အီရန်

January 30, 2023

အီရန်-တူရကီနယ်စပ်တွင် ပြင်းအား ၅ ဒသမ ၉ ရှိ ငလျင်လှုပ်ပြီး လူ ၂ ဦးထက်မနည်း သေဆုံး

အီရန်နိုင်ငံအနောက်မြောက်ပိုင်းက တူရကီနယ်စပ်အနီးမှာ ပြင်းအား ရစ်ချ်တာစကေး ၅ ဒသမ ၉ အဆင့်ရှိ ပြင်းထန်တဲ့ မြေငလျင်လှုပ်ခတ်မှုကြောင့် ဇန်နဝါရီ ၂၈ ရက်က လူ ၂ ဦးထက်မနည်း သေဆုံးခဲ့တယ်လို့ ပြည်ထဲရေးဝန်ကြီး အာမက်ဗာဟီဒီက ဇန်နဝါရီ ၂၉ ရက်မှာ အတည်ပြု ပြောပါတယ်။

နိုင်ငံပိုင်မီဒီယာကတော့ ဒီငလျင်လှုပ်လို့ လူပေါင်း ၃၀၀ ကျော် ထိခိုက်ဒဏ်ရာရရှိခဲ့တယ်လို့ သတင်းဖော်ပြထားပါတယ်။

အီရန်ပြည်ထဲရေးဝန်ကြီး အာမက်ဗာဟီဒီက ဒီဖြစ်ရပ်မှာ လူ ၂ ဦး သေဆုံးခဲ့တဲ့အပြင် နောက်တဦးလည်း ဦးနှောက်သွေးကြောပြတ်ကာ သေဆုံးခဲ့တာကြောင့် စုစုပေါင်း လူသေဆုံးမှု ၃ ဦးအထိရှိတယ်လို့ ဆိုပါတယ်။

ကျေးရွာပေါင်း ၇၀ မှာ ဒီလှုပ်ခတ်မှုကို သိသိသာသာ ခံစားခဲ့ရပြီး အပျက်အစီးပုံတွေအောက်မှာ နောက်ထပ် လူတွေပိတ်မိနေတာမျိုး မရှိဘူးလို့ ယုံကြည်ရကြောင်း ဗာဟီဒီက နိုင်ငံပိုင်ရုပ်သံကို ဖြေဆိုပါတယ်။

အရေးပေါ်ကယ်ဆယ်ရေး အရာရှိတဦးကလည်း ဆီးနှင်းတွေကျရောက်နေတဲ့ နယ်မြေဒေသတချို့မှာ အလွန်အေးခဲတဲ့ ရာသီဥတုနဲ့ ရင်ဆိုင်နေရပြီး လျှပ်စစ်ဓာတ်အား ပြတ်တောက်မှုတချို့ ရှိတယ်လို့လည်း နိုင်ငံပိုင်ရုပ်သံကို အစောပိုင်းမှာ ပြောထားပါတယ်။

ဘူမိဗေဒဆိုင်ရာ အဓိကပြတ်ရွေ့ကြောဟာ အီရန်နိုင်ငံမှာ ဖြတ်သန်းတည်ရှိနေတဲ့အတွက် မကြာသေးမီနှစ်တွေအတွင်း ငလျင်အများအပြား လှုပ်ခတ်ခဲ့ရာကနေ ကြီးမားတဲ့ ထိခိုက်ပျက်စီးမှုတွေကို ကြုံတွေ့ခံစားခဲ့ရပါတယ်။

1 week Ago

အီရန် လက်နက်ခဲယမ်းစက်ရုံ ဒရုန်းဖြင့် တိုက်ခိုက်ခံရ

အီရန်နိုင်ငံအလယ်ပိုင်း၊ အစ်ဖှာဟန်မြို့အနီးရှိ စစ်ဘက်ဆိုင်ရာ စက်ရုံတရုံမှာ ဇန်နဝါရီ ၂၉ ရက်က အမည်မသိ တိုက်ခိုက်ရေးသမားတွေက ဒရုန်းနဲ့ တိုက်ခိုက်ခဲ့လို့ ကျယ်လောင်တဲ့ပေါက်ကွဲမှု ဖြစ်ခဲ့တယ်လို့ အီရန်အစိုးရက ပြောပါတယ်။

ပေါက်ကွဲခဲ့တာ ခဲယမ်းစက်ရုံလို့ အီရန်ရဲ့တရားဝင်သတင်းအေဂျင်စီ IRNA က  ဖော်ပြခဲ့ပြီး စက်ရုံပေါက်ကွဲမှုကြောင့် ထိခိုက်မှုနည်းနည်းသာရှိခဲ့ကာ ဒဏ်ရာရ သေဆုံးသူ မရှိဘူးလို့ ကာကွယ်ရေးဝန်ကြီးဌာနက ပြောပါတယ်။ ပျက်စီးမှု အတိုင်းအတာကို သီးခြား အတည်မပြုနိုင်သေးသလို ပေါက်ကွဲမှုအတွက် ဘယ်သူ့မှာ တာဝန်ရှိလဲဆိုတာ ချက်ချင်းလက်ငင်း ထုတ်မပြောသေးပါဘူး။

သူရဲဘောကြောင်တဲ့ဒီတိုက်ခိုက်မှုဟာ အီရန်မှာ မလုံခြုံမှုကို ဖန်တီးဖို့ ရည်ရွယ်တယ်လို့ အီရန်နိုင်ငံခြားရေးဝန်ကြီး ဟူစိန် အမိယာအဗ်ဒူလာဟိန်က ရုပ်သံမိန့်ခွန်းမှာပြောပါတယ်။

“ဒီလိုလုပ်ရပ်တွေက ကျနော်တို့ရဲ့ ငြိမ်းချမ်းတဲ့ နျူးကလီးယားလုပ်ငန်းမှာ တိုးတက်ဖို့ ကျွမ်းကျင်သူတွေရဲ့ ဆုံးဖြတ်ချက်ကို သက်ရောက်မှုရှိမှာ မဟုတ်ပါဘူး။”

ဒေသစံတော်ချိန် စနေနေ့ည ၁၁ နာရီခွဲလောက်မှာ ဝန်ကြီးဌာနရဲ့ အလုပ်ရုံတွေထဲက တခုကို Micro Aerial Vehicles (MAVs) ကိုသုံးပြီး မအောင်မြင်တဲ့ တိုက်ခိုက်မှုတခု ဖြစ်ပွားခဲ့ပါတယ်လို့ ကာကွယ်ရေးဝန်ကြီးဌာနက နိုင်ငံပိုင်ရုပ်သံကနေ ကြေညာချက် ထုတ်လွှင့်ခဲ့ပါတယ်။

ဒရုန်းတစီး ပစ်ချခံရပြီး ကျန် နှစ်စီးကတော့ ကာကွယ်ရေး ထောင်ချောက်အတွင်း ပေါက်ကွဲသွားခဲ့တာပါ။ အလုပ်ရုံ အဆောက်အအုံရဲ့ ခေါင်မိုးကတော့ နည်းနည်း ပျက်စီးခဲ့ကာ ထိခိုက်ဒဏ်ရာရသူ မရှိခဲ့ဘူးလို့ ဆိုပါတယ်။

အီရန်အစိုးရရဲ့ နျူးကလီးယား အစီအစဉ်၊ ယူကရိန်းစစ်ပွဲအတွက် ရုရှားကို လက်နက်ထောက်ပံ့မှုနဲ့ ပြည်တွင်းမှာ လပေါင်းများစွာကြာအောင် အစိုးရဆန့်ကျင်ရေး ဆန္ဒပြမှုတွေအပေါ် အင်အားသုံး ချေမှုန်းခဲ့တာတွေနဲ့ ပတ်သက်ပြီး အနောက်နိုင်ငံတွေနဲ့ အီရန်အစိုးရ ဆက်ဆံရေး တင်းမာနေပါတယ်။

1 week Ago

January 27, 2023

အီရန်ရှိ အဇာဘိုင်ဂျန်သံရုံး ပစ်ခတ်ခံရပြီး လုံခြုံ‌ရေးအရာရှိ ၁ ဦးသေဆုံး၊ ၂ ဦးဒဏ်ရာရ

အီရန်နိုင်ငံရှိ၊ အဇာဘိုင်ဂျန်သံရုံးကို သေနတ်သမားတဦးက ပစ်ခတ်ခဲ့တာကြောင့် လုံခြုံရေးအရာရှိတဦး သေဆုံးပြီး ၂ ဦး ဒဏ်ရာရရှိခဲ့တယ်လို့ အဇာဘိုင်ဂျန် နိုင်ငံခြားရေးဝန်ကြီးဌာနက ဇန်နဝါရီ ၂၇ ရက်မှာ ပြောပါတယ်။

“တိုက်ခိုက်သူဟာ အစောင့်ဂိတ်စခန်းကို ဖောက်ထွင်းဝင်ရောက်ခဲ့ပြီး လုံခြုံရေးအကြီးအကဲကို ကလာ့ရှင်န်ကော့ဗ် ချေမှုန်းရေးရိုင်ဖယ်နဲ့ ပစ်သတ်ခဲ့ပါတယ်” လို့ ဆိုပါတယ်။

ဆိုရှယ်မီဒီယာမှာ မျှဝေထားတဲ့ ဗီဒီယိုဖိုင်မှာ သံရုံးအတွင်းက တံခါးတချပ် မှန်ကွဲနေပြီး ပျက်စီးသွားပုံတွေကို ပြသထားပါတယ်။

တီဟီရန်ရဲတပ်ဖွဲ့က သူတို့ဟာ သံသယရှိသူတဦးကို ဖမ်းဆီးထားပြီး တိုက်ခိုက်မှု နောက်ကွယ်က အကြောင်းရင်းကို စုံစမ်းစစ်ဆေးနေတယ်လို့ ပြောပါတယ်။

သံသယရှိသူဟာ ကလေး ၂ ဦးနဲ့အတူ သံရုံးထဲကို ဝင်လာတာဖြစ်ပြီး သူ့ရဲ့ ကိုယ်ရေးကိုယ်တာကိစ္စတွေရဲ့ လှုံ့ဆော်မှုကြောင့် ဖြစ်နိုင်ကြောင်း ရဲချုပ်ကိုကိုးကားပြီး Tasnim သတင်းဌာနက ဖော်ပြပါတယ်။

2 weeks Ago
More News
Up