အီးမေးလ် ဘာသာပြန်မတင်ပြနိုင်သေးသဖြင့် မလေးမူးယစ်ဆေးဝါးမှု မစစ်ဆေးနိုင်သေး

August 28, 2018

အီးမေးလ် ဘာသာပြန်မတင်ပြနိုင်သေးသဖြင့် မလေးမူးယစ်ဆေးဝါးမှု မစစ်ဆေးနိုင်သေး

မလေးရှားမှာ စံချိန်တင်ဖမ်းမိတဲ့ မူးယစ်ဆေးဝါးမှုနဲ့ ဖမ်းဆီးထားသူတွေကို စတင်စစ်ဆေးဖို့ရှိပေမယ့် ဥပဒေရုံးကနေ သက်သေတင်သွင်းထားတဲ့ အီးမေးလ်စာတွေကို ဘာသာပြန်မတင်ပြနိုင်သေးလို့ စက်တင်ဘာ ၆ ရက်ကို ပြန်လည်ချိန်းဆိုလိုက်ပါတယ်။ ဒီအမှုမှာ အဓိကတရားခံအဖြစ် စွဲချက်တင်ထားတဲ့ ဦးမောင်မောင် (ခ) ဟာဂျီယာစင်နဲ့ ဦးဇေယျာ (ခ)ဇေယျာဟိန်း၊ ဦးမင်းနိုင်တို့ကို အနောက်ပိုင်းခရိုင်တရားရုံးကနေ သြဂုတ် ၂၈ ရက်နေ့မှာ ၆ ကြိမ်မြောက် ရုံးထုတ်စစ်ဆေးခဲ့တာပါ။ အဲဒီရုံးချိန်းမှာ တရားစွဲခံရသူ ၃ ဦးနဲ့တရားလိုဖြစ်တဲ့ ရဲမှူးခင်မောင်အေးတို့ကို အပြန်အလှန်စစ်ဆေးဖို့ရှိပေမယ့် ရုံးချိန်းနောက်ကျတာနဲ့ အီးမေးလ်စာတွေ ဘာသာပြန်မတင်ပြ နိုင်သေးတာကြောင့် စက်တင်ဘာလ ၆ ရက်နဲ့ စက်တင်ဘာလ ၁၃ ရက်နေ့ကို တရားသူကြီးက ပြန်လည်ချိန်းဆိုလိုက်တယ်လို့  ဖမ်းဆီးခံရသူတွေရဲ့ ရှေ့နေ ဦးသန်းအောင်က ပြောပါတယ်။ မလေးရှားနိုင်ငံမှာ အမေရိကန်ဒေါ်လာ(၁၈)သန်းလောက်တန်ဖိုးရှိတဲ့ စိတ်ကြွဆေးပြား တွေ စံချိန်တင် ဖမ်းမိတာနဲ့ပတ်သက်လို့ မြန်မာနိုင်ငံရဲတပ်ဖွဲ့ကို နိုင်ငံတကာ မူးယစ်ဆေးဝါး တားဆီး နှိမ်နှင်းရေးအဖွဲ့တွေကနေ အီးမေးလ် ၃ စောင်ကို ပေးပို့ထားတာပါ။ အဲဒီအီးမေးလ်စာတွေကို တရားလိုရဲမှူးခင်မောင်အေးက တရားရုံးကို သက်သေခံအဖြစ် တင်ပြထားတဲ့အပေါ် တရားလို ရှေ့နေက သြဂုတ်လ ၁၄ ရက်နေ့ရုံးချိန်းမှာ တရားရုံးကနေ ဘာသာပြန်တင်ပြခိုင်းခဲ့တာလို့ ဆိုပါတယ်။ လက်ရှိ ဒီအမှုနဲ့ပတ်သက်လို့ ဦးမင်းနိုင်ပါ ၃ ဦးကို ဖမ်းဆီး စစ်ဆေးနေပြီး ချင်ကျားမူ (ခ)မကျားဝေ(ခ) နှင်းဦးလွင်နဲ့ မာမက်ဟူစိန် (ခ)ဟူစိန်တို့ကို တရားခံပြေးအဖြစ် အနောက်ပိုင်း ခရိုင်တရားရုံးကနေ ၀ရမ်းထုတ်ပြန်ထားပါတယ်။ အဓိက တရားခံအဖြစ်သတ်မှတ်ထားတဲ့ ဦးမောင်မောင် (ခ)ဟာဂျီယာစင်အမှုကို တရား လွှတ်တော် ရှေ့နေ ဦးသန်းအောင်အပါအ၀င် ရှေ့နေ(၅)ဦးက အကျိုးဆောင်ရှေ့နေအဖြစ် လိုက်ပါ ဆောင်ရွက်နေတာပါ။
3 years Ago
Up