အုပ်ချုပ်ရေးမှူးအဖြစ် ရွေးချယ်ခံရ

March 27, 2017

ကာရီလမ် ဟောင်ကောင်၏ ပထမဆုံးအမျိုးသမီး အုပ်ချုပ်ရေးမှူးအဖြစ် ရွေးချယ်ခံရ

အကြီးတန်း အစိုးရအရာရှိဟောင်း ကာရီလမ်က ဟောင်ကောင်ကျွန်းရဲ့ ပထမဆုံး အမျိုးသမီး အုပ်ချုပ်ရေးမှူးအဖြစ် ပြီးခဲ့တဲ့ မတ် ၂၆ ရက်နေ့က ရွေးကောက် တင်မြှောက်ခံလိုက်ရပါတယ်။ တရုတ်ပြည်မကြီး အစိုးရကို လိုလားသစ္စာခံတဲ့သူတွေ အများစုပါတဲ့ လူအယောက် ၁၂၀၀ ရှိတဲ့ ရွေးကောက်ပွဲကော်မတီက သူကို ရွေးချယ်လိုက်တာလို့ မီဒီယာတွေက အစီရင်ခံပါတယ်။ ခေါင်းဆောင်ရွေးချယ်မှုအပေါ် လူဦးရေ ၇ ဒသာမ ၃ သန်းရှိတဲ့ မဲရှင် အများစုက ကျေနပ် တာတော့ မဟုတ်ပါဘူး။ ဗြိတိသျှကိုလိုနီဖြစ်ခဲ့တဲ့ ဟောင်ကောင်ကျွန်းကို တရုတ်ပြည်မကြီး အစိုးရလက်ထဲ ၁၉၉၇ ခုနှစ်က တနိုင်ငံ စနစ် ၂ မျိုး အုပ်ချုပ်မှုကတိနဲ့ လွှဲပေးခဲ့တာပါ။ ရွေးကောက်ပွဲပုံစံနဲ့ ပတ်သက်ပြီး တင်းမာမှုတွေ မြင့်နေပါတယ်။ ကာရီလမ်ဟာ ဇူလိုင် ၁ ရက်နေ့မှာ တာဝန်ကို စပြီး ထမ်းဆောင်ရမှာပါ။ သူက ထောက်ခံမဲ ၇၇၇ ရထားပြီး သူရဲ့အနီးစပ်ဆုံး ပြိုင်ဘက် ဘဏ္ဍာရေးဝန်ကြီးဟောင်း ဂျွန်ဆန်းက ၃၆၅ မဲ ရထားပါတယ်။ ဒါပေမယ့် ထင်မြင်ချက်စစ်တမ်းမှာတော့ ဂျွန်ဆန်းက လူကြိုက် ပိုများနေတာပါ။ တတိယ ကိုယ်စားလှယ် တရားသူကြီးဟောင်းကတော့ ၂၁ မဲပဲ ရပါတယ်။ မဲရုံအပြင်ဘက်မှာ ဆန္ဒပြသူတွေ စုရုံးခဲ့တာပါ။ ယွဲ့လုံခရိုင် ကောင်စီဝင် ခါ့လွန်တွန်းကတော့ ဒီရလဒ်ဟာ တရုတ်ပြည်မကြီးကို လိုလားတဲ့ လျန်ချွန်းရင်က နောက်ထပ် ၅ နှစ်သက်တမ်းကို ခိုင်ခိုင်မြဲမြဲ ထမ်းဖို့ အိပ်မက်ဆိုးကို ဆက်သယ်လာလိမ့်မယ်လို့ ပြောခဲ့ပါတယ်။
5 years Ago
Up