အိန္ဒိယ-မြန်မာ

September 21, 2018

အိန္ဒိယ-မြန်မာနှစ်နိုင်ငံ အရပ်ဘက်အဖွဲ့များ တမူးမြို့တွင်ပထမဆုံးအကြိမ်တွေ့ဆုံ

အိန္ဒိယ-မြန်မာ နယ်စပ်နေ နှစ်နိုင်ငံ ပြည်သူတွေအတွက် ငြိမ်းချမ်းတဲ့ ဒေသဖြစ်စေဖို့၊ အတူတကွယှဉ်တွဲနေနိုင်ဖို့နဲ့ ချစ်ကြည်ရင်းနှီးမှု ခိုင်မာစေဖို့အတွက် ရည်ရွယ်ပြီး နှစ်နိုင်ငံ အရပ်ဘက်အဖွဲ့အစည်းတွေ တာဝန်ရှိသူတွေ  တမူးမြို့မှာ ဒီကနေ့ တွေ့ဆုံပါတယ်။ ဒီဆွေးနွေးပွဲကို ဦးဆောင်ကျင်းပတဲ့ တမူးလူငယ်ကွန်ရက်က ကိုအောင်သူချမ်းက “နယ်စပ်ဆိုပေမယ့် တမြေထဲမှာ နေတဲ့အတွက် တဖက်နဲ့တဖက် ပူးပေါင်းဆောင်ရွက်ဖို့နဲ့ ချစ်ကြည်ရင်းနှီးစွာ နေထိုင်ကြဖို့က အဓိကရည်ရွယ်ချက်တွေပါ။  တမူးမှာ ပထမဆုံး ကျင်းပပြီး နောက်လည်းဆက်ပြီး သူတို့ဘက်မှာလည်း ကျင်းပမယ်၊ ကျနော်တို့ဘက်ကလည်း ကျင်းပမယ်ဆိုရင် နှစ်နိုင်ငံ ရင်းနှီးမှုတွေရလာမယ်၊ လူငယ်များ မူးယစ်ဆေးဝါးပြဿနာနဲ့ အခြားလူမှုပြဿနာတွေ အဖြေရှာဆောင်ရွက်ကြမယ်” လို့ ပြောပါတယ်။ ဒါ့အပြင် စက်တင်ဘာ ၁၇ ရက်နေ့က အိန္ဒိယ-မြန်​မာနယ်​စပ်​ အမှတ် ၁ ဂိတ်​နဲ့ ၂ ဂိတ်​အကြား ပဲတန်းပေါက်အနီး ခိုက်​ရန်​ဖြစ်​ပွားခဲ့တဲ့ကိစ္စနဲ့ ပတ်သက်ပြီးလည်း ဒီကိစ္စဟာ လူနှစ်ယောက်ရဲ့ ပြဿနာသာ ဖြစ်ပြီး နိုင်ငံနှစ်နိုင်ငံရဲ့ ပြဿနာမဟုတ်ဘူးလို့လည်း ဆွေးနွေးပွဲ တက်ရောက်လာသူတွေက ပြောပါတယ်။ အိန္ဒိယအရပ်ဘက်အဖွဲ့အစည်းဝင် မိုဟန်က “အဲ့ဒီပြဿနာကို နိုင်ငံပြဿနာလို့ ယူဆကြပါနဲ့၊ အဲဒီပြဿနာနဲ့ ပတ်သက်လို့ ကျနော်တို့စိတ်ထဲမှာ ဘာမှမရှိဘူးဆိုတာကို ကျနော်တို့ပြတယ်။ နောက်ထပ်ဘာအကူအညီရှိရင်လည်း ကျနော်တို့ကိုပြောပါ။ ကျနော်တို့ လုပ်ပေးမယ်။ ဒီဘက်ကကြိုဆိုမှုအတွက်လည်း ကျနော်တို့ သိပ်ဝမ်းသာတယ်။ ဒါဟာ သမိုင်းမှာ အဖွဲ့အစည်းနှစ်ခု ပထမဆုံးတွေ့ဆုံပွဲဖြစ်တဲ့အတွက် သိပ်ဝမ်းသာပါတယ်'' လို့ပြောပါတယ်။ ဒီကနေ့ တွေ့ဆုံပွဲကို တမူးအရပ်​ဘက်​အဖွဲ့အစည်း ၃၅ ဖွဲ့နဲ့ မိုရေးအရပ်​ဘက်​အဖွဲ့အစည်း ၅ ဖွဲ့ တက်​​ရောက်​ခဲ့ပြီး ဖိတ်ကြားထားသူ သူဦးရေ ၂၀၀  လောက်တက်​​ရောက်​ခဲ့ကြပါတယ်။
3 years Ago

March 26, 2018

အိန္ဒိယ-မြန်မာရေတပ်ပူးတွဲစစ်ရေးလေ့ကျင့်

အိန္ဒိယနဲ့ မြန်မာနှစ်နိုင်ငံ ရေတပ်ပူးတွဲစစ်ရေးလေ့ကျင့်ဖို့အတွက် မြန်မာရေတပ်မတော်က ဆင်ဖြူရှင်စစ်သင်္ဘောနဲ့ အင်းလေးစစ်သင်္ဘောတို့ အိန္ဒိယနိုင်ငံ ဗီဆတ်ဟာပတ်နမ်ဆိပ်ကိမ်းမှာ ရောက်ရှိနေပါတယ်။ ၂၀၁၈ အိန္ဒိယ-မြန်မာရေတပ်လေ့ကျင့်မှု IMNEX-18ကို နှစ်နိုင်ငံ ပူးပေါင်းဆောင်ရွက်မှု တိုးမြှင့်ဆောင်ရွက်ဖို့ ရည်ရွယ်တာဖြစ်ပြီး  စစ်ရေးလေ့ကျင့်မှုကိုကဏ္ဍ နှစ်ခုခွဲပြုလုပ်မှာဖြစ်တယ်လို့ အိန္ဒိယရေတပ်က သတင်းထုတ်ပြန်ပါတယ်။ မတ်လ ၂၅ရက်ကနေ ၃၀ ရက်အထိ ဆိပ်ကမ်းမှာပူးတွဲလေ့ကျင့်မှာဖြစ်ပြီး မတ်လ ၃၁ရက်ကနေ ဧပြီ ၃ရက်အထိတော့ ပင်လယ်ထဲမှာ နှစ်နိုင်ငံ ရေတပ်ပူးတွဲ စစ်ရေးလေ့ကျင့်မှု ပြုလုပ်မှာ ဖြစ်ပါတယ်။ ဒီစစ်ရေးလေ့ကျင့်မှုမှာ  အိန္ဒိယစစ်သင်္ဘောတွေဖြစ်တဲ့ Sahyadri နဲ့  Kamorta တို့ အပြင် ရဟတ်ယာဉ်၊ ဂျက်လေယာဉ်နဲ့ ရေငုပ်သင်္ဘောတွေလည်း ပါဝင်မှာဖြစ်တယ်လို့ သိရပါတယ်။ ဓာတ်ပုံ-India Navy
3 years Ago
Up