အီသီယိုးပီးယားအစိုးရ

October 1, 2021

ကုလအကြီးတန်းအရာရှိ ၇ ဦးကို အီသီယိုးပီးယားအစိုးရ နှင်ထုတ်

အီသီယိုးပီးယားအစိုးရဟာ တောင်အာဖရိကနိုင်ငံသားတစ်ဦး အပါအဝင် ကုလသမဂ္ဂ အကြီးတန်းအရာရှိ ၇ ဦးကို ၇၂ နာရီအတွင်း နိုင်ငံကနေ ထွက်ခွာသွားဖို့ နှင်ထုတ်လိုက်ပါတယ်။

အာဒစ်အဘာဘာနဲ့ ထိဂရေးဒေသအစိုးရတို့အကြား ဖြစ်ပွားခဲ့တဲ့ လူသားချင်း စာနာမှု အကြပ်အတည်းမှာ ၀င်ရောက်စွက်ဖက်မှုအတွက်လို့ ဆိုပါတယ်။ 

ဒီသတင်းကြောင့် ကုလသမဂ္ဂအတွင်းရေးမှူးချုပ် အန်တိုနီယို ဂူတာရက်စ်ဟာ အံ့အားသင့်သွားတယ်လို့ ကုလသမဂ္ဂပြောရေးဆိုခွင့်ရှိသူ စတက်ဖနီထမ်းဘလေက စက်တင်ဘာ ၃၀ ရက်က သတင်းစာရှင်းလင်းပွဲမှာ ပြောကြားခဲ့ပါတယ်။ 

အင်္ဂါနေ့တုန်းက ကုလသမဂ္ဂ လူသားချင်း စာနာထောက်ထားမှု ဆိုင်ရာအကြီးအကဲ မာတင်ဂရစ်ဖစ်  ဟာ အစားအစာ၊ ဆေးဝါးအထောက်အပံ့နဲ့လောင်စာတွေကို လက်ရှိအာဏာလက်ကိုင်အစိုးရက ပိတ်ဆို့ထားတာကြောင့် အီသီယိုးပီးယားနိုင်ငံမြောက်ပိုင်း ထိဂရေးပြည်နယ်မှာ သိန်းနဲ့ချီတဲ့လူတွေ အငတ်ဘေးဖြစ်ပွားနေပြီလို့ သတိပေးပြောကြားခဲ့တာပါ။ 

အာဒစ်အဘာဘာအစိုးရက ဒါကိုလက်တုံ့ပြန်ပုံရပြီး သူတို့ရဲ့ပြည်တွင်းရေးကို ၀င်စွက်ဖက်နေတယ်လို့ ပြောပြီးတော့ ခုလိုနှင်ထုတ်ခံရတာဖြစ်ပါတယ်။ 

ကုလသမဂ္ဂအနေနဲ့ စားနပ်ရိက္ခာ၊ ဆေးဝါး၊ ရေနဲ့ သန့်ရှင်းရေးအထောက်အကူတွေ အပါအဝင် လူသားချင်းစာနာထောက်ထားမှုဆိုင်ရာ အကူအညီတွေကို မှီခိုနေတဲ့ အီသီယိုးပီးယား ပြည်သူတွေကို ကူညီနိုင်ဖို့ အခုဆိုရင် သက်ဆိုင်ရာကုလအဖွဲ့အစည်းတွေကို သူတို့ရဲ့ အရေးကြီး အလုပ်တွေ ဆက်လုပ်ခွင့်ပြုဖို့ မျှော်လင့်ပြီး အီသီယိုးပီးယား အစိုးရနဲ့ ဆွေးနွေးညှိနှိုင်းနေပါတယ် လို့ ကုလပြောခွင့်ရ ထမ်းဘလေက ပြောပါတယ်။

နှင်ထုတ်ခံရသူခုနစ်ဦးထဲမှာ ကုလသမဂ္ဂကလေးများရန်ပုံငွေအဖွဲ့ (UNICEF) ရဲ့ အကြီးအကဲတွေနဲ့ လူသားချင်းစာနာထောက်ထားမှုဆိုင်ရာ ညှိနှိုင်းဆောင်ရွက်ရေးရုံး (OCHA) တို့ပါဝင်ပါတယ်။ 

ထိဂရေးရှိအခြေအနေများအပေါ် နိုင်ငံတကာရဲ့ဝေဖန်မှုတွေ မြင့်တက်လာနေပြီး အီသီယိုးပီးယား မြောက်ပိုင်းမှာ တိုက်ပွဲဖြစ်နေကြတဲ့အဖွဲ့များအားလုံးဟာ အမေရိကန်အစိုးရရဲ့ ဒဏ်ခတ်ပိတ်ဆို့နိုင်ခြေတွေနဲ့ ရင်ဆိုင်နေရပါတယ်။  

4 months Ago

July 2, 2021

တီဂရေးသူပုန်များကို အီသီယိုးပီးယားအစိုးရက အပစ်ရပ်စဲရေး တိုက်တွန်း

အီသီယိုးပီးယားအစိုးရက တီဂရေးသူပုန်တွေကို အပစ်အခတ်ရပ်စဲရေးမှာ ပူးပေါင်းဖို့ တိုက်တွန်းထားတာကြောင့် ဇူလိုင် ၁ ရက်က တီဂရေးဒေသရှိလမ်းတွေမှာ လုံခြုံရေးတပ်ဖွဲ့တွေ ကင်းလှည့်နေကြပါတယ်။ 

အစိုးရက တစ်ဖက်သတ် အပစ်အခတ်ရပ်စဲရေး ကြေညာခဲ့ပေမဲ့ တီဂရေး ပြည်သူ့ လွတ်မြောက်ရေးတပ်ဦး TPLF က  ဟာသပြက်လုံး တစ်ခုလို ပယ်ချလိုက်ပြီး စစ်ရေးတိုက်ပွဲတွေ ဆက်ရှိနေပါတယ်။ 

အီသီယိုးပီးယားရဲ့ တီဂရေးဒေသအုပ်ချုပ်သူဟောင်းတွေဖြစ်တဲ့ TPLF ဟာ ရှစ်လနီးပါး တိုက်ပွဲတွေအပြီးမှာ ဒေသမြို့တော် မီကယ်လ်လီကို ပြန်ထိန်းချုပ်ထားလိုက်ပြီလို့ ဇွန် ၂၈ ရက်က ပြောခဲ့ပါတယ်။ 

ရှိုင်းယားနဲ့ တီဂရေးဒေသက တခြားမြို့အတော်များများကို တီဂရေးစစ်တပ်က ထိန်းချုပ်ထားပြီး အစိုးရနဲ့ မဟာမိတ်ဖွဲ့ထားတဲ့ အိမ်နီးချင်းအမ်ဟာရာ ဒေသကတပ်ဖွဲ့တွေကတော့ တီကီဇီမြစ်ရဲ့ တခြားဘက်ခြမ်းမှာရှိတဲ့ နယ်မြေကို ထိန်းချုပ်ထားပါတယ်။ 

မြောက်ပိုင်း ရှိုင်းယားမြို့အနီးရှိ တီကီဇီမြစ်ကူးတံတားတစ်စင်း ပျက်စီးသွားခဲ့တာကြောင့် စစ်ဘေးဒဏ်သင့်ဒေသကို အကူအညီတွေ ရောက်ရှိဖို့က အရင်ကထက် ပိုပြီးအတားအဆီးတွေ ရှိလိမ့်မယ်လို့ အပြည်ပြည်ဆိုင်ရာကယ်ဆယ်ရေးကော်မတီက ပြောကြားခဲ့ပါတယ်။

 အကူအညီပေးရေး အေဂျင်စီတွေဟာ ငတ်မွတ်ခေါင်းပါးမှုနဲ့ ရင်ဆိုင်နေရတဲ့ ရာနဲ့ထောင်နဲ့ ချီနေတဲ့လူတွေဆီကို ရောက်ဖို့ ကြိုးစားနေရတာပါ။ 

ဒေသတွင်းမှာ လျှပ်စစ်မီးနဲ့ ဖုန်းလိုင်း၊ အင်တာနက်လိုင်းတွေ ပြတ်တောက်နေတာကြောင့် အကူအညီပေးရေးအေဂျင်စီတွေဟာ အစားအစာနဲ့ တခြားအကူအညီတွေကို အလွန်အမင်း လိုအပ်နေသူတွေဆီ ရောက်နိုင်ဖို့ သူတို့လုပ်ပေးနိုင်စွမ်းတွေက အကန့်အသတ် ဖြစ်နေရပါတယ်။

မီကယ်လ်လီရှိဆေးရုံတွေမှာလည်း လျှပ်စစ်မီးပြတ်တောက်မှုကြောင့် မီးစက်တွေကို သုံးနေရတယ်လို့ အပြည်ပြည်ဆိုင်ရာကြက်ခြေနီကော်မတီမှ ပြောရေးဆိုခွင့်ရှိသူက  ပြောပါတယ်။

ကုလသမဂ္ဂကတော့ တီဂရေးရှိ အနည်းဆုံး လူပေါင်း ၃ သိန်းခွဲဟာ အစားအစာ ရှားပါးခြင်းနဲ့ ရင်ဆိုင်နေရတယ်လို့ ဇွန်လအစောပိုင်းက ပြောခဲ့ပြီး ပြီးခဲ့တဲ့အပတ်ကတော့ အရေအတွက် ၉ သိန်းလောက်ရှိလာပြီလို့ နိုင်ငံတကာဖွံ့ဖြိုးရေး ကုလအေဂျင်စီက ခန့်မှန်းထားပါတယ်။ 

7 months Ago
Up