အုတ်ဖိုမြို့နယ်

May 20, 2022

အုတ်ဖိုမြို့နယ်၌ အလောင်းသယ်ရန် စစ်ကောင်စီတပ်က ရွာသားများကို ဖမ်းဆီးခေါ်ဆောင်

ပဲခူးတိုင်း၊ အုတ်ဖိုမြို့နယ်၊  ဝိုင်းကျေးရွာအုပ်စု၊ တာဝါတိုင်ရွာမှာ မေ ၁၁ ရက်က သေနတ်နဲ့ ပစ်ခတ်ခံရပြီး သေဆုံးခဲ့တဲ့ ပျူစောထီးအဖွဲ့ခေါင်းဆောင်တွေရဲ့ အလောင်းကို သယ်ပေးဖို့ စစ်ကောင်စီတပ်က  ရွာသား ၅ ယောက်ကို ဖမ်းဆီးခေါ်ဆောင်သွားတယ်လို့ ဒေသခံတွေက ပြောပါတယ်။

တာဝါတိုင်ရွာနေ ပျူစောထီးအဖွဲ့ခေါင်းဆောင်တွေဖြစ်တဲ့ ကိုအောင်မျိုးဇော်နဲ့ ကိုခင်မောင်သန်းတို့ နေအိမ်မှာ ရှိနေစဉ် အမည်မသိလူ ၆ ယောက်က ပြီးခဲ့တဲ့ မေ ၁၁ ရက်နေ့က သေနတ်နဲ့ ဝင်ရောက်ပစ်ခတ်ရာ နေရာမှာပဲ သေဆုံးခဲ့ပြီး အဲဒီအလောင်းတွေကို သယ်ပေးဖို့အတွက် စစ်တပ်က ဒေသခံရွာသား ၅ ယောက်ကို ခေါ်ဆောင်သွားတာလို့ဆိုပါတယ်။ 

အဆိုပါရွာသား ၅ ယောက်ထဲကနေ ၄ ယောက် ပြန်လည်ရောက်ရှိလာပြီး တယောက်ကတော့ အခုထိ ပြန်မလွတ်သေးတာကြောင့် စိတ်ပူပန်နေတယ်လို့ မိသားစုဝင်တယောက်က ပြောပါတယ်။

ပြန်လွတ်လာသူတဦးက "ရွာက ကျနော်တို့ ၅ ယောက်ကို ခေါ်သွားတုန်းက အသတ်ခံရတဲ့ ပျူအလောင်းတွေကို သယ်ဖို့သက်သက်ပဲ။ နောက် အလောင်းတွေကို အုတ်ဖိုဆေးရုံကို သယ်ပြီးတော့ သူတို့ ၅ ယောက်ကို စစ်ကောင်စီတပ်တွေက မေးခွန်းတွေမေးပြီး တယောက်ချင်းစီ ခွဲပြီးစစ်တယ်။ နောက် ၄ ယောက်ကို ပြန်လွှတ်ပေးပြီး တယောက်ကို ဖမ်းထားလိုက်တာ။ သူက ရွာထဲက နာမည်ထွက်နေတဲ့ သူတွေနဲ့ အမျိုးတော်နေတာမလို့ ဆိုပြီး ပြန်မလွှတ်တာ" လို့ ပြောပါတယ်။

အဖမ်းခံထားရတဲ့ အသက် ၂၀ ကျော်အရွယ် ကိုချစ်ကိုလတ်ဟာ မိဘတွေနဲ့ အတူနေသူဖြစ်ပြီး မေ ၁၁ ရက်ကတည်းက အိမ်ပြန်ရောက်မလာတော့တဲ့အတွက် မိသားစုနဲ့ ရင်းနှီးတဲ့ အုတ်ဖိုရဲတပ်ဖွဲ့က တာဝန်ရှိသူတယောက်ကို မေးမြန်းကြည့်ရာမှာ သူတို့မသိကြောင်း၊ ရဲစခန်းမှာ မရှိကြောင်းနဲ့ စစ်တပ်က တနေရာရာမှာ စစ်ကြောရေး လုပ်နေသလား ဆိုတာတော့ မသိဘူးလို့ မိသားစုဝင်တယောက်က ပြောပါတယ်။

တာဝါတိုင်ကျေးရွာမှာ အိမ်ခြေ ၆၀ ကျော်ရှိပြီး စစ်ကောင်စီတပ်တွေ မကြာခဏ လာရောက်အနိုင်ကျင့် နှိပ်စက်တာ၊ ဖမ်းဆီးတာတွေ လုပ်တဲ့အတွက် တရွာလုံး ထွက်ပြေးတိမ်းရှောင်နေရပြီး ပျူစောထီးအဖွဲ့ဝင် ၆ အိမ်လောက်ပဲ ရွာမှာကျန်နေခဲ့ကာ စစ်ကောင်စီတပ်တွေလည်း ခဏခဏလာပြီး တပ်စွဲလေ့ရှိတယ်လို့ ဒေသခံတယောက်က ပြောပါတယ်။

ကျေးရွာ ပျူစောထီးခေါင်းဆောင် ၂ ယောက်ကို ပဲခူးတိုင်း ပြည်သူ့ကာကွယ်ရေးတပ်ဖွဲ့ တပ်ရင်းအမှတ် ၃၈၀၂၊ တပ်ခွဲ ၄ က  သေနတ်နဲ့ပစ်ခတ်ကာ သုတ်သင်ရှင်းလင်းခဲ့တာလို့ သာယာဝတီ ပြည်သူ့ကာကွယ်ရေးတပ်ဖွဲ့ကနေ သိရပါတယ်။

1 month Ago

February 6, 2022

အုတ်ဖိုမြို့နယ်က သစ်တောရုံး ဖောက်ခွဲတိုက်ခိုက်ခံရ

ပဲခူးတိုင်း အုတ်ဖိုမြို့နယ်မှာ ဖေဖော်ဝါရီလ ၅ ရက်နေ့ ညနေပိုင်းက သစ်တောရုံးတစ်ရုံး ဖောက်ခွဲတိုက်ခိုက်ခံခဲ့ရတယ်လို့ အုတ်ဖို မြေအောက်ပြောက်ကျားတပ်ဖွဲ့ကနေ သိရပါတယ်။

အုတ်ဖိုမြို့နယ် ထောက်ကြံ့ကွင်းထိပ်၊ သပြေကန်သစ်တောရုံးကို မနေ့ ညနေပိုင်းမှာ အုတ်ဖိုမြေအောက်ပြောက်ကျားတပ်ဖွဲ့က ဖောက်ခွဲ တိုက်ခိုက်ခဲ့တာလို့ UGF(OKPO) ရဲ့ ပြန်ကြားရေးတာဝန်ခံက ဒီဗွီဘီကိုပြောပါတယ်။

အဲဒီ သစ်တောရုံးက Non CDM ဝန်ထမ်းတွေအနေနဲ့ ပြည်သူလူထုဘက်ကို မရပ်တည်တဲ့အပြင် ဝိသမလောဘသား စီးပွားရေးသမားတွေနဲ့ ပူးပေါင်းပြီး ပဲခူးရိုးမက သစ်တွေကို ခိုးထုတ်နေတာကြောင့် သတိပေးဖောက်ခွဲခဲ့တာဖြစ်ပြီး ထိခိုက်ပျက်စီးမှုရှိနိုင်တယ်လို့ ဆိုပါတယ်။

စစ်တပ်က အုပ်ချုပ်ခဲ့တဲ့ ကာလတွေမှာ သစ်တောသယံဇာတတွေကို မဆင်မခြင် ထုတ်ယူရောင်းစားခဲ့လို့ တစ်နိုင်ငံလုံး ရာသီဥတုဖောက်ပြန်တဲ့ဒဏ်ကို ခံစားနေကြရကြောင်း၊ လူတစ်စု ကောင်းစားရေးအတွက် အများပြည်သူ ဒုက္ခရောက်စေမယ့် လုပ်ရပ်တွေကို UGF(OKPO) က ပြင်းပြင်းထန်ထန် တားဆီးတုံ့ပြန်သွားမယ်လို့ ပြောပါတယ်။

UGF (အုတ်ဖို) အနေနဲ့ ဖေဖော်ဝါရီ ၂ ရက်နေ့မှာလည်း အုတ်ဖိုမြို့နယ် ကျွန်းကုန်းရွာထိပ်က ရဲဂိတ်ကိုလည်း အဝေးထိန်းမိုင်းနဲ့ ဖောက်ခွဲ တိုက်ခိုက်ခဲ့တယ်လို့ သိရပါတယ်။

5 months Ago
More News
Up