောင်ရွက်တဲ့အပိုင်းမှာလည်း သက်ဆိုင်ရာ အဝေးသင်သင်တန်းတွေကို တာဝန်ခံတဲ့ တက္ကသိုလ်တွေက ပါမောက္ခတွေ၊ ပါမောက္ခချုပ်တွေနဲ့ ကျောင်းသားတွေအသံ နားထောင်ပြီး ဆောင်ရွက်ပေးဖို့ ညှိနှိုင်းပြီးရင် တရားဝင်ထုတ်ပြန်ပေးမယ်လို့ ဆိုပါတယ်။ ဒုဝန်ကြီး ဦးဝင်းမော်ထွန်းက “ညှိနှိုင်းနေတယ်ဆိုတာ ဒီလိုဖြစ်ရင်ကောင်းမယ်လို့ ကျနော်တို့ ပထမ သင်ကြားရေးဘက်က ဆန္ဒသဘောထားသိရတဲ့အတွက် ကဲဒါဖြင့်လည်း သင်ဆိုပြီး ပြောလိုက်တာပေါ့။ သို့သော် အခုနက သိတဲ့အတိုင်း အဆင်မပြေမှုတွေ အမှန်တကယ် ရှိနေရင် ပြန်ကြည့်ပေးဖို့၊ ပေါ့စေလိုလို့ ကြောင်ရုပ်ထိုးရင် ဆေးအတွက်လေးတာတော့ ဖြစ်လို့မရဘူးပေါ့ဗျာ။ အကောင်းဆုံးဖြစ်အောင် ဆောင်ရွက်ပေးပါမယ်”လို့ ပြောပါ တယ်။ အဝေးသင်ဝိဇ္ဇာဘာသာရပ်တွေအတွက် အနီးကပ် ဆယ်ရက် အစား ငါးရက် နှစ်ကြိမ်ခွဲ တက်ဖို့ ပုံစံပြောင်းလဲလိုက်တာကို ဇန်န၀ါရီ ၁၆ ရက်နေ့က အဆင့်မြင့် ပညာရေးဦးစီးဌာနက ထုတ်ပြန်ခဲ့ပါတယ်။ ၂၀၁၉-၂၀ ပညာသင်နှစ်မှာ အဝေးသင် ၀ိဇ္ဇာဘာသာရပ်တွေ စာမေးပွဲမဖြေခင် တကြိမ်တည်း အနီးကပ် ဆယ်ရက်တက်ရတာကို မေလမှာ ငါးရက်နဲ့ အောက်တိုဘာ၊ နိုဝင်ဘာမှာ ငါးရက် တက်ရမယ်လို့ ပြောင်းလဲလိုက်တာဖြစ်ပါတယ်။ ဒီလို ပြောင်းလဲလိုက်တာနဲ့ပတ်သက်လို့ အဝေးသင် ကျောင်းသားကျောင်းသူတွေက ဖဲကြိုးနီလှုပ်ရှားမှုတွေ ပြုလုပ်ပြီး ကန့်ကွက်နေကြပါတယ်။
2 years Ago
Up